1 Anajwan at walal, wahi’ k’a’ruhaq chik li nawaj raj xyeeb’al aawe; xb’aan naq nink’e reetal naq xikenaq aach’ool chi k’oxlak chirix lix waklijikeb’ li kamenaq chi yo’yo.

2 K’e reetal, ninye aawe, naq maajun wakliik chi yo’yo wan—malaj ut, tinye raj, sa’ jalan chik aatin, naq li k’a’ru a’in li nakam ink’a’ naxk’e chirix li ink’a’ nakam, li k’a’ru a’in li naq’a ink’a’ naxk’e chirix li ink’a’ naq’a—toj chirix xk’ulunik li Kristo.

3 K’e reetal, a’an naxk’e chi uxmank lix waklijikeb’ li kamenaq chi yo’yo. A’ut k’e reetal, at walal, toj maji’ na’ux li wakliik chi yo’yo. Anajwan, ninte chawu jun li muqmuukil na’leb’; a’b’anan wankeb’ k’iila muqmuukil na’leb’ li k’uulanb’ileb’, re naq maa’ani taanawoq re, ka’ajwi’ li Dios xjunes. A’b’an laa’in nink’ut chawu jun li na’leb’ li xinpatz’ok chi yalb’il inq’e chiru li Dios re tinnaw—a’an chirix li wakliik chi yo’yo.

4 K’e reetal, wan jun kutan eetalinb’il naq chixjunileb’ te’elq chaq sa’ xyanqeb’ li kamenaq. Anajwan jo’q’e taachalq li kutan a’in maajun nanawok re; a’b’an li Dios naxnaw li kutan li k’eeb’il.

5 Anajwan, ma jun kutan taawanq, malaj xkab’ li kutan, malaj rox li kutan, naq eb’ li winq te’elq chaq sa’ xyanqeb’ li kamenaq, maak’a’ na’ajman wi’, xb’aan naq li Dios nanawok re chixjunil li k’a’aq re ru a’in, ut tz’aqalin rik’in xnawb’al naq jo’ka’in taawanq—naq wan jun kutan eetalinb’il naq chixjunileb’ te’wakliiq chaq sa’ xyanqeb’ li kamenaq.

6 Anajwan tento taa’uxq naq taawanq xnumik li kutan chirix xkutankil li kamk ut rub’elaj xkutankil li wakliik chi yo’yo.

7 Ut anajwan tinpatz’ k’a’ru te’xk’ul li raameb’ li winq chirix li kutan a’in re kamk, rub’elaj li kutan eetalinb’il choq’ re li wakliik chi yo’yo?

8 Anajwan ma numenaq jun kutan tana’ eetalinb’il re te’wakliiq li winq maak’a’ na’ajman wi’; xb’aan naq moko jun kamikeb’ ta chixjunileb’, ut a’in maak’a’ na’ajman wi’; chixjunil chanchan naq jun kutan chiru li Dios, ut ka’ajwi’ chiruheb’ li winq b’isb’il li kutan.

9 Jo’kan naq wan jun hoonal eetalinb’il chaq choq’ reheb’ li winq naq te’wakliiq chaq sa’ xyanqeb’ li kamenaq; ut wan xnumik li kutan chirix li kamk ut rub’elaj li wakliik chi yo’yo. Ut anajwan, chirix lix numik li kutan a’in, li k’a’ru te’xk’ul li raameb’ li winq, a’an li na’leb’ li xinpatz’ chi yalb’il inq’e re li Dios re xnawb’al; ut a’in li na’leb’ li ak ninnaw wi’ chirix.

10 Ut naq taachalq xq’ehil naq te’wakliiq chixjunileb’, chirix a’an te’xnaw naq li Dios nanawok re chixjunileb’ li kutan li eetalinb’ileb’ chaq choq’ re li winq.

11 Anajwan, chirix k’a’ru xwanjik li aamej chirix li kamk ut rub’elaj li wakliik chi yo’yo—K’e reetal, xk’ehe’ chinnaw xb’aan jun li anjel, naq lix musiq’eb’ chixjunil li winq, naq elenaqeb’ chaq chik sa’ li tz’ejwalej a’in li nakam, relik chi yaal, lix musiq’eb’ chixjunileb’ li winq, us ta useb’ malaj ink’a’ useb’, neke’k’ame’ wi’chik rik’in li Dios a’an li kik’ehok xyu’ameb’.

12 Toja’ ut naq taak’ulmanq, naq lix musiq’eb’ li tiikeb’ xch’ool neke’k’ule’ sa’ jun wanjik re sahil ch’oolejil, a’an hilob’aal na’ajej yeeb’il re, jun wanjik re hilank, jun wanjik re tuqtuukilal, b’ar wi’ te’hilanq chiru chixjunil li rahilal ke’xnumsi ut chiru chixjunil li k’a’uxlej, ut li rahil ch’oolejil.

13 Toja’ ut naq taak’ulmanq, naq lix musiq’eb’ laj maak, relik chi yaal, li ink’a’ useb’—xb’aan naq k’e reetal, eb’ a’an maajun raqal, chi moko xb’ayaqil lix Musiq’ li Qaawa’ neke’xk’ul; xb’aan naq k’e reetal, ke’xsik’ ru li ink’a’ us aj k’anjel chiru li chaab’il; jo’kan naq lix musiq’ laj tza ki’ok rik’ineb’, ut kireechani li rochocheb’—ut eb’ a’in te’tz’eqe’q sa’ li najtil aak’ab’; taawanq yaab’ak, ut ayaynak, ut k’uxuxink ruuch-e, ut a’in xb’aan xmaa’usilaleb’ a’an, rik’in naq ke’b’eresiik chi preexil xb’aan li rajom laj tza.

