1 Ao e a koro bukina bwa tarin Iareta, (ngkai mwaitin kaibuke ake a tia ni katauraoaki bon waniwaa), e nako nakon te maunga, are a aranna bwa te maunga are Terem, ibukin rianakon rietatana, ma ni kabuei ma ni koraoi man te bwa atibu aika a uarereke aika tebwi ma onoua; ao a bon mainaina ma n itiaki, n aron te kirati; ao e bon uoti i nanon baina i aon taubukin te maunga, man tang nakon te Uea, ni kangai:

2 O te Uea, ko a tia n taku bwa ti na katobibiaki n te ieka. Ao ngkai nooria, O te Uea ao tai un iroun am toro ibukin mamaarana i matam; bwa ti ataia bwa ko mimitong ao ko maeka i karawa, ao ti bon aki tau i matam; ibukin te bwaka ao a buakaka arora n aki toki; ma e ngae n anne, O te Uea, ko a tia n anganiira te tua bwa ti na weteiko, bwa mai iroum ao ti na karekei bwaai ake a tangiri nanora.

3 Nooria, O te Uea, ko a tia n oroira ibukin ara bure, ma n tia ni katiotioira, ao i nanon ririki aika a mwaiti ao ti a tia ni mena i nanon te rereua; ma e ngae n anne ko a bon tia n nanoangaira. O te Uea, tarataraai ma te nanoanga, ao katannakoa unim mai irouia te botanaomata aio, ao tai kariaia bwa a na rinanon te marawa ae buaka i nanon te roo; ma noori bwaai aika I a tia ni kabuei ma ni karaoi man te bwa.

4 Ao I ataia, O te Uea, bwa iai iroum te mwaaka ni kabane, ao ko kona ni karaoa te bwai ae e na raoiroi ibukin te aomata; ngaia are ringi atibu aikai, O te Uea, katauraoi n tabonibaim bwa aonga n oota nako i nanon te roo; ao a na oota nakoira i nanon kaibuke ake ti a tia ni karaoi, bwa e aonga n reke ara taura i nanon ara tai n rinanon te marawa.

5 Nooria, O te Uea, ko kona ni karaoa aei. Ti ataia bwa ko kona ni kaota mwaakam ae korakora, are e taraa n uarereke n ana atatai te aomata.

6 Ao e a koro bukina bwa ngke e a tia tarin Iareta n taekin taeka aikai, nooria, e arora baina te Uea ma n ringi atibu akekei teuana i mwin teuana n tabonibaina. Ao e kamwawaki te rabuna n ataibwai mai i matan tarin Iareta, ao e noora tabonibain te Uea; ao tarin Iareta e bwaka i matan te Uea, bwa e a oreaki n te maaku.

7 Ao te Uea e nooria bwa tarin Iareta e a tia ni bwaka nako aontano; ao e taku te Uea nakoina: Teirake, e aera ngkai ko bwaka?

8 Ao e taku nakon te Uea: I noora tabonibain te Uea, ao I maaku bwa mwiina ao e oreai; bwa I aki ataia ae iai raraan ma irikon te Uea.

9 Ao e taku te Uea nakoina: Ibukin am onimaki ao ko a tia n noorai bwa N na katokaa i aou te iriko ma te raraa; ao bon akea te aomata ae e a tia n roko i matau ma te onimaki ae rianako n aron ae ko a tia ngkoe; bwa ngke arona bwa tiaki ao ko aki kona n noora tabonibaiu. Ko noora riki ae mwaiti nakon aei?

10 Ao e kaeka: I aki; te Uea, kaotiko nakoiu.

11 Ao e taku te Uea nakoina: Ko kakoauai taeka ake N na taekin?

12 Ao e kaeka: Eng, te Uea, I ataia bwa ko taekina te koaua, bwa bon ngkoe Atuan te koaua, ao ko aki kona ni kewe.

13 Ao ngke e a tia n taekin taeka aikai te Uea, nooria, e kaoti nakoina te Uea, ma n taku: Ibukina bwa ko a atai bwaai aikai ko a kabooaki man te bwaka; ngaia are ko a uotaki nako matau; ngaia ae I kaotai nakoim.

