1 Tan tua, tua, ikuan ko ed sikayo a wala so arum ni a karnerok, ya aliwa a taga-dia ed saya a dalin, ni say dia ed dalin na Jerusalem, ni say dia ed kabiañgan na dalin a kaliber-liber a naakar ko la a nampuloñgan.

2 Tan sikara so saray asalitak ya ag da ni nadñgel so voces ko; ni say angan dinan man a panaon impanengneng ko so inkasiak ed sikara.

3 Balet siak so akaawat na gangan ed Ama ya onla ak ed sikara, tan deñgelen da so voces ko, tan sikara so nibilang ed limog na saray karnerok, tan wala so saksakey a pastolan tan saksakey a managpastol; dia ed ontan siak so onla ya ipanengneng ko so inkasiak ed sikara.

4 Tan igangan ko ed sikayo ya isulat yo so saraya ya imbalikas ko kayari na itaynan ko, tan no bilbilang saray totook ed Jerusalem, saraman so akapinengneng ed siak tan akapiolop ed siak ed impampulong ko, so ag da kerewen ed Ama ed panamegley na ñgaran ko, pian naawat da so pikakabat nipaakar ed sikayo ed panamegley na Espiritu Santo, tan ontan met ed saray arum a tribo a sikara so ag da kabat, a saraya ya imbagak ya isulat yo so nisinop tan saraya so nipanengneng ed saray Gentiles, pian dia ed inkagnap na saray Gentiles, say nakdaan ed saray boleg da, a sikara so ataytayak ed amin a tapew na dalin lapu ed ag da pananisia, sikara so naawit, odino sikara so naawit ed pikakabat ed siak, a Mananundon da.

5 Tan dia ed ontan tiponen ko ra a manlapu ed apatira a sukong na dalin; tan dia ed ontan sumpalen ko so paknaan a ginawa na Amak ed amin a totoo ed kailalakan na Israel.

6 Tan mapalar so saray Gentiles, lapu ed pananisia ra ed siak, tan dia ed panamegley na Espiritu Santo, a sikato so mantasi ed sikara ed siak tan ed say Ama.

7 Nia, makaseñgeg ed pananisia ra ed siak, inkuan na Ama, tan lapu ed ag yo pananisia, O kailalakan na Israel, dia ed kaunoran ya agew say katuaan so onsabi ed saray Gentiles, pian say inkagnap na saraya a beñgatla so nipakabat ed sikara.

8 Balet abagey, inkuan na Ama, ed ag pananisia na saray Gentiles—tan manwari a sikara so sinmabi ed tapew na saya a dalin, tan intaytayak da so saray totook a sikara so kabiañgan ed kailalakan na Israel; tan saray totook a sikara so wala ed kailalakan na Israel ya apagit a nanlapu ed limog da, tan sikara so ginatin-gatinan da;

9 Tan lapu ed panañgasi na Ama ed saray Gentiles, tan ontan met ed saray panañgokom na Ama ed saray totook a sikara so wala ed kailalakan na Israel, tua, tua, ikuan ko ed sikayo, tan dia ed kayari na saya ya amin, tan ingangan ko ed saray totook a wala ed kailalakan na Israel so nabakbak, tan sikara so napairap, tan napatey, tan sikara so napapaway ed limog da, tan manmaliw ira a kabusol da, tan manmaliw ira a puñges tan salita ya ag nalingwanan ed limog da—

10 Tan onia so ingangan na Ama ya ibagak ed sikayo: Dia ed saman ya agew sano saray Gentiles so mankasalanan sumpa ed evangeliok, tan ag da awaten so inkagnap na evangeliok, tan sikara so mampaatagey ed kinon na saray puso ra ed tagey na saray amin a bansa, tan ed tagey na amin a totoo ed amin a dalin, tan sikara so napano na amin a nengneng na panagtila, tan panagpalikdo, tan kapilyuan tan amin a nengneng na panagkunwari, tan panagpatey, tan kasiliban na sacerdote, tan inkabalangkantis, tan maamot a karumsisan; tan no gawaen da so saraman ya amin a beñgatla, tan ag da awaten so inkagnap na evangeliok, nia, inkuan na Ama, awiten ko so inkagnap na evangeliok manlapu ed limog da.

11 Tan dia ed ontan nunoten ko so paknaan ko a ginawak ed saray totook, O kailalakan na Israel, tan awiten ko so evangeliok ed sikara.

12 Tan ipanengneng ko ed sika, O kailalakan na Israel, a saray Gentiles ag ira nawalaan na pakapanyari ed sika; balet nunoten ko so paknaan ko ed sika, O kailalakan na Israel, tan sika so makasabi ed pikakabat ed inkagnap na evangeliok.

13 Balet no saray Gentiles so mambabawi tan ompawil ira ed siak, inkuan na Ama, nia sikara so nibilang ed limog na saray totook, O kailalakan na Israel.

14 Tan ag ko itepel so saray totook, a sikara so wala ed kailalakan na Israel, ya onla a milimog ed sikara, tan sikara so gatin-gatinan da, inkuan na Ama.

15 Balet no sikara so ag ompawil ed siak, tan ag ondeñgel ed voces ko, sikara so itepel ko, on, itepel ko so saray totook, O kailalakan na Israel, a sikara so onla ed limog da, tan sikara so gatin-gatinan da, tan sikara so siñga asin ya abalang la so taway to, a lapu ed ontan angapo la so kakanaan to no ag ibantak, tan gatin-gatinan na saray totoo, O kailalakan na Israel.

16 Tua, tua, ikuan ko ed sikayo, onia so ingangan na Ama ed siak—ya iter ko ed saya a totoo so saya a dalin ya onkana a tawir da.

17 Tan dia ed onia saray salita nen profeta Isaias so nasumpal, a nankuan:

18 Saray managbantay ikelyaw da so voces da; tan dia ed pankakasakey na voces da sikara so mancancion, tan nanengneng da mata ed mata sano say Katawan awiten to lamet so Sion.

19 Bigla kayo a mangayaga, mancancion kayo a mankakasakey, sikayo ya angapo so onkitakitaw a pasen na Jerusalem; lapu ed say Katawan niligliwa to so saray totoo to, dinundon to la so Jerusalem.

20 Say Katawan mapalaway to ya impanengneng so masanto a taklay to ed saray mata na amin a bansa; tan say amin a sampot na dalin nanengneng da so panañgilaban na Dios.