1 Kwaye kwenzekile okokuba uAlma noAmyuleki bayalelwa ukuba bemke baphume kweso sixeko; baza bemka, baza baphumela nakulo ilizwe laseTsidom; kwaye qaphelani, apho bafumana bonke abantu ababemkile baphuma kulo ilizwe ^alaseAmoniha, ^bababekhutshelwe ngaphandle baza baxulutywa ngamatye, ngenxa yokuba babekholelwa kumazwi ka-Alma.

2 Baza babachazela ngako konke okwenzekileyo kubo ^aabafazi babo nabantwana babo, kananjalo malunga nabo, ^bnangamandla abo okuhlangula.

3 Kwaye noZiyezirom kanjalo walala egula eTsidom, enomkhuhlane otshisayo, owawubangelwa zinkxwaleko ezinkulu zengqondo yakhe ngenxa ^ayenkohlakalo yakhe, kuba wayecinga okokuba uAlma noAmyuleki abasekho; kwaye wayecinga ukuba babulewe ngenxa yobugwenxa bakhe. Kwaye esi sono sikhulu, nezinye izono zakhe ezininzi, zaye zayihlupha ingqondo yakhe yada yababuhlungu ngokugqithisileyo, engenakukhululeka; ke ngoko waqalisa ukugqatswa bubushushu obutshisayo.

4 Ngoku, akuba evile ukuba uAlma noAmyuleki babekwilizwe laseTsidom, intliziyo yakhe yaqalisa ukukhuthazeka; waza wathumela umyalezo ngokonangoko kubo, enqwenela ukuba beze kuye.

5 Kwaye kwenzekile okokuba baya ngoko-nangoko, bethobela umyalezo lowo wayewuthumele kubo; baza bangena ngaphakathi endlwini kuye uZiyezirom; baza bamfumana ephezu komandlalo wakhe, egula, etyhafile kakhulu enomkhuhlane otshisayo; kwaye nengqondo yakhe kanjalo yayixhwaleke ngokugqithisileyo ngenxa yobugwenxa bakhe; waza akubabona wosolulela phambili isandla sakhe, waza wababongoza ukuba bamphilise.

6 Kwaye kwenzekile okokuba wathi uAlma kuye, embamba ngesandla: ^aUyakholelwa na kuwo amandla kaKrestu okusindisa?

7 Waza waphendula kwaye wathi: Ewe, ndiyawakholelwa onke amazwi othe wawafundisa.

8 Waza uAlma wathi: Ukuba uyakholelwa kuyo inkululeko kaKrestu unako ^aukuphiliswa.

9 Waza wathi: Ewe, ndiyakholelwa ngokwamazwi akho.

10 Waza ke uAlma wadanduluka kuyo iNkosi, wathi: Owu Nkosi Thixo wethu, yiba nenceba kuyo le ndoda, uze ^auyiphilise ngokokholo lwayo olukuye uKrestu.

11 Waza akuba uAlma ewathethile la mazwi, uZiyezirom ^awaxhuma wema ngeenyawo zakhe, waza waqalisa ukuhamba; kwaye oku kwenzeka ekukhwankqisekeni okukhulu kwabo bonke abantu; kwaze ukwaziwa kwako oku kwalityhutyha lonke ilizwe laseTsidom.

12 Waza uAlma wambhaptizela eNkosini uZiyezirom; waza waqalisa ukususela kwelo lixa ukushumayela ebantwini.

13 Waza uAlma wamisa ibandla elizweni laseTsidom, waza wangcwalisa ababingeleli notitshala elizweni, ukuba babhaptizele eNkosini nabani na abanqwenela ukuba babhaptizwe.

14 Kwaye kwenzekile okokuba baba baninzi; kuba beza beyimihlambi besuka kuso sonke isithili esirhangqe iTsidom, baza babhaptizwa.

15 Kodwa bona ngokwabo abantu ababekwilizwe laseAmoniha, babesahleli bengabantu abantliziyo ziqaqadekileyo nabantamo zilukhuni; kwaye abazange baguquke ezonweni zabo, ngokubhekisele kuwo onke amandla ka-Alma noAmyuleki kumtyholi; kuba babengabenkolo ^akaNehore, kwaye bengakholelwa enguqukweni yezono zabo.

16 Kwaye kwenzekile okokuba uAlma kwakunye noAmyuleki, ekubeni uAmyuleki ^aeshiye yonke igolide yakhe, nesilivere, nazo zonke izinto zakhe zexabiso, ezazikulo ilizwe laseAmoniha, ngenxa yelizwi likaThixo, ekubeni ^belahliwe ngabo babefudula bezizihlobo zakhe nanguyise kananjalo nezalamane zakhe;

17 Ke ngoko, emva kokuba uAlma emisele ibandla eTsidom, ebona ^aukuzibamba okukhulu, ewe, ebona ukuba abantu babezibambile ngokubhekisele kwikratshi leentliziyo zabo, baza baqalisa ^bukuzithoba phambi koThixo, baza baqalisa ukuzihlanganisa kunye kwiindawo zabo ezingcwele ukuba ^cbanqule uThixo phambi kwesibingelelo, ^dbelindile kwaye bethandaza ngamaxesha onke, ukuze babe nokukhululwa kuSathana, nakuko ^eukufa, nakuyo intshabalalo—

18 Ngoku njengokuba benditshilo, uAlma ekubeni ezibonile zonke ezi zinto, ke ngoko wathabatha uAmyuleki waza wawelela kwilizwe laseZarahemla, waza wamthabathela kweyakhe indlu, waza wamsikelela kwiinkxwaleko zakhe, waza wamomeleza eNkosini.

19 Kwaye waphela njalo oweshumi unyaka wolawulo lwabagwebi phezu kwabantu bakaNifayi.