1 Ket napasamak a nagsubli dagiti buyot ti ari, awan serserbi iti panagsapulda kadagiti tattao ti Apo.

2 Ket ita kitaen, bassit ti bilang dagiti soldado ti ari, gapu ta nakissayan, ket nangrugi ti panagsisina dagiti nabati kadagiti tattao.

3 Ket nangrugi ti basbassit a paset ti tattao a nangipeksa iti pammutbutengda iti ari, ket nangrugi ti dakkel a panagsususikda.

4 Ket ita adda maysa a lalaki kadakuada nga agnagan iti Gideon, ket gapu ta napigsa a lalaki ken kabusor ti ari, ngarud inasutna ti espadana, ket iti pungtotna insapatana a papatayenna ti ari.

5 Ket napasamak a kinarangetna ti ari; ket idi makita ti ari a dandanin a maparmek, naglibas ket nagtaray ket immuli iti ^atorre nga asideg iti templo.

6 Ket kinamat ni Gideon ket dandanin makauli iti torre tapno patayenna ti ari, ket inwaras ti ari ti panagkitana iti aglawlaw ti daga a Shemlon, ket kitaen, adda ti buyot dagiti Lamanita kadagiti beddeng ti daga.

7 Ket ita nagpakpakaasi ti ari iti nalaus a sanaang ti kaungganna, a kinunana: Gideon, saannak a patayen, ta umasidegen dagiti Lamanita kadatayo, ket dadaelennatayo; wen, dadaelenna dagiti tattaok.

8 Ket ita saan unay a maseknan ti ari kadagiti taona ngem ketdi iti biagna; nupay kasta, inispal ni Gideon ti biagna.

9 Ket binilin ti ari dagiti tattao a nasken a libasanda dagiti Lamanita, ket indauloanna ida, ket pimmanawda iti langalang, a kaduada dagiti babbai ken annakda.

10 Ket napasamak a kinamat dagiti Lamanita ida, ket naabutanda ida, ket rinugianda ida a papatayen.

11 Ita napasamak nga imbilin ti ari a nasken a panawanda ti amin a lallaki dagiti assawada ken annakda, ket libasanda dagiti Lamanita.

12 Ita adu ti saan a mangayat a panawan ida, ngem kaykayatda nga agbati ken maungaw a kaduada ida. Ket pinanawan ti dadduma dagiti assawa ken annakda ket naglibasda.

13 Ket napasamak nga imbilin dagiti nagbati a kadua dagiti assawa ken annakda a pumasango dagiti napintas a babbalasangda ket agpakaasida kadagiti Lamanita a saanda ida a patpatayen.

14 Ket napasamak a kinaasian ida dagiti Lamanita, agsipud ta naguyugoyda iti kinapintas dagiti babbaida.

15 Ngarud inispal dagiti Lamanita ti biagda, ket inalada a kas balud ken insublida iti daga a Nephi, ket pinalubosanda a mangtagikua iti daga, babaen ti saritaan nga idatagda ni ari Noe kadagiti Lamanita, ken itedda dagiti sanikuada, uray pay ti kagudua ti amin a kukuada, kagudua ti balitokda, ken ti pirakda, ken amin a napateg a bambanagda, ket kasta a nasken nga agbayadda iti buis iti ari dagiti Lamanita iti tinawen.

16 Ket ita adda maysa kadagiti annak ti ari kadagiti naala a balud, nga agnagan iti ^aLimhi.

17 Ket ita tarigagay ni Limhi a saan koma a madadael ti amana; nupay kasta, saan a limed ken ni Limhi iti kinadangkes ti amana, idinto nga isu ket nalinteg a tao.

18 Ket napasamak a sililimed a nangibaon ni Gideon kadagiti lallaki iti langalang, a mangsapul iti ari ken kadagiti kinakuyogna. Ket napasamak a nasabetda dagiti tattao iti langalang, isuda amin malaksid ti ari ken dagiti saserdotena.

19 Ita naikarida kadagiti pusoda nga agsublida iti daga a Nephi, ket no napapatay dagiti assawa ken annakda, ken kasta met dagiti nagbati kadakuada, nga agibalesda, ket mapapatayda met a kas kadakuada.

20 Ket imbilin kadakuada ti ari a nasken nga saanda agsubli; ket kinaungetda ti ari, ket impakatda a nasken nga agsagaba isuna, uray pay ti ^aipapatay babaen iti apuy.

21 Ket alaenda koma met dagiti saserdote ken papatayenda, ngem nakalibasda.

22 Ket napasamak nga agsublida koman iti daga a Nephi, ket nasabetda dagiti tattao ni Gideon. Ket imbaga dagiti tattao ni Gideon kadakuada ti amin a napasamak kadagiti assawa ken annakda; ken pinalubosan ida dagiti Lamanita nga agtagikua iti daga babaen ti panagbayadda iti buis kadagiti Lamanita iti kagudua ti amin a sanikuada.

23 Ket imbaga dagiti tattao kadagiti tattao ni Gideon a napataydan ti ari, ken linibasan ida dagiti saserdotena iti langalang.

24 Ket napasamak a kalapasan a nalpasda ti seremonia, nagsublida iti daga a Nephi, nagrag-oda gapu ta saan a napapatay dagiti assawa ken annakda; ken imbagada ken ni Gideon ti inaramidda iti ari.

25 Ket napasamak a nagaramid ti ari dagiti Lamanita iti ^asapata kadakuada, a nasken a saanda a dadaelen dagiti taona.

26 Ken kasta met ni Limhi, gapu ta anak ti ari, gapu ta naitalek kenkuana ti pagarian ^ababaen dagiti tattao, nagsapata iti ari dagiti Lamanita nga agbayad kenkuana dagiti taona iti buis, uray pay ti kagudua ti amin a sanikuada.

27 Ket napasamak a rinugian ni Limhi a binukel ti pagarian ken siniguradona ti kaadda iti kappia kadagiti taona.

28 Ket nangipan ti ari dagiti Lamanita kadagiti guardia iti aglawlaw ti daga, tapno maipilitna nga agtalinaed dagiti tattao ni Limhi iti daga, tapno saanda makapanaw a mapan iti langalang; ket nangipaay kadagiti guardiana kadagiti kasapulanda aggapu iti buis a naawatna manipud kadagiti Nephita.

29 Ket ita napagtultuloy ni Limhi ti kappia iti pagarianna iti las-ud ti dua a tawen, ta saanda a riniribuk dagiti Lamanita wenno ginandat a papatayen ida.