សាសនាចក្ររបស់ព្រះយេស៊ូវគ្រីស្ទត្រូវបានស្ដារឡើងវិញ
ពីមុនយើងបានមកលើផែនដី យើងបានរស់នៅជាមួយព្រះមាតាព្រះបិតាសួគ៌របស់យើង ។ ពួកទ្រង់ស្រឡាញ់យើង ! ព្រះវរបិតាសួគ៌មានផែនការដ៏អស្ចារ្យមួយសម្រាប់យើង ។ យើងនឹងមកផែនដី ដើម្បីយើងអាចទទួលបានរូបកាយមួយ ហើយរៀន និងធំលូតលាស់ឡើង ។ បន្ទាប់មកយើងអាចត្រឡប់ទៅរស់នៅក្នុងដំណាក់ស្ថានសួគ៌វិញ ។ ប៉ុន្តែយើងពុំអាចធ្វើវាដោយខ្លួនឯងបានទេ ។ យើងត្រូវការជំនួយ ។
ព្រះវរបិតាសួគ៌បានជ្រើសរើសបងប្រុសច្បងរបស់យើងគឺ ព្រះយេស៊ូវគ្រីស្ទ ដើម្បីយាងមកកាន់ផែនដីដើម្បីជួយយើង ។ ព្រះយេស៊ូវបានបង្ហាញយើងពីរបៀបស្រឡាញ់អ្នកដទៃ និងធ្វើតាមបទបញ្ញត្តិរបស់ព្រះវរបិតាសួគ៌ ។ ទ្រង់បានជ្រើសរើសសាវកដើម្បីដឹកនាំសាសនាចក្ររបស់ទ្រង់ ។
បន្ទាប់មក ព្រះយេស៊ូវបានរងទុក្ខជំនួសយើងនៅក្នុងសួនច្បារគែតសេម៉ានី ។ ទ្រង់យល់រាល់ការឈឺចាប់ និងទុក្ខព្រួយទាំងអស់របស់យើង ។ ទ្រង់បានសុគតនៅលើឈើឆ្កាងសម្រាប់យើង ។ ដោយសារអ្វីដែលទ្រង់បានធ្វើ យើងអាចបែរទៅរកទ្រង់ ពេលយើងឈឺចាប់ ឬព្រួយ ឬត្រូវការជំនួយ ។ យើងអាចប្រែចិត្តពេលយើងធ្វើអ្វីខុស ។
នៅថ្ងៃទីបី បន្ទាប់ពីព្រះយេស៊ូវបានសុគត ទ្រង់បានមានព្រះជន្មរស់ឡើងវិញ ។ ព្រះយេស៊ូវបានមានព្រះជន្មរស់ឡើងវិញម្តងទៀត ! ដោយសារទ្រង់ នោះយើងនឹងរស់ឡើងវិញផងដែរ ។ យើងអាចរស់នៅស្ថានសួគ៌ម្ដងទៀតបន្ទាប់ពីយើងស្លាប់ ។
បន្ទាប់ពីការរស់ឡើងវិញរបស់ទ្រង់ ព្រះយេស៊ូវបានយាងមកជួបពួកសិស្សទ្រង់នៅក្នុងទីក្រុងយេរ៉ូសាឡិម និងនៅក្នុងទ្វីបអាមេរិក ។ ទ្រង់បានសុំឲ្យពួកសាវករបស់ទ្រង់បន្តបង្រៀនមនុស្សពីដំណឹងល្អរបស់ទ្រង់ ។ មានមនុស្សជាច្រើនដែលបានឮពួកសាវកបានទទួលបុណ្យជ្រមុជទឹក ហើយបានចូលសាសនាចក្រ ។
