1 Anajwan wan sa’ lix chaq’rab’ laj Mosiah naq li junjunq chi winq li wan choq’ aj raqol aatin chirix li chaq’rab’, malaj eb’ li xaqab’anb’ileb’ choq’ aj raqol aatin, te’xk’ul xtojb’aleb’ jo’ xnajtil li kutan ke’k’anjelak wi’ re raqok aatin sa’ xb’eeneb’ li ke’k’ame’ chiruheb’ re taaraqe’q aatin chirixeb’.

2 Anajwan wi jun li winq wan xk’as rik’in jalan chik, ut ink’a’ naraj xtojb’al li k’a’ru tento sa’ xb’een, a’an kijite’ chiru laj raqol aatin, ut laj raqol aatin kixk’anjela li wankilal, ut kixtaqlaheb’ laj taql re taak’ame’q li winq chiru; ut kixraq aatin chirix li winq jo’ chanru li chaq’rab’ ut li yaalalil li nak’ute’ chirix, ut chi jo’kan namine’ ru li winq chixtojb’al k’a’ru xk’as, malaj taamaq’e’q chiru li k’a’ru re, malaj taa’isiiq chaq sa’ xyanqeb’ li tenamit jo’ aj elq’ ut aj maq’onel.

3 Ut laj raqol aatin naxk’ul choq’ xtojb’al jo’ chanru lix kutan—jun senin oor chiru jun kutan, malaj jun senum plaat, a’an juntaq’eet xtz’aq rik’in jun senin oor; ut a’in jo’ chanru li chaq’rab’ li k’eeb’il.

4 Anajwan a’ineb’ xk’ab’a’ li jalan jalanq raqal lix ooreb’, ut lix plaateb’, jo’ chanru xtz’aqeb’. Ut k’eeb’ileb’ li k’ab’a’ej xb’aaneb’ laj Nefita, xb’aan naq ink’a’ neke’ajlan jo’ chanru xna’leb’eb’ laj Judio li wankeb’ chaq Jerusalen; chi moko neke’b’isok jo’ chanru neke’xb’aanu laj Judio; ke’xjal b’an li ajlank ut li b’isok, jo’ chanru lix k’a’uxleb’ li tenamit ut chanru neke’wan, sa’ li junjunq tasal tenamit, toj sa’ rawa’b’ejileb’ laj raqol aatin, ut ^akixaqab’aak chaq xwankil a’an xb’aan li rey aj Mosiah.

5 Ut a’an a’in rajlankil—jun senin oor, jun seon oor, jun xum oor, ut jun limnah oor.

6 Jun senum plaat, jun amnor plaat, jun ezrom plaat, ut jun onti plaat.

7 Jun senum plaat juntaq’eet xtz’aq rik’in jun senin oor, ut jun reheb’, xtz’aq jun b’iis li cebada, ut jo’kan ajwi’ jun b’iis li junjunq paay chi iyaj nak’uxman.

8 Anajwan lix tz’aq jun seon oor, a’an xtz’aq wiib’ chi senin.

9 Ut jun xum oor a’an xtz’aq wiib’ seon.

10 Ut jun limnah oor a’an xtz’aq chixjunileb’.

11 Ut jun amnor plaat juntaq’eet rik’in wiib’ senum.

12 Ut jun ezrom plaat juntaq’eet rik’in kaahib’ senum.

13 Ut jun onti juntaq’eet rik’in chixjunileb’.

14 Ut a’in xtz’aq li kok’ ajl jo’ chanru neke’ajlan—

15 Jun xiblon a’an xyijach jun senum; jo’kan naq jun xiblon choq’ re lix ka’jach jun b’iis chi cebada.

16 Ut jun xiblum a’an xyijach jun xiblon.

17 Ut jun leah a’an xyijach jun xiblum.

18 Ut a’in rajlankileb’, jo’ chanru neke’ajlan.

19 Anajwan jun antion oor juntaq’eet xtz’aq rik’in oxib’ xiblon.

20 Anajwan, a’an junes re te’xk’ul xtumin, xb’aan naq neke’xk’ul xtojb’aleb’ jo’ chanru li tojb’ileb’ wi’ chi k’anjelak, jo’kan ut, neke’reek’asiheb’ li tenamit re taa’uxq li tuub’ank-ib’, ut li k’iila paay chi choqink ut maa’usilal, re naq taawanq chik li k’anjel te’toje’q wi’, re naq te’ruuq ^achixk’ulb’al xtumineb’ jo’ chanru li jitok li nak’ame’ chiruheb’; jo’kan naq ke’reek’asiheb’ li tenamit re xjitb’al laj Alma ut laj Amulek.

