1 Tan natan agawa dia ed komalabinanem a taon nanlapu ed insabi nen Cristo, si Lachoneus, say gobernador ed saman a dalin, so akaawat na sakey a sulat a nanlapu ed pañgulo tan gobernador na saya ya olop na saray matatakew; tan saraya so salita a nisulat, a nankuan:

2 Lachoneus, sankamagalañgan tan pañgulo a gobernador na saya a dalin, nia, insulat ko so saya a sulat ed sika tan iter ko ed sika so mapalalo a dayew lapu ed elet mo ya ag-nagiing, tan ontan met ed elet na saray totoom, a pagnanayonen yo so ipapasen yo a pankatunoñgan tan kawayañgan yo; on, sikayo so akatalindeg ya ag-nagiing, a siñga kayo tutuloñgan na lima na sakey a dios, ed pañgiagel ed kawayañgan yo, tan kayarian yo, tan bansa yo, odino saya so tatawagen yo na ontan.

3 Tan ipapasen ko a sakey ka a pakaskasi ed siak, sankamagalañgan a Lachoneus, a sakey ka a makulang-kulang tan andi-kana no ipapasen mo a nayarian mo so ontalindeg ya onsumpa ed ontan la a karakel na masesebeg a lalaki a wala ed silong na sankaatageyan a pakapanyarik, a natan ed saya a panaon akatalindeg ira a siaayura, tan manaalagar ira a tekep na baleg a pampirawat ed salita—Onla kayo ya ondugpa ed saray Nephite tan deral yo ra.

4 Tan siak, unong ed kakabatan ko ed espiritu ra ya ag patalo, lapu ed sikara so asubok la ed lawak na labanan, tan dia ed pikakabat ko ed andi-angaan a busol da ed sika makaseñgeg ed dakel ya aliwa a makatunoñgan a ginawam ed sikara, dia ed ontan no sikara so onla sumpa ed sika sikayo so dalawen da na sigpot a kadederal.

5 Dia ed ontan insulat ko so saya a sulat, tan kinapotan ko ed dili a limak, a sililikna ak ed pankaabigan yo, lapu ed elet yo ya ag-nagiing ed saman so sisiaen yo a pankatunoñgan yo, tan say magalang ya espiritu yo ed lawak na labanan.

6 Dia ed ontan isulat ko ed sika, lapu ed pilalek ko ya isuko yo ed saraya so totook, so saray ciudad yo, saray dalin yo, tan saray kayarian yo, nen say sikayo so dalawen da na espada tan say kadederal so onsabi ed sikayo.

7 Odino dia ed sananey a salita, isuko yo so inkasikayo ed sikami, tan mitipon kayo ed sikami tan mikabat kayo ed saray maamot a kimey mi, tan manmaliw kayo a kaagian mi pian sikayo so manmaliw a siñga sikami—aliwa ya aripen mi, balet kaagian mi tan kamuyong mi ed amin a pambibilay mi.

8 Tan nia, sambaan ko ed sika, no saya so gawaen mo, tekep na samba, sikayo so ag naderal; balet no ag yo gawaen so saya, sambaan ko ed sika katekep to so samba, a dia ed ontumbok a bulan igangan ko so saray ñgayew ko ya onlasur sumpa ed sikayo, tan ag da amperen so saray lima da tan angapo so iligyas da, balet sikayo so pateyen da, tan idapo ra so saray espada da ed sikayo, anga ed sikayo ya amin so sigpot a naandi.

9 Tan nia, siak si Giddianhi; tan siak so gobernador na saya a maamot a muyoñgan nen Gadianton; a saya a muyoñgan tan saray kimey to so kabat ko a maong; tan saraya so ginagawa la ed kadaanan a panaon tan saraya so niawat ed sikami.

10 Tan isulat ko so saya a sulat ko ed sika, Lachoneus, tan mailalo ak ya iawat yo so saray dalin yo tan saray kayarian yo, ya angapo la so onterter a dala, pian saraya a totook napapawil da so saray pankatunoñgan da tan say oley, a sikara so sinmian ya inmarawi ed sikayo lapu ed karelmeñgan yo ed impansamsam yo ed saray pankatunoñgan da ed panañgoley, tan likud no saya so gawaen yo, ibales ko so aliwa a kagagawa yo ed sikara. Siak si Giddianhi.

11 Tan natan agawa a sanen naawat nen Lachoneus so saya a sulat sikato so nikelawan na mapalalo, lapu ed ontan la a sebeg nen Giddianhi ed pañgipasuot to ed pankayarian to ed dalin na saray Nephite, tan ontan met ed panagtaktakot to ed saray totoo tan pañgibales to ed saray aliwa a kagagawa na saraman so ag akaawat na aliwa, bangbalet sikara so nangawa na aliwa ed inkasikara a dili lapu ed insian da ya inmarawi ra a linma ed saray marelmeng tan marumsis a matatakew.

12 Natan nia, saya a Lachoneus, say gobernador, so sakey a too a matunong, tan ag nataktakot ed saray panagpasuot tan panagtaktakot na sakey a matakew; dia ed ontan ag to sinisia so sulat nen Giddianhi, a gobernador na saray matatakew, balet ingangan to ed saray totoo to ya ontawag ira ed Katawan onkana ed biskeg sumpa ed panaon a saray matatakew so ondugpa sumpa ed sikara.

