1 Ut kik’ulman naq li rey aj Lamoni kixtaqla naq te’xaqliiq lix moos chi uub’ej ut te’xch’olob’ xyaalal chixjunil li k’a’aq re ru ke’ril chirix li na’leb’ a’an.

2 Ut chirix naq chixjunileb’ ak ke’xch’olob’ xyaalal li k’a’aq re ru ke’ril chaq, ut a’an kixtzol chirix lix xaqxookil xch’ool laj Ammon sa’ xkolb’al rix lix ketomq, ut jo’kan ajwi’ lix nimal ru xmetz’ew sa’ xpleetinkileb’ li ke’sik’ok chaq xkamsinkil, kisach xch’ool chi numtajenaq, ut kixye: Relik chi yaal naq moko yal winq ta a’in. K’ehomaq reetal, ma maawa’ a’in li Xnimal ru Musiq’ej li nataqlan re xninqal li tojb’a-maak sa’ xb’een li tenamit a’in, sa’ xk’ab’a’ li kamsink xe’xb’aanu?

3 Ut eb’ a’an ke’xchaq’b’e li rey, ut ke’xye: Ma Xnimal ru Musiq’ej malaj winq a’an ink’a’ naqanaw; a’in b’an naqanaw, naq ^aink’a’ naru nakamsiik xb’aaneb’ li xik’ neke’ilok re li rey, chi moko neke’ru chixjek’inkileb’ lix ketomq li rey naq wan a’an qik’in, xb’aan lix seeb’al ut xnimal lix metz’ew; jo’kan ut, naqanaw naq a’an wan sa’ chaab’ilal rik’in li rey. Ut anajwan, at rey, ink’a’ naqapaab’ naq junaq winq wan ta xnimal li wankilal a’in, xb’aan naq naqanaw naq ink’a’ naru nakamsiik.

4 Ut anajwan, naq kirab’i li rey li aatin a’in, kixye reheb’: Anajwan ninnaw naq a’an li Xnimal ru Musiq’ej; ut xkub’e sa’ li hoonal a’in re xkolb’al rix lee yu’am, re naq ink’a’ ^atexinkamsi jo’ kinb’aanu reheb’ lee ras eeriitz’in. Anajwan a’in li Xnimal ru Musiq’ej li ke’aatinak wi’ li qayuwa’.

5 Anajwan a’in li na’leb’ kanab’anb’il chaq re laj Lamoni, li kixk’ul chaq rik’in lix yuwa’, naq wan jun li ^aXnimal ru Musiq’ej. Us ta neke’xpaab’ naq wan jun li Xnimal ru Musiq’ej, neke’xk’oxla naq chaab’il yalaq k’a’ru li neke’xb’aanu; a’b’anan laj Lamoni q’axal naq ki’ok chi xuwak, rik’in xxiw naq maare anchal ink’a’ us xb’aanu sa’ xkamsinkileb’ lix moos;

6 Xb’aan naq naab’al reheb’ kixkamsi xb’aan naq eb’ li ras riitz’ineb’ ke’xjek’iheb’ chaq lix ketomq sa’ xna’aj li ha’; ut chi jo’kan, xb’aan naq ke’jek’iik chaq lix ketomqeb’ ke’kamsiik.

7 Anajwan a’in xna’leb’eb’ laj Lamanita a’an, xaqliik chire li ha’ Sebus re xjek’inkileb’ lix ketomq li tenamit, re naq chi jo’kan te’xb’eresi sa’ xch’och’eb’ a’an naab’al li ke’jek’iik chaq, ut chi jo’kan na’ux li maq’ok sa’ xyanqeb’.

8 Ut kik’ulman naq li rey aj Lamoni kipatz’ok chiruheb’ lix moos, ut kixye: B’ar wan li winq a’in li wan xnimal li wankilal a’in rik’in?

9 Ut eb’ a’an ke’xye re: K’e reetal, yoo chixk’eeb’al xtzakemqeb’ laa kawaay. Anajwan li rey kixtaqlaheb’ chaq lix moos, rub’elaj chaq li hoonal ke’xk’e wi’ xha’eb’ lix ketomq, naq te’xkawresiheb’ lix kawaay ut lix kareet, ut te’xk’am sa’ li ch’och’ Nefi; xb’aan naq kixaqab’aak xq’ehil jun li nimla ninq’e sa’ li ch’och’ Nefi, xb’aan xyuwa’ laj Lamoni, li wan choq’ rey sa’ xb’een chixjunil li ch’och’.

10 Anajwan naq kirab’i li rey aj Lamoni naq laj Ammon yoo chixkawresinkileb’ lix kawaay ut lix kareet, q’axal wi’chik kisach xch’ool, xb’aan xxaqxookil xch’ool laj Ammon, ut kixye: Relik chi yaal naq moko wanjenaq ta junaq moos sa’ xyanqeb’ chixjunil inmoos li wanjenaq ta chi xaqxo xch’ool jo’ li winq a’in; xb’aan naq a’an najultiko’ re chixjunil lin taqlahom re tixk’anjela.

