Sendvulelo
INcwadzi yaMormon ingumculu wemibhalo lengcwele lecatsaniswa neliBhayibheli. Ingumbhalo wetento taNkulunkulu nalabebahlala eMelika endvulo futsi icuketse livangeli leliphelele laphakadze.
Lencwandzi yabhalwa baphrofethi labanyenti basendvulo ngamoya wekuphrofetha kanye newekwembulelwa. Emavi abo abhalwe kubongcwengcwe beligolide, acashunwa futsi afinyetwa ngumphrofethi longumlandzi lobitwa ngaMormon. Lombhalo ulandzisa ngetive letimbili letinkhulu. Sinye sasuka eJerusalema ngemnyaka wema-600 ngaphambi kwekutalwa kwaKhristu futsi muva sahlukana saba tive letimbili, letatiwa ngekutsi ngemaNefi kanye nemaLamani. Lesinye sasuka kudzala kakhulu ngesikhatsi iNkhosi iphambanisa tilimi eMbhoshongweni waseBhabheli. Lelicembu latiwa ngekutsi ngemaJaredi. Emvakwetinkhulungwane teminyaka, tonkhe tabhujiswa ngaphandle kwemaLamani, futsi wona angulabanye bokhokho bemaNdiya aseMelika.
Sigameko lesikhulu kakhulu lesibhaliwe eNcwadzini yaMormon ngumsebenti weNkhosi Jesu Khristu lucobo emkhatsini wemaNefi masinyane nje emvakwekuvuka Kwayo. Sibeka ngalokusobala timfundziso telivangeli, sicacisa ngelisu lensindziso, futsi sitjela bantfu kutsi kufanele benteni kute bazuze kuthula kulemphilo kanye nensindziso yaphakadze emphilweni letako.
Emvakwekutsi Mormon sekayicedzile imibhalo yakhe, waniketa indvodzana yakhe Moroni lendzaba, leyangeta emavi ayo lambalwa futsi yabafihla bongcwengcwe eGcumeni iKhumora. Mhlaka 21 eNyonini, ngemnyaka we-1823, yena kanye loyo Moroni, ngaleso sikhatsi lobekasengumuntfu lokhatimulisiwe, lovukile, wavela kumPhrofethi Joseph Smith futsi wamfundzisa mayelana nembhalo wasendvulo kanye nekuhunyushwa kwawo lokumiselwe elulwimini lwesiNgisi.
Ngesikhatsi lesifanele labongcwengcwe baletfwa kuJoseph Smith, lowabahumusha ngesipho kanye nangemandla aNkulunkulu. Lombhalo manje ukhishwa ngetilwimi letinyenti njengebufakazi lobusha kanye nalobungetiwe bekutsi Jesu Khristu uyiNdvodzana yaNkulunkulu lophilako futsi nekutsi bonkhe labatawuta Kuye nalabahlonipha imitsetfo kanye netimiso telivangeli Lakhe bangasindziswa.
Mayelana nalombhalo umPhrofethi Joseph Smith watsi: “Ngabatjela bomnaketfu kutsi iNcwadzi yaMormon beyingulecondze kakhulu kunato tonkhe tincwadzi emhlabeni, futsi isisekelo senkholo yetfu, futsi umuntfu uyawuba sedvutane naNkulunkulu ngekugcina imiyalo yayo, ngetulu kwanoma nguyiphi lenye incwadzi.”
Ngaphandle kwaJoseph Smith, iNkhosi yalungisela labanye labalishumi nakunye kutsi bababone ngekwabo labongcwengcwe beligolide futsi babe bofakazi labakhetsekile beliciniso kanye nekutsi iNcwadzi yaMormon ivela kuNkulunkulu. Bufakazi babo lobubhaliwe bufakiwe lapha njenge “BuFakazi baboFakazi labaTsatfu” kanye ne “BuFakazi baboFakazi labasiPhohlongo.”
Simema bonkhe bantfu noma ngukuphi kutsi bayifundze iNcwadzi yaMormon, bazindle etinhlitiyweni tabo ngemlayeto lewucuketse, futsi emvakwaloko babute Nkulunkulu, Babe waPhakadze, egameni laKhristu kutsi ngabe lencwadzi iliciniso na. Labo labalandzela lendlela baphindze babute ngelukholo batawuzuza bufakazi beliciniso layo kanye nekutsi ivela kuNkulunkulu ngemandla aMoya loNgcwele. (Buka Moroni 10:3–5.)
Labo labazuza lobu bufakazi baNkulunkulu lobuvela kuMoya loNgcwele batawuphindze bati ngawo lawo mandla kutsi Jesu Khristu nguMsindzisi wemhlaba, nekutsi Joseph Smith ungumembuli kanye nemphrofethi Wakhe kulawa malanga ekugcina, kanye nekutsi LiBandla LaJesu Khristu Lalabangcwele Betinsuku Tekugcina lingumbuso weNkhosi lophindze wamiswa lamhlabeni, kulungiselela Kubuya kwesiBili kwaMesiya.