BuFakazi bemPhrofethi Joseph Smith
Emavi emPhrofethi Joseph Smith lucobo lwakhe ngekuvela kweNcwadzi yaMormon ngulawa:
“Entsambama yalowo mhlaka 21 ngeNyoni [1823] … ngathandaza ngancusa kuNkulunkulu Somandla. …
“Ngesikhatsi ngisambita Nkulunkulu, ngabona kukhanya kuvela ekamelweni lami, lokwachubeka kwandza likamelo late lakhanya kwendlula imini, lokwatsi masinyane ngaleso sikhatsi kwavela umuntfu eceleni kwembhedze wami, eme emoyeni, ngoba tinyawo takhe betingatsintsi phansi.
“Bekembetse ingubo lecekako lebeyimhlophe ngalokumangalisa kakhulu. Kwakubumhlophe lobendlula konkhe kwasemhlabeni lengake ngakubona; angikholwa futsi kutsi kukhona kwasemhlabeni lokungentiwa kube mhlophe ngalokwecile kuphindze kukhatimule kakhulu kanje. Tandla takhe tatibonakala, ngalokunjalo nemikhono yakhe, ngenhla nje kancane kwesihlakala sesandla; kanjalo netinyawo takhe betibonakala, njengemilente yakhe, ngenhla nje kancane kwetihlakala. Inhloko kanye nentsamo yakhe nako bekubonakala. Ngakhona kubona kutsi bekangakagcoki lutfo lolunye ngaphandle kwalengubo, njengoba yayivulekile, kute ngikhone kubona esifubeni sakhe.
“Kwakungasiyo ingubo yakhe kuphela leyayimhlophe ngalokwecile, kodvwa sicu sakhe sonkhe besikhatimula ngalokungachazeki, buso bakhe ngempela bebunjengembane. Likamelo bese likhanya kakhulu, kodvwa lalingakhanyi kakhulu njengaloko kukhanya lebekumtungeletile. Ngesikhatsi ngicala kumbuka, ngaba nekwesaba; kodvwa kwesaba kwasheshe kwakhwesha kimi.
“Wangibita ngelibito, waphindze watsi kimi usitfunywa lesitfunyelwe kimi lesivela kuNkulunkulu, nekutsi libito lakhe kwakunguMoroni; nekutsi Nkulunkulu bekanemsebenti lebekafuna ngiwente; nekutsi libito lami bekufanele latiwe ngebuhle nangebubi emkhatsini wato tonkhe tive, tihlobo, netilimi, noma bekufanele kukhulunywe kahle nakabi ngalo emkhatsini webantfu bonkhe.
“Watsi kwakunencwadzi lebeyibekiwe, lebeyibhalwe kubongcwengcwe beligolide, iniketa umlandvo ngebantfu labebahlala kulelivekati ngaphambilini, nemsuka lapho badzabuka khona. Wabuye watsi kuphelela kweliVangeli laphakadze bekucuketfwe kuyo, njengoba lanikwa nguMsindzisi kubantfu basendvulo;
“Kanjalo, nekutsi kwakukhona ematje lamabili eluhlakeni lwesiliva—nekutsi lamatje, bekaboshelwe esivikelweni sesifuba, akha loku lokubitwa ngekutsi yi-Urimu neThumimu—bekabekwe nabongcwengcwe; kuba nalamatje nekusetjentiswa kwawo kwakunguloko lobekwenta ‘baboniswa’ emadvulo noma etikhatsini takadzeni; nekutsi Nkulunkulu bekawalungiselele kuhumusha leyo ncwadzi. …
“Ngetulu kwaloko, wangitjela kutsi uma sengibatfolile labo bongcwengcwe lebekakhulume ngabo—ngoba sikhatsi lekufanele batfolwe ngaso besingakagcwaliseki—bekungakafaneli ngibakhombise umuntfu; ngisho nesivikelo sesifuba lesine-Urimu neThumimu; kuphela kulabo lengiyoyaletwa kutsi ngibakhombise; uma ngike ngakwenta loko ngiyobhujiswa. Ngesikhatsi asakhuluma nami ngabongcwengcwe, umbono wavuleka engcodvweni yami kangangoba ngayibona leyo ndzawo lapho labongcwengcwe bebabekwe khona, kwaba sebaleni kwaphindze kwacaca kangangoba ngayati leyo ndzawo ngesikhatsi sengiya kuyo.
“Emvakwalenkhulumo, ngabona lokukhanya ekamelweni sekucala kugcogcana ngekushesha edvute nalomuntfu lobekasolo akhuluma nami, kwachubeka nekwenta njalo late likamelo lasala limnyama futsi, ngaphandle nje kwasedvutane naye; lekwatsi, ngekuphatima kweliso ngabona, shangatsi kuvuleka umhume lofika ezulwini, wabese uyenyuka wate wanyamalala, nelikamelo lasala njengoba belikadze linjalo ngaphambi kwekutsi kuvele loku kukhanya kwasezulwini.
