Dagiti Nasantuan a Kasuratan
Mosiah 7


Kapitulo 7

Masarakan ni Ammon ti daga a Lehi-Nephi, a ni Limhi ti ari—Adipen dagiti Lamanita dagiti tattao ni Limhi—Salaysayen ni Limhi ti pakasaritaanda—Impaneknek ti maysa a propeta (ni Abinadi) a ni Cristo ti Dios ken Ama ti amin a banag—Agani iti alipugpog dagiti agmula iti kinarugit, ket maisalakan dagiti agtalek iti Apo. Agarup 121 B.C.

1 Ket ita, napasamak a kalpasan a naaddaan iti nagtultuloy a kappia ni ari Mosiah iti las-ud ti tallo a tawen, tinarigagayanna a maammuan ti maipanggep kadagiti tattao a anapan nagtaeng iti daga a Lehi-Nephi, wenno iti siudad ti Lehi-Nephi; agsipud ta awan ti aniaman a nangngeg dagiti tattao maipapan kadakuada manipud iti panawen a pimmanawda iti daga ti bZarahemla; ngarud, naburiboran kadagiti panagdamdamagda.

2 Ket napasamak nga impalubos ni ari Mosiah a makapan iti daga a Lehi-Nephi ti sangapulo ket innem kadagiti napigsa a lallakida, tapno dumamag maipanggep kadagiti kakabsatda.

3 Ket napasamak a nagrubbuatda iti kabigatanna, kaduada ti maysa nga agnagan iti Ammon, maysa a napigsa ken maingel a lalaki, ken maysa a kaputotan ni Zarahemla; ket isu met ti dadauloda.

4 Ket ita, saanda ammo ti turongen iti panagdaliasatda iti langalang iti ipapanda iti daga a Lehi-Nephi; ngarud nagallaallada iti adu nga aldaw iti langalang, a dimmanon pay iti uppat a pulo nga aldaw ti panagallaallada.

5 Ket kalpasan ti uppat a pulo nga aldaw a panagallaallada nakadanonda iti maysa a turod, nga amiananen ti daga a aShilom, ket impatakderda idiay dagiti toldada.

6 Ket intugot ni Ammon ti tallo kadagiti lallaki a kabsatna, ket Amaleki, Helem, ken Hem ti naganda, ket napanda iti daga a aNephi.

7 Ket kitaen, nasabatda ti ari dagiti tattao nga adda iti daga a Nephi, ken iti daga a Shilom; ket napalawlawanda kadagiti guardia ti ari, ket innalada ida, ken pinungoda, ket impanda iti pagbaludan.

8 Ket napasamak a kalpasan ti pannakaibaludda iti dua nga aldaw naisaklangda manen iti ari, ket nawarwar ti pungoda; ket nagtakderda iti sango ti ari, ket napalubosanda, wenno nabilinda, a nasken a sungbatanda dagiti saludsodna.

9 Ket kinunana kadakuada: Kitaendak, siak ni aLimhi, ti lalaki nga anak ni Noe, a lalaki nga anak ni Zeniff, a naggapu iti daga a Zarahemla tapno tawidenna daytoy a daga, a daga dagiti ammada, a nagbalin nga ari babaen ti timek dagiti tattao.

10 Ket ita, kalikagumak a maammuan ti gapu ti kinaturedyo nga immasideg kadagiti pader ti siudad, idi a siak, a mismo, kaduak dagiti guardiak iti ruar ti ruangan?

11 Ket ita, daytoy ti panggepko nga impalubosko a nasken a masalaknibankayo, tapno makapagsaludsodak kadakayo, ta no saan nasken nga imbilinko a patayenkayo dagiti guardiak. Mapalubosankayo nga agsao.

