Dagiti Nasantuan a Kasuratan
Mosiah 6


Kapitulo 6

Isurat ni ari Benjamin ti nagnagan dagiti tattao ken mangtuding kadagiti saserdote a mangisuro kadakuada—Agturay ni Mosiah a nalinteg nga ari. Agarup 124-121 B.C.

1 Ket ita, napanunot ni ari Benjamin a rumbeng daytoy, kalpasan ti panagsaona kadagiti tattao, a nasken nga aalaenna ti nagnagan dagiti amin a nakitulag iti Dios a mangtungpal kadagiti bilinna.

2 Ket napasamak nga awan ti uray no maysa a kararua, malaksid kadagiti babassit nga ubbing, ti saan a nakitulag ken immawat iti nagan ni Cristo.

3 Ket manen, napasamak nga inleppas ni ari Benjamin amin dagitoy a bambanag, ken kinonsagraranna ti lalaki nga anakna a ni aMosiah nga ari ken mangituray kadagiti taona, ken intedna amin a pagrebbengan maipanggep iti pagarian, ken bnangdutok kadagiti saserdote a cmangisuro kadagiti tattao, tapno mangngeg ken maammuanda dagiti bilin ti Dios, ken tinignayna ida a manglagip iti dsapata nga inaramidda, pinagawidna ti ummong, ket nagsublida ti tunggal maysa, a mayannurot iti kaamaanda, kadagiti balayda.

4 Ket nangrugi a nagturay ni aMosiah a kasukat ti amana. Ket nangrugi a nagturay iti maika sangapulo ket tallo a tawenna, a nangbukel, iti agarup uppat a gasut ken pitopulo ket innem a tawen manipud iti bpanawen a pimmanaw ni Lehi iti Jerusalem.

5 Ket nagbiag pay ni ari Benjamin iti tallo a tawen ket natay.

6 Ket napasamak a sinurot ni ari Mosiah dagiti wagas ti Apo, ket tinungpalna dagiti pangngeddeng ken alagadenna, ket tinungpalna dagiti bilinna iti amin a banag nga imbilinna kenkuana.

7 Ket impatungpal ni ari Mosiah kadagiti taona a sukayenda ti daga. Kasta met, nga isu a mismo, nagsukay iti daga, tapno iti kasta asaan nga agbalin a dagensen dagiti taona, tapno maaramidna ti mayannurot kadagiti amin a banag nga inaramid ti amana. Ket awan ti panagsusupanget kadagiti taona iti las-ud ti tallo a tawen.