Mwakoro 8
E a reke te kakauntaeka ao te itabaraaraa ibukin te abanuea—E katei botaki ni karaba Akiti aika buakaka ae a kabaeaki kaaina n te tuea bwa ana tiringa te uea—Botaki ni karaba aika buakaka bon mai iroun te riaboro ao a karika kamaunakia botanaomata nako—Tientaire n taai aikai a anganaki te taeka ni kauring ibukin botaki ni kamwamwane ni karaba aika a ukoukora kabwakan inaomataia taabo, botanaomata, ao aaba nako.
1 Ao e a koro bukina bwa e karika Oma, ao Oma e uea i mwiina. Ao Oma e karika Iareta; ao Iareta e karikiia natina mwaane ao aine.
2 Ao Iareta e kaitaraa tamana, ao e roko ni maeka n te aba are Eta. Ao e a koro bukina bwa e bon kababaia aomata aika a mwaiti, man ana taeka ni kamwamwane, ni karokoa ae e a reke irouna iteran te abanuea.
3 Ao ngke e a reke irouna iteran te abanuea e a buaka ma tamana, ma ni kairanako tamana nakon te tautoronaki, ma ni kariaia bwa e na mwakuri i nanon te tautoronaki.
4 Ao ngkai, n ana bong n tautaeka Oma e bon mena i nanon te tautoronaki i nanon te maan ae iteran ana bong ni maiu. Ao e a koro bukina bwa e karikiia natina mwaane ao aine, ao iai mai i buakoia aika Etirom ao Koriantamwa;
5 Ao e bon rianako uniia ibukin te bwai are e karaoia tariia are Iareta, n te aro are a kateirakea te taanga ni buaka ma ni buakana Iareta. Ao e a koro bukina bwa a bon buakanna n te bong.
6 Ao e a koro bukina bwa ngke a tia n tiringa ana taanga ni buaka Iareta ao a nang manga bon tiringnga naba; ma e bubutia bwa a na aki tiringnga, ao e na anganako te abanuea nakon tamana. Ao e a koro bukina bwa a bon anganna maiuna.
7 Ao ngkai Iareta e rikirake ni korakora nanokawakina ibukin buan te abanuea, bwa e a tia ni katuka i nanona tangiran te abanuea ao mimitongin te aonaba.
8 Ngkai natin Iareta are te aine e bon rangi ni rianako rabakauna, ao e noora nanokawakin tamana, ao e iangoia bwa e na karaoa te babaire are e na manga kaoka te abanuea nakon tamana.
9 Ngkai natin Iareta are te aine e bon rangi ni rianako tamaroana. Ao e a koro bukina bwa e taetae ni kawai ma tamana, ma n taku nakoina: E aera ngkai e rangi ni korakora nanokawakin tamau? Ko tuai ma ni wareka te rongorongo are a uotia tamara rinanon te marawa are e korakora? Nooria, tiaki bwa iai rongorongoia naake ni kawai, are man aia babaire aika a araba ao a karekei abanuea ma mimitong aika a korakora?
10 Ao ngkai, ngaia are, ke e kananako tamau ibukin Akiti, are natin Kimnoa; ao nooria, I bon rangi n tamaroa, ao N na amwaie i matana, ao N na kakukureia, n te aro are e na tangirai bwa buuna; mangaia are ngkana e tangiriko bwa ko na anganna ngai bwa buuna, ao ko na kangai: N na anganiko ngkana ko uotamai atuun tamau, are te uea.
11 Ao ngkai Oma bon raoraon Akiti, mangaia are, ngke e a tia Iareta ni kananako ibukin wetean Akiti, ao natin Iareta are te aine e mwaie i matana n te aro are e kukurei irouna, n te aro are e tangiria bwa e na bunna. Ao e a koro bukina bwa e kangai nakon Iareta: Anganai bwa bu.
12 Ao Iareta e taku nakoina: N na anganiko, ngkana ko uotamai atuun tamau, are te uea.
13 Ao e a koro bukina bwa Akiti e ikotiia nako nanon mwengan Iareta ana koraki ni kabane, ma n taku nakoia: Kam kona ni berita nakoiu bwa kam na kakaonimaki nakoiu n te bwai are N na tangiria mai iroumi?
14 Ao e a koro bukina bwa a bane ni aberita nakoina, ibukin Atuan karawa, ao ibukin naba karawa, ao ibukin naba te aonaba, ao ibukin naba atuuia, bwa ane e tannako man te ibuobuoki are e tangiria Akiti e na bon kabakuaki roroana; ao ane e kaota te bwai are e na kaotia Akiti nakoia, e na bon bua maiuna.
