« តើការធ្វើជាអ្នកផ្សះផ្សាអាចជួយខ្ញុំឲ្យប្រមូលផ្តុំអ៊ីស្រាអែលបានដោយរបៀបណា ? » លីអាហូណា ខែ មីនា ឆ្នាំ ២០២៤ ។
ចូរមកតាមខ្ញុំ
តើការធ្វើជាអ្នកផ្សះផ្សាអាចជួយខ្ញុំឲ្យប្រមូលផ្តុំអ៊ីស្រាអែលបានដោយរបៀបណា ?
នីហ្វៃបានមើលឃើញថា សាសនាចក្រអាចនឹងទាស់ទែងគ្នានៅថ្ងៃចុងក្រោយ ( សូមមើល នីហ្វៃទី២ ២៨:៣–៤, ២០ ) ប៉ុន្តែការទាស់ទែងគ្នាមិនមែនជាវិធីរបស់ព្រះអម្ចាស់នោះទេ ។ តាមពិតទៅ ដើម្បីប្រមូលផ្តុំអ៊ីស្រាអែល យើងចាំបាច់ត្រូវមានវិធី « ដ៏ខ្ពស់ជាង និងបរិសុទ្ធជាង »១ ក្នុងការប្រាស្រ័យទាក់ទងជាមួយអ្នកដទៃ ។
ប្រធាន រ័សុល អិម ណិលសុន បានបង្រៀន ៖ « បើបងប្អូនម៉ឺងម៉ាត់ក្នុងការជួយប្រមូលផ្តុំអ៊ីស្រាអែល និងការស្ថាបនាទំនាក់ទំនងដែលនឹងមានភាពយូរអង្វែងដល់អស់កល្បជានិច្ច ពេលនេះ គឺជាពេលដើម្បីបោះចោលភាពល្វីងជូរចត់ហើយ ។ ឥឡូវនេះ គឺជាពេលដើម្បីឈប់រឹងចចេសថា វាត្រូវតែជារបៀបខ្ញុំ បើមិនដូច្នោះខ្ញុំមិនធ្វើនោះទេ ។ ឥឡូវនេះ គឺជាពេលដើម្បីឈប់ធ្វើអ្វីដែលធ្វើឲ្យអ្នកដទៃខ្លាចរអា ព្រោះតែខ្លាចធ្វើឲ្យបងប្អូនអាក់អន់ចិត្ត ។ ឥឡូវនេះ គឺជាពេលដើម្បីកប់គ្រឿងសស្ត្រាវុធពិជ័យសង្គ្រាមរបស់បងប្អូនហើយ ។ បើឃ្លាំងពាក្យសម្ដីរបស់បងប្អូនមានពេញទៅដោយការប្រមាថ និងការចោទប្រកាន់ ឥឡូវនេះ គឺជាពេលដើម្បីបោះវាចោលហើយ ។ បងប្អូននឹងរីកចម្រើនឡើងជាបុរស ឬស្ដ្រីដ៏រឹងមាំខាងវិញ្ញាណរបស់ព្រះគ្រីស្ទ » ។២
ព្រះវរបិតាសួគ៌ និងព្រះយេស៊ូវគ្រីស្ទស្រឡាញ់បុត្រាបុត្រីទាំងអស់របស់ព្រះ ដោយមិនគិតពីភាពខុសគ្នារបស់ពួកគេឡើយ ។ សាតាំងព្យាយាមប្រើភាពខុសគ្នារបស់យើងដើម្បីបែងចែកយើង ប៉ុន្តែតាមរយៈការជ្រើសរើសសេចក្ដីសុខសាន្ដជាជាងការទាស់ទែងគ្នា នោះយើងបង្កើតបរិយាកាសស្វាគមន៍មួយដែលទាក់ទាញមនុស្សទៅកាន់ដំណឹងល្អដែលបានស្ដារឡើងវិញរបស់ព្រះអម្ចាស់ ។
សូមពិចារណាអំពីស្ថានភាព និងជញ្ជឹងគិតអំពីរបៀបដែលបងប្អូនអាចឆ្លើយតបដោយសេចក្ដីស្រឡាញ់បាន ៖
ប្រសិនបើបងប្អូនមានអារម្មណ៍ខ្លាំងអំពីទស្សនៈនយោបាយ តើបងប្អូនអាចមានការយល់ដឹងកាន់តែច្រើននៅក្នុងការសន្ទនារបស់បងប្អូនជាមួយអ្នកដែលមានទស្សនៈផ្ទុយគ្នាដោយរបៀបណា ?
បើគ្រួសាររបស់បងប្អូនមិនបានចុះសម្រុងគ្នា តើបងប្អូនអាចនាំមកនូវបរិយាកាសនៃសេចក្ដីសុខសាន្ត និងសេចក្តីស្រឡាញ់ដោយរបៀបណា ?
ប្រសិនបើបងប្អូនមានអារម្មណ៍អាក់អន់ចិត្តចំពោះអ្វីដែលបងប្អូនអាននៅលើប្រព័ន្ធផ្សព្វផ្សាយសង្គម តើបងប្អូនអាចធ្វើអ្វីខ្លះដើម្បីចៀសវាងការឈ្លោះប្រកែកគ្នា ?