1 Ket ita, napasamak a ni Alma, a naglibas manipud kadagiti katulongan ni ari Noe, nagbabawi kadagiti basol ken kinadangkesna, ket napan a sililimed kadagiti tattao, ket rinugianna nga isuro dagiti balikas ni Abinadi—

2 Wen, maipanggep iti dumteng, ken kasta met ti maipanggep iti panagungar dagiti natay, ken ti pannakasubbot ti tattao, a mapasamak babaen ti bileg, ken panagsagaba, ken ipapatay ni Cristo, ken ti panagungarna ken yuulina idiay langit.

3 Ket insurona ti kas iti kaadu kadagiti dumngeg iti balikasna. Ket insurona ida iti nalimed, tapno saan a maammuan ti ari. Ket adu ti namati kadagit balikasna.

4 Ket napasamak a kas iti kaadu kadagiti namati kenkuana ti napan iti lugar a naawagan iti Mormon, a naadaw ti naganna manipud iti ari, nga adda iti beddeng ti daga a nakaad-adu iti atap nga ayup bayat iti tiempo wenno panawen.

5 Ita, addaan iti Mormon ti maysa nga ubbog ti nadalus a danum, ket napan sadiay ni Alma, ta adda rimmuong ti babassit a kayo iti asideg ti danum, a paglemmenganna iti aldaw manipud kadagiti panagsapsapul ti ari.

6 Ket napasamak a kas iti kaadu kadagiti namati kenkuana ti napan sadiay a dumngeg kadagiti balikasna.

7 Ket napasamak kalpasan ti adu nga aldaw nga adda dakkel a bilang a naguummong a sangsangkamaysa iti lugar a Mormon, tapno dumngeg iti balikas ni Alma. Wen, nagtitipon dagiti amin a namati iti balikasna, tapno dumngeg kenkuana. Ket insurona ida, ken inkasabana kadakuada ti panagbabawi, ken pannakasubbot, ken pammati iti Apo.

8 Ket napasamak a kinunana kadakuada: Kitaen, dagitoy ti danum ti Mormon (gapu ta kastoy ti pannakaawagda) ket ita, gapu ta tarigagayanyo nga umay iti pagaponan ti Dios, ken maawagan a taona, ken sitatallugod a makipagbaklay iti imet ti tunggal maysa, tapno lumag-anda;

9 Wen, ken sitatallugod a makipagladingit kadagiti agladladingit; wen, ken manglinglingay kadagiti agkasapulan iti pannakalinglingay, ken agtakder a kas kadagiti saksi ti Dios iti amin a tiempo ken iti amin a banag, ken iti amin a lugar nga ayanyo, uray pay agingga iti ipapatay, tapno masubbotnakayo ti Dios, ket maibilangkayo kadagidiay adda iti umuna a panagungar, tapno maaddaankayo iti agnanayon a biag—

10 Ita kunak kadakayo, no daytoy ti tarigagay dagiti pusoyo, ania a rasonyo a saan nga agpabuniag iti nagan ti Apo, a kas pannangsaksi iti sanguananna a nakitulagkayo kenkuana, nga agserbikayo kenkuana ken agtungpalkayo kadagiti bilinna, tapno nabusbuslon ti panangiburayna iti Espirituna kadakayo?

11 Ket ita idi nangngegan dagiti tattao dagitoy a balikas, nagsisipatda gapu iti rag-o, ket inyebkasda: Daytoy ti tarigagay dagiti pusomi.

12 Ket ita napasamak nga innala ni Alma ni Helam, gapu ta isu ti maysa kadagiti immuna, ket napan nagtakder iti danum, ket immawag, kinunana: O Apo, ibukbokmo ti Espiritum iti katulongam, tapno maaramidna daytoy nga aramid nga addaan iti nasantuan a puso.

13 Ket idi naibagana dagitoy a balikas, nagadda kenkuana ti Espiritu ti Dios, ket kinunana: Helam, buniaganka, gapu iti turay nga adda kaniak manipud iti Mannakabalin a Dios, a kas pammaneknek a nakitulagka nga agserbi kenkuana agingga iti ipapataymo iti nainlasagan a bagi; ket sapay koma ta maibukbok kenka ti Espiritu ti Apo; ken sapay koma ta ipaay kenka ti agnanayon a biag, babaen ti pannubbot ni Cristo, nga insaganana manipud idi pannakaparsua ti lubong.

14 Ket kalpasan a naibaga ni Alma dagitoy a balikas, agpada nga nairarem da Alma ken Helam iti danum; ket limmung-awda ken sirarag-o a timmakdangda manipud iti danum, ta napnoda iti Espiritu.

15 Ket manen, nangala ni Alma iti sabali, ket napan iti danum iti maikadua a gundaway, ket binuniaganna a kas iti immuna, ngem saannan nga inrarem ti bagina iti danum.

16 Ket binuniaganna iti kastoy a wagas ti tunggal maysa a napan iti lugar a Mormon; ket agdagupda iti dua gasut ken uppat a kararua; wen, ket nabuniaganda iti danum ti Mormon, ket napnuanda iti parabur ti Dios.