12 Ket ita, idi naammuan ni Ammon a napalubosan isuna nga agsao, immasideg ket nagkurno iti sango ti ari; ket kinunana idi umangad manen: Wen ari, agyamanak unay iti Dios ita nga aldaw ta sibibiagak pay, ken napalubosanak nga agsao; ket ikagumaak ti agsao nga adaan turedna;

13 Ta naipanamnama kaniak a no am-ammonak saanmo koma nga impalubos a mapungoak. Ta siak ni Ammon, ket kaputotannak ni aZarahemla, ket naggapuak iti daga ti Zarahemla tapno dumamag maipanggep kadagiti kakabsatmi, nga impanaw ni Zeniff iti dayta a daga.

14 Ket ita, napasamak nga idi mangngeg ni Limhi dagiti balikas ni Ammon,naragsakan unay, ket kinunana: Ita, ammok a sitatalged a sibibiag pay dagiti kabsatko iti daga a Zarahemla. Ket ita, agrag-oakto; ket pagbalinnek nga agrag-onto met dagiti tattaok inton bigat.

15 Ta kitaem, adipenkami dagiti Lamanita, ket aagbubuiskami iti buis a nadagsen unay nga ibaklay. Ket ita, kitaem, isalakanakaminto dagiti kakabsatmi iti pannakaadipenmi, wenno kadagiti ima dagiti Lamanita, ket agbalinkaminto nga adipenda; ta nasaysayaat nga adipendakami dagiti Nephita ngem iti agbuiskami iti ari dagiti Lamanita.

16 Ket ita, binilin ni ari Limhi dagiti guardiana a saandan a punguen ni Ammon wenno dagiti kakabsatna, ngem palubosanda ida a mapan iti turod iti amianan ti Shilom, ket itugotda dagiti kakabsatda iti siudad, tapno manganda idiay, ken uminumda, ken makainanada iti bannogda a nagdaliasat; ta adu a banag ti nagrigatanda; nagsagabada iti bisin, waw, ken bannog.

17 Ket ita, napasamak nga iti kabigatanna inwaragawag ni ari Limhi kadagiti taona, ta iti kasta aguummongda a mapan iti atemplo, tapno dumngegda kadagiti balikas nga isaona kadakuada.

18 Ket napasamak nga idi naummongdan imbagana kadakuada iti kastoy a wagas, a kinunana: Wen dakayo, a tattaok, yangadyo dagiti uloyo ket agliwliwakayo; ta kitaen, daytoyen ti panawen, wenno saan nga adayo, inton saannatayo iturayanen dagiti kabusortayo, nupay iti laksid ti adu a pannakidangadangtayo, ngem agtalekak nga adddaan iti nabati nga awan nagmamaayanna; ngem namnamaek nga addaanto pay iti epektibo a pannakidangadang a maaramid.

19 Ngarud, yangadyo dagiti uloyo, ket agrag-okayo, ket agtalekkayo iti aDios, iti dayta a Dios nga isu ti Dios ni Abraham, ken ni Isaac, ken ni Jacob; ken kasta met, iti Dios a bnangipanaw kadagiti annak ti Israel manipud iti Egipto, ken pinagbalinna a makapagnada iti namaga a daga iti ibaballasiwda iti Nalabaga a Baybay, ken pinakanna ida iti cmana tapno saanda a maungaw iti langalang; ken adu pay a banag ti inaramidna para kadakuada.

20 Ket manen, aimpanaw ti isu met laeng a Dios dagiti ammatayo iti Jerusalem, ket sinaluadan ken sinalaknibanna dagiti taona agingga ita; ket kitaen, gapu iti kinadangkes ken ti kinarimontayo ti nangigapuanna iti pannakaadipentayo.