បន្ទាប់ពីពួកសាវកបានស្លាប់ មនុស្សបានចាប់ផ្ដើមភ្លេចផ្នែកសំខាន់ៗមួយចំនួននៃដំណឹងល្អរបស់ព្រះយេស៊ូវ ។ ពួកគេបានឈប់ជឿថា ព្រះវរបិតាសួគ៌នឹងតែងតែបំផុសគំនិតដល់បុត្រាបុត្រីទ្រង់នៅលើផែនដី ។ ពួកគេភ្លេចថា គ្រប់គ្នានៅលើផែនដីនឹងមានឱកាសមួយដើម្បីទទួលបុណ្យជ្រមុជទឹក ។ ពួកគេបានឈប់ជឿថា ពួកព្យាការី និងពួកសាវកនឹងតែងតែដឹកនាំសាសនាចក្រ ។
ច្រើនឆ្នាំបានកន្លងផុតទៅ ។ ទីបំផុត វាដល់ពេលដើម្បីនាំត្រឡប់មកវិញនូវផ្នែកដែលបាត់បង់នៃដំណឹងល្អរបស់ព្រះយេស៊ូវ ។ វាដល់ពេលដើម្បីស្ដារឡើងវិញនូវសាសនាចក្ររបស់ទ្រង់ ! ព្រះវរបិតាសួគ៌ត្រូវការមនុស្សម្នាក់ដើម្បីធ្វើជាព្យាការី និងជួយនាំវាត្រឡប់មកផែនដីវិញ ។ ទ្រង់បានជ្រើសរើសយុវជនម្នាក់ឈ្មោះ យ៉ូសែប ស៊្មីធ ។
ថ្ងៃមួយ យ៉ូសែបកំពុងអានព្រះគម្ពីរប៊ីប ។ នៅក្នុង យ៉ាកុប ១:៥ វាចែងថា ព្រះវរបិតាសួគ៌នឹងឆ្លើយតបសំណួររបស់យើង ពេលយើងសូមដោយសេចក្ដីជំនឿ ។ យ៉ូសែបពិតជាមានសំណួរមួយមែន ! លោកបានដឹងថាមានសាសនាចក្រជាច្រើនដែលបង្រៀនអំពីព្រះយេស៊ូវ ។ ប៉ុន្តែលោកចង់ស្វែងយល់ថាបើមានសាសនាចក្រមួយដូចជាសាសនាចក្ររបស់ព្រះយេស៊ូវនៅក្នុងព្រះគម្ពីរសញ្ញាថ្មី ។
នាថ្ងៃនាទិឃរដូវដ៏ត្រកាលមួយ ប្រហែលអំឡុងពេលបុណ្យអ៊ីស្ទើរ យ៉ូសែបបានចូលទៅក្នុងព្រៃនៅក្បែរផ្ទះរបស់លោក ។ លោកបានលុតជង្គង់ចុះ ហើយបានចាប់ផ្ដើមអធិស្ឋាន ។ បន្ទាប់មក យ៉ូសែបបានមានអារម្មណ៍ខ្មៅងងឹត ។ សាតាំងបានព្យាយាមបំបាក់ទឹកចិត្តលោក ។ ប៉ុន្តែ យ៉ូសែបបានបន្តអធិស្ឋានដោយអស់ពីកម្លាំងលោក ។
បន្ទាប់មក មានពន្លឺដ៏ស្រស់ស្អាតមួយបានចុះមក ។ យ៉ូសែបបានឃើញព្រះវរបិតាសួគ៌ និង ព្រះយេស៊ូវគ្រីស្ទ ។ ការណ៍នេះត្រូវបានហៅថា ការនិមិត្តដំបូង ។ ពួកទ្រង់បានមានបន្ទូលថា សាសនាចក្ររបស់ព្រះយេស៊ូវពុំមាននៅលើផែនដីទេ ។ តែថាវានឹងកើតឡើងឆាប់ៗ ។ ការស្ដារឡើងវិញបានចាប់ផ្ដើម !
