1 Tan natan, agawa a wala so dakel ya akadñgel ed saray sinalita nen Samuel, a Lamanite, ya insalita to ed tagey na padir na ciudad. Tan no kaonoñgan karakel so saray anisia ed salita to so linma tan inanap da si Nephi; tan sanen sikara so linma tan sikato so nalmo ra impatua ra ed sikato so saray kasalanan da tan ag da imburi, lapu ed pilalek da a sikara so nabiniagan ed Katawan.

2 Balet no kaonoñgan karakel so saray ag manisia ed saray salita nen Samuel so mamapasnok ed sikato; tan sikato so tinutopak da na bