« បងប្អូនមានចំណែក » លីអាហូណា ខែ មីនា ឆ្នាំ ២០២៤ ។
យុវមជ្ឈិមវ័យ
បងប្អូនមានចំណែក
យើងអាចរកឃើញអារម្មណ៍នៃការមានចំណែករបស់យើង នៅពេលយើងអភិវឌ្ឍទំនាក់ទំនងដ៏មានអត្ថន័យជាមួយព្រះវរបិតាសួគ៌ និងព្រះយេស៊ូវគ្រីស្ទ ។
ព័ត៌មានលម្អិតមកពី កម្រិតនៃសិរីរុងរឿង ដោយ អានី ហែនរី ណេឌើរ
យើងម្នាក់ៗបានកើតមកដោយមានតម្រូវការការមានចំណែកពីកំណើត ។ ពីធម្មជាតិមក យើងចង់មានការរួមចំណែកនៅក្នុងទំនាក់ទំនងរបស់យើងជាមួយនឹងក្រុមគ្រួសារ មិត្តភក្តិ អ្នកធ្វើការជាមួយ វួដ និងមនុស្សដទៃទៀតនៅក្នុងជីវិតរបស់យើង ។ ដួងចិត្តរបស់យើងហាក់ដូចជាមាននូវការរួមចំណែកដ៏ទេវភាពទាំងនេះ សម្រាប់តម្រូវការដ៏ជ្រាលជ្រៅ និងខ្ជាប់ខ្ជួនមួយ ។
បងប្អូន និងខ្ញុំជា—ហើយនៅតែ—ជាផ្នែកមួយនៃគ្រួសារដ៏អស់កល្បជានិច្ចជាមួយនឹងព្រះវរបិតាសួគ៌របស់យើង តាំងពីមុនពេលយើងមកដល់ផែនដីនេះទៅទៀត ។ ព្រះគម្ពីរពិពណ៌នាយើងថាជា « អ្នកដទៃ និងជាអ្នកសំណាក់នៅលើផែនដីប៉ុណ្ណោះ » ( ហេព្រើរ ១១:១៣; គោលលទ្ធិ និងសេចក្តីសញ្ញា ៤៥:១៣ ) ។ នៅក្នុងការចាកចេញពីផ្ទះនៅស្ថានសួគ៌របស់យើង ហើយមកដល់ពិភពមួយដែលពោរពេញទៅដោយការច្របូកច្របល់ ភាពឯកោ និងការឈឺចាប់ យើងអាចមានអារម្មណ៍ដូចជាអ្នកដើរវង្វេងដោយទន្ទឹងរង់ចាំការត្រឡប់ទៅផ្ទះ និងទំនាក់ទំនងដ៏អស់កល្បជានិច្ចរបស់យើង ។
ប្រសិនបើបងប្អូនធ្លាប់មានអារម្មណ៍ថានឹកផ្ទះនៅស្ថានសួគ៌បន្តិច ប្រហែលជាដោយសារតែផ្ទះ និងអត្តសញ្ញាណពិតរបស់យើងត្រូវបានចងភ្ជាប់ទៅនឹងព្រះវរបិតាសួគ៌ និងព្រះអង្គសង្គ្រោះរបស់យើងគឺ ព្រះយេស៊ូវគ្រីស្ទ ។ នេះជាមូលហេតុដែលវាមានសារៈសំខាន់ខ្លាំង នៅក្នុងការមានទំនាក់ទំនងដ៏ស៊ីជម្រៅជាមួយទ្រង់ទាំងទ្វេ ។ នៅពេលយើងភ្ជាប់ជាមួយនឹងទ្រង់ទាំងទ្វេតាមរយៈទំនាក់ទំនងនៃសេចក្ដីសញ្ញារបស់យើង នោះយើងនឹងរកឃើញនូវអារម្មណ៍ពិតនៃការមានចំណែក ដែលវិញ្ញាណរបស់យើងទន្ទឹងចង់បាន ។
ទំនាក់ទំនងនៃសេចក្តីសញ្ញារបស់យើងជាមួយព្រះ
