« ខ្ញុំបានដឹងថាខ្ញុំត្រូវបានការពារ » លីអាហូណា ខែ មីនា ឆ្នាំ ២០២៤ ។
សំឡេងពួកបរិសុទ្ធថ្ងៃចុងក្រោយ
ខ្ញុំបានដឹងថាខ្ញុំត្រូវបានការពារ
សង្គ្រាមបានកើតឡើងនៅខាងក្រៅ ប៉ុន្តែនៅពេលខ្ញុំអានព្រះគម្ពីរមរមន ខ្ញុំមានអារម្មណ៍សុខសាន្ត ហើយមិនខ្លាចឡើយ ។
ឆ្នាំ ១៩៩២ សង្គ្រាមយូហ្គោស្លាវីបានផ្ទុះឡើង ។ ទីក្រុងម៉ូសតារបស់យើងត្រូវបានគេទម្លាក់គ្រាប់បែកជារៀងរាល់ថ្ងៃ ។ សេវាសាធារណៈទាំងអស់ត្រូវបានផ្អាក រួមទាំងសេវាប្រៃសណីយ៍ផងដែរ ។
ទោះជាយ៉ាងណាក៏ដោយ នៅថ្ងៃទី ១ ខែ មេសា មានគេគោះទ្វាររបស់ខ្ញុំ ។ ពេលខ្ញុំបើកទ្វារ មានបុរសម្នាក់ដែលខ្ញុំមិនធ្លាប់ឃើញបានហុចកញ្ចប់មួយពីកូនស្រីរបស់ខ្ញុំឲ្យខ្ញុំ ដែលនាងរស់នៅក្នុងទីក្រុងម៉ាឡាហ្គា ប្រទេសអេស្ប៉ាញ ជាកន្លែងដែលនាងបានចូលរួមក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ នៅក្នុងកញ្ចប់នោះ មានព្រះគម្ពីរមរមនមួយក្បាល ។
ខ្ញុំបានចាប់ផ្ដើមអានព្រះគម្ពីរនោះនាថ្ងៃនោះតែម្តង ។ សង្គ្រាមបានកើតឡើងនៅខាងក្រៅ ប៉ុន្តែនៅពេលខ្ញុំអាន ខ្ញុំមានអារម្មណ៍សុខសាន្ត ហើយមិនខ្លាចឡើយ ។ ក្រោយមក ខ្ញុំបានដឹងថា សេចក្ដីសុខសាន្តដែលខ្ញុំមានគឺជាព្រះវិញ្ញាណបរិសុទ្ធ ។ ខ្ញុំដឹងថា ខ្ញុំត្រូវបានការពារ ហើយនឹងមិនស្លាប់ទេ ។
ពេលខ្ញុំអាន ខ្ញុំបានរៀនអំពីព្រះយេស៊ូវគ្រីស្ទ ហើយថាទ្រង់នៅមានព្រះជន្មរស់នៅឡើយ ។ ខ្ញុំបានរៀនអំពីពិធីបុណ្យជ្រមុជទឹក និងសាសនាចក្ររបស់ព្រះអង្គសង្គ្រោះ ។ ខ្ញុំមានអារម្មណ៍ថា អ្វីៗដែលខ្ញុំបានអានគឺពិត ។ ពីពេលមួយទៅពេលមួយ កូនស្រីរបស់ខ្ញុំឆ្លើយសំណួររបស់ខ្ញុំ ។
នៅពេលស្វាមីខ្ញុំស្លាប់ក្នុងឆ្នាំ ២០១៩ ខ្ញុំបានសម្រេចចិត្តទៅសហរដ្ឋអាមេរិក កន្លែងដែលកូនស្រីខ្ញុំរស់នៅសព្វថ្ងៃនេះ ។ ខ្ញុំចង់ជួបនាង ហើយរៀនបន្ថែមទៀតអំពីសាសនាចក្រដែលបានស្ដារឡើងវិញ ។
ខ្ញុំស្នាក់នៅទីក្រុង សលត៍ លេក រដ្ឋ យូថាហ៍ អស់រយៈពេលបួនខែកន្លះ ។ ខ្ញុំទៅព្រះវិហារជារៀងរាល់សប្តាហ៍ជាមួយកូនស្រីរបស់ខ្ញុំ ។ ខ្ញុំមានអារម្មណ៍មួយដែលខ្ញុំមិនអាចពិពណ៌នាបាន ។ ខ្ញុំបានរៀនជាមួយនឹងអ្នកផ្សព្វផ្សាយសាសនា ។ ខ្ញុំដឹងថា រឿងទាំងអស់នោះគឺពិត ។ ខ្ញុំបានមានបទពិសោធន៏ដ៏អស្ចារ្យមួយក្នុងជីវិតរបស់ខ្ញុំ នៅពេលខ្ញុំចូលទៅក្នុងទឹកនៃពិធីបុណ្យជ្រមុជទឹក ហើយត្រូវបានបញ្ជាក់ថាជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនៅ ថ្ងៃទី ២៧ ខែ កក្កដា ឆ្នាំ ២០១៩ ។
នៅពេលខ្ញុំដើរចូលទៅក្នុងបន្ទប់ដើម្បីបញ្ជាក់ បន្ទាប់ពីពិធីបុណ្យជ្រមុជទឹករបស់ខ្ញុំ មនុស្សគ្រប់គ្នាយំ ។ ការទទួលពិធីបុណ្យជ្រមុជទឹក និងការទទួលអំណោយទាននៃព្រះវិញ្ញាណបរិសុទ្ធ គឺជាអំណោយទានដ៏ធំធេងមួយមកពីព្រះវរបិតាសួគ៌របស់យើង ។ ក្រោយពីការបញ្ជាក់របស់ខ្ញុំ ខ្ញុំមានអារម្មណ៍ថា ស្ថានសួគ៌បានបើក ហើយថាយើងទាំងអស់គ្នានៅទីនោះជាមួយគ្នា ។ ក្រោយមកទៀត នៅក្នុងពររបស់លោកអយ្យកោរបស់ខ្ញុំ ខ្ញុំបានទទួលការសន្យាដ៏ពិសេស និងអស់កល្បជានិច្ចជាច្រើន ។
ព្រះគម្ពីរមរមនគឺពិត ។ តាមរយៈការអាន និងការអធិស្ឋានអំពីព្រះគម្ពីរនេះ យើងអាចទទួលបានទីបន្ទាល់ផ្ទាល់ខ្លួនរបស់យើងអំពីវា ។ ជាមួយនឹងទីបន្ទាល់នោះ យើងនឹងដឹងថា យ៉ូសែប ស្ម៊ីធ គឺជាព្យាការី ហើយថាតាមរយៈលោក នោះសាសនាចក្រពិតរបស់ព្រះយេស៊ូវគ្រីស្ទត្រូវបានស្ដារឡើងវិញលើផែនដីនេះ ។