21 Ut laj Tzeesrom a’in ki’ok chixpatz’b’al li na’leb’ re laj Amulek, ut kixye: Ma teesume junjunq inpatz’om li tinpatz’ eere? Anajwan laj Tzeesrom a’an jun winq li seeb’ xna’leb’ sa’ lix ^ak’oxlanb’il na’leb’ laj tza, re taaruuq tixsach li k’a’ru chaab’il, jo’kan naq a’an kixye re laj Amulek: Ma teesume li na’leb’ tinpatz’ eere?

22 Ut laj Amulek kixye re: Yaal, wi jo’kan naraj lix ^aMusiq’ li Qaawa’, li wan wik’in, xb’aan naq maak’a’ tinye li moko naxk’am ta rib’ rik’in lix Musiq’ li Qaawa’. Ut laj Tzeesrom kixye re: K’e reetal, wahi’ waqib’ onti plaat, ut chixjunil a’in tink’e aawe wi taaye naq maak’a’ jun Dios li nataqlan re chixjunil.

23 Anajwan laj Amulek kixye: At ^aralal xb’alb’a, k’a’ut naq ^bnikinaawaale? Ma nakanaw naq li tiikeb’ xch’ool moko neke’xq’axtesi ta rib’ chiru xkomon a’ aaleek a’in?

24 Ma nakapaab’ naq maak’a’ jun li Dios? Ninye aawe, ink’a’, nakanaw b’an naq wan jun li Dios, a’ut li ^atumin a’an q’axal wi’chik nakara chiru a’an.

25 Ut anajwan xinaatik’ti’i chiru li Dios. Laa’at kaye we—K’e reetal li waqib’ onti a’in, tertookeb’ xtz’aq, tink’e aawe—naq wan sa’ aach’ool naq ink’a’ taak’e we, ut ka’ajwi’ kawaj naq tintz’eqtaana xyaalal li tz’aqal ut li yo’yookil Dios, re taataw rajb’al naq tinaasach. Ut anajwan k’e reetal, taak’ul aaq’ajkamunkil xb’aan li nimla maa’usilal a’in.

26 Ut laj Tzeesrom kixye re: Nakaye naq wan jun tz’aqal ut yo’yookil Dios?

27 Ut laj Amulek kixye: Yaal, wan jun li tz’aqal ut yo’yookil Dios.

28 Ut laj Tzeesrom kixye: Ma wan chik xkomon li Dios chiru li jun?

29 Ut a’an kichaq’ok, Ink’a’.

30 Anajwan laj Tzeesrom kixye wi’chik re: Chan ru naq nakanaw li k’a’aq re ru a’in?

31 Ut a’an kixye: Jun li ^aanjel kixk’e chinnaw.

32 Ut laj Tzeesrom kixye wi’chik: Ani a’an li taachalq? Ma a’an li Ralal li Dios?

33 Ut a’an kixye re: Yaal.

34 Ut laj Tzeesrom kixye wi’chik: Ma tixkol lix tenamit ^asa’ xmaakeb’? Ut laj Amulek kichaq’ok ut kixye re: Ninye eere naq moko tixb’aanu ta, xb’aan naq a’an ink’a’ naru naq tixtz’eqtaana xyaalal li raatin.

35 Anajwan laj Tzeesrom kixye re li tenamit: Cheril naq chijultiko’q eere li k’a’aq re ru a’in, xb’aan naq kixye naq jun ajwi’ li Dios wan; a’b’an naxye naq taachalq li Ralal li Dios, a’ut naq moko tixkol ta lix tenamit—chanchan raj naq wan xwankil chixtaqlankil li Dios.

36 Anajwan laj Amulek kixye re: K’e reetal naq kattik’ti’ik, xb’aan naq kaye naq kin’aatinak jo’ raj wan inwankil chixtaqlankil li Dios rik’in naq kinye naq a’an ink’a’ tixkol lix tenamit sa’ xmaakeb’.

37 Ut ninye wi’chik eere naq moko naru ta chixkolb’aleb’ sa’ ^axmaakeb’; xb’aan naq ink’a’ naru nintz’eqtaana xyaalal li raatin, ut a’an kixye naq ^bmaajun k’a’ru tz’aj naru taa’eechaninq re li ^cawa’b’ejihom re choxa; jo’kan ut, chan put ru naq texruuq chi kole’k, wi ink’a’ nekereechani li awa’b’ejihom re choxa? Jo’kan naq moko texruuq ta chi kole’k sa’ lee maak.

