1 Natan agawa a say komasiamaplo tan sakey a taon so linmabas tan saya so anem a lasus a taon nanlapu ed panaon ya intaynan nen Lehi ed Jerusalem; tan dia ed saya a taon si Lachoneus so pañgulo ya okom tan gobernador ed saman a dalin.

2 Tan si Nephi, say laki ya anak nen Helaman, so sinmipot a pinmaway ed dalin na Zarahemla, ya initer to so pakaoley ed laki ya anak to a si Nephi, a sikato so sankapañguloan a laki ya anak to, so nipaakar ed saray piligo a gansa, tan amin a kasulatan a nisinop, tan amin a beñgatla ya insinop a sagrado nanlapu ed intaynan nen Lehi a pinmaway ed Jerusalem.

3 Dia ed saya sikato so tinmaynan a pinmaway ed saman a dalin, tan no iner so nila to, angapo so too a makapikabat; tan say laki ya anak to a si Nephi so añgisinop ed saray kasulatan ed lugar to, on, say kasulatan a nipaakar ed saya a totoo.

4 Tan agawa a dia ed kagapo na komasiamaplo tan dua a taon, nia, saray profesiya na saray profeta so ginmapo la a nasumpal a nagnap; tan wala so saray ginmapo a makapakelaw a pakapatnagan tan makapakelaw ira a milagro so sinmabi ed limog na saray totoo.

5 Balet wala so arum a ginmapo a nankuan a say panaon so linmabas la nipaakar ed kasumpal na saray salita, a saraya so sinalita nen Samuel, a Lamanite.

6 Tan ginapoan da so mangayaga ed saray kaagian da, a kuan da: Nia say panaon so linmabas la, tan saray salita nen Samuel so ag asumpal; dia ed ontan, say gayaga tan pananisia yo nipaakar ed saya a beñgatla so naandian la na kakanaan.

7 Tan agawa a nangawa ra na maksil ya iñgal ed amin a dalin; tan saray totoo ya anisia ginmapo ra a manermen, ag la piga dia ed antokaman a pamaakaran saraman a beñgatla ya asalita so ag la nagawa.

8 Balet nia, sikara so nambantay ya andi-tonda ed saman so agew tan saman a labi a saya so manmaliw a siñga sakey labat ya agew a siñga angapo so labi, pian nakabatan da a say pananisia ra so ag naandian na kakanaan.

9 Natan agawa a wala so sakey ya agew ya imbiig na saray aliwan mananisia, ya amin ya anisia ed saraman so ugali a tinawir sikara so pateyen da likud no say pakapatnagan so nagawa, a saya so initer nen Samuel a profeta.

10 Natan agawa sanen si Nephi, say laki ya anak nen Nephi, anengneng to so saya a karelmeñgan na saray totoo to, say puso to so maermen a mapalalo.

11 Tan agawa a sikato so linma a pinmaway tan intewek to so inkasikato ed dalin, tan nampikasi a maksil ed Dios to onkana ed saray totoo to, on, saraman so ñgalñgali la naderal lapu ed pananisia ra ed ugali a tawir na kaamaan da.

12 Tan agawa a sikato so nampikasi a maksil ed Katawan ed loob na sanagew; tan nia, say voces na Katawan so sinmabi ed sikato, a nankuan:

13 Itangwam so ulom tan manliket ka a maong; tan nia, say panaon asinger la, tan dia ed saya a labi niiter so pakapatnagan, tan dia ed kaimbuasan siak so onsabi ed mundo, pian ipanengneng ko ed mundo a sumpalen ko ya amin so saraman so ingangan ko a salitaen ed panamegley na sañgi na saray masanto a profetak.

14 Nia, siak so onsabi ed inkasiak a dili, a manumpal ed amin a beñgatla ya impakabat ko ed saray anak na totoo manlapu ed inletneg na mundo, tan pian gawaen ko so linawa, na mandapag ya Ama tan say Anak—ed Ama lapu ed siak, tan ed Anak lapu ed laman ko. Tan nia, say panaon so asinger la, tan dia ed saya a labi niiter la so pakapatnagan.

15 Tan agawa a saray salita a sinmabi ed kinen Nephi so asumpal, unong a saraya so asalita; tan nia, dia ed inselek na agew, angapo so biluñget; tan saray totoo ginmapo ra ya onkelaw lapu ed angapo so biluñget sanen sinmabi so labi.

16 Tan wala so dakel, ed saray ag-anisia ed salita na saray profeta, so niparukol ed dalin tan siñga ra inatey, lapu ed kabat da a say baleg a plano na kadederal ya imparaan da onkana ed saraman so anisia ed saray salita na saray profeta so ag natuloy; lapu ed saray pakapatnagan a niiter so nagagawa la.