11 Anajwan ninnaw chi yaal naq a’in li Xnimal ru Musiq’ej, ut tintz’aama raj chiru naq taa’ok wik’in, a’b’an maak’a’ inch’ool chixb’aanunkil.

12 Ut kik’ulman naq chirix naq laj Ammon kixkawresiheb’ li kawaay ut li kareet choq’ re li rey ut eb’ lix moos, ki’ok rik’in li rey, ut kiril naq jalb’il li rilob’aal li rey, jo’kan naq ok raj re chi sutq’iik chaq chiru.

13 Ut jun reheb’ lix moos li rey kixye re: Rabbanah, ut chi k’utb’il xyaalalil li aatin, a’an rey nim xwankil malaj nim ru, xb’aan naq neke’xk’oxla naq wan xnimaleb’ xwankil lix reyeb’; ut chi jo’kan kixye re: Rabbanah, li rey naraj naq tatkanaaq.

14 Jo’kan naq laj Ammon kixsutq’isi li rilob’aal rik’in li rey, ut kixye re: K’a’ru nakawaj naq tinb’aanu choq’ aawe, at rey? Ut li rey ink’a’ kixchaq’b’e chiru xnumik jun hoonal, jo’ chanru neke’rajla li kutan, xb’aan naq ink’a’ naxnaw k’a’ raj ru tixye re.

15 Ut kik’ulman naq laj Ammon kixye wi’chik re: K’a’ru nakawaj wik’in? A’ut li rey moko kichaq’ok ta chiru.

16 Ut kik’ulman naq laj Ammon, rik’in naq nujenaq rik’in lix Musiq’ li Dios, kireek’a chi jo’kan lix ^ak’oxlahom li rey. Ut kixye re: Ma xb’aan naq xawab’i resil naq kinkoleb’ rix laa moos ut laa ketomq, ut kinkamsi wuqub’ reheb’ li ras riitz’in rik’in li jok’ ut li yok’leb’ ch’iich’, ut kinch’oteb’ ruq’ jalaneb’ chik, re xkolb’al rix laa ketomq ut eb’ laa moos; k’e reetal, ma xb’aan a’in lix sachik aach’ool?

17 Ninye aawe, k’a’ put ru naq k’a’jo’ xnimal xsachik aach’ool? K’e reetal, winqin, ut laa’in laa moos; jo’kan ut, yalaq k’a’ru taawaj li tiik, a’an tinb’aanu.

18 Anajwan naq li rey kirab’i li aatin a’in, kikana wi’chik chi sachso xch’ool, xb’aan naq kixk’e reetal naq laj Ammon naru ^achixtz’ilb’al rix lix k’oxlahom; a’b’anan, li rey aj Lamoni kixte xtz’uumal re, ut kixye re: Anihat laa’at? Ma laa’at li Xnimal ru Musiq’ej a’an, li ^bnanawok re chixjunil li k’a’aq re ru?

19 Laj Ammon kichaq’ok ut kixye re: Maawa’in.

20 Ut li rey kixye: Chan ru nakanaw lix k’oxlahom inch’ool? Naru nakat-aatinak chi kaw aach’ool, ut taaye we chirix li k’a’aq re ru a’in; ut ye ajwi’ we k’a’ru chi wankilal kakamsiheb’ ut kach’ot wi’ ruq’eb’ li was wiitz’in li ke’jek’in chaq re lin ketomq—

21 Ut anajwan, wi taaye we chirix li k’a’aq re ru a’in, yalaq k’a’ru taawaj tink’e aawe; ut wi ta taa’ajmanq ru, tinkol raj aawix rik’ineb’ lin teep aj pleet; a’b’an ninnaw naq nim wi’chik aawankil chiru chixjunileb’ a’an; a’b’anan yalaq k’a’ru taawaj wik’in laa’in tink’e aawe.

22 Anajwan laj Ammon rik’in naq chaab’il xna’leb’, a’ut maajun ra naraj, kixye re laj Lamoni: Ma tat-ab’inq chiru li waatin, wi ninye aawe k’a’ru li wankilal ninb’aanu wi’ li k’a’aq re ru a’in? A’an ut a’in li k’a’ru nawaj aawik’in.

23 Ut li rey kichaq’ok chiru, ut kixye: Yaal, tinpaab’ chixjunil laa waatin. Ut chi jo’kan kiteneb’aak rik’in xseeb’al li na’leb’.

24 Ut laj Ammon ki’ok chiraatinankil chi ^akaw xch’ool, ut kixye re: Ma nakapaab’ naq wan jun li Dios?

25 Ut kichaq’ok, ut kixye re: Ink’a’ ninnaw k’a’ru xyaalal a’an.

26 Toja’ ut naq laj Ammon kixye: Ma nakapaab’ naq wan jun li Xnimal ru Musiq’ej?

27 Ut kixye, Hehe’.

28 Ut laj Ammon kixye: A’in li Dios. Ut laj Ammon kixye wi’chik re: Ma nakapaab’ naq li Xnimal ru Musiq’ej a’in, a’an ajwi’ li Dios, kiyiib’ank re chixjunil li k’a’aq re ru wan sa’ choxa ut sa’ li ch’och’?

