1 Tan dia ed ontan saman so nisulat so nagawa: Mancancion ka, O lepes, sika ya ag mananak; bigla kayo a mancancion, tan onakis na maksil, sika ya ag nanlikna na kairapan ed ogaw; lapu ed dakel ni so saray anak na wala ed kabukoran nen say anak na bii ya inkasal, inkuan na Katawan.

2 Pabaleg mo so ayaman mo ed dalem na abong-abong mo ya abel, tan iunat mo so abel a sanib na saray duroñgawan ed panaayaman mo; ag mo kakawananen, parukey mo so lubir mo tan pabiskeg mo so saray palpal mo;

3 Tan bigla kayo ya ompaway ed kawanan a lima tan dia ed kawigi, tan say boleg mo tawiren da so saray Gentiles tan gawaen da so saray ciudad ya angapo so manaayam pian napanayaman.

4 Ag ka ontatakot, tan sika so ag ombaing; ni say sika so nakewkew, lapu ed sika so ag niakar ed kababaiñgan; tan nalingwanan mo so kababaiñgan ed kalangweran mo, tan ag mo la nanunotan so tetel ed inkaogaw mo, tan ag mo la nanunotan so tetel ed inkabalom.

5 Tan say amalsa ed sika, say asawam a laki, say Katawan na saray Ejercito so ñgaran to; tan say Mananundon mo, say Masanto a Bugtong na Israel—say Dios na amin a dalin so itawag ed sikato.

6 Tan say Katawan tinawag to ka a siñga sakey a bii ya inkaindan tan apaermen ed espiritu, tan asawa a bii ed kalangweran, sanen sika so ag-inawat, inkuan na Dios mo.

7 Tan dia ed melag a bekta sika so inkaindan ko, balet tekep na baleg a panañgasi sika so kupkopen ko.

8 Dia ed sakey a melag a sanok insanib ko so lupak ed sika ed sakey a bekta, balet tekep na andi-angaan a panañgaro siak so awalaan na panañgasi ed sika, inkuan na Katawan a Mananundon mo.

9 Lapu ed saya, saray danum nen Noe onkana ed siak, lapu ed insambak a saraman so danum nen Noe so ag la kapiganman onsabi ed dalin, onia so insambak ya ag ak la onsanok ed sika.

10 Tan saray kapalandeyan so ontaynan tan saray kapukdolan so naekal, balet say panañgarok ed sika so ag ontaynan, ni say paknaan na totook so naekal, inkuan na Katawan a say panañgasi to wala ed sika.

11 O sika ya apairap, a nibantak na mabiskeg a bagyo, tan ag aligliwa! Nia, ipasen ko so saray batom tekep na saray mararakep a kolor, tan ipasen ko so leletnegan mo ed saray safiro.

12 Tan gawaen ko so saray duroñgawan mo ed rubi, tan saray puertam ed karbunklo, tan amin a ketegan mo ed ankabli a bato.

13 Tan amin ya anak mo so ibañgat ed Katawan; tan baleg so kareenan na saray anak mo.

14 Dia ed inkamatunong sika so niletneg; sika so niarawi ed pamasegsegang lapu ed sika so ag ontakot, tan ed kebyew tan saya so ag onasinger ed sika.

15 Nia, sikara so andi-saew a mantitipon sumpa ed sika, aliwa a lapu ed siak; siopaman so saray mantitipon a manoolop sumpa ed sika so napelag lapu ed sika.

16 Nengneng mo, pinalsak so panday a mansibok na ñgalab na apoy, tan mañgawit na sakey ya ikakana ed kimey to; tan pinalsak so managdarak a manderal.

17 Angapo so ayura a ginawa ya onsumpa ed sika so ontaluna; tan balang sakey a dila a mantami sumpa ed sika ed panañgokom sikato so dusaen mo. Saya so tawir na saray igagangan na Katawan, tan say inkamatunong da so wala ed siak, inkuan na Katawan.