1 Tan natan nia, angapo so angan sakey a mabilay a kamarerua ed limog na saray totoo na Nephite so nanduarua ed angan sankamelagan a salita na amin na saray masanto a profeta a nansalita; lapu ed akabatan da a saraya so ag-nasaew a nasumpal.

2 Tan akabatan da a si Cristo so sinmabi la, lapu ed saray dakel a pakapatnagan a niiter la, unong ed saray salita na saray profeta; tan lapu ed saray beñgatla ya agawa la kabat da a nakaukolan a saraya ya amin a beñgatla so nagawa unong ed asalita la.

3 Dia ed ontan inlingwan da ya amin so saray kasalanan da, tan saray karumsisan da, tan saray inkabalangkantis da, tan nanlingkor ira ed Dios ed amin a seet ed agew tan dia ed labi.

4 Tan natan agawa a sanen inala ra ya amin so saray matatakew a nipañgaw, dia ed onia angapo so akabatik ya ag da pinatey, impisok da so saray adakep ed pañgawan, tan ingangan da a say salita na Dios so nipulong ed sikara; tan no kaonoñgan so mambabawi ed saray kasalanan da tan onloob ed sakey a paknaan ya ag la ra mamatey kapiganman niiter ed sikara so kawayañgan da.

5 Balet no kaonoñgan so saray ag linmoob ed paknaan, tan intuloy da ni so saraman so maamot a panagpatey ed puso ra, on, no kaonoñgan karakel so saray arumog a nambebesñgaw na panagtaktakot sumpa ed saray kaagian da sikara so atutolan tan adusa unong ed gangan.

6 Tan dia ed onia sinampotan da ya amin so saray marelmeng, tan maamot, tan saray marumsis a pannununoñgan, a dia ed saya so kawalaan na ontan la a karakel na karelmeñgan, tan dakerakel ya agawa a panagpatey.

7 Tan dia ed onia linmabas so komaduamplo tan dua a taon, tan ontan met ed taon a komaduamplo tan talo, tan say komaduamplo tan apat, tan say komaduamplo tan lima; tan dia ed onia linmabas so duamplo tan lima a taon.

8 Tan dakerakel so saray beñgatla ya agawa, a dia ed mata na saray arum, so sakey a makabaliksan tan makapakelaw; manwari ya ontan, saraya ya amin so ag nisulat ed saya a libro; on, saya a libro ag to la nilugan so angan say kakalasus na saray agawa ed limog na agay la a karakel a totoo ed loob na duamplo tan lima a taon;

9 Balet nia wala so saray kasulatan a nilugan ya amin so saray agawa ed saraya a totoo; tan antikey balet tua a kasulatan so initer nen Nephi.

10 Dia ed onia ginawak so saray kasulatan ko ed saraya a beñgatla unong ed kasulatan nen Nephi, a saraya so nitatak ed saray piligo a tatawagen na piligo nen Nephi.

11 Tan nia, itatak ko so kasulatan ed saray piligo a ginawak ed dili a limak.

12 Tan nia, siak so atawag a Mormon, ya atawag ya imboloy ed dalin na Mormon, say dalin ya añgiletnegan nen Alma na simbaan ed limog na saray totoo, on, say inmuna a simbaan a niletneg ed limog da kayari na impankasalanan da.

13 Nia, siak so disipulo nen Jesu Cristo, say Anak na Dios. Siak so tinawag to a mañgibawag na salita to ed limog na saray totoo to, pian nawalaan ira na andi-angaan a bilay.

14 Tan kinaukolan a siak, unong ed linawa na Dios, pian saray pikakasi na saraman so akauna la a sinmipot, a sikara so masanto, so nasumpal unong ed pananisia ra, a gawaen so sakey a kasulatan na saraya a beñgatla ya agawa—

15 On, melag a kasulatan na saray agawa nanlapu ed saman a panaon ya intaynan nen Lehi ed Jerusalem, ya anga ed saya a panaon.

16 Dia ed ontan gawaen ko so saray kasulatan ko manlapu ed saray kasulatan ya initer na saray akauna nen say siak, ya anga ed ingapo na saray agew ko;

17 Tan dia ed onia gawaen ko so kasulatan na saray beñgatla ya anengneng ko ed dili a matak.

18 Tan amtak a say kasulatan a ginawak so maptek tan matua a kasulatan; angaman ontan wala so dakerakel a beñgatla ya, unong ed salita mi, ag ko nayarian ya isulat.

19 Tan natan sampotan ko la so balikas ko, nipaakar ed siak a dili, tan ipatuloy ko la ya iter so kasulatan na saray beñgatla ya akauna nen say siak.

20 Siak si Mormon, tan peteg a kapolian nen Lehi. Wala so pankatunoñgan ko a mañgidayew ed Dios ko tan Manañgilaban ko a si Jesu Cristo, lapu ed impaway to so saray ama mi ed dalin na Jerusalem, (tan angapo so arum a makapikabat likud ed sikato a dili tan saray impaway to ed saman a dalin) tan initer to ed siak tan saray totook so dakel a kakabatan nipaakar ed kilalaban na saray kamarerua mi.

21 Petepeteg binendicionan to so kailalakan nen Jacob, tan sikato so mapañgasi ed saray boleg nen Jose.

22 Tan unong a saray anak nen Lehi sinumpal da so saray gangan to binendicionan to ra tan pinaaliguas to ra unong ed salita to.

23 On, tan petepeteg ya awiten to lamet so saray nakdaan ed boleg nen Jose ed pikakabat ed Katawan a Dios da.

24 Tan petepeteg ya unong a say Katawan mabilay, tiponen to a manlapu ed apatira a sukong na dalin so amin a nakdaan ed boleg nen Jacob, a sikara so nitaytayak ed amin a tapew na dalin.

25 Tan unong a sikato so akipaknaan ed amin a kailalakan nen Jacob, iñgen say paknaan ya impipaknaan to ed kailalakan nen Jacob so nasumpal ed dili a panaon to, anga ed kipawil na kailalakan nen Jacob ed pikakabat na paknaan a saya so akipaknaan to ed sikara.

26 Tan dia ed saman nakabatan da so Mananundon da, a si Jesu Cristo, say Anak na Dios; tan dia ed saman sikara so natipon manlapu ed apatira a sukong na dalin a paarap ed saray dili a dalin da, no iner so nanlapuan da nen sikara so nansisian; on, unong a say Katawan so lawas mabilay saya so nasumpal. Amen.