សកម្មភាព និងគំនិតរបស់យើងឆ្លុះបញ្ចាំងអំពីទំនាក់ទំនងដែលយើងឲ្យតម្លៃ ។ វាដូចគ្នានឹងទំនាក់ទំនងនៃសេចក្ដីសញ្ញារបស់យើងជាមួយនឹងព្រះវរបិតាសួគ៌ និងព្រះអង្គសង្រ្គោះរបស់យើងដែរ ។
នៅពេលយើងឲ្យតម្លៃលើទំនាក់ទំនងនៃសេចក្ដីសញ្ញារបស់យើងជាមួយនឹងព្រះ នោះអ្វីៗគ្រប់យ៉ាងនឹងផ្លាស់ប្ដូរ ។ ជំនួសឲ្យការទទួលឥទ្ធិពលពីពិភពលោកនេះ យើងទទួលបានឥទ្ធិពលពីទ្រង់ ហើយក្លាយដូចជាទ្រង់កាន់តែខ្លាំងឡើង ។ ជីវិតរបស់យើងចាប់ផ្ដើមមានអត្ថន័យកាន់តែច្រើន ព្រមទាំងស្ថេរភាព និងអំណាចខាងវិញ្ញាណ ។ ភ្លាមៗនោះ « ការមានចំណែក » កើនលើសពីអ្វីដែលយើងគិតថាជាអត្ថន័យនៃ « ការមានចំណែក » នៅក្នុងពិភពនៃជីវិតរមែងស្លាប់នេះ ។
នៅពេលដែលទំនាក់ទំនងនៃសេចក្ដីសញ្ញាជាមួយនឹងព្រះមានអាទិភាពមុនគេ នោះការរំខានដែលគ្មានន័យនៃពិភពលោកនេះបាត់បង់ការក្តោបក្តាប់របស់វា ហើយយើងរកឃើញនូវសេចក្ដីសុខសាន្តផ្ទាល់ខ្លួនពិតប្រាកដ និងការមានចំណែក ។ នៅក្នុងពិភពមួយដែលជាញឹកញាប់មិនផ្តល់នូវអ្វីៗដោយឥតគិតថ្លៃ នោះព្រះវរបិតាសួគ៌របស់យើងបានប្រទានពរជ័យនៃសេចក្ដីសញ្ញារបស់ទ្រង់ដោយសេចក្ដីស្រឡាញ់ ដោយមិនគិតពីស្ថានភាពរបស់យើងនៅក្នុងពិភពលោកនេះឡើយ ( សូមមើល នីហ្វៃទី២ ៩:៥០–៥១ ) ។
ប្រធាន រ័សុល អិម ណិលសុន បានបង្រៀនយ៉ាងឥតខ្ចោះថា « ពេលយើងចុះសេចក្តីសញ្ញាជាមួយព្រះ នោះយើងពុំនៅលើដីអព្យាក្រឹតទៀតឡើយ ។ ព្រះនឹងមិនបោះបង់ចោលទំនាក់ទំនងរបស់ទ្រង់ជាមួយអស់អ្នកដែលបានបង្កើតចំណងមិត្តភាពបែបនោះជាមួយទ្រង់ឡើយ ។ តាមពិត អស់អ្នកទាំងឡាយណាដែលបានចុះសេចក្តីសញ្ញាជាមួយព្រះ អាចទទួលបានសេចក្តីស្រឡាញ់ និងសេចក្តីមេត្តាករុណាដ៏ពិសេសមួយ » ។១
យើងកំណត់ថា តើយើងមានទំនាក់ទំនងយ៉ាងជិតស្និទ្ធជាមួយព្រះដែរឬទេ—ទ្រង់តែងតែខ្ជាប់ខ្ជួនចំពោះយើង ប៉ុន្តែយើងត្រូវតែជ្រើសរើសឲ្យមានការខ្ជាប់ខ្ជួនចំពោះទ្រង់ ។ ហើយជម្រើសដ៏ទេវភាពនោះគឺមានទាំងការពង្រឹងអំណាច និងការដោះលែង ! ជម្រើសនេះធ្វើឲ្យយើងមានសេរីភាពពីទស្សនៈខុសឆ្គងអំពីខ្លួនយើងថាជានរណា និងពីច្រវ៉ាក់ដែលមានកម្រិតនៃការរំពឹងទុករបស់ពិភពលោកនេះ ។
