1 Ao ngkai Ngai, ae Moronaai, I a waaki ma reekoti. Ngaia are nooria, e a koro bukina bwa ibukin aia ^abotaki ni karaba aika buakaka Akiti ma raoraona, nooria, a bon kabwaka abanuean Oma.

2 Ma e ngae n anne, e bon nanoanga te uea nakon Oma, ao nakon naba natina mwaane ao aine ake a bon aki ukoukora tiringana.

3 Ao te Uea e anga te taeka ni kauring nakon Oma n te mii bwa e na kitana te aba; ngaia are Oma e kitana te aba ma ana utu, ao a mwananga i nanon boong aika a mwaiti, man roko nakon te tabuki are ^aTiim, ma n roko ^bnakon te tabo are a tiringaki iai Nibwaite, ao ma ikekei nako mainiku, ma n roko nakon te aba are e aranaki bwa Aborom, i rarikin mataniwin te bike, ao e katea ana umwanrianna ikekei, ao natina naba mwaane ao aine, ao kaain batana ni kabane, ma ti Iareta ma ana utu ae a aki.

4 Ao e a koro bukina bwa e kabiraki Iareta bwa te uea i aoia aomata, ni baia aika a buakaka; ao e anga natina te aine nakon Akiti bwa buuna.

5 Ao e a koro bukina bwa Akiti e ukoukora maiun taman kaain abana; ao e bubuti nakoia naake e a tia ni berita mangaiia n te berita ni kawai, ao a karekea atuun taman kaain abana, ngke e tekateka i aon ana kaintoka n uea, n taetae ni kawai nakoia ana botanaomata.

6 Ao e a rangi ni korakora butanakon te buakaka ao te botaki ae raba aio n te aro are e a kabuakaka nanoia aomata ni kabane; ngaia are Iareta e a tiringaki i aon ana kaintoka n uea, ao e uea Akiti n onea mwina.

7 Ao e a koro bukina bwa Akiti e a bakantang iroun natina te mwaane, ngaia are e a rokanna n te nne ni kaikain, ma n anganna te amwarake ae rangi n uarereke ke ae bon akea ni karokoa e a mate.

8 Ao ngkai tarin teuare e mate (ao arana bon Nimraa) e un iroun tamana ibukin te bwai are e karaoia tamana nakon tarina.

9 Ao e a koro bukina bwa Nimraa e ikotiia te mwaiti n aomata ae a karako, ao e birinako man te aba, ma n roko ni maeka ma Oma.

10 Ao e a koro bukina bwa Akiti e karikiia riki natina mwaane, ao a tatangiraki irouia aomata, e ngae ngke a tia ni berita nakoina bwa a na karaoi aekan buakaka nako n aron are e tangiria.

11 Ngkai ana botanaomata Akiti a tangira reken ae raka irouia, n aiaron Akiti ae tangira te kan tautaeka; ngaia are natin Akiti ake mwaane, a bon anganiia te mwane, ao a iraki irouia aomata aika a mwaiti riki ibukin aei.

12 Ao e a riki te buaka i marenaia natin Akiti ake mwaane ao Akiti are a waaki i nanon te maan ae ririki aika a bati, eng, ao a kuri n tiringaki aomata ni kabane n te abanuea, eng, bon ni kabane, ma ti teningaun aomata, ao naake a birinako ma kaain batan Oma.

13 Mangaia are Oma e a manga kaokaki nakon abana ni bwaibwai

14 Ao e a koro bukina bwa e a moanna ni kara Oma; ma e ngae n anne, i nanon ana tai ni kara ao e karika Ema; ao e kabira Ema bwa e na uea i mwina.

15 Ao i mwin are e a tia n kabira Ema bwa e na uea ao e noora te rau iaon te aba i nanon te maan ae uoua te ririki ao e a mate naba, i mwin ana boong ni maiu aika a rangi ni mwaiti, ake a bon onrake n te nanokawaki. Ao e a koro bukina bwa Ema e bon onea mwiina n tautaeka, ao e katotonga aron ana waaki tamana.

16 Ao te Uea e waaki ni kanakoa te rekenikai mai iaon te aba, ao e rikirake aron mwengan Ema i aan ana tautaeka Ema; ao i nanon te maan ae onobwi ma uoua te ririki ao a rikirake ni korakora, n te aro are e a korakora kaubwaia.

17 Iai irouia aekan nako uaanikai, ao wiita, ao tirika, ao rinen aika a rarangaki raoi, ao koora, ao tirewa, ao bwaai aika a kakawaki.

18 Ao aekan nako maan aika aai rangaia ao maan n aiaroia kao, ao te kao, ao tiibu, ao beeki, ao kooti, ao aekan nako maan aika a raoiroi ibukin kanaia aomata.

