1 Ao ngkai Ngai, ae Moronaai, I a waaki n anga rongorongon Iareta ma tarina.

2 Bwa e a koro bukina bwa i mwin are te Uea e katauraoi ^aatibu ake e uoti tarin Iareta nakon te maunga, e a ruo tarin Iareta man te maunga, ao e bon katikui atibu akekei n taian kaibuke ake a tia ni katauraoaki, kakateuana i taboia; ao nooria, a bon anga te oota nakon te kaibuke.

3 Ao ngaia are te Uea e kariki atibu bwa a na oota n te roo, bwa a na oota mwaane, aine, ao ataei, bwa a na aki riaon raan aika a korakora n te roo.

4 Ao e a koro bukina bwa ngke a tia ni katauraoi aekan amwarake nako, bwa aonga ni maiuiakinna ngkana a mena i aon te ran, ao kanaia naba aia nanai ma aia ikota ni man, ao te man ae aki manana ke taian man ke maan aika a kibakiba are a kona n uoti ma ngaiia—ao e a koro bukina bwa ngke a tia ni karaoi bwaai aikai ni kabane a tokara aia kaibuke ke aia bwaati, ma ni mwananga nako taari, n anga ngaiia nakon te Uea ae Atuaia.

5 Ao e a koro bukina bwa te Uea ae te Atua e karekea te ^aang ae korakora bwa e na uka aon te ran, nakon te aba ni berita; ao ngaia are a kibakiba rake i aon taian nao i mwain te ang.

6 Ao e a koro bukina bwa a mwaiti aia tai are a taunaki i kabin marawa, ibukin naao aika a maunga ake a roko i aoia, ao ibukin naba korakoran ma kakamakun te angi buaka are a riki man unin te ang.

7 Ao e a koro bukina bwa ngkana a taunaki n are i nano ao bon akea te ran ae a kona n ikoaki iai, bwa a ^abono aia kaibuke n aron te raurau, ao a bono n aron ana ^bake Noa; ngaia are ngkana a otabwaniniaki n te ran ae bati a bon tang nakon te Uea, ao e bon uotia rake riki i aon te ran.

8 Ao e a koro bukina bwa te ang e aki toki ukina nakon te aba ni berita i nanon aia tai ni mena i aon te ran; ao ngaia are a kairaki n te ang.

9 Ao a bon ^aanene n nebonebo nakon te Uea; eng, tarin Iareta e bon anene n nebonebo nakon te Uea, ao e ^bkarabwa ma n neboa te Uea ni kabwanina te bong; ao ngke e a roko te bong, e bon aki toki ana nebo nakon te Uea.

10 Ao ngaia are a kairaki; ao akea manin taari are kakamaku ae kona n roko irouia, ao akea naba te kua ae kona ni karekea te uruaki nakoia; ao bon iai irouia te oota ae reitinako, ngkana a mena i aon te ran ke i aan te ran.

11 Ao ngaia are a kairaki i nanon tenibubua ao abwi ma aua te bong i aon te ran.

12 Ao a bon waerake i aon mataniwin biken te aba ni berita. Ao ngke a toua mataniwin biken te aba ni berita waeia a bobaraaki i aon te aba, ma ni kananorinanoia i matan te Uea, ma ni bwaro ranin mataia ibukin te kimwareirei i matan te Uea, ibukin mwaitin ana nanoanga i aoia.

13 Ao e a koro bukina bwa a mwananga nako i aon te aba, ma ni waaki n ribana te aba.

14 Ao Iareta bon iai aman natina mwaane: ao araia bon Iakom, ao Kikare, ao Maa, ao Oria.

15 Ao tarin Iareta e karikiia naba natina mwaane ao aine.

16 Ao mwaitia ^araoraon Iareta ma tarina bon uangaun ma uoman; ao a karikiia naba natiia mwaane ao aine i mwain rokoia n te aba ni berita; ao ngaia are a bon mwaiti.

17 Ao a reireinaki bwa a na ^anakonako ma te nanorinano i matan te Uea ao a bon ^breireinaki naba mai i eta.

18 Ao e a koro bukina bwa a waaki ni kabuta aon te aba, ma ni kariki ao n ribana te aba; ao a bon matoatoa n te aba.

19 Ao tarin Iareta e a moanna ni kara, ao e nooria bwa e nang ruo nakon te rua ni mate; ngaia are e taku nakon Iareta: Ti na ikotiia ara botanaomata bwa ti aonga ni warekiia, bwa ti aonga n ataia mai irouia bwa tera ae a tangiria mai iroura i mwain ae ti nako nakon rua ni matera.

20 Ao a ikotaki aomata n aron aei. Ngkai mwaitia natin tarin Iareta mwaane ao aine bon uangaun ma uoman; ao mwaitia natin Iareta bon tengaun ma uoman, bwa aman natina mwaane.

21 Ao e a koro bukina bwa a bon warekia aia botanaomata; ao i mwin are a tia ni warekiia a bon tangiria mai irouia bwaai ake a tangiria bwa a na karaoi i mwain ae a nakon rua ni mateia.

22 Ao e a koro bukina bwa aomata a tangiria bwa a na rinea ao man ^akabira temanna mai i buakon natiia mwaane bwa e na uea i aoia.

23 Ao ngkai nooria, bon te bwai ae kananokawaki te bwai aio nakoia. Ao e taku tarin Iareta nakoia: E bon koaua bwa te bwai aio e na ^akairi ngkami nakon te tautoronaki.

24 Ma e taku Iareta nakon tarina: Kariaia bwa e na reke aia uea. Ao ngaia are e taku nakoia: Rineia mai i buakoia natira mwaane bwa te uea, are kam bon tangiria.

25 Ao e a koro bukina bwa a bon rinea are ana karimoa n nati tarin Iareta; ao arana bon Bakaake. Ao e a koro bukina bwa e rawa ao e aki kariaia bwa e na riki bwa aia uea. Ao a tangiria aomata bwa e na kairoroaki iroun tamana, ma e rawa tamana; ao e tuangiia bwa a na aki kairoroa te aomata temanna bwa e na riki bwa aia uea.

26 Ao e a koro bukina bwa a bane n rineia tarin Bakaake, ma a bane n rawa.

27 Ao e a koro bukina bwa a rawa naba natin Iareta ake mwaane, ni kabane ma ti temanna; ao Oria e a kabiraki bwa te uea i aoia aomata.

28 Ao e waaki n tautaeka, ao a rikirake aroia aomata; ao e a rianako kaubwaia.

29 Ao e a koro bukina bwa e a mate Iareta, ao tarina naba.

30 Ao e a koro bukina bwa Oria e nakonako ma te nanorinano i matan te Uea, ao e bon uring bwaai aika a korakora are e a tia te Uea ni karaoi ibukin tamana, ao e reireinia naba ana botanaomata bwaai aika a korakora are te Uea e a tia ni karaoia ibukiia aia bakatibu.