សួស្ដីពីព្រៃពិសិដ្ឋ !
ជម្រាបសួរពួកយើងឈ្មោះ ម៉ាហ្គោ និង ប៉ោឡូ ។
ខែនេះ ដើម្បីអបអរសាទរការស្ដារឡើងវិញ យើងមកទស្សនាទីកន្លែងដែលការនិមិត្តដំបូងបានកើតឡើង ២០០ ឆ្នាំកន្លងមកហើយ !
ពេល យ៉ូសែប ស៊្មីធ អាយុ ១៤ ឆ្នាំ លោកបានរស់នៅក្នុងផ្ទះឈើមួយនៅក្នុងទីក្រុង ញូវយ៉ក ស.រ.អា ។ លោកមានបងប្អូនប្រុសប្រាំនាក់ និងបងប្អូនស្រីបីនាក់ ។ លោកគោរពឪពុកម្ដាយលោក ហើយរាក់ទាក់ដល់អ្នកដទៃទៀត ។ លោកអានព្រះគម្ពីរប៊ីបជាមួយគ្រួសារលោក ប៉ុន្តែពួកគេមិនបានទៅព្រះវិហារដូចគ្នាជាមួយគ្នាទាំងអស់គ្នានោះទេ ។
យ៉ូសែបជាមនុស្សខិតខំធ្វើការ ។ លោកជួយកាត់ដើមឈើ ដើម្បីគ្រួសារលោកអាចដាំដំណាំ ។ លោកក៏បានជួយគ្រួសារលោកប្រមូលរុក្ខរសពីដើមមេបផលដើម្បីយកទៅធ្វើស្ករ ។
យ៉ូសែបចង់ស្វែងរកសាសនាចក្រមួយដូចជាសាសនាចក្រមួយនៅក្នុងព្រះគម្ពីរប៊ីប ។ ថ្ងៃមួយលោកបានទៅក្នុងព្រៃ ហើយបានអធិស្ឋាន ។ ព្រះជាព្រះវរបិតាសួគ៌ និងព្រះយេស៊ូវបានបង្ហាញព្រះកាយដល់លោក ។ ពួកទ្រង់បានប្រាប់លោកថា អំពើបាបរបស់លោកត្រូវបានអភ័យទោស ។ ពួកទ្រង់ក៏បានមានព្រះបន្ទូលផងដែរថា លោកមិនគួរចូលរួមនឹងសាសនាចក្រណាឡើយ ។ មិនយូរទេសាសនាចក្ររបស់ព្រះយេស៊ូវគ្រីស្ទនឹងត្រូវបានស្ដារឡើងវិញ !
មនុស្សពេញវ័យជាច្រើនបានចំអកឲ្យយ៉ូសែប ដោយសារតែអ្វីដែលលោកបានឃើញ ។ ពួកគេបាននិយាយថា លោកបានប្រឌិតរឿងទាំងអស់នោះឡើង ។ ប៉ុន្តែយ៉ូសែបបានបន្តប្រាប់ពួកគេនូវសេចក្ដីពិតនោះ ។ លោកបាននិយាយថា « ខ្ញុំដឹងថាខ្ញុំបានឃើញការនិមិត្ត ហើយខ្ញុំដឹងថា ព្រះទ្រង់ក៏ដឹងថាខ្ញុំបានឃើញការនិមិត្ត ហើយខ្ញុំពុំអាចបដិសេធរឿងនេះ » ( យ៉ូសែប ស្មីធ—ប្រវត្តិ ១:២៥ ) ។
ថ្ងៃនេះ មនុស្សអាចទៅទស្សនាតំបន់ដែលយ៉ូសែបបានអធិស្ឋាន ។ វាគឺជាកន្លែងដែលស្រស់ស្អាត និងមានភាពសុខសាន្តណាស់ ។
កុមារទាំងនេះរស់នៅកន្លែងដែល យ៉ូសែប ស៊្មីធ បានធំដឹងក្ដីឡើង !
ខ្ញុំដឹងថា ព្រៃពិសិដ្ឋគឺជាកន្លែងដ៏ពិសេស ដោយសារ យ៉ូសែប ស៊្មីធ បានអធិស្ឋាន និងបានឃើញព្រះវរបិតាសួគ៌ និងព្រះយេស៊ូវនៅទីនោះ ។
ផែភឺ ឌី អាយុ ៥ ឆ្នាំ រដ្ឋញូវយ៉ក ស.រ.អា.
ខ្ញុំមានអំណរគុណដែលយើងរស់នៅជិតនឹងផ្ទះរបស់ យ៉ូសែប ស៊្មីធ ។ ខ្ញុំចូលចិត្តទៅអគារហ្គ្រែនឌីន ដែលមានរោងពុម្ពនៅទីនោះ ។ ខ្ញុំពិតជាចូលចិត្តមើលកន្លែងដែលពួកគេបានបោះពុម្ពច្បាប់ដំបូងនៃព្រះគម្ពីរមរមន ។
រ៉ូស្កូ ប៊ី អាយុ ៩ ឆ្នាំ រដ្ឋញូវយ៉ក ស.រ.អា.
សូមអរគុណចំពោះការមកការទស្សនាព្រៃពិសិដ្ឋជាមួយពួកយើង ។ ជួបគ្នាពេលក្រោយទៀត !
រូបថតក្មេងប្រុស ដោយ ជូលី ភលសុន រចនារូបភាពដោយ ខាទី ម៉ាក់ឌី