1 Siak, ni Zeniff, a nasursuruan iti amin a pagsasao dagiti Nephita, ken addaan iti pannakaammo iti ^adaga a Nephi, wenno iti daga nga immuna a tawid dagiti ammami, ken naibaon kas maysa nga espia kadagiti Lamanita tapno espiaak dagiti bunggoyda, tapno madarup ken mapapatay ida ti buyotmi—ngem idi nakitak ti naimbag nga adda kadakuada tinarigagayak a saanda a mapapatay.

2 Ngarud, sinuppiatko kadagiti kabsatko iti langalang, agsipud ta kayatko a nasken a makitulag ti agturaymi kadakuada; ngem gapu ta naunget ken mammapatay a lalaki isuna imbilinna a nasken a patayendak; ngem naisalakanak babaen iti pannakaisayasay ti adu a dara; agsipud ta nagraranget ti ama kontra iti ama, ken ti kabsat kontra iti kabsat, agingga nga ad-adu iti bilang ti buyotmi ti napapatay iti langalang; ket nagsublikami, dakami a naisalakan, iti daga ti Zarahemla, a mangisalaysay iti dayta nga estoria kadagiti assawa ken annakda.

3 Ken nupay kasta, iti kinaregtak unay a mangtawid iti daga dagiti ammami, nakaurnongak ti kas iti kaadu kadagiti nagtarigagay a mapan agtagikua iti daga, ket inrugimi manen ti agdaliasat iti langalang iti papanmi iti daga; ngem nagsagabakami iti bisin ken nakaro a rigrigat; agsipud ta nabannayat kami a manglagip iti Apo a Diosmi.

4 Nupay kasta, kalpasan ti adu nga aldaw a panagallaalla iti langalang impatakdermi dagiti toldami iti lugar a nakapapatayan dagiti kakabsatmi, nga asideg iti daga dagiti ammami.

5 Ket napasamak a napanak manen a kinuyog ti uppat kadagiti tattaok iti siudad, iti ari, tapno maammuak ti panagipato ti ari, ken tapno maammuak no mabalinko a kaduaen dagiti tattaok ken tagikuaen ti daga a sitatalna.

6 Ket napanak iti ari, ket intulagna kaniak a mabalinko a tagikuaen ti daga a Lehi-Nephi, ken ti daga a Shilom.

7 Ken imbilinna met a nasken a pumanaw dagiti taona iti daga, ket napanak ken dagiti tattaok iti daga tapno tagikuaenmi.

8 Ket rinugianmi ti agpatakder iti pasdek, ken agtarimaan kadagiti pader ti siudad, wen, uray pay dagiti pader ti siudad ti Lehi-Nephi, ken ti siudad ti Shilom.

9 Ket rinugianmi a sinukay ti daga, wen, uray pay ti amin a kita ti bukbukel, ti bukbukel ti mais, ken ti trigo, ken ti sebada, ken ti neas, ken ti sheum ken bukbukel ti nadumaduma a bungbunga; ket rinugianmi ti umado ken rumang-ay iti daga.

10 Ita ti kinasikap ken kinamanangallilaw ni ari a Laman, a ^amangipan kadagiti tattaok iti pannakaadipen, insukona ti daga tapno mabalinmi a tagikuaen.

11 Ngarud napasamak, a kalpasan ti panagnaedmi iti daga iti las-ud ti sangapulo ket dua a tawen nangrugi a mariribukan ni ari Laman, amangan ta iti ania man a wagas bumileg dagiti tattaok iti daga, ket saanda a maparmek ken maiturong ida iti pannakaadipen.

12 Ita sadut ken ^amanagrukbab iti didiosen a tattao ida; ngarud tinarigagayanda a maiturongkami iti pannakaadipen, tapno bussogenda ti bagbagida kadagiti nagbannoganmi; wen, tapno pagpiestaanda dagiti arban iti talonmi.

13 Ngarud napasamak a rinugian ni ari Laman a mangsugsog kadagiti taona a nasken a makiranget kadagiti tattaok; ngarud nangrugi dagiti gubgubat ken panagsususik iti daga.

14 Ta, iti maikasangapulo ket tallo a tawen a panagturayko iti daga ni Nephi, iti adayo nga abagatan ti Shilom, bayat a papainumen ken pakpakanen dagiti tattaok dagiti arbanda, ken suksukayenda dagiti dagada, adu a buyot dagiti Lamanita ti nangraut kadakuada ket rinugianda a mangpapatay kadakuada, ken mangala kadagiti arbanda, ken mais dagiti talonda.

15 Wen, ket napasamak a naglibasda, amin dagiti saan a naparmek, uray iti siudad ti Nephi, ket nagkiddawda kaniak para iti salaknib.

16 Ket napasamak nga inarmasak ida kadagiti bai, ken dagiti pana, espada, ken palang, ken pang-or, ken palsiit, ken iti amin a kita dagiti armas a mapartuatmi, ket napannak ken dagiti tattaok a makidangadang kadagiti Lamanita.

17 Wen, napankami nakidangadang maibusor kadagiti Lamanita babaen ti bileg ti Apo; agsipud ta sibibileg nga immawagak ken dagiti tattaok iti Apo tapno isalakannakami manipud kadagiti ima dagiti kabusormi, agsipud ta nariingkami iti pannakalagip ti pannakawayawaya dagiti ammami.

18 Ket ^adinengngeg ti Dios ti ararawmi ken sinungbatanna dagiti kararagmi; ket napankami babaen iti bilegna; wen, napankami maibusor kadagiti Lamanita, ket pinapataymi ti tallo ribu ken uppat a gasut ket tallo iti maysa nga aldaw ken maysa a rabii; pinapataymi ida agingga a napapanawmi ida iti dagami.

19 Ket siak, a mismo, babaen dagiti bukodko nga ima, timmulongak a nangitanem kadagiti minatayda. Ket kitaen, iti nalabes a leddaang ken ladingitmi, dua gasut ken pitopulo ket siam ti natay kadagiti kabsatmi.