21 Ket dakayo amin ti saksi ita nga aldaw, a ni Zeniff, a nagbalin nga ari dagitoy a tao, isu a anaregget unay nga agtawid iti daga dagiti ammana, ngarud gapu iti pannakaallilawna babaen iti kinasikap ken kinaulbod ni ari Laman, a nakitulag ken ni ari Zeniff, ken nangisuko iti panagtagikua iti paset ti daga, wenno uray pay ti siudad a Lehi-Nephi, ken ti siudad a Shilom; ken amin a daga iti aglawlawna—

22 Ket inaramidna amin dagitoy, nga awan sabali a panggepna no di iti amangipan kadakuada iti sidong ti turayda wenno iti pannakaadipen. Ket kitaen, iti agdama agbuistayo iti ari dagiti Lamanita, iti gatad ti kagudua ti maistayo, ken ti sebadatayo, ken uray pay ti amin a kita ti binukeltayo, ken kagudua ti annak dagiti pangen ken arbantayo; ken uray pay ti kagudua ti amin nga adda wenno kukuatayo ti alaen kadatayo ti ari dagiti Lamanita, wenno ti biagtayo.

23 Ket ita, saan kadi a nadagsen unay daytoy a baklayen? Ket daytoy, sagsagabaentayo, saan kadi a nakaro unay? Ita kitaenyo, anian a nagkaro a puon ti pagladingitantayo.

24 Wen, kunak kadakayo, nakaro dagiti puon ti ladingittayo; ta kitaenyo manon ti napapatay kadagiti kakabsattayo, ket naibukbok ti darada nga awan kapapayanna, ket gapu amin dagitoy iti kinadangkes.

25 Agsipud ta no saan koma a nagsalungasing dagitoy a tao saan koma nga impalubos ti Apo a naiyeg kadakuada ti nakaro a kinadakes. Ngem kitaen, saanda ipangag dagiti balikasna; ngem timmaud dagiti panagsusupangetda, uray pay a nakaro unay a nakaibukbokan ti darada.

26 Ket pinapatayda ti apropeta ti Apo; wen, ti napili a tao ti Dios, a nangibaga kadakuada ti kinadangkesda ken ti makarimon nga aramidda, ken nangipadto iti adu a banag a dumteng, wen, uray pay ti yaay ni Cristo.

27 Ket gapu ta imbagana kadakuada a ni Cristo ti aDios, ti Ama ti amin a banag, ken imbagana a nasken nga isuotna ti langa ti tao, ken isu ti blanga a nakaparsuaan ti tao idi punganay; wenno iti sabali a pannao, imbagana a naparsua ti tao iti langa ti cDios, ket bumabanto ti Dios kadagiti annak ti tattao, ket maaddaanto iti lasag ken dara, ket mapanto iti rabaw ti daga—

28 Ket ita, gapu ta imbagana daytoy, pinapatayda; ken adu pay a banag ti inaramidda a nakaigapuan iti pungtot ti Dios kadakuada. Ngarud, asino ti masdaaw nga addada iti pannakaadipen, ken nadusada iti nakaro a panagsagaba?

29 Ta kitaenyo, kinuna ti Apo: saankonto asaranayen dagiti tattaok iti aldaw a panagsalungasingda; ngem aladak dagiti dalanda tapno saanda a rumang-ay; ket agbalin dagiti aramidda a kas maysa a lapped iti sanguananda.

30 Ket manen, kinunana: No agmula dagiti tattaok iti akinarugit baniendanto ti taep iti alipugpog; ket sabidongto ti ibungana.

31 Ket kinunana manen: No agmula dagiti tattaok iti kinarugit aniendanto ti aangin iti daya, a mangyeg iti madagdagus a pannakadadael.

32 Ket ita, kitaen, natungpalen ti kari ti Apo, ket nadusa ken nagsagabakayo.

33 Ngem no aagsublikayo iti Apo nga addaan iti naan-anay a panggep ti puso, ken agtalekkayo kenkuana, ken agserbikayo kenkuana iti amin a kinaregta ti panunot, no aramidenyo daytoy, isalakannakayo manipud iti pannakaadipen, kas mayannurot iti pagayatan ken pakaragsakanna.