“Ngalala ngicabanga ngalesi sehlakalo lesimangalisako, ngisamangele kakhulu ngalebengikutjelwe ngulesi sitfunywa lebesingakajwayeleki; lokwatsi, ekhatsi nekuzindla kwami, masinyane ngabona kutsi likamelo lami beselicala kukhanya futsi, ngekuphatima kweliso, leso sitfunywa sasezulwini bese sisedvute nembhedze wami futsi.
“Sacala, sakhuluma tintfo letifanako naleto lesasitikhulume ekufikeni kwaso kwekucala, kwabate ngisho naloluncane lushintjo; lesatsi sesikwentile loko, sangatisa ngetehlulelo letinkhulu lebetitawuta emhlabeni, ngembubhiso lenkhulu ngendlala, ngenkemba, ngamashayabhuce wesifo; nekutsi leti tehlulelo letimatima titawuta emhlabeni kulesi situkulwane. Sesitikhulumile letintfo, saphindze senyuka njengoba sasentile ekucaleni.
“Ngalesi sikhatsi, yaseyijule kakhulu imicabango engcondvweni yami, kangangoba ngaphelelwa butfongo, ngalala ngenganywe kumangala ngaloko bengikubonile ngiphindze ngikuvile. Kodvwa lokwangimangalisa kubona futsi leso sitfunywa eceleni kwembhedze wami, ngasiva sikhuluma noma siphindzaphindza kimi leto tintfo letifanako njengasekucaleni; sengeta secwayiso kimi, singitjela kutsi Sathane utawetama kungilinga (ngenca yesimo sebumphofu bemndeni wababe) kutsi ngitfole bongcwengcwe ngenhloso yekutfola umcebo. Kuloku sangivimba, satsi akukafaneli ngibe nalenye inhloso ngekutfola bongcwengcwe ngaphandle kwekudvumisa Nkulunkulu, futsi akukafaneli ngibe nanoma ngusiphi sizatfu ngaphandle kwaleso sekwakha umbuso wakhe; kungenjalo angeke ngibatfole.
“Emvakwaloku kufika kwesitsatfu, saphindze senyukela ezulwini njengasekucaleni, ngaphindze ngasala ngizindla ngaloku lebengisandza kukubona lokungakajwayeleki; lokwatsi cishe masinyane emvakwekutsi sitfunywa sasezulwini senyukile sisuka kimi kwesitsatfu, licudze lakhala, ngatfola kutsi besekusa, kangangoba kukhuluma kwetfu kufanele kube kwakutsetse bonkhe lobo busuku.
“Emvakwesikhashana ngavuka embhedzeni wami, njengalokwejwayelekile, ngahamba ngayawusebenta imisebenti ledzingekile yangalelo langa; kodvwa, ekwetameni kusebenta njengasemihleni, ngatitfola ngiphelelwa ngemandla kangangoba angikhonanga ngisho kwentani. Babe, lobekasebenta nami, wabona kutsi bekukhona lokungalungi ngami, wangitjela kutsi angiye ekhaya. Ngahamba ngitsi ngiya endlini; kodvwa, ngesikhatsi ngetama kweca lutsango ngiphuma ensimini lapho sasikhona, emandla ami aphela nya, ngawela phansi ngangakwati kwenta lutfo, futsi kwesikhashana angatanga lutfo lolwenteka.
“Intfo yekucala lengingayikhumbula bekulivi lelalikhuluma kimi, lingibita ngelibito. Ngabuka etulu, ngabona sona leso sitfunywa sime ngetulu kwenhloko yami, situngeletwe kukhanya njengasekucaleni. Saphindze salandzisa kimi konkhe loko lesasikulandzise ebusuku lobendlulile, sangiyaleta kutsi ngiye kubabe ngimtjele ngembono nangemiyaleto lebengiyitfolile.
“Ngalalela; ngabuyela kubabe ensimini, ngamlandzisa ngako konkhe lobekwentekile. Wangiphendvula ngekutsi kwakukwaNkulunkulu, wangitjela kutsi angihambe ngiyawukwenta njengoba ngiyaletwe sitfunywa. Ngashiya ensimini, ngaya kuleyo ndzawo lapho sitfunywa sasingitjele kutsi bongcwengcwe babekwe khona; futsi ngenca yekucaca kwembono lengangibe nawo ngayo, ngayati leyo ndzawo ngekushesha nje uma ngifika kuyo.
“Madvutane nje nesigodzi saseManchester, esifundzeni yase-Ontario, eNew York, kume ligcuma lelikhulu, leliphakeme kunawo onkhe kulendzawo. Ngasenshonalanga yaleligcuma, dvute nasetulu, ngaphansi kwelitje lelikhulu, bongcwengcwe bebalapho, babekwe ebhokisini lelitje. Lelitje lalingucinsi futsi liyindilinga emkhatsini ngetulu, linciphile ngasemingcengcemeni, kangangoba lingekhatsi lalo lalibonakala ngetulu kwemhlabatsi, kodvwa umngcengcema wonkhe wawumbonywe ngumhlabatsi.
