Scriptures
3 Nephi 28


Tekap 28

Say siamira ed saman so Labindua so nampilalek tan nisipan ed sikara so sakey a tawir ed panarian nen Cristo sano sikara so ompatey—Saray Talora a Nephite nampilalek tan niiter ed sikara so pakapanyari ya ontaluna ed patey pian natilak ira ed dalin anga ed si Jesus so onsabi lamet—Sikara so nauman balet ag inatey tan nanenengneng da so saray beñgatla ya ag makatunoñgan a bitlaen, tan sikara natan so mampupulong ed limog na saray totoo. Ñgalñgali K.C. 34–35.

1 Tan agawa a sanen si Jesus nibaga to la so saraya a salita, sikato so akisalita ed saray disipulos to, a sinansakey, a kuan to ed sikara: Anto so pilalek yo ed siak, dia ed kayari a siak so onsipot la ya onla ed Ama?

2 Tan sikara ya amin so nansalita, likud lambeñgat ed saray talora, a kuan da: Pilalek mi a dia ed kayari na pambilay mi ed taon na too, a say impampulong mi, a saya so anawagan mo ed sikami, so saya la so mañganga, sikami komon so maples ya onla ed sika diman ed panarian mo.

3 Tan inkuan to ed sikara: Mapalar kayo lapu ed nampilalekan yo so saya a beñgatla ed siak; dia ed ontan, dia ed kayari na pitumplo tan dua a taon yo sikayo la so onla ed siak ed panarian ko; tan dia ed siak naalmo yo so painawa.

4 Tan sanen sikato so ayari a nansalita ed sikara, sikato so inmarap ed saray talora, tan inkuan to ed sikara: Anto so pilalek yo a gawaen ko ed sikayo, no siak la so onsipot ya onla ed Ama?

5 Tan sikara so nanermen ed saray puso ra, lapu ed ag da nitepel ya isalita ed sikato so nipaakar ed saman so pilalek da.

6 Tan inkuan to ed sikara: Nia, amtak so saray wala ed kanunotan yo, tan pilalek yo so beñgatla a si Juan, ya inararok, a sikato so kaolop ko ed pampupulong ko, sakbay a siak so nibayubay da ed krus na saray Judio, a saya so pilalek to ed siak.

7 Dia ed ontan, lalo kayo a mapalar, lapu ed ag yo la natawayan so patey; balet sikayo so mambilay pian nanengneng yo so amin a kimey na Ama ed saray anak na totoo, anga ed amin a beñgatla so nasumpal unong ed linawa na Ama, sano onsabi ak ed gloriak katekep na pakapanyari na tawen.

8 Tan ag yo nasali so mantepel na sakit na ipapatey; balet sano siak so onsabi ed gloriak sikayo so nauman dia ed kakirem na mata manlapu ed kipapatey ya onsalat so ag-ompatey; tan dia ed ontan sikayo so mapalar ed panarian nen Amak.

9 Tan lamet, ag kayo manlikna na sakit legan a wala kayo ed laman, ni say ermen likud lambeñgat ed kasalanan na mundo; tan saya gawaen ko ya amin lapu ed say beñgatla a nampilalekan yo ed siak, lapu ed nampilalekan yo a naawit yo so saray kamarerua na saray totoo ed siak, legan a manalalagey ni so mundo.

10 Tan lapu ed saya a pamaakaran nawalaan kayo na nagnap a gayaga; tan onyurong kayo ed panarian nen Amak; on, say gayaga yo so nagnap; angan siñga si Ama ya añgiter ed siak na nagnap a gayaga; tan manmaliw kayo a siñga siak, tan siak so siñga met ed Ama; tan say Ama tan siak so saksakey;

11 Tan say Espiritu Santo so mantasi ed Ama tan say siak; tan say Ama iter to so Espiritu Santo ed saray anak na totoo, lapu ed siak.

12 Tan agawa a sanen si Jesus nibaga to la so saraya a salita, diniwit to ra a sansansakey ed gamet to likud lambeñgat ed saray talora a sikara so natilak, tan sikato la so tinmaynan.

13 Tan nia, saray katawenan so linmukas, tan sikara so naala a nipatagey ed tawen, tan anengneng da tan nadñgel da so saray beñgatla ya ag-nibalikas.

14 Tan nisebel ed sikara a saya so bitlaen da; ni say niiter ed sikara so pakapanyari a bitlaen da so saray beñgatla ya anengneng da tan nadñgel da;

15 Tan no sikara so wala ed loob na laman odino dia ed paway na laman, ag da nibaga; lapu ed say pakalikna ra ed inkasikara siñga agawa ed sikara so inkaoman, a sikara so asalatan manlapu ed saya a laman ed kipapasen ya ag-ompatey, pian nanengneng da so saray beñgatla ed Dios.

16 Balet agawa a sikara lamet so nampulong ed tapew na dalin; manwari ya ontan ag da impulong so saray beñgatla a nadñgel da tan anengneng da, lapu ed gangan a niiter ed sikara diman ed tawen.

17 Tan natan, no kasi sikara so too ya ompatey odino ag-ompatey nanlapu ed saman ya agew na inkaoman da, ag ko amta;

18 Balet onia labat so amtak, unong ed kasulatan a niiter—sikara so linma ed tapew na dalin, tan sikara so nampulong ed amin a totoo, ya inkasakey da so dakel ed simbaan no kaonoñgan so anisia ed saray pulong da; a sikara so bininiagan da, tan no kaonoñgan so saray abiniagan so akaawat na Espiritu Santo.