15 Ao e a koro bukina bwa a bon bane ni kukurei ni boraraoi ma Akiti. Ao Akiti e bon waakina te aberita are a anganaki mai irouia kaaina ngkoa ake a ukoukora naba te kan tautaeka, are e anga te aba rikaaki man ana tai bKain, are te tia tiritiri man te moan tai.
16 Ao a bon kawakinaki ni mwaakan te riaboro bwa a na karaoi berita aikai nakoia aomata, bwa a na tauiia i nanon te roo, ni buokiia ake a ukoukora te kan tautaeka bwa e aonga n reke te mwaaka irouia, ao n tiritiri, ma urubwai ma n anaibwai, ni kewe, ma ni karaoi aekan nako te buakaka ma te waaki ni kabekaau.
17 Ao bon natin Iareta te aine are e karina i nanona ukerakin bwaai ni kawai aikai; ao Iareta e karinna i nanon Akiti ngaia are, Akiti e waaki nakoia ana koraki ao raoraona, ni kairiia nako ibukin ana berita aika a raoiroi bwa a na karaoi bwaai ake e tangiri.
18 Ao e a koro bukina bwa a katea te abotaki ni karaba aika buakaka, n aron are ngkoa; are te botaki ae moan te ribaki ao te kabanea ni buakaka i aoia ni kabane, imatan te Atua.
19 Bwa te Uea e aki mwakuri rinanon botaki ni karaba aika buakaka, ao e aki tangiria naba bwa te aomata e na kawawaea te raraa, ma e a tia ni katabui ni bwaai ni kabane, man ana moan tai te aomata.
20 Ao ngkai Ngai, Moronaai, I aki karaoi aron aia berita ma aia botaki ni kamwamwane, bwa e a tia ni kaotaki nakoiu bwa bon iai i buakoia aomata ni kabane, ao bon iai i buakoia Reimwanaite.
21 Ao a bon karika akamaunakin te botanaomata aio are I taekinia ngkai, ao kamaunakia naba ana botanaomata Nibwaai.
22 Ao te botanaomata are e kamatoai botaki ni karaba aika buakaka, bwa a aonga ni karekea te kan tautaeka ao te raka, ni karokoa ae a kabuta te botanaomata, nooria, a na bon kamaunaki; bwa te Uea e na bon aki kariaia bwa araraaia ana aomata aika itiaki, are e na kawawaeaki irouia, a na aki toki n tang nakoina mai i aantano ibukin te birantaanga i aoia ao e bon aki irantaangaiia.
23 Ngaia are, O ngkami Tientaire, bon ibukin te wanawana iroun te Atua ao a kaotaki bwaai aikai nakoimi, bwa kam aonga n rairinanomi man ami bure, ao tai kariaia bwa botaki ni kamwamwane aika a tiritiri aikai a na tautoroni ngkami, are a kateaki bwa a na karekea te amwaaka ao te raka—ao te mwakuri, eng, te mwakuri n tiritiri e na roko iaomi, eng, e na bwaka iaomi ana kabaang ni momotiraoi te Atua ae Akea Tokina, ao kam na kabwakaki ma ni kamaunaki ngkana kam kariaia bwa a na iai bwaai aikai.
24 Ngaia are, e anga te tua nakoimi te Uea, bwa ngkana kam noori bwaai aikai n roko i buakomi ao kam na uti nakon namakinan aromi ae e aki nakoraoi, ibukin botaki ni karaba aika buakaka; are e na mena i buakomi; ke te maraia nakoina, ibukin raraaia ake a tia n tiringaki; bwa a tang man te tano ibukin irantangakiia iai, ao ibukiia naba ake a kateia.
25 Bwa e a koro bukina bwa ane e kateia e ukoukora kabwakan ainaomataia taabo, botanaomata, ao aaba; ao e kakoroa bukin kamaunakia aomata ni kabane, bwa e bon kateaki iroun te riaboro, are bon taman taian kewe ni kabane; are bon te tia kewe naba are e a tia ni bkamwaneia ara moan karo, eng, are bon te tia kewe naba are e kairoroa te aomata bwa e na karaoa te tiritiri man te moan tai; are e a tia ni kamatoatoai nanoia aomata ao a tia n tiringia burabeti, ma ni karebanaia n te atibu, ma n teweia nako man te moan tai.
26 Ngaia are, Ngai, Moronaai, I a tuangaki bwa N na koroi bwaai aikai bwa e aonga n toki te buakaka, ao bwa e na roko te tai are a na aakea mwaakan Tatan iaon nanoia natiia aomata, ma a na bkairoroaki bwa a na karaoa ae raoiroi n aki toki, bwa aonga n roko nakon te koburake n ran ibukin raoiroi ni kabane ma ni kamaiuaki.