17 Ket nanagananda iti simbaan ti Dios, wenno ti simbaan ni Cristo, manipud iti dayta a kanito. Ket napasamak a nainayon iti simbaanna ti siasino man a nabuniagan babaen ti bileg ken turay ti Dios.

18 Ket napasamak a nangorden ni Alma kadagiti saserdote gapu ta adda iti turay manipud iti Dios; nangorden ti uray maysa a saserdote iti tunggal limapulo kadagiti bilangda a mangasaba kadakuada, ken mangisuro kadakuada maipanggep kadagiti banag a maipapan iti pagarian ti Dios.

19 Ket binilinna ida a nasken nga awan sabali nga isuroda malaksid dagiti banag a naisurona, ken naisaon babaen iti nagaon iti ngiwat dagiti nasantuan a propeta.

20 Wen, uray pay a binilinna ida a nasken nga awan ti ikasabada malaksid ti panagbabawi ken pammati iti Apo, a nangsubbot kadagiti taona.

21 Ket binilinna ida a nasken nga awan ti panagsususik ti tunggal maysa, ngem nasken a sangsangkamaysada nga agnamnama, nga addaan iti maysa a pammati ken maysa a panagbuniag, a namagtitipon dagiti pusoda nga addaan iti panagkaykaysa ken panagayat iti tunggal maysa.

22 Ket ngarud binilinna ida a mangasaba. Ket ngarud nagbalinda nga annak ti Dios.

23 Ket binilinna ida a nasken a ti aldaw ti panaginana ket ngilinen, ken pagtalinaedenda a nasantuan, ken kasta met a nasken nga inaldaw nga agyamanda iti Apo a Diosda.

24 Ket binilinna pay ida a nasken nga agbannog dagiti saserdote nga inordenanna babaen ti bukodda a bannog para kadagiti kasapulanda.

25 Ket nailatang ti maysa nga aldaw a nasken nga aguummongda a sangsangkamaysa tapno masuruan dagiti tattao, ken mangdayaw iti Apo a Diosda, ken kasta met, agingga iti kabaelanda, nga aguummongda a sangsangkamaysa.

26 Ket saan nga idas-al dagiti saserdote kadagiti tattao ti kasapulanda; ngem umawatda iti parabur ti Dios para iti bannogda, isu a pimmigsada iti Espiritu, nga addaan iti pannakaammo iti Dios, tapno makaisuroda nga addaan bileg ken turay a manipud iti Dios.

27 Ket manen imbilin ni Alma kadagiti tattao ti simbaan a nasken a mangibingayda iti sanikuada, mayannatop ti kaadda iti tunggal maysa; no nabusbuslon nasken a nabusbuslon met ti ibingay; ket ti addaan sangkabassit, bassit met ti kasapulan; ket nasken a maikkan ti awanan.

28 Ket ngarud nasken nga mangibingayda kadagiti sanikuada nga addaan ti nawaya a pangngeddeng ken naimbag a tarigagay iti Dios, ken kadagidiay saserdote nga agkasapulan, wen, ken iti tunggal agkasapulan, lamulamo a tao.

29 Ket imbagana daytoy kadakuada, gapu ta binilin ti Dios; ket nagbiagda a sililinteg iti sanguanan ti Dios, a mangibinglay iti tunggal maysa iti naindagaan ken naespirituan a mayannatop iti kasapulan ken kayatda.

30 Ket ita napasamak a naaramid amin dagitoy idiay Mormon, wen, iti asideg ti dandanum ti Mormon, iti kabakiran nga asideg ti dandanum ti Mormon; wen, iti lugar ti Mormon, iti dandanum ti Mormon, iti kabakiran ti Mormon, anian ti kinapintasda kadagiti mata dagiti napan sadiay a nakaammo iti Mannubbotda; wen, ket anian a pannakaparaburda, agsipud ta agkantadanto ti pakadaydayawanna iti agnanayon.

31 Ket naaramid dagitoy a banag kadagiti beddeng ti daga, tapno saan a maammuan ida ti ari.

32 Ngem kitaen, napasamak a ti ari, gapu ta naduktalanna ti panagtignay dagiti tattao, nangibaon kadagiti katulonganna a mangsiput kadakuada. Ngarud nasarakan ida ti ari iti aldaw a panaguummongda a dumngeg ti balikas ti Apo.

33 Ket ita kinuna ti ari a sugsugsogan ni Alma dagiti tattao ti iyaalsada a maibusor kenkuana; imbaonna ngarud dagiti buyotna a mangdadael kadakuada.

34 Ket napasamak a naipakaammo ken ni Alma ken dagiti tattao ti Apo ti yaay ti buyot ti ari; ngarud innalada dagiti toldada ken dagiti pamiliada ket pimmadawda a nagturong iti langalang.

35 Ket agarup nga agdagupda iti uppat a gasut ken limapulo a tao.