Tekap 29
Say ipaway na Libro nen Mormon so sakey a pakapatnagan a say Katawan ginapoan to la a tiponen so Israel tan sumpalen to so saray paknaan to—Saraman so ag-mañgawat ed saray puyan to ed saguinunor ya agew tan saray palabo so naayew. Ñgalñgali K.C. 34–35.
1 Tan natan nia, ikuan ko ed sikayo a sano say Katawan nanengneng to so pankanepegan, dia ed kakabatan to, a saraya a salita so onsabi ed saray Gentiles unong ed saray salita to, dia ed ontan nakabatan yo komon a say paknaan na Ama a ginawa to ed saray anak na Israel, nipaakar ed kipawil da ed saray dalin a tawir da, so ginmapo la a nasumpal.
2 Tan nakabatan yo komon a saray salita na Katawan, a sinalita na saray masanto a profeta, so amin nasumpal; tan ag yo nakaukolan ya ibaga a say Katawan aabalaen to so isabi to ed saray anak na Israel.
3 Tan ag yo nakaukolan a nunoten ed dalem na puso yo a saray salita ya imbaga to so andi-kana, tan nia, say Katawan nunoten to so paknaan a ginawa to ed saray totoo to ed kailalakan na Israel.
4 Tan sano nanengneng yo so saraya a salita so onsabi ed limog yo, dia ed ontan ag yo la nakaukolan ya ag awaten so saray kimey na Katawan, lapu ed say espada na kaptekan to so wala ed lima to a kawanan; tan nia, dia ed saman ya agew, no ag yo awaten so saray kimey to gawaen to a saya so onabet ed sikayo.
5 Abagey so saman so ag mañgawat ed saray kimey na Katawan; on, abagey so siopaman a mañgiburi ed si Cristo tan saray kimey to!
6 On, abagey so siopaman a mañgiburi ed saray puyan na Katawan, tan say mañgikuan a say Katawan ag la mankikimey ed panamegley na puyan, odino dia ed profesiya, odino dia ed saray palabo, odino dia ed saray salita, odino dia ed panagtambal, odino dia ed pakapanyari na Espiritu Santo!
7 On, tan abagey so siopaman a mankuan ed saman ya agew, pian makaala na gungona, ya angapo la so saray milagro a gawaen nen Jesu Cristo; tan siopaman a mangawa ed saya so siñga saman so anak na kadederal, a dia ed sikato angapo so panañgasi, unong ed salita nen Cristo!
8 On, tan ag la nakaukolan a sikayo so ompuñges, odino ag-mañgawat, odino manlodlurey ed saray Judio, odino dia ed saray nakdaan ed kailalakan na Israel; tan nia, say Katawan nanunotan to so paknaan a ginawa to ed sikara, tan sumpalen to ed sikara so unong ed saman so sinambaan to.
9 Dia ed ontan ag yo nepeg ya ipasen a napatolok yo so kawanan a lima na Katawan ed kawigi, pian ag to gawaen so panañgokom ed panumpal to ed saray paknaan a ginawa to ed kailalakan na Israel.