ហើយនៅពេលយើងរកឃើញការមានចំណែកជាមួយនឹងព្រះវរបិតាសួគ៌របស់យើង នោះយើងអាចមើលទៅខាងក្រៅ ហើយមើលអ្នកដទៃដូចទ្រង់ទតឃើញដែរ ។ ពេលខ្ញុំយល់ពីអារម្មណ៍របស់ទ្រង់មានចំពោះខ្ញុំ ខ្ញុំយល់កាន់តែច្បាស់ពីអារម្មណ៍របស់ទ្រង់មានចំពោះបងប្អូន ហើយសមត្ថភាព និងបំណងប្រាថ្នារបស់ខ្ញុំដើម្បីឈោងទៅជួយ និងប្រមូលអ្នកដទៃ មានកាន់តែរឹងមាំឡើង ។
រូបភាពនៃព្រះវិហារបរិសុទ្ធ ណៅវូ នៅពេលព្រះអាទិត្យលិច ដោយ ម៉ាក្ស ឌី វីវើរ
សេចក្តីសញ្ញាបើកសោនៃពរជ័យ
ព្រះវរបិតាសួគ៌ និងព្រះយេស៊ូវគ្រីស្ទប្រាថ្នាឲ្យយើងចុះសេចក្ដីសញ្ញាជាមួយទ្រង់ទាំងទ្វេ ដើម្បីឲ្យទ្រង់ទាំងទ្វេអាចប្រទានពរដល់យើងតាមរបៀបដែលយើងត្រូវការ និងផ្លាស់ប្ដូរយើងតាមរបៀបដែលនឹងអនុញ្ញាតឲ្យយើងត្រឡប់ទៅកាន់វត្តមានរបស់ទ្រង់ទាំងទ្វេវិញ ។
ខ្ញុំសូមអញ្ជើញបងប្អូនឲ្យទៅកាន់ព្រះដំណាក់របស់ព្រះអម្ចាស់ឲ្យបានញឹកញាប់តាមដែលបងប្អូនអាចធ្វើបាន ។ ពេលខ្ញុំប្តេជ្ញាចិត្តទៅជាញឹកញាប់ និងដោយចេតនា នោះខ្ញុំទទួលបានការធូរស្បើយពីលោកិយ ហើយគំនិត និងធម្មជាតិរបស់ខ្ញុំត្រូវបានលើកឡើងផងដែរ ។
តាមរយៈការរក្សាសេចក្ដីសញ្ញារបស់យើង នោះយើងទទួលបានអំណាចបព្វជិតភាពដែលអាចបើកសោនូវពរជ័យនៃដង្វាយធួនរបស់ព្រះអង្គសង្គ្រោះនៅក្នុងជីវិតរបស់យើង ។ ពរជ័យទាំងនោះរួមមានការព្យាបាល ការណែនាំ ការការពារ ជំនួយ កម្លាំង សេចក្ដីសុខសាន្ដ ទស្សនវិស័យ និងអំណរ ។ ព្រះវរបិតាសួគ៌មានបំណងប្រទានពរដល់យើងនូវអ្វីៗទាំងអស់នេះ តាមរយៈទំនាក់ទំនងនៃសេចក្ដីសញ្ញារបស់យើង ។
ប្រសិនបើបងប្អូនមិនទាន់បានទទួលពរជ័យពីព្រះវិហារបរិសុទ្ធនៅឡើយទេ ខ្ញុំសូមអញ្ជើញបងប្អូនឲ្យសិក្សាអំពីពរជ័យនៃព្រះវិហារបរិសុទ្ធ អំណាចបព្វជិតភាព សេចក្ដីសញ្ញា និងអ្វីដែលព្រះប្រាថ្នាចង់បានសម្រាប់បងប្អូន ។ សូមកុំបង្អង់ដើម្បីទទួលបានការធូរស្រាល អំណាច និងជំនួយដ៏ពេញដោយសេចក្តីស្រឡាញ់ពីព្រះអង្គឡើយ ។
ប្រធាន ណិលសុន បានមានប្រសាសន៍ ៖