19 Tan sikara so imbantak ed pañgawan na saraman so aliwa a miembro na simbaan. Tan saray pañgawan ag to ra nabembenan, tan saraya so apaldua.

20 Tan sikara so imbantak da ed dalin; balet binakbak da so dalin ed salita na Dios, dia ed onia sikara so niligyas na pakapanyari to ed kaaraleman na dalin; tan dia ed onia ag ira makakutkot na abot a magenap a mamemben ed sikara.

21 Tan amitlo a sikara so imbuntok da ed dalem na pugon tan sikara so ag asakitan.

22 Tan amiddua a sikara so imbuntok da ed pukokan na maatap a monanakap; tan nia sikara so akigalaw ed saray monanakap a siñga sakey ya ogaw ed mansususo a kilaw na karnero, tan sikara so ag asakitan.

23 Tan agawa a dia ed onia sikara so linma ed limog na saray totoo nen Nephi, tan impulong da so evangelio nen Cristo ed amin a totoo ed tapew na dalin; tan sikara so apasimbalo ed Katawan, tan akikasakey ira ed simbaan nen Cristo, tan dia ed onia saray totoo na saman a kailalakan so abendicionan, unong ed salita nen Jesus.

24 Tan natan siak, Mormon, sampotan ko la so pansasalitak nipaakar ed saraya a beñgatla ed saya a panaon.

25 Nia, ñgalñgalik la isulat so kañgaranan na saraman so ag da natawayan so patey, balet say Katawan insebel to; dia ed ontan sikara so ag ko insulat, lapu ed sikara so nisanib ed mundo.

26 Balet nia, anengneng ko ra, tan sikara so nampulong ed siak.

27 Tan nia sikara so wala ed limog na saray Gentiles, tan saray Gentiles ag da ra kabkabat.

28 Sikara met so wala ed limog na saray Judio, tan saray Judio ag da ra kabkabat.

29 Tan nagawa, sano say Katawan nanengneng to a kanepegan ed kakabatan to a sikara so mampulong ed amin ya atayak a tribo na Israel, tan dia ed amin a bansa, sankakanayon, salita tan totoo, tan awiten da a manlapu ed sikara so dakerakel a kamarerua ed si Jesus, pian say pilalek da so nasumpal, tan ontan met lapu ed makakuyong a pakapanyari na Dios a wala ed sikara.

30 Tan sikara so siñga saray angeles na Dios, tan no sikara so mampikasi ed Ama ed ñgaran nen Jesus nayarian da ya ipabirbir so inkasikara ed siopaman a too ya isisipen da a maong.

31 Dia ed ontan, makana tan makapakelaw ira a kimey so awit da, sakbay na makabaliksan tan onsabi ya agew sano say amin a totoo nakaukolan ya ontalindeg ed arap na yuroñgan na panañgokoman nen Cristo;

32 On angan dia ed limog na saray Gentiles wala so makana tan makapakelaw a kimey a ginawa ra, sakbay na saman ya agew na panañgokom.

33 Tan no wala ed sikayo so amin a masanto a kasulatan ya añgiter na awaran ed amin a makapakelaw a kimey nen Cristo, sikayo, unong ed saray salita nen Cristo, nakabatan yo a saraya a beñgatla so peteg ya onsabi.

34 Tan abagey so saraman so ag ondeñgel ed saray salita nen Jesus, tan ontan met ed saray pinili to tan imbaki to ed limog da; tan siopaman ya ag to awaten so saray salita nen Jesus tan saray salita na saraman so imbaki to ed sikara so ag da ra awaten; tan dia ed ontan sikara so ag to awaten ed sampot ya agew.

35 Tan magmaong ni a sikara so ag la nianak. Tan ipasen yo a naekal yo so kaptekan na sakey ya asakitan a Dios, a sikato so ginatin-gatinan na saray totoo, a dia ed sikato onsabi so kilalaban?

36 Tan natan nia, unong ed sinalitak nipaakar ed saray pinili na Katawan, on, angan saraman so talora a sikara so nipaatagey ed tawen, kanian ag ko kabat no kasi sikara so alinisan ed too ya ompatey ya onsalat so ag-ompatey—

37 Balet nia, nanlapu la ed impansulat ko, intepet ko ed Katawan, tan saya so impanengneng to ed siak ya nakaukolan a wala so agawa a kaoman ed saray laman da, odino nakaukolan a tawayan da so patey.

38 Dia ed ontan, pian ag da la natawayan so patey sirin wala so agawa ya inkaoman ed laman da, pian ag la ra manlikna na sakit ni say ermen likud lambeñgat ed kasalanan na mundo.

39 Natan saya ya inkaoman ag kapara na kaoman a nagawa ed sampot ya agew; balet wala so inkaoman ya agawa ed sikara, dia ed onia angapo so pakapanyari nen Satanas ed sikara, pian sikara so ag to natukso; tan sikara so apasanto ed inkalaman, kanian sikara so masanto, tan say pakapanyari na mundo ag to la ra nabembenan.

40 Tan dia ed saya a kipapasen sikara so magnayon anga ed agew na panañgokom nen Cristo; tan dia ed saman ya agew awaten da so babaleg a kaoman, tan sikara so naawat ed panarian na Ama ya ag la ra ompaway, balet miayam la ra ed Dios ya andi-angaan ed tawen.