“Sengiwususile umhlabatsi, ngatfola ligwadlulo, lengalifaka ngaphansi kwemngcengcema welitje, ngemandla lamancane nje ngaliphakamisa. Ngabuka ngekhatsi, ngempela ngababona bongcwengcwe, i-Urimu neThumimu, nesivikelo sesifuba, njengoba sitfunywa sasishito. Lelibhokisi letatikulo belakhiwe ngematje lahlanganiswe ndzawonye ngeluhlobo lolutsite lwasemende. Ngaphansi kwelibhokisi bekubekwe ematje lamabili aphambene ebhokisini, ngetulu kwalamatje kubekwe bongcwengcwe kanye naletinye tintfo nabo.
“Ngetama kubatsatsa, kodvwa sitfunywa sangalela, saphindze sangitjela kutsi sikhatsi sekubakhipha sasisengakefiki, noma sasingeke, kute kuphele iminyaka lemine kusukela ngaleso sikhatsi; kodvwa sangitjela kutsi bekufanele ngite kuleyo ndzawo nakanjani emvakwemnyaka kusukela ngaleso sikhatsi, nekutsi sasiyawuhlangana nami lapho, nekutsi bekufanele ngichubeke nekwenta njalo kute kufike sikhatsi sekutfola bongcwengcwe.
“Ngako, njengoba ngangiyaletiwe, ngangiya ekupheleni kwemnyaka ngamunye, futsi njalo nje ngangisitfola sitfunywa sikhona lapho, ngangitfola kukhanyiseleka kanye nelwati kuso njalo nje ekukhulumeni kwetfu, ngalokuphatselene nalobekutawentiwa yiNkhosi, nekutsi umbuso wayo wawutawuphatfwa kanjani futsi ngayiphi indlela ngemalanga ekugcina.
“Emvakwesikhatsi lesidze sefika sikhatsi sekutfola bongcwengcwe, i-Urimu neThumimu, kanye nesivikelo sesifuba. Mhla tingemashumi lamabili nakubili enyangeni yeNyoni, ngemnyaka wenkhulungwane nemakhulu lasiphohlongo nemashumi lamabili nesikhombisa, ngiyile njengalokwejwayelekile ekupheleni kwalomunye umnyaka ngaya lapho betibekwe khona, leso sitfunywa sasezulwini sanginika tona nalomyaleto: kutsi ngibophekile ngato; nekutsi uma ngangiyawutiyekela tisuke kimi ngenca yekungatinaki, noma ngenca yekutiyekelela, kufanele ngehlukaniswe naNkulunkulu; kodvwa uma ngangiyawukwenta yonkhe imetamo yami kutigcina, size sona, sitfunywa, sitilandze, kufanele tivikeleke.
“Ngasheshe ngasitfola sizatfu sekutsi kungani ngitfole imiyaleto leyayicine kangaka yekutsi ngitigcine tivikelekile, nekutsi kungani sitfunywa sasitsite ekubeni ngikwentile lokwakudzingekile esandleni sami, sasiyawufuna ngitibuyise. Masinyane besekwatiwa kutsi nginato, kwaba nemzukuzuku lomkhulu wemetamo leyasentjetiswa kutsi titsatfwe kimi. Onkhe emasu labengentiwa etanywa kufeza leyo nhloso. Kuhlushwa kwaba kubi kakhulu futsi kwaba matima kunakucala, nelinyenti lebantfu belihlala ligadze njalo nje kutitsatsa kimi uma kungenteka. Kodvwa ngekuhlakanipha kwaNkulunkulu, tahlala tivikelekile etandleni tami, ngate ngakufeza loko lobekudzingekile ngato esandleni sami. Lokwatsi, ngalokuhleliwe, sitfunywa satifuna, ngasinika; futsi tikuso kute kube ngulamuhla, kulilanga lesibili kuNkhwekhweti, umnyaka wenkhulungwane nemakhulu lasiphohlogo nemashumi lamatsatfu nesiphohlongo.”
Kute utfole indzaba lephelele, buka Joseph Smith—uMlandvo kulo Ligugu leLinani leLikhulu.
Lombhalo wasendvulo lowavetwa ngalendlela usuka emhlabatsini njengelivi lebantfu likhuluma livela elutfulini, futsi wahunyushelwa elulwimini lwesimanje ngesipho kanye nemandla aNkulunkulu njengobe kwafakazelwa nguNkulunkulu, wakhishwa kwekucala emhlabeni ngesingisi ngemnyaka we-1830 njenge The Book of Mormon.