« ខ្ញុំនឹងជំរុញទឹកចិត្តក្មួយថា កុំឲ្យរង់ចាំរហូតដល់អាពាហ៍ពិពាហ៍កើតឡើងនៅក្នុងដំណាក់នៃព្រះអម្ចាស់ឡើយ ។ សូមចាប់ផ្ដើមឥឡូវនេះដើម្បីរៀនសូត្រ និងដកពិសោធន៍នូវអត្ថន័យនៃការបំពាក់ដោយអំណាចបព្វជិតភាព ។
« ហើយចំពោះក្មួយម្នាក់ៗដែលបានធ្វើសេចក្ដីសញ្ញាក្នុងព្រះវិហារបរិសុទ្ធ ខ្ញុំសូមអង្វរក្មួយឲ្យខិតខំខ្នះខ្នែង—ប្រកបដោយការអធិស្ឋាន និងដោយខ្ជាប់ខ្ជួន—យល់ដឹងពីសេចក្ដីសញ្ញា និងពិធីបរិសុទ្ធទាំងឡាយក្នុងព្រះវិហារបរិសុទ្ធ ។ ទ្វារខាងវិញ្ញាណនឹងបើកឡើង ។ ក្មួយៗនឹងរៀនអំពីរបៀបបើកវាំងននដែលខណ្ឌចែករវាងស្ថានសួគ៌ និងផែនដី អំពីរបៀបទូលសូមពួកទេវតារបស់ព្រះឲ្យជួយដល់ក្មួយ និងអំពីរបៀបទទួលការដឹកនាំមកពីស្ថានសួគ៌ឲ្យបានកាន់តែប្រសើរឡើង ។ ការខិតខំដ៏ឧស្សាហ៍ព្យាយាមរបស់ក្មួយដើម្បីធ្វើកិច្ចការនេះនឹងពង្រឹង និងផ្ដល់កម្លាំងដល់គ្រឹះខាងវិញ្ញាណរបស់ក្មួយៗ » ។២
ការមានចំណែកតាមរយៈការប្រែចិត្ដ
ការប្រែចិត្ដឥតឈប់ឈរគឺជាវិធីដ៏ល្អអស្ចារ្យ និងមានឥទ្ធិពលមួយទៀតដើម្បីនៅជិតស្និទ្ធនឹងព្រះវរបិតាសួគ៌ និងព្រះយេស៊ូវគ្រីស្ទ ។ ជាញឹកញាប់យើងជឿខុសថា ប្រសិនបើយើងកំពុងប្រែចិត្តច្រើន នោះយើងប្រាកដជានៅឆ្ងាយពីទ្រង់ទាំងទ្វេហើយ ។ ប៉ុន្តែ វាមិនពិតនោះទេ !
ការប្រែចិត្ដមិនបានធ្វើឲ្យបងប្អូនចេញឆ្ងាយពីទ្រង់ទាំងទ្វេនោះទេ—ការប្រែចិត្តនាំបងប្អូនទៅកាន់តែជិតនឹងទ្រង់ទាំងទ្វេ !
បងប្អូនអាចរកឃើញការមានចំណែកកាន់តែខ្លាំង និងទំនាក់ទំនងកាន់តែជ្រាលជ្រៅជាមួយទ្រង់ទាំងទ្វេតាមរយៈការខិតខំរបស់បងប្អូន ដើម្បីបែរទៅរកទ្រង់ទាំងទ្វេដើម្បីបានជំនួយ និងទទួលបានការអភ័យទោស ។
យើងម្នាក់ៗប្រហែលជាមានអារម្មណ៍ថា នៅឆ្ងាយពីភាពល្អឥតខ្ចោះជាងអ្វីដែលយើងចង់បាន ប៉ុន្តែខ្ញុំគិតថា ព្រះវរបិតាសួគ៌មិនមានការព្រួយបារម្ភអំពីរឿងនោះ ដូចដែលទ្រង់មានការព្រួយបារម្ភអំពីបំណងប្រាថ្នា និងការខិតខំរបស់យើងដើម្បីសាកល្បងម្តងទៀតនោះទេ ។ ទ្រង់ស្រឡាញ់យើង ទ្រង់ដឹងថា យើងកំពុងធ្វើដំណើរទៅកន្លែងណា ហើយទ្រង់នឹងដឹកនាំយើងទៅដោយក្ដីស្រឡាញ់ ។
