1 Ao ngkai e koro bukina bwa e anga ueana Tinebi nakon Noa, ae natina te mwaane temanna; mangaia ae e a onea mwiina Noa n tautaeka; ao e aki katotonga maiun tamana.

2 Bwa taraia, e aki kaawakin ana tua te Atua, ma e rimwin kukurein oin nanona. Ao a mwaiti buuna ma ana ^akinano. Ao e ^bkariaia bwa a na karaoa te bure ana botanaomata, ao ni karaoi bwaai aika a ribaki imatan te Uea. Eng, ao a karaoi mwakuri ni ^ckabekaau ma mwakuri riki aika bubuaka n aroia nako.

3 Ao e bairea te angabwai nakon teuana kanimamwakoron aia bwai, kanimamwakoron aia koora ma aia tirewa, kanimamwakoron ^atibi, ma aia kaobwa, ma aia buraati ma aia biti; ao kanimamwakoron aia tiibu; ao kanimamwakoron naba aia wiita.

4 Ao e anai bwaai aikai ni kabane ibukin maiuna, ma buuna ao ana kinano; ma ana ibonga, ma buuia ao aia kinano; mangaia ae e a bon bita aron butin ueana.

5 E kakerikakiia ibonga ni kabane ake a katabuaki iroun tamana, ao e katabuia aika a boou, aika moan te kamoamoa ma ni kan tiroaki, bwa a na onea mwiia.

6 Eng, mangaia are a kamaiuaki n taningarotia, ao n taromauria anti, ao n aia mwakuri ni kabekaau, ma n taian angabwai ake kamatoai te uea ae Noa nakoia ana botanaomata; mangaia are a bekumwaaka te botanaomata ibukin kateimatoan te bure.

7 Eng, a taromauria naba anti, ngkai a keweaki n taeka aika akea nanoia ma ni kababa ake e taekin te uea ma ana ibonga; bwa a bon taetae ni kababa nakoia.

8 Ao e koro bukina bwa e katei kateitei aika moan te bubura te uea ae Noa; ao e katamaroai ni bwai ni katamaroa aika rangi n tamaroa karaoaia man te kai, ao man bwaai aika kakawaki, man te koora, ao te tirewa, ao man te biti, ao man te buraati, ao man te tibi, ao man te kaobwa;

9 E a katea naba te bareti ae moan te mwawawa nanona bon ibukina, ao te kaintoka n uea i nanona, are karaoaki man te kai ae moan te tamaroa ao e katikiraoaki n te koora ao te tirewa ao bwaai riki tabeua aika kakawaki.

10 Ao e tuatua naba nakoia ana tia mwakuri bwa a na karaoi bwaai aika a tamaroa i nanon oon te tembora aika karaoaki man te kai, ao te kaobwa, ao te buraati.

11 Ao e katikiraoi n te koora kaintekateka ake a kaokoroaki ibukiia ibonga aika a rietata, aika a ririeta riki nakon kaintekateka ake tabeua; e katamaroai ni koora ao e tua bwa e na kateaki te kai ni kabwarabwara i mataia, bwa aonga n nangoi rabwataia ma baia iaona ngkana a taekin taeka aika a kewe man akea nanoia nakoia ana botanaomata.

12 Ao e koro bukina bwa e katea te ^ataua i rarikin te tembora; eng, te taua ae moan te rietata, ae koro rietana are ngkana e tei i taubukina ao e kona n noora aon Tiirom mai iai, ao aon naba Tiemron, aika a maeka iai Reimwanaite; ao e kona naba n noori aaba nako ake a katobibia.

13 Ao e koro bukina bwa e tua bwa a na kateaki kateitei aika a mwaiti iaon Tiirom; ao e tua bwa e na kateaki te taua ae rietata iaon te tabuki ae e mena i meangin Tiirom, are e a tia n riki ngkoa bwa te tabo ni kamanomano ibukiia natin Nibwaai n te tai are a birinako iai man te aba; ao e karaoi bwaai aikai man te kaubwai are e reke man taian angabwai ake e katei nakoia ana botanaomata.

14 Ao e koro bukina bwa e maamate nanona riki ni kaubwaina, ao e babane ana tai ni maiuakina te bure ma buuna ma ana kinano aika a mwaiti; ao ai te arona naba ma ana ibonga aika a kabanea aia tai irouia kabekaau.

15 Ao e koro bukina bwa e uniki taian nne ni kurebe aika a mwaiti iaon te aba; ao e katei taabo ni karao wain, ao e karaoi wain aika a mwaiti; ao e a riki bwa te ^atia koro ni mooi wain ae koro, ai uana naba ma ana botanaomata.

