1 Tan natan, nia, ikuan ko ed sikayo, nepeg ya anapen yo so saraya a beñgatla. On, sakey a gangan so iter ko ed sikayo ya anapen yo so saraya a beñgatla a siseseet; lapu ed makabaliksan so saray salita nen Isaias.

2 Tan petepeteg a sikato so nansalita a sinaglawi to so amin a beñgatla nipaakar ed saray totook a sikara so wala ed kailalakan na Israel; dia ed ontan nakaukolan a sikato so mansalita met ed saray Gentiles.

3 Tan amin a beñgatla a sinalita to nen saman tan ed arapen, iñgen unong ed saray salita ya imbalikas to.

4 Dia ed ontan deñgel kayo ed saray salitak; isulat yo so saray beñgatla ya imbagak ed sikayo; tan unong ed panaon tan ed linawa na Ama saraya so makasabi ed saray Gentiles.

5 Tan siopaman ya ondeñgel ed saray salitak tan mambabawi tan nabiniagan, sikato met lamlamang so nilaban. Anap yo so saray profeta, lapu ed dakel ed sikara so mampaneknek ed saraya a beñgatla.

6 Tan natan agawa a sanen si Jesus nibalikas to so saraya a salita inkuan to ed sikara lamet, kayari ya impaliwawa to so saray masanto a kasulatan ed sikara ya inawat da, inkuan to ed sikara: Nia, sakey ni a masanto a kasulatan so labay ko ya isulat yo, a saraya so angapo ed sikayo.

7 Tan agawa ya inkuan to ed si Nephi: Awit mo dia so saray kasulatan ya insinop mo.

8 Tan sanen inawit nen Nephi so saray kasulatan, tan initer to ed arap to; inwandag to so saray mata to ed saraya tan inkuan to:

9 Tua ikuan ko ed sikayo, ginangan ko si igagangan ko a Samuel, a Lamanite, a mampaneknek ed saya a totoo, a dia ed saman ya agew a say Ama nigloria to so ñgaran to ed siak dakel ed saray sasantos so ombañgon manlapu ed saray inaatey, tan sikara so omparungtal ed amayamay, tan sikara so mampulong ed sikara. Tan inkuan to ed sikara: Aliwa kasi a saya so tua?

10 Tan saray disipulos to so inmebat tan inkuan da: On, Katawan, si Samuel so namprofesiya unong ed saray salitam, tan saraya ya amin so asumpal.

11 Tan si Jesus inkuan to ed sikara: Panon ya ag yo insulat so saya a beñgatla, a dakel a sasantos so binmañgon tan sikara so pinmarungtal ed amayamay tan sikara so nampulong ed sikara?

12 Tan agawa ya anunotan nen Nephi a saya a beñgatla so ag nisulat.

13 Tan agawa a si Jesus ingangan to a saya so isulat; dia ed ontan saya so nisulat unong ed gangan to.

14 Tan natan agawa a sanen si Jesus nipaliwawa to la so amin a masanto a kasulatan ed saksakey, saman so insulat da, ingangan to ed sikara ya ibañgat da so saray beñgatla ya impaliwawa to ed sikara.