ការទទួលស្គាល់ភាពទន់ខ្សោយ និងកំហុសរបស់យើងតម្រូវឲ្យមានភាពងាយឈឺចាប់ ប៉ុន្តែដោយការប្រែចិត្ត យើងសូមយាងព្រះវរបិតាសួគ៌ឲ្យគង់នៅជិតផ្នែកដែលងាយឈឺចាប់របស់យើងនោះ ។ ទីតាំងនៅជិតនោះហើយដែលអនុញ្ញាតឲ្យទ្រង់ពង្រីកសេចក្ដីស្រឡាញ់ដ៏ធំធេងរបស់ទ្រង់មកដល់យើង និងផ្តល់នូវការព្យាបាល ការអភ័យទោស និងសុវត្ថិភាពដែលយើងត្រូវការ ។ វាគឺនៅក្នុងការភ្ជាប់នេះទៅនឹងព្រះដែលយើងអភិវឌ្ឍការទុកចិត្ត និងស្វែងរកការលើកទឹកចិត្ត និងការមានចំណែកពិត ។
ការបង្កបង្កើត ដោយ អានី ហែនរី ណេឌើរ
ការស្វែងរកទស្សនវិស្ស័យដែលខ្ពស់ជាង
ទស្សនវិស័យរបស់យើងអាចរួមចំណែកទៅដល់អារម្មណ៍របស់យើងអំពីការមានចំណែកនៅក្នុងសាសនាចក្ររបស់ព្រះអម្ចាស់ ។ យើងអាចជ្រើសរើសយកទស្សនវិស័យដែលថា ទង្វើរបស់យើងផ្ទាល់អាចជួយដល់វួដរបស់យើង សមាគមសង្គ្រោះរបស់យើង ឬកូរ៉ុមអែលឌើររបស់យើងឲ្យក្លាយជាកន្លែងដ៏ជាទីស្រឡាញ់មួយដើម្បីមានចំណែក ។ ការខំខ្នះខ្នែងជួយដល់អ្នកដទៃពិតជាបង្កើនអារម្មណ៍ផ្ទាល់ខ្លួនរបស់យើងអំពីការមានចំណែក ។
ពីព្រោះបងប្អូនជាបុត្ររបស់ព្រះ នោះបងប្អូនមានចំណែក—មិនថាបងប្អូនឯទៀតយល់ឃើញពីបងប្អូន ឬរបៀបដែលបងប្អូនយល់ឃើញពីខ្លួនឯងយ៉ាងណានោះទេ ។ ផែនការសុភមង្គលរបស់ព្រះវរបិតាគឺមានន័យចំពោះ បងប្អូន ហើយបងប្អូនមានតួនាទីសំខាន់នៅក្នុងការដើរតាមតួនាទីនោះ ។ បងប្អូនរាល់គ្នាមានសមត្ថភាពក្នុងការរួមចំណែក និងមានចំណែកយ៉ាងពិសេសចំពោះសាសនាចក្ររបស់ព្រះ មិនថាឋានៈ អាពាហ៍ពិពាហ៍ ការអប់រំ ឬសាវតារបស់បងប្អូនយ៉ាងណានោះទេ ។
គំនិតមួយដែលបានកើតឡើងម្តងហើយម្តងទៀតនៅក្នុងគំនិតរបស់ខ្ញុំ គឺថាពាក្យ « យុវមជ្ឈិមវ័យនៅលីវ » « យុវមជ្ឈិមវ័យ » និង « មជ្ឈិមវ័យនៅលីវ » គឺមិនមែនជាបងប្អូនពិតនោះទេ ។ ទាំងនេះគឺជាពាក្យអត្រានុកូសាស្រ្តដែលជួយពិពណ៌នាអំពីអាយុ និងស្ថានភាពអាពាហ៍ពិពាហ៍ ប៉ុន្តែទាំងនោះមិនមែនពិពណ៌នាគ្រប់ជ្រុងជ្រោយអំពីអត្តសញ្ញាណ គោលបំណង និងសមត្ថភាពដ៏អស់កល្បជានិច្ចពិតប្រាកដនោះទេ ។