17 Tan sikara so ginmapo ed pikakabat a say Anak na Dios so ag-mabayag sikato so ompatnag; on, dia ed antikey a salita, amin a totoo ed tapew na dalin manlapu ed sagur ya anga ed bokig, mandapag dia ed dalin ed baybay tan dalin ed abalaten, sikara so mapalalo a kinmelaw kanian sikara so niparukol ed dalin.

18 Lapu ed kabat da a saray profeta pinaneknekan da so saraya a beñgatla ed loob na dakel a taon, tan saray pakapatnagan a niiter so nagagawa la; tan ginmapo ra ya ontakot lapu ed saray karelmeñgan da tan say ag da panisia.

19 Tan agawa ya angapo so biluñget ed saman a labi, balet maliwliwawa a siñga kaaguan. Tan agawa a say agew so binmutay ed kaimbuasan lamet, unong ed gendat ya ipapaway to; tan amta da a dia ed saman ya agew say Katawan so nianak, lapu ed say pakapatnagan a niiter.

20 Tan agawa, on, say amin a beñgatla, angan say sankamelagan a kabiañgan, unong ed saray salita na saray profeta.

21 Tan agawa met a sakey a balo a bitewen so linmetaw, unong ed salita.

22 Tan agawa a nanlapu ed saya a panaon wala so saray ginmapo a tilaan a sinmabi ed limog na saray totoo, ed panamegley nen Satanas, pian paaweten to so saray puso ra, ed gagala pian ag ira manisia ed saraman a pakapatnagan tan pakelaw ya anengneng da; balet manwari ya ontan a wala so saray panagtila tan panagpalikdo say dakel a kabiañgan na saray totoo so anisia, tan apasimbalo ra ed Katawan.

23 Tan agawa a si Nephi so linma ed limog na saray totoo, tan ontan met wala so dakel, so bininiagan to onkana ed pambabawi, lapu ed saya wala so baleg a pamaandi na saray kasalanan. Tan dia ed onia saray totoo ginmapo ra lamet a nawalaan na kareenan ed saman a dalin.

24 Tan angapo so saray baliñgaan, likud ed saray pigara a ginmapo a nampulong, a panseseetan da a paneknekan ed panamegley na saray masanto a kasulatan ya ag la nakaukolan a sumpalen so saray gangan nen Moises. Natan dia ed saya a beñgatla sikara so aliñgo, lapu ed ag da atalusan so saray masanto a kasulatan.

25 Balet agawa ya ag abayag sikara so apasimbalo, tan sikara so akuyong ed saray liñgo a kawalaan da, lapu ed nipakabat ed sikara a say gangan so ag ni asumpal, tan saya so nakaukolan a nasumpal anga ed sankamelagan a kabiañgan; on, say salita so sinmabi ed sikara a saya so nakaukolan a nasumpal; on, angan sakey a tulnek odino melag a tanda so ag onlabas anga ed nasumpal ya amin; kanian dia ed saman lamlamang a taon sikara so naawit ed kakabatan ed saray liñgo ra tan impatua ra so saray kasalanan da.

26 Tan dia ed onia linmabas so komasiamaplo tan dua a taon, ya añgawit na maliket a balita ed saray totoo lapu ed saray pakapatnagan ya agawa, unong ed saray salita ya improfesiya na amin a masanto a profeta.

27 Tan agawa a say komasiamaplo tan talo a taon so linmabas met ed kareenan, likud labat ed saray matatakew a Gadianton, a manaayam ed saray kapalandeyan, a sikara so mamapairap ed saman a dalin; tan ontan la so biskeg na panaamotan da tan saray maamot a pasen da kanian saray totoo ag da ra nadaeg; dia ed ontan, sikara so nangawa na dakel a panagpatey, tan sikara so nangawa na dakel a panagpatey ed limog na saray totoo.

28 Tan agawa a dia ed komasiamaplo tan apat a taon sikara so dinmakel ed bilang, makaseñgeg wala so dakel a sinmian a Nephite a binmatik ed sikara, a señgegan na baleg ya ermen ed saraman so Nephite ya atilak ed saman a dalin.

29 Tan wala met so señgegan na baleg ya ermen ed limog na saray Lamanite; tan nia, dakel so saray anak da so binmaleg tan ginapoan da so binmiskeg ed taon, tan sikara so nanoley ed sikara a dili, tan sikara so iniarawi na arum a Zoramite, ed panamegley na saray panagtila ra tan makasagiat a salita ra a mitipon ed saray matatakew a Gadianton.

30 Tan dia ed onia saray Lamanite so asigen-sigen met, tan ginmapo ya onlasay ed pananisia ra tan inkamatunong da, lapu ed karelmeñgan na saray ontotubo a kailalakan.