1 Tan natan agawa a sanen si Jesus sinampotan to la so saraya a salita inwandag to so mata to ed kaliberliber ed saray karaklan, tan inkuan to ed sikara: Nia, nadñgel yo so saray beñgatla ya imbañgat ko sakbay na intokutok ko ed Amak; dia ed ontan, siopaman a makanunot ed saraya ya imbagak tan gawaen to so saraya, sikato so paolien ko ed bilay dia ed sampot ya agew.

2 Tan agawa a sanen si Jesus imbalikas to so saraya a salita alikas to a wala so pigara ed limog da so mankelaw, tan nankelaw no anto so gawaen to ed say gangan nen Moises; tan ag da atalusan so saray imbaga na saray kadaanan a beñgatla so linmabas la, tan amin a beñgatla nanmaliw a balo.

3 Tan inkuan to ed sikara: Ag kayo mankelaw ed impañgibagak ed sikayo a saray kadaanan a beñgatla so linmabas la, tan amin a beñgatla so nanmaliw la a balo.

4 Nia, ikuan ko ed sikayo a say gangan a niiter ed si Moises so asumpal la.

5 Nia, siak so saman so añgiter na gangan, tan siak so saman so akipaknaan ed saray totook ya Israel; dia ed ontan, say gangan ed siak so asumpal, tan linma ak dia a manumpal ed say gangan, dia ed ontan saya la so nansampot.

6 Nia, ag ko dederalen so saray profeta, tan no kaonoñgan karakel so ag asumpal ed siak, tua ikuan ko ed sikayo, saraya ya amin so nasumpal.

7 Tan lapu ed inkuan ko ed sikayo a saray kadaanan a beñgatla so linmabas la, ag ko dederalen so saraman so asalita la nipaakar ed saray beñgatla a saraya so onsabi.

8 Tan nia, say paknaan a ginawak ed saray totook so ag ni asumpal ya amin; balet say gangan a niiter ed si Moises so nansampot la ed siak.

9 Nia, siak so gangan, tan liwawa. Onnengneng kayo ed siak, tan mansiansia kayo ya anga ed sampot, tan sikayo so mambilay; tan dia ed saraman so mansiansia ya anga ed sampot dia ed sikara iter ko so andi-angaan a bilay.

10 Nia, initer ko ed sikayo so saray gangan; dia ed ontan sumpal yo so saray gangan ko. Tan saya so gangan tan saray profeta, lapu ed sikara so peteg a nampaneknek ed siak.

11 Tan natan agawa a sanen si Jesus imbalikas to so saraya a salita, inkuan to ed saray labindua a sikara so pinili to.

12 Sikayo so saray disipulos ko; tan sikayo so liwawa ed saya a totoo, a sikara so nakdaan ed kailalakan nen Jose.

13 Tan nia, saya so dalin a tawir yo; tan say Ama so añgiter ed saya ed sikayo.

14 Tan angapo ni so angan sakey a panaon a say Ama initer to ed siak so gangan ya ibagak so saya ed saray kaagian yo ed Jerusalem.

15 Ni say wala so panaon a say Ama initer to ed siak so gangan ya ibagak ed sikara so nipaakar ed sananey a tribo ed kailalakan na Israel, a sikara so indawat na Ama a papaway ed saman a dalin.

16 Saya labat so ingangan na Ama ed siak, ya ibagak ed sikara:

17 A wala so arum ni a karnero a kayarian ko ya aliwa a kabiañgan na saya a pastolan; a sikara met so nakaukolan ya awiten ko, tan deñgelen da so voces ko; tan wala so saksakey a pastolan, tan saksakey a managpastol.

18 Tan natan, lapu ed kinatalker na teñger da tan ag-pananisia ag da atalusan so salitak; dia ed ontan siak so ingangan na Ama ya ag ko la bitlaen so nipaakar ed sikara.

19 Balet, tua, ikuan ko ed sikayo a say Ama ginangan to ak, tan ibagak so saya ed sikayo, a sikayo so nisian ed limog da lapu ed karelmeñgan da; dia ed ontan lapu ed karelmeñgan da kanian sikayo so ag da akabatan.

20 Tan tua, ikuan ko ed sikayo lamet a wala ni so arum a tribo ya insian na Ama ed sikara; tan lapu ed karelmeñgan da kanian sikara so ag da kayo akabatan.

21 Tan tua ikuan ko ed sikayo, a sikayo so kipaakaran na sinalitak: Wala so arum ni a karnero a kayarian ko ya ag kabiañgan na saya a pastolan; a sikara met so nakaukolan ya awiten ko, tan deñgelen da so voces ko; tan wala so saksakey a pastolan, tan saksakey a managpastol.

22 Tan ag da ak atalusan, lapu ed impasen da a saya so nipaakar ed saray Gentiles; tan ag da atalusan a saray Gentiles so napasimbalo ed pananisia ed panamegley na saray pulong da.

23 Tan ag da ak atalusan ya imbagak a deñgelen da so voces ko; tan ag da ak atalusan a saray Gentiles kapigan man ag da nareñgel so voces ko—tan ag ko met ipanengneng so inkasiak ed sikara likud ed panamegley na Espiritu Santo.

24 Balet nia, nadñgel yo a mandapag so voces ko, tan anengneng yo ak; tan sikayo so karnerok, tan sikayo so nibilang ed limog na saray initer na Ama ed siak.