14 A’in ut xwanjik li raameb’ laj maak, relik chi yaal, sa’ q’ojyin, ut xik’ob’aal ut xuwajel li wankeb’ wi’ chiroyb’eninkil xxamlel lix xik’il xjosq’il li Dios sa’ xb’eeneb’; chi jo’kan neke’kana sa’ li wanjik a’in, ut jo’kaneb’ ajwi’ li tiikeb’ xch’ool sa’ li hilob’aal na’ajej, toj sa’ xq’ehil lix waklijikeb’ chi yo’yo.

15 Anajwan, wankeb’ junjunq li ke’k’oxlank re naq li wanjik a’in re sahil ch’oolejil ut li wanjik a’in re rahil ch’oolejil re li aamej, rub’elaj chaq li wakliik chi yo’yo, a’an jun xb’een wakliik chi yo’yo. Yaal, nink’oxla naq naru naq wakliik chi yo’yo taayeemanq re a’in, naq nawaklesiik li musiq’ej malaj li aamej ut nak’ehe’ sa’ sahil malaj sa’ rahil ch’oolejil, jo’ chanru li aatin li ak yeeb’il.

16 Ut k’e reetal, yeeb’il ajwi’, naq wan jun li xb’een wakliik chi yo’yo, jun xwaklijikeb’ chi yo’yo chixjunileb’ li wanjenaqeb’ malaj li neke’wan, malaj li toj te’wanq, toj sa’ xwaklijik li Kristo chi yo’yo sa’ xyanqeb’ chaq li kamenaq.

17 Anajwan, ink’a’ naqak’oxla naq li xb’een wakliik chi yo’yo a’in, li yeeb’il resil chi jo’ka’in, a’anaq ta naq te’wakliiq li aamej ut te’k’ehe’q sa’ sahil malaj sa’ rahil ch’oolejil. Ink’a’ naru nakak’oxla naq a’in ta li naraj naxye.

18 K’e reetal, ninye aawe naq ink’a’, naraj b’an naxye xjunajinkil wi’chik li aamej rik’in li tz’ejwalej, reheb’ li ke’wan chalen chaq xkutankil laj Adan toj reetal sa’ xwaklijik li Kristo chi yo’yo.

19 Anajwan, ma te’junajiiq wi’chik li raameb’ ut lix xaqalileb’ li ani yeeb’ileb’ resil sa’ jun xikik, laj maak jo’ ajwi’ li tiikeb’ xch’ool, ink’a’ ninye; chitz’aqloq b’an naq tinye naq chixjunileb’ neke’el chaq; malaj sa’ jalan chik aatin, lix waklijikeb’ chi yo’yo nak’ulman rub’elaj lix waklijikeb’ chi yo’yo li ani neke’kam chirix xwaklijik li Kristo chi yo’yo.

20 Anajwan, at walal, moko ninye ta naq lix waklijikeb’ chi yo’yo nachal sa’ xwaklijik li Kristo chi yo’yo; a’b’an k’e reetal, ninye naq k’oxlanb’il inb’aan, naq li aamej ut li tz’ejwalej najunajiik wi’chik, reheb’ li tiikeb’ xch’ool, sa’ lix waklijik li Kristo chi yo’yo, ut lix taqe’jik sa’ choxa.

21 A’b’an ma taawanq sa’ xwaklijik a’an chi yo’yo malaj chirix chik, moko ninye ta; toj b’an a’in ninye, naq wan jun xnumik li kutan chirix li kamk ut rub’elaj lix waklijik li tz’ejwalej chi yo’yo, ut jun xwanjik li aamej sa’ sahil malaj sa’ rahil ch’oolejil toj tixtaw li kutan eetalinb’il xb’aan li Dios, naq eb’ li kamenaq te’elq chaq, ut te’junajiiq wi’chik, li aamej jo’ ajwi’ li tz’ejwalej, ut te’k’ame’q chi xaqliik chiru li Dios, ut taaraqe’q aatin chirixeb’ a’ yaal jo’ chanru xk’anjeleb’.

22 Relik chi yaal, a’in naxk’e chi uxmank lix k’ojlajik wi’chik chixjunil li k’a’aq re ru li yeeb’il resil xb’aan xtz’uumaleb’ re li profeet.

23 Li aamej taak’ojob’aaq wi’chik rik’in li tz’ejwalej, ut li tz’ejwalej rik’in li aamej; relik chi yaal, ut li junjunq chi cha’alej ut b’asalilej taak’ojob’aaq rik’in lix tz’ejwalej, relik chi yaal, moko taasachq ta yal ta jun rismal jolomej; chixjunil b’an li k’a’aq re ru taak’ojob’amanq wi’chik sa’ tz’aqal xxaqalil chi tz’aqal re ru.

24 Ut anajwan, at walal, a’in li k’ojob’ank wi’chik li yeeb’il resil xb’aan xtz’uumaleb’ re li profeet—

25 Toja’ ut naq eb’ li tiikeb’ xch’ool toxe’lemtz’unq chaq sa’ li rawa’b’ejihom li Dios.

26 A’b’an k’e reetal, jun li xik’ob’aal kamk nachal sa’ xb’eeneb’ laj maak; xb’aan naq eb’ a’an neke’kam jo’ chanru li na’leb’ chirix li k’a’aq re ru re tiikilal; xb’aan naq tz’ajeb’ ru a’an, ut maajun k’a’ru tz’aj naru na’eechanink re li rawa’b’ejihom li Dios; neke’isiik chaq b’an, ut k’eeb’ileb’ chixyalb’al li x’uuchin wi’ xk’anjeleb’ malaj xb’aanuhomeb’, li ink’a’ us chaq; ut neke’ruk’ xxelil jun li k’a aj sek’.