14 Nooria, bon ngai are I katauraoaki ma ni moan te aonaba bwa N na kabooia au botanaomata. Nooria, Ngai Iesu Kristo. Ngai te Tama ao te Nati. E na reke irouia aomata ni kabane te maiu mai irou, ao naake a na kakoaua arau; a na riki bwa natiu mwaane ao natiu aine n aki toki.

15 Ao I bon tuai ma ni kaotai nakon te aomata ae I a tia ni karikia, bwa bon akea te aomata ae e a tia ni kakoauai n aron ae ko a tia ngkoe. Ko nooria ae ko a bon tia ni karikaki ni katotongau. Eng a bon karikaki aomata ni kabaneia man te moantai n ai aron katootongau.

16 Nooria, te rabwata aio, are ko a nooria ngkai, bon rabwatan tamneiu; ao I a tia ni karika te aomata n aron rabwatan tamneiu; ao n aron ae I kaoti nakoim n te tamnei ao N na bon kaoti nakoia au botanaomata n te rabwata.

17 Ao ngkai, Ngai, ae Moronaai, I taku bwa I aki kona ni kabwanina rongorongon bwaai aikai ake a koreaki, ngaia are e a tau naba bwa N na kangai bwa Iesu e bon kaotia nakon te mwaane aio n te tamnei, n aron ao katotongan te rabwata are e kaoti iai nakoia Nibwaite.

18 Ao e karaoa te mwakuri ni ibuobuoki nakoina n aron are e karaoa naba te mwakuri n ibuobuoki nakoia Nibwaite; ao a riki bwaai aikai ni kabane bwa e aonga n ataia te aomata aio bwa bon ngaia te Atua, ibukin mwakuri aika a korakora aika a mwaiti are e a tia te Uea ni kaotia nakoina.

19 Ao ibukin ana atatai te aomata aio ao e a bon aki kona n tauaki bwa e na aki kona n noora are i nanon rabunan te ataibwai; ao e noora tabonibain Iesu, are, ngke e nooria, e bwaka ma te maaku; bwa e ataia bwa bon tabonibain te Uea; ao ai bon akea ana onimaki, bwa e a ataia, ao akea te nanououa.

20 Ngaia are, ibukina bwa iai te ataibwai ae kororaoi ibukin te Atua irouna, ao e a bon aki kona n tauaki mai i nanon rabunan te ataibwai; ngaia are e noora Iesu; ao e karaoa te mwakuri n ibuobuoki nakoina.

21 Ao e a koro bukina bwa e taku te Uea nakon tarin Iareta: Nooria, ko na bon aki kariaia bwa bwaai ake ko a tia n noori man ongo a na buta n te aonaba, ni karokoa are e roko te tai are N na kamimitonga arau n riki n iriko; ngaia are ko na kaikoi bwaai ake ko noori ma n ongo, ma n akea ae ko na kaotia nakon te aomata.

22 Ao nooria, ngkana ko kawarai, ko na koroi ma ni kaini bwa e aonga n ae akea temanna ae kona n ataa nanoia; ao ko na koroi n te taetae ae aki kona ni warekaki.

23 Ao nooria, N na anganiko atibu aika uoua aikai, ao ko na kaini naba ma bwaai ake ko na koroi.

24 Bwa nooria, te taetae are ko na koroboki iai I a tia ni kamangaoa; ngaia are N na karekea te anga are n au tai are i baireia iai ao atibu aikai a na kaota nakon mataia aomata bwaai ake ko na koroi.

25 Ao ngke e a tia te Uea n taekin taeka aikai, e kaota nakon tarin Iareta kaain te aonaba ni kabane ake a tia n riki, ao ni kabane naba ake a na riki; ao e aki karabai mai i matana, ni karokoa tokin aonaba.

26 Bwa e a tia ni kangai nakoina n taai ake ngkoa, bwa ngkana e kakoaua ao e na kaota nakoina bwaai ni kabane—ake a na riai ni kaotaki nakoina; ngaia are te Uea e bon aki kona n taua te bwai teuana mai irouna, bwa e ataia bwa te Uea e kona ni kaoti bwaai ni kabane nakoina.

27 Ao e taku te Uea nakoina: Koroi bwaai aikai ao kaini; ao N na kaoti n oin au tai nakoia natiia aomata.

28 Ao e a koro bukina bwa e tua te Uea bwa e na kaini atibu ake uoua ake e a tia ni karekei, ma n aki kaoti, ni karokoa are e na kaoti te Uea nakoia natiia aomata.