1 Tan agawa a wala so sakey a voces a nadñgel ed limog na amin a manaayam ed dalin, ed amin a tapew na saman a dalin, a nankelyaw:

2 Abagey, abagey, abagey so saya a totoo; abagey so saray manaayam ed amin a dalin likud no sikara so mambabawi; tan say demonyo so manelek, tan saray angeles to so mangagayaga, lapu ed impatey na saray malimgas ya anak a lalaki tan anak a bibii na saray totook; tan saya so makaseñgeg ed karelmeñgan da tan karumsisan da kanian sikara so niparukol!

3 Nengneng yo, saman so baleg a ciudad na Zarahemla so pinoolan ko ed apoy, tan ontan met ed saray manaayam diman.

4 Tan nia, saman so baleg a ciudad na Moroni so pinalereg ko ed kaaraleman na dayat, tan saray manaayam diman so nalner.

5 Tan nia, saman so baleg a ciudad na Moronihah so tinabonan ko na dalin, tan saray manaayam diman, pian niamot da so saray karelmeñgan tan karumsisan da manlapu ed arapan na lupak, pian say dala na saray profeta tan saray sasantos so ag la onsabi ed siak sumpa ed sikara.

6 Tan nia, say ciudad na Gilgal so pinalereg ko, tan saray manaayam diman so atabonan ed kaaraleman na dalin;

7 On, tan say ciudad na Onihah tan saray manaayam diman, tan say ciudad na Mocum tan saray manaayam diman, tan say ciudad na Jerusalem tan saray manaayam diman; tan say danum so ingangan ko ya ontagey ya onsublay diman, a mañgiamot ed saray karelmeñgan tan karumsisan da manlapu ed arapan na lupak, pian say dala na saray profeta tan saray sasantos so ag la onsabi ed siak sumpa ed sikara.

8 Tan nia, say ciudad na Gadiandi, tan say ciudad na Gadiomnah, tan say ciudad na Jacob, tan say ciudad na Gimgimno, saraya ya amin so pinalereg ko, tan ginawak so saray pukdol tan patar a nampegleyan na palandey so sinmalat ed pasen da; tan saray manaayam diman sikara so intabon ko ed kaaraleman na dalin, pian niamot so saray karelmeñgan tan karumsisan da manlapu ed arapan na lupak, pian say dala na saray profeta tan saray sasantos so ag la onsabi ed siak sumpa ed sikara.

9 Tan nia, saman so baleg a ciudad na Jacobugath, a saya so panaayaman na saray totoo nen ari Jacob, so pinoolan ko ed apoy lapu ed kasalanan tan kaugsan da, ya alablabas ni nen say karelmeñgan na amin a dalin, lapu ed saray maamot a panagpatey tan pannununoñgan da; lapu ed sikara so nanderal na kareenan na saray totook tan say oley ed dalin; dia ed ontan sikara so pinoolan ko, pian naderal ira ed arapan na lupak, pian say dala na saray profeta tan saray sasantos so ag la onsabi ed siak sumpa ed sikara.

10 Tan nia, say ciudad na Laman, tan say ciudad na Josh, tan say ciudad na Gad, tan say ciudad na Kishkumen, so pinoolan ko ed panamegley na apoy, tan saray manaayam diman, lapu ed saray kaugsan da ed impampagit da ed saray profeta, tan tinutopak da so saraman so imbakik a mañgibawag ed sikara nipaakar ed karelmeñgan tan saray karumsisan da.

11 Tan lapu ed sikara so pinagit da ya amin a pinapaway, ya angapo so matunong ed limog da, imbakik so apoy ya ondapo tan manderal ed sikara, pian say karelmeñgan tan karumsisan da so niamot ed arapan na lupak, pian say dala na saray profeta tan saray sasantos ya imbakik ed limog da so ag la onakis ed siak a manlapu ed dalin sumpa ed sikara.

12 Tan dakel so ankakabaleg a kadederal so imbakik ya ondapo ed saya a dalin, tan ed saya a totoo, lapu ed karelmeñgan tan karumsisan da.

13 O sikayo ya amin a niligyas sikayo so lalo a matunong nen say sikara, ag kayo la natan kasi ompawil ed siak, tan mambabawi ed saray kasalanan yo, tan sikayo so napasimbalo, pian sikayo so paabigen ko?

14 On, tua kuan ko ed sikayo, no sikayo so ondago ed siak nawalaan kayo na andi-angaan a bilay. Nengneng yo, say taklay ko a mapañgasi so akaunat ed sikayo, tan siopaman so ondago, sikato so awaten ko; tan mapalar so saraman so ondago ed siak.

15 Nia, siak si Jesu Cristo say Anak na Dios. Siak so amalsa ed saray tawen tan say dalin, tan amin a beñgatla a wala diman. Siak so kaiba na Ama nanlapu la ed gapo. Siak so wala ed Ama, tan say Ama so wala ed siak; tan dia ed siak say Ama nigloria so ñgaran to.

16 Siak so sinmabi ed kayarian ko, tan saray kayarian ko ag da ak inawat. Tan saray masanto a kasulatan nipaakar ed isabik so asumpal.

17 Tan no kaonoñgan so saray añgawat ed siak, dia ed sikara initer ko so panmaliw ya anak na Dios; tan iñgen ontan met so gawaen ko no kaonoñgan so karakel na saray manisia ed ñgaran ko, tan nia, dia ed siak say karundon onsabi, tan dia ed siak say gangan nen Moises so asumpal.

18 Siak so liwawa tan bilay na mundo. Siak so Alfa tan Omega, say gapo tan say kasampotan.

19 Tan ag kayo la mañgiter na bagat ed siak ed pamaterter na dala; on, saray bagat tan saray pinoolan a bagat so ag la gawaen, tan angapo la so awaten ko ed saray bagat yo tan saray pinoolan a bagat yo.

20 Tan say iter yo ed siak a bagat so say puso a maermen tan say mambabawi ya espiritu. Tan siopaman so ondago ed siak ya awalaan na puso a maermen tan mambabawi ya espiritu, sikato so biniagan ko ed apoy tan ed Espiritu Santo, angan siñga saray Lamanite, lapu ed pananisia ra ed siak nen panaon na impakasimbalo ra, sikara so abiniagan ed apoy tan Espiritu Santo, tan saya so ag da amta.

21 Nia, siak so sinmabi ed mundo pian mañgawit na karundon ed mundo, a mañgilaban ed mundo ed kasalanan.

22 Dia ed ontan, siopaman so mambabawi tan ondago ed siak a siñga melag ya ogaw, sikato so awaten ko, lapu ed onia so panarian na Dios. Nengneng yo, lapu ed saraya initer ko so bilay ko, tan saya so inalak lamet; dia ed ontan mambabawi kayo, tan ondago kayo ed siak sikayo a wala ed sampot na dalin, tan sikayo so nilaban.