1 Ao e a koro bukina bwa n aia kaabwi ma uoua n ririki n tautaeka taan moti, i mwin are Moronaaia e a tia ni karekea te rau imarenaia Nibwaite ma Reimwanaite, nooria bon akea temanna ae kaaina te kaintekateka ni motikitaeka; ngaia are e a manga waaki te itabaraaraa i buakoia aomata ni kaineti bwa antai ae e na kaaina te kaintekateka ni motikitaeka.

2 Ao e a koro bukina bwa Ereman, are bon natin Ereman, e a rineaki bwa e na kaaina te kaintekateka ni motikitaeka, n nanoia aomata.

3 Ma nooria, ^aKitekuman, are e a bon tia n tiringa Bwaoraan, e bon tataninga naba bwa e na tiringa Ereman naba; ao e bon boutokaaki irouia ana koraki, ake a tia ni karaoa te berita ae tabu bwa akea ae e na ataa ana mwakuri ae buakaka.

4 Ao bon iai temanna ae arana ^aKateanton, ae rianako rabakauna n taetae ni kawai, ao n ana mwakuri naba, ni karaoa te mwakuri ae raba n tiritiri ao n iraa; ngaia are e a riki bwa aia mataniwi ana koraki Kitekuman.

5 Ngaia are e mwamwanaia, Kitekuman naba, bwa ngkana ngaia bwa e na mena n te kaintekateka ni motikitaeka e na bon anganiia ni kabane ake kaaina ana koraki bwa a na korakora ma n tautaeka i aoia te botanaomata; ngaia are Kitekuman e a ukora tiringakin Ereman.

6 Ao e a koro bukina bwa ngke e waaki nakon te kaintekateka ni motikitaeka bwa e na tiringa Ereman, nooria temanna ana toro Ereman, are e otinako n te bong, ma n tia ni karekea n te anga ni karaba, te atatai ibukin te babaire are e a karaoaki irouia te koraki aei bwa e na tiringaki Ereman—

7 Ao e a koro bukina bwa e kaitibo ma Kitekuman, ao e anganna te kanikina; ngaia are Kitekuman e kaota nakoina oin are e tangiria, are e tangiria bwa e na kairia nakon te kaintekateka ni motikitaeka bwa e aonga n tiringa Ereman.

8 Ao ana toro Ereman ngke e a ataa raoi nanon Kitekuman, are bon oin nanona bwa e na tiritiri ao are bon oin nanoia naba ake a kaaina ana koraki bwa ana tiritiri, ao a na iraa, ao a na tautaeka, (ao bon aio aia babaire ni ^akaraba, ma aia waaki ni kamwamwane ae raba) e taku ana toro Ereman nakon Kitekuman: Ti a nako nakon te kaintekateka ni motikitaeka.

9 Ao ngkanne n te aro aei e bon rangi n rianako iai kukurein Kitekuman, bwa e taku i nanona bwa e nang kakoroa nanon ana babaire; ma nooria ana toro Ereman, i nanon aia tai ni mwananga nakon te kaintekateka ni motikitaeka, e bon ewara buroon Kitekuman, n te aro are e a bwaka n aki kakarongoaa. Ao e birinako ni kaongoa Ereman bwaai ni kabane ake e a tia n noori, n ongo, ma ni karaoi.

10 Ao e a koro bukina bwa Ereman e kananako bwa a na anaaki taan kamwarua aikai ma taan tiritiri, bwa a na tiringaki ni kaineti ma te tua.

11 Ma nooria ngke Kateanton e kunea bwa e tuai ni karairaki Kitekuman, e bon raraoma bwa mwiina e a tiringaki; ngaia are e tua bwa a na rimwia ana koraki. Ao a toua te kawai n otinako man te aba ae karaba, nakon te rereua; ao ngaia are ngke e kananako Ereman bwa a na tauaki a bon aki kona n reke.

12 Ao e na manga taekinaki riki rimwi rongorongon Kateanton aei. Ao ikai are e a toki naba iai aia kaabwi ma uoua n ririki n tautaeka taan moti i aoia ana botanaomata Nibwaai.

13 Ao nooria, ni banen te boki aio kam na nooria bwa ^aKateanton aio e bon riki bwa te tia kabwakaia, eng, e kataia ni kamaunaia ana botanaomata Nibwaai ni kabane.

14 Nooria, I aki kananonaa banen ana boki Ereman, ma I kananonaa banen ana boki Nibwaai, are I anai ma iai rongorongo ni kabane ake I a tia ni koroi.