ព្រះវរបិតាសួគ៌បានបញ្ជូនពួកទេវតាមកដើម្បីស្ដារឡើងវិញនូវផ្នែកសំខាន់ៗនៃដំណឹងល្អ ។ ទេវតាមរ៉ូណៃបានប្រគល់ផ្ទាំងចំណារមាសដល់យ៉ូសែប ដើម្បីយើងអាចមានព្រះគម្ពីរមរមន ដើម្បីជួយយើងរៀនអំពីព្រះយេស៊ូវគ្រីស្ទ ។
យ៉ូហាន បាទីស្ទ បាននាំត្រឡប់នូវបព្វជិតភាពអើរ៉ុនដើម្បីយើងអាចទទួលបុណ្យជ្រមុជទឹក ។ ពេត្រុស យ៉ាកុប និងយ៉ូហាន បាននាំមកនូវបព្វជិតភាពមិលគីស្សាដែក ដើម្បីយើងអាចទទួលអំណោយទានព្រះវិញ្ញាណបរិសុទ្ធ និងទទួលពរជ័យទាំងឡាយពេលយើងឈឺ ។
អេលីយ៉ាបានមក ដើម្បីយើងអាចផ្សារភ្ជាប់ជាមួយគ្រួសារយើងនៅក្នុងព្រះវិហារបរិសុទ្ធ ។
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយត្រូវបានរៀបចំឡើង ។ នោះមានន័យថា សាសនាចក្ររបស់ព្រះយេស៊ូវត្រឡប់មកផែនដីវិញ ! ការណ៍ទាំងអស់នេះគឺជាផ្នែកនៃការស្ដារឡើងវិញ ។
ការស្ដារឡើងវិញនៃដំណឹងល្អនៅតែកំពុងបន្តនៅសព្វថ្ងៃនេះ ។ ពួកព្យាការី ពួកសាវក ពួកអ្នកផ្សព្វផ្សាយសាសនានិងសមាជិកកំពុងចែកចាយដំណឹងល្អរបស់ព្រះយេស៊ូវគ្រីស្ទនៅទូទាំងពិភពលោក ។ ព្រះវិហារបរិសុទ្ធកំពុងត្រូវបានសាងសង់នៅក្នុងដែនដីជាច្រើន ដើម្បីឲ្យប្រជាជនអាចបានផ្សារភ្ជាប់ជាមួយគ្រួសាររបស់ពួកគេជានិរន្តរ៍ ។ ហើយសាសនាចក្រកំពុងជួយមនុស្សនៅក្នុងទីកន្លែងជាច្រើន ដែលមានមនុស្សស្រេកឃ្លាន ឬមានគ្រោះមហន្តរាយ ។
មនុស្សគ្រប់គ្នាអាចធ្វើអ្វីមួយដើម្បីជួយដល់ការស្ដារឡើងវិញ ។ ប្អូនអាចជួយដោយការរៀនអំពីពង្សប្រវត្តិរបស់ប្អូន ហើយធ្វើបុណ្យជ្រមុជទឹកក្នុងព្រះវិហារបរិសុទ្ធ ។ ប្អូនអាចបង់ដង្វាយមួយភាគក្នុងដប់ដើម្បីស្ថាបនាសាសនាចក្រ និងព្រះវិហារបរិសុទ្ធ ។ ប្អូនអាចបង់ដង្វាយតមអាហារដើម្បីជួយមនុស្សដែលត្រូវការជំនួយ ។ ប្អូនអាចប្រាប់មនុស្សអំពីព្រះយេស៊ូវគ្រីស្ទ ។
ព្រះយេស៊ូវបានប្រទានដល់យើងនូវសាសនាចក្ររបស់ទ្រង់ ដើម្បីជួយយើងវិលត្រឡប់ទៅផ្ទះសួគ៌ារបស់យើងវិញ ។ យើងអាចទទួលទានសាក្រាម៉ង់ ហើយតែងតែចងចាំនូវអ្វីដែលទ្រង់បានធ្វើសម្រាប់យើងជានិច្ច ។ យើងអាចបង្ហាញសេចក្ដីស្រឡាញ់ចំពោះមនុស្សដទៃ ដូចទ្រង់បានធ្វើ ។ យើងអាចជួយមនុស្សគ្រប់គ្នាឲ្យរៀនអំពីព្រះយេស៊ូវគ្រីស្ទបាន !
រចនារូបភាពដោយ អាបរីល ស្តុត