29 Ut a’an kixye: Yaal, ninpaab’ naq a’an kixyo’ob’tesi chixjunil li k’a’aq re ru wan sa’ li ruchich’och’; a’b’an moko ninnaw ta ru li choxa.

30 Ut laj Ammon kixye re: Li choxa a’an jun li na’ajej b’ar wi’ nawan li Dios ut chixjunileb’ lix santil anjel.

31 Ut li rey aj Lamoni kixye: Ma taqenaq sa’ xb’een li ruchich’och’?

32 Ut laj Ammon kixye: Yaal, ut a’an na’ilok taq’a sa’ xb’eeneb’ chixjunil li ralal xk’ajoleb’ li winq; ut naxnaw chixjunil lix ^ak’oxlahom ut li rajom li ch’oolej; xb’aan naq rik’in ruq’ a’an ke’yo’ob’tesiik chixjunileb’ chalen chaq sa’ xtiklajik.

33 Ut li rey aj Lamoni kixye: Ninpaab’ chixjunil li k’a’aq re ru a’in kaye. Ma taqlanb’ilat chaq rik’in li Dios?

34 Laj Ammon kixye re: Laa’in winqin; ut li ^awinq sa’ xtiklajik kiyo’ob’tesiik jo’ chanru xjalam-uuch li Dios, ut laa’in b’oqb’ilin xb’aan lix Loq’laj Musiq’ re ^bxk’utb’al li k’a’aq re ru a’in chiru li tenamit a’in, re naq taaruuq te’k’ame’q chixnawb’al li k’a’ru tiik ut yaal;

35 Ut jun raqal li ^aMusiq’ej a’an nawan wik’in, li nak’ehok re ^binnawom, jo’ ajwi’ li wankilal jo’ chanru lin paab’aal ut li wajom, li wankeb’ rik’in li Dios.

36 Anajwan chirix naq laj Ammon kixye li aatin a’in, kitikla rik’in lix yo’ob’tesinkil chaq li ruchich’och’, jo’ ajwi’ lix yo’ob’tesinkil laj Adan, ut kixye re chixjunil li k’a’aq re ru chirix lix t’anik li winq, ut kixch’olob’ ut ^akixk’ojob’ chiru li tz’iib’anb’il esil ut ^beb’ li loq’laj tz’iib’anb’il hu reheb’ li tenamit, li yeeb’il xb’aaneb’ li ^cprofeet, chalen chaq sa’ li kutan naq laj Lehi lix yuwa’eb’ ki’el chaq Jerusalen.

37 Ut kixnumsi ajwi’ resil chiruheb’ (xb’aan naq a’an chiru li rey ut chiruheb’ lix moos) chixjunil lix b’eenikeb’ lix yuwa’eb’ sa’ li yamyookil ch’och’, ut chixjunil li rahilal ke’xk’ul rik’in tz’okaak ut chaqi-eel, ut xtawajikeb’, ut xkomon li na’leb’.

38 Ut kixnumsi ajwi’ chiruheb’ chirix lix po’jikeb’ xch’ool laj Laman ut laj Lemuel, ut eb’ li ralal laj Ismael, relik chi yaal, chixjunileb’ lix po’jikeb’ xch’ool kixseraq’i reheb’; ut kixch’olob’ chiruheb’ chixjunil li tz’iib’anb’il esil ut eb’ li loq’laj hu chalen chaq relik laj Lehi aran Jerusalen toj sa’ li kutan wan wi’.

39 A’ut moko ka’aj ta wi’ a’in; xb’aan naq kixch’olob’ chiruheb’ li ^ak’uub’anb’il na’leb’ re li tojb’al-ix, li kikawresiman chalen chaq sa’ xk’ojlajik li ruchich’och’; ut kixk’e ajwi’ chixnaweb’ chirix lix k’ulunik li Kristo, ut chixjunil lix k’anjel li Qaawa’ kixk’e chixnaweb’.

40 Ut kik’ulman, chirix naq kixye chixjunil li k’a’aq re ru a’in, ut kixch’olob’ chiru li rey, naq li rey kixpaab’ chixjunil li raatin.

41 Ut ki’ok chi elajink chiru li Qaawa’, ut kixye: At Qaawa’, chiwanq aawuxtaan, jo’ chanru xnaab’alil laa ^awuxtaan li kawuxtaanaheb’ wi’ ru lix tenamit laj Nefi, chawuxtaana wu, ut ruheb’ lin tenamit.

42 Ut anajwan, chirix naq kixye a’in, kit’ane’ chi ch’och’, chanchan naq kamenaq.

43 Ut kik’ulman naq eb’ lix moos ke’xtaqsi ut ke’xk’am rik’in li rixaqil, ut ke’xyokob’ sa’ xb’een jun li ch’aat; ut kikana chi yokyo chanchan naq kamenaq chiru xnumik wiib’ kutan ut wiib’ q’ojyin, ut li rixaqil, ut eb’ li ralal, ut eb’ lix rab’in ke’yaab’ak sa’ xb’een, jo’ chanru neke’xb’aanu laj Lamanita, ut k’a’jo’ ke’raho’ xch’ool rik’in xsachik.