1 Ao e a koro bukina bwa ngke e a marurung Koriantamwa man ikoakina ao e a uring ana ^ataeka Ita ake e a tia n taekin nakoina.

2 E nooria bwa a tia n tiringaki ana botanaomata ae kaan uoua te mirion n te kabaang, ao e a moanna n nanokawaki i nanona; eng, a bon tia n tiringaki uoua te mirion mwaane aika a korakora, ma buuia ao natiia.

3 E a waki n rairananona man te buakaka are e a tia ni karaoia; ao e a moanna n ururing taeka ake a tia n taekinaki ni wiia burabeti ni kabane, ao e nooria bwa a bane ni koro bukiia n te tai aei, ni kabane mwakorokorona; ao e nanokawaki tamneina ao e rawa ni kabebeteaki nanona.

4 Ao e koro bukina bwa e korea ana reta nakon Tiiti, n tangiria bwa e na kamaiuia aomata, ao e na anganako te abaniuea ibukin maiuia aomata.

5 Ao e koro bukina bwa ngke e karekea ana reta Tiiti e korea te reta nakon Koriantamwa, bwa ngkana e anga oin rabwatana, bwa e aonga n tiringnga n oin ana kabaang, ao ngkanne e na kamaiuia aomata.

6 Ao e koro bukina bwa aomata a bon aki rairinanoia man buakakaia; ao ana botanaomata Koriantamwa a bon kakiriweaki n un ni kaaitaraia ana aomata Tiiti; ao ana botanaomata Tiiti a bon kakiriweaki n un bwa a na kaaitaraia ana botanaomata Koriantamwa; ngaia are, ana botanaomata Tiiti a bon buakaniia ana botanaomata Koriantamwa.

7 Ao ngke e nooria Koriantamwa bwa a nang bwaka e a manga birinako riki mai irouia ana aomata Tiiti.

8 Ao e koro bukina bwa e roko nakon ranin Ribiriangkam, are kabwaranakoan nanona e bubura, ke e riaoia ni kabane; ngaia are, ngke a roko nakon raan aikai a bon katei umwaianrianna; ao Tiiti e bon katea naba umwananrianna irarikiia; ao ngaia are n te bong are i mwina a bon buaka.

9 Ao e koro bukina bwa a bon buaka n te buaka ae moan te korakora arona, are e a bon ikoaki riki Koriantamwa iai, ao e tong ibukin nakon raraana ae bati.

10 Ao e koro bukina bwa ana taanga ni buaka Koriantamwa a bon kakioia ana taanga ni buaka Tiiti ao a konaia, n te aro are a biri nako mai irouia; ao a biri nako maiaki, ma ni katea aia umwa n rianna n te tabo are arana Okate.

11 Ao e koro bukina bwa ana taanga ni buaka Koriantamwa a bon katea aia umwaianrianna i rarikin te tabuki are Raamwa; ao bon te tabuki naba are e ^akarabai reekoti aika a tabu iroun te Uea, tamau are Moomon.

12 Ao e koro bukina bwa a bon ikotiia ni kabane aomata i aon te aba, ake a bon tuai n tiringaki, ma tiaki Ita.

13 Ao e koro bukina bwa Ita e noori ni kabane bwaai ake a karaoi aomata; ao e nooria bwa aomata ake a tei ibukin Koriantamwa a bon ikotaki ma ana taanga ni buaka Koriantamwa; ao aomata ake a tei ibukin Tiiti a ikotaki nakon ana taanga ni buaka Tiiti.

14 Ngaia are, i nanon te maan ae aua te ririki ao a bon waaki n ikotiia aomata, bwa aonga ni karekeia ni kabane ake a mena i aon te aba, bwa aonga ni karekea ni kabane te korakora are a kona ni butimwaia.

15 Ao e koro bukina bwa ngke a bane n ikotaki, ni kabane te aomata nakon te taanga ni buaka are e tangiria, ma buuia ao natiia—mwaane, aine ao natiia ma aia bwai ni buaka, otangaia, ao ^aotangan bwabwaia, ma otangan atuuia, ao ma n kunnikainia ni kunnikain te buaka—a bon mwananga ni kaaitaraia i marenaia n te buaka; ao a buaka ni kabwanina te bong, ao a bon aki tokanikai.

16 Ao e koro bukina bwa ngke e a bong, a bon kua, ao a okirikaki nakon aia tabo ni maeka; ao ngke a tia n okirikaki nakon aia tabo ni matu a bon tang n tatakarua ma ni bwaebwaeti ibukin buaia aia botanaomata; ao e a bon kakarongoa korakoran tangiia, ma tatakaruaia ao aia bwaebwaeti, ngaia are e a korakora niniakin te eeaa irouia.

17 Ao e koro bukina bwa n te bong arei a bon nako riki ni buaka, ao bon te bong ae rianako korakorana ma kakamaakuna; ma e ngae n anne a bon aki naba tokanikai, ao ngke e a roko te tairiki a bon manga niniaki te eea riki n tangiia, ma tatakaruaia, ao aia tang ni wenei, ibukin buaia ma tiringakia aia botanaomata.

18 Ao e koro bukina bwa Koriantamwa e a manga korea riki te reta teuana nakon Tiiti, bwa e tangiria bwa e na manga aki roko ni buaka, ma e na anaa te abanuea ao e na kamaiuia aomata.

19 Ma nooria, e aki mena Tamnein te Uea irouia, ao e a korakora ana tautaeka ^aTatan i aon nanoia aomata; bwa a bon ira nanon nanoia aika a matoatoa, ma matakin aia iango are a na kona ni kamaunaki; ngaia are a manga nako riki ni buaka.

20 Ao e koro bukina bwa a buaka ni kabanea te bong anne, ao ngke e a bong a matu i aon aia kabaang.

21 Ao ngke e ingabong a manga buaka riki ni karokoa e a manga bong.

22 Ao ngke e roko te bong a bon ^amanging n uniia, n aron te aomata are e a manging n te wain; ao a matu riki i aon aia kabaang.

23 Ao ngke e ingabong a bon manga buaka riki; ao ngke e a roko te bong a bon bane ni bwaka n te kabaang ma bon ti nimangaun ma uoman ana botanaomata Koriantamwa, ao onongaun ma ruaman ana botanaomata Tiiti n tiku.

24 Ao e koro bukina bwa a bon matu i aon aia kabaang n te tairiki, ao n te ingabong a manga buaka riki, ao a un ma korakoraia ma aia kabaang ao otangaia, ni kabwanina te bong.

25 Ao ngke e a roko te bong ai bon ti teningaun ma uoman ana botanaomata Tiiti, ao uangaun ma itiman ana botanaomata Koriantamwa.

26 Ao e koro bukina bwa a amwarake ao a matu, ao a katauraoi ibukin te mate nakon te ingabong. Ao bon mwaane aika totoa ma ni korakora n aron kabootauan korakoraia aomata.

27 Ao e koro bukina bwa a buaka i nanon te maan ae teniua te aoa, ao a tong ibukin nakon raraaia ae bati.

28 Ao e koro bukina bwa ana aomata Koriantamwa ake a reke marurungiia ae tau ao a kona n nakonako, ao a nang bon birinako ibukin maiuia; ma nooria, Tiiti e teirake, ao ana aomata naba, ao e berita i nanon unna bwa e na tiringa Koriantamwa ke e na mate n te kabaang.

29 Ngaia are, e bon kakioia, ao n te bong are i mwina a bon reke irouna; ao a manga buaka riki n te kabaang. Ao e a koro bukina bwa ngke ^aa tia ni bwaka n te kabaang, bon ti Koriantamwa ao Tiiti aika a maiu, nooria, Tiiti e tong ibukina bwa e korakora raraana n nako.

30 Ao e koro bukina bwa ngke Koriantamwa e a tia n raraa aon ana kabaang ma ni motirawa teutana, e a korea ni kanakoa atuun Tiiti.

31 Ao e koro bukina bwa i mwin are e a tia ni korea ni kanakoa atuun Tiiti, ao Tiiti e teirake i aon baina ao e a bwaka; ao i mwin kibekibena ni kakaea ikena, e a mate.

32 Ao e koro bukina bwa ^aKoriantamwa e bwaka nako aontano, n aiaron ae e a mate.

33 Ao e taetae te Uea nakon Ita, ni kangai nakoina; Nako. Ao e mwananga nako, ma n nooria bwa ana taeka te Uea a bon bane ni kakoroaki bukiia; ao e kabanea ana ^areekoti: (ao katebubuan mwakorona I a bon aki koroia) ao e karaba n te aro are ana botanaomata Rimwaai a bon kunei.

34 Ngkai aikai kabanea n taeka ake a koreaki iroun ^aIta: Ngkana tao nanon te Uea bwa e na bitaki rabwatau, ke tao N na korakai n rabwatau n aron nanon te Uea, e bon aki kakawaki, ngkana arona bwa I a kamaiuaki n uean te Atua. Amen.