ស្លាក ឬការប្រៀបធៀបអាចកំណត់អំពីរបៀបដែលយើងឃើញខ្លួនយើង និងតម្លៃ និងសក្តានុពលរបស់យើងនៅក្នុងនគរនៃព្រះ ។ ការពិតគឺថា បងប្អូនគឺជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ បងប្អូនបានចុះសេចក្ដីសញ្ញាថ្មីជាមួយនឹងព្រះ ។ បងប្អូនមានសិទ្ធិអំណាចបព្វជិតភាពរបស់ទ្រង់ ។ បងប្អូនជាសមាជិកនៃសមាគមសង្គ្រោះ ឬកូរ៉ុមអែលឌើរ ។ ដូចប្រធាន ណិលសុន បានបង្រៀនថា ដំបូងបងប្អូនគឺជាបុត្ររបស់របស់ព្រះ ជាបុត្រនៃសេចក្តីសញ្ញា និងជាសិស្សរបស់ព្រះយេស៊ូវគ្រីស្ទ ។ នោះគឺជាបងប្អូនពិតប្រាកដជាដំបូង និងសំខាន់បំផុត ហើយនោះគឺជាអ្វីដែលនឹង « ដឹកនាំបងប្អូនឆ្ពោះទៅរកជីវិតដ៏អស់កល្បជានិច្ចនៅក្នុងនគរសេឡេស្ទាលនៃព្រះ » ។៣
ដំណឹងល្អត្រូវបានស្តារឡើងវិញតាមរយៈព្យាការីដែលមានអាយុជាយុវមជ្ឈិមវ័យ—យ៉ូសែប ស្ម៊ីធ ។ នោះគឺជាគំនិតដ៏មានឥទ្ធិពលមួយដែលត្រូវគិតពិចារណា ។ ព្រះវរបិតាសួគ៌ និងព្រះយេស៊ូវគ្រីស្ទបានប្រគល់ឲ្យព្យាការី និងសហការីរបស់លោកនៅអាយុនោះដើម្បីស្ដារសាសនាចក្រឡើងវិញ ។ ព្រះក៏ទុកចិត្តបងប្អូនឲ្យក្លាយជាផ្នែកមួយនៃកិច្ចការដ៏អស្ចារ្យនេះនៅថ្ងៃចុងក្រោយនេះផងដែរ ។
បើចង់ដឹងថាបងប្អូនគឺជានរណា ហើយថាបងប្អូនជាមនុស្សជាទីស្រឡាញ់ និងមានតម្លៃឬអត់ សូមសួរព្រះវរបិតារបស់បងប្អូននៅស្ថានសួគ៌ ។ ទ្រង់នឹងប្រាប់បងប្អូនជានិច្ចនូវសេចក្ដីពិតអំពីបងប្អូន ។ ទ្រង់នឹងជួយបងប្អូនឲ្យមើលឃើញខ្លួនឯងដូចដែលទ្រង់ទតឃើញបងប្អូន—ជាមួយនឹងសមត្ថភាព និងសេចក្ដីស្រឡាញ់យ៉ាងអស្ចារ្យ ។ ទ្រង់អាចដឹកនាំបងប្អូនឲ្យមានឱកាស និងការរីកចម្រើនដ៏អស្ចារ្យដែលបងប្អូនមិនអាចនឹកស្មានបាន !
សូមឲ្យយើងទាំងអស់គ្នាមានភ្នែកមើលឃើញគ្នាទៅវិញទៅមក ហើយមិនមែនមើលតាមរយៈកញ្ចក់នៃអាយុ ឬស្ថានភាពអាពាហ៍ពិពាហ៍នោះទេ ប៉ុន្តែតាមរយៈកញ្ចក់បង្រួបបង្រួមនៃអ្នករក្សាសេចក្ដីសញ្ញា សិស្សរបស់ព្រះយេស៊ូវគ្រីស្ទ មិត្តភក្តិ បងប្អូនប្រុសស្រី និងបុត្រាបុត្រីរបស់ព្រះ ។ ហើយនៅក្នុងតួនាទី និងទំនាក់ទំនងដ៏អស់កល្បជានិច្ចនោះ យើងនឹងរកឃើញនូវអារម្មណ៍ដ៏ខ្ពស់បំផុត និងពិតប្រាកដបំផុតនៃការមានចំណែក ។