38 Anajwan laj Tzeesrom kixye wi’chik re: Li Ralal li Dios, ma a’an tz’aqal li Junelik Yuwa’b’ej?

39 Ut laj Amulek kixye re: Relik chi yaal, a’an tz’aqal li ^aJunelik Yuwa’b’ej re choxa ut re ch’och’, ut ^bchixjunil li k’a’aq re ru wan chi sa’; a’an lix tiklajik ut li roso’jik, li xb’een ut xraqik;

40 Ut a’an taachalq sa’ li ^aruchich’och’ re ^bxtojb’al rix lix tenamit; ut ^ctixk’ul sa’ xb’een li q’etok aatin reheb’ li neke’paab’ank re lix k’ab’a’; ut a’aneb’ a’in li te’wanq xyu’am chi junelik, ut maa’ani chik aj-e nachal li kolb’a-ib’.

41 Jo’kan naq eb’ laj maak neke’kana chanchan naq ^amaajun tojb’al-ix ki’uxman, ka’ajwi’ naq taahite’q xb’ak’leb’ li kamk; xb’aan naq k’ehomaq reetal, taachalq li kutan naq ^bchixjunileb’ te’wakliiq chaq sa’ xyanqeb’ li kamenaq ut te’xaqliiq chiru li Dios, ut ^ctaaraqe’q aatin chirixeb’ jo’ chanru xk’anjeleb’.

42 Anajwan, wan jun li kamk, li kamk re li yu’am a’in nayeeman re, ut lix kamik li Kristo tixhit ^axb’ak’leb’ li kamk a’in re li yu’am a’in, re naq chixjunileb’ te’waklesiiq chiru li kamk re li yu’am a’in.

43 Li musiq’ej ut li tz’ejwalej ^ate’junajiiq wi’chik chi tz’aqal re ru te’k’utunq; li cha’alej jo’ ajwi’ li b’asalilej te’k’ojob’aaq wi’chik sa’ tz’aqal xxaqalil, jo’ chanru ajwi’ naq wanko sa’ li hoonal a’in; ut took’ame’q chi xaqliik chiru li Dios, chi taqanaw jo’ chanru nokonawok anajwan, ut ^bjultikaq qe chi kutankil chixjunil li ^cmaak wan sa’ qab’een.

44 Anajwan, li k’ojob’aak wi’chik a’in taachalq re chixjunil, jo’ tiix jo’ saaj, jo’ moos jo’ ach’ab’anb’il, jo’ winq jo’ ixq, jo’ aj maak jo’ li tiik xch’ool; ut moko taasachmanq ta yal ta jun rismal xjolomeb’; chixjunil b’an ^ataak’ojob’amanq wi’chik sa’ xxaqalil chi tz’aqal re ru, jo’ chanru naq wan anajwan, malaj sa’ li tz’ejwalej, ut taak’ame’q ut taajite’q chiru lix raqleb’aal aatin li Kristo Alalb’ej, ut li Dios ^bYuwa’b’ej, ut li Loq’laj Musiq’ej, a’an ^cjunaj chi Junelik Dios, re ^dtaaraqe’q aatin chirixeb’ jo’ chanru xk’anjeleb’, ma useb’ malaj ink’a’ useb’.

45 Anajwan, k’ehomaq reetal, kexwaatina chirix lix kamik li tz’ejwalej nakam, ut jo’kan ajwi’ chirix lix ^awaklijik chi yo’yo li tz’ejwalej nakam. Ninye eere naq li tz’ejwalej a’in li nakam ^bnawaklesiik sa’ jun ^ctz’ejwalej li ink’a’ nakam, malaj chiru li kamk, a’an chiru li xb’een kamk toj sa’ li yu’amej, re naq ^dink’a’ chik te’ruuq chi kamk; ut te’junajiiq lix musiq’eb’ rik’in lix tib’eleb’, chi maajo’q’e chik te’xjach rib’; chi jo’kan li jun xaqalil na’ok choq’ ^emusiq’ejil winq li ink’a’ neke’kam, re naq ink’a’ chik te’ruuq chixk’ulb’al li q’aak.

46 Anajwan, naq kixchoy laj Amulek li aatin a’in eb’ li tenamit ke’ok wi’chik chi sachk xch’ooleb’, ut jo’kan ajwi’ laj Tzeesrom ki’ok chi siksotk. Ut chi jo’kan kiraqe’ li raatin laj Amulek, malaj ut a’in chixjunil li xintz’iib’a.