13 On, sikato so añgipaakseb na pakabat ed limog na saray totoo, a tiponen da so saray bibii, tan saray anak da, saray karnero tan baka ra, tan amin a nakaukolan da a pambilay, likud ed saray dalin da, ed sakey a pasen.

14 Tan ingangan to so pañgipaalagey na saray salimbeñgan ed kaliber-liber da, tan nakaukolan a saraya so mabisbiskeg. Tan ingangan to so saray ñgayew, mandapag a saray Nephite tan saray Lamanite, odino amin a nibilang ed limog na saray Nephite, so ipasen a bantay ed kaliber-liber pian bantayan da ra, tan iagel da ra ed saray matatakew no labi tan agew.

15 On, inkuan to ed sikara: Unong a say Katawan so mabilay, likud no sikayo so mambabawi ed amin a karelmeñgan yo, tan mikasi kayo ed Katawan, ag kayo nilaban ed lima na saray matatakew a Gadianton.

16 Tan agay la a kinabaleg tan makapakelkelaw so saray salita tan saray profesiya nen Lachoneus a saraya so añgiter na takot ed saray totoo; tan ginawa ra so angaan na pakayari ra unong ed saray salita nen Lachoneus.

17 Tan agawa a si Lachoneus so anuro na pinagkapañgulo na saray kapitan ed amin a ñgayew na saray Nephite, a mañgikurang ed sikara ed panaon a saray matatakew so ompaway ya onlasur ed saray kalawakan sumpa ed sikara.

18 Natan say sankaatageyan ed limog na amin a pañgulo na saray kapitan tan sikato so sankaatageyan a manañgigangan ed amin a ñgayew na saray Nephite so aturo, tan say ñgaran to Gidgiddoni.

19 Natan saya so kaugalian ed limog na amin a Nephite so manuro na pañgulo na saray kapitan, (likud labat ed panaon na karelmeñgan) na sakey a too a wala ed sikato so espiritu na puyan tan ontan met na profesiya; dia ed ontan, saya a Gidgiddoni so sakey a bantog a profeta ed limog da, tan sikato met so pañgulo ya okom.

20 Natan saray totoo inkuan da ed kinen Gidgiddoni: Mampikasi ka ed Katawan, tan sikatayo so onla ed tuktok na saray kapalandeyan tan dia ed saray kalawakan, pian sikatayo so ondugpa ed saray matatakew tan sikara so deralen tayo ed saray dalin da a dili.

21 Balet si Gidgiddoni inkuan to ed sikara: Say Katawan ag to iabuloy; tan no sikatayo so onla ya ondugpa ed sikara say Katawan iawat to itayo ed saray lima da; dia ed ontan iparaan tayo so inkasikatayo a dili ed pegley na saray dalin tayo, tan tiponen tayo ya amin so saray ñgayew tayo, tan sikatayo so ag ompegdat sumpa ed sikara, balet sikatayo so manalagar anga ed sikara so ondago sumpa ed sikatayo; dia ed ontan unong a say Katawan so lawas a mabilay, no onia so gawaen tayo sikara so iawat to ed saray lima tayo.

22 Tan agawa a dia ed komalabimpito a taon, sanen mansampot la so taon, say pakabat nen Lachoneus so akasabi la ed amin a pasen na dalin, tan inala ra so amin a kabayo ra, tan saray karwahe ra, tan amin a baka ra, tan amin a manok da, tan saray ayayep da, tan saray dawa ra, tan amin a pambilay da, tan sikara so nanakar a nilibo tan tungal a samplora a nilibo, ya anga ed akasabi ra ed aturo a pasen a pantitiponan da, pian iagel da so inkasikara sumpa ed saray kabusol da.

23 Tan say pasen ya aturo so say dalin na Zarahemla, tan say dalin a wala ed baetan na Zarahemla tan say dalin na Bountiful, on, anga ed ketegan na dalin na Bountiful tan dalin na Apalis.

24 Tan wala so dakerakel a nilibo a totoo a sikara so tinawag a Nephite, a nantitipon a nanoolop ed saya a dalin. Natan si Lachoneus ingangan to a mantitipon ira a manoolop ed dalin a mamaabalaten, lapu ed baleg ya ayew a wala ed dalin a mamabaybay.

25 Tan sinalimbeñgan da so inkasikara a dili sumpa ed saray kabusol da; tan sikara so nanayam ed sakey a pasen na dalin, tan ed sakey ya olop, tan inonor da so saray salita ya imbaga nen Lachoneus, dia ed onia sikara so nambabawi ed amin a kasalanan da; tan intañgay da so pikakasi ra ed Katawan a Dios da, a sikara so ilaban to ed panaon no saray kabusol da so onlasur sumpa ed sikara a milaban.

26 Tan sikara so maermen a mapalalo lapu ed saray kabusol da. Tan si Gidgiddoni ingangan to a mangawa ra na saray agamil da ed bakal ed nambabañgil a nengneng, tan nakaukolan a sikara so mabiskeg ed saray sakob na laman da, tan saray salimbeng na pagew, tan ontan met ed sakob na taklay, unong ed kanengneñgan na bilin to ed sikara.