16 Ao e koro bukina bwa a ekinakoaki ana botanaomata irouia Reimwanaite, n te mwaiti ae e karako, ao a tiringia i nanon aia tawaana, ngke a tabe n tararuaia aia nanai.

17 Ao e kanakoia ana tautia te uea ae Noa ni kabuta ueana bwa a na tukia; ma e aki tau te mwaiti are e kanakoia, ao Reimwanaite a ekianako ao a tiringiia, ao a kairianako aia nanai mai abaia; ao Reimwanaite a moana tiringakia, ao ni kamwakura aia kairiribai i aoia.

18 Ao e koro bukina bwa e kanakoia ana taanga te uea ae Noa bwa a na kaaitaraia, ao a kakioia nako, ke a kaeia i nanon te tai ae kimototo; mangaia ae a oki ma te kimwareirei ni bwaai ake a reke irouia man te buaka.

19 Ao ngkai, ibukin te tokanikai ae korakora aio ao a onrake nanoia n te kamoamoa n te kan tiroaki; ao a ^akamoamoa aron korakoraia, n taekinna bwa a kona ti nimangaun mai buakoia ni kaaitaraia ngaa ma ngaa tautia aika Reimwanaite; ao e a waaki nako aia kamoamoa, ao a kukurei nanoia n te raraa, ma katinakoan raraaia tariia, ao e riki aio ibukin buakakan aia uea ma buakakaia aia ibonga.

20 Ao e koro bukina bwa iai te mwaane temanna i buakoia ae arana bon ^aAbinataai; ao e tei i buakoia, ao e a moana ana taetae ni burabeti, ni kangai: Taraia, e taku ana taeka te Uea, ao e a tia n tuatua nakoiu, ni kangai, Ko na nako, ao ko na taetae nakoia te botanaomata aio, bwa e kangai te Uea—e na reke kaia te botanaomata aio, bwa I a tia n noori aia mwakuri aika a ribaki, ma aia buakaka, ma aia mwakuri ni kabekaau; ao ngkana a aki rairinanoia ao N na karokoa uniu irouia.

21 Ao ngkana a aki rairinanoia n okira te Uea ae Atuaia, ao taraia, N na kawenea taekaia nako nanon baia aia kairiribai; eng, ao a na reke i aan te ^atautoronaki; ao a na karawawataki i aan baia aia kairiribai.

22 Ao e na koro bukina bwa a na ataia ae ngai bon te Uea ae Atuaia, ao te Atua ae I ^abakantang ngai, ae I katuaeia au botanaomata n aia bure.

23 Ao e na koro bukina bwa ngkana a aki rairinanoia te botanaomata aio nakon te Uea ae Atuaia, ao a na reke i aan te tautoronaki; ao akea ae e na kamaiuia, ma bon ti te Uea ae te Atua ae Moan te Mwaaka.

24 Eng, ao e na koro bukina bwa ngkana a tang nakoiu ao N na ^awaeremwe n ongo tangiia; eng, ao N na kariaia bwa a na konaki irouia aia kairiribai.

25 Ma ngkana a aki rairinanoia ma te nanorinano ao te nano ni koaua, ao ni kakorakoraia n tataro nakon te Uea ae Atuaia, ao N na bon aki ^aongo aia tataro, ke ni kamaiuia man rawawataia; ao aikai ake e taekin te Uea, ao ake e a tia n tua bwa N na taekin.

26 Ngkai e a koro bukina bwa ngke e a tia Abinataai n taekin taeka aikai nakoia ao a un irouna, ao a kataia n anaa maiuna; ma e kamaiua te Uea mai nanon baia.

27 Ao ngke e a tia n ongo te uea ae Noa taian taeka ake taekin Abinataai nakoia ana botanaomata, ao e a un naba; ao e taku: Antai Abinataai, are e na kona ni motika taekau ma taekaia au botanaomata, ke ^aantai te Uea, are e na kona ni karuoa te rawawata ae moan te korakora nakoia au botanaomata?

28 I tua nakoimi bwa kam na uota Abinataai n nakomai, bwa N na tiringnga, bwa e atong bwaai aikai bwa e aonga ni karika te mangaongao ao te un imarenaia au botanaomata, ao ni karika te itabaraara imarenau ma au botanaomata; mangaia ae N na tiringnga.

29 Ao a ^akamatakiaki mataia te botanaomata; mangaia are a ^bkamatoai nanoia ni kaaitarai ana taeka Abinataai, ao a moanna man te tai arei n uaa rekena. Ao e kamatoa nanona te uea are Noa ni kaitaraa ana taeka te Uea, ao e aki rairananona man ana mwakuri aika a buakaka.