19 Ao iai naba aia ^aaoti, ma aia aati, ao erebwanti, ma kuarom ao kumwam ake a bon bongana iroun te aomata ao ai moaraara riki taian erebwanti ma kuarom ao kumwam.

20 Ao ngaia are te Uea e a bon kabwaroa ana kakabwaia iaon te aba aio, are e bon ^arine i aoia aaba nako; ao e tua bwa ane e taua te aba e na taua nakon te Uea, ke a na ^btiringaki ngkana a tawaa n te bure; bwa N na kabwaroa bwaninin uniu i aoia aekaki aikai, e taku te Uea.

21 Ao Ema e bon karaoa te motikitaeka i nanon te raoiroi ni kabanea ana bong, ao e karikia natina mwaane ao aine aika a mwaiti; ao e karika Koriantam, ao e kabira Koriantam bwa e na uea i mwina.

22 Ao i mwin are e kabira Koriantam bwa e na uea i mwina e maiu i nanon aua te ririki, ao e nora te rau n te aba; eng, ao e nora naba ^aNatin te Raoiroi, ao e kimwareirei ma ni kakatonga i nanon ana bong; ao e mate i nanon te rau.

23 Ao e a koro bukina bwa Koriantam e bon nakonako n aron tamana, ma ni katei kaawa aika a mwaiti ma ni korakora ao e karaoa ae raoiroi nakoia ana botanaomata i nanon ana bong ni kabane. Ao e a koro bukina bwa akea natina ni karokoa ae e a rangi ni kara.

24 Ao e a koro bukina bwa e a mate buuna, bwa ai tebubua ao uoua ana ririki. Ao e a koro bukina bwa Koriantam e a manga anaa buuna, i nanon ana tai ni kara te aine ae rikirake, ao e karikiia natina mwaane ao aine; ngaia are e maiu ni karokoa ae ai tebubua ao abwi ma uoua ana ririki.

25 Ao e a koro bukina bwa e karika Koom, ao Koom e uea i mwina; ao e uea i nanon abwi ma ruaiwa te ririki, ao e karika Eta; ao e karikiia riki natina mwaane ao aine.

26 Ao aomata a butanako riki iaon te aba, ao e a manga waaki te buakaka ae korakora iaon te aba, ao Eta e a manga karaoi babaire ni kawai ake a karaba, bwa e na tiringa tamana.

27 Ao e a koro bukina bwa e kabwaka tamana man ueana, bwa e tiringnga n oin ana kabaang; ao e uea i mwina.

28 Ao a roko burabeti nakon te aba riki, n takaruaea te rairannano nakoia—bwa a na katauraoa kawain te Uea ke e na roko te rekenikai nakon te aba; eng, e na bon iai te rongo ae korakora, are a na bon tiringaki iai ngkana aki rairinanoia.

29 Ma aomata a bon aki kakoauai aia taeka burabeti, ma a teweia nako ao iai tabeman ake a teweaki nako nanon te mwarua ma ni katikuia bwa a na mate. Ao e a koro bukina bwa a karaoi bwaai aikai n aron ana tua te uea, are Eta.

30 Ao e a koro bukina bwa e a roko te rongo ae korakora iaon te aba, ao kaaina a moanna ni mate n te aro ae waekoa ibukin te rongo, bwa bon akea te karau iaon te aba.

31 Ao a roko naeta aika a kamamate iaon te aba naba, ma ni kamateia aomata. Ao e a koro bukina bwa a birinako aia man mai irouia naeta ake a kamamate, nakon te aba are i maiaki, are e aranaki irouia Nibwaite bwa ^aTaraemera.

32 Ao e a koro bukina bwa a bon mwaiti mai i buakoia ake a mate i nanon kawaia; ma e ngae n anne bon iai mai i buakoia ake a birinako nakon te aba i maiaki.

33 Ao e a koro bukina bwa te uea e kariaia ^anaeta bwa a na toki ni kakiokioia, ma ana oona te kawai bwa a na aki kona aomata n riaona, ao ane e kataia n riaona ao e na mate irouia naeta ake a kamamate.

34 Ao e a koro bukina bwa aomata a bon karaoi aia waki maan, ma ni kanii rabwataia ake a mate ake a bwaka i rarikin te kawai, ni karokoa ae a bane ni kang. Ngkai ngke a nooria aomata bwa a nang bon mate ao a ^arairinanoia man aia bure ma n tang nakon te Uea.

35 Ao e a koro bukina bwa ngke a ^ananorinano n te aro ae tau i matan te Uea e bon kabwakaa te karau iaon te aba; ao aomata a manga maiu, ao e a manga reke te uaanikai n te aba i meang, ao n aaba ake i rarikina. Ao te Uea e bon kaota mwaakana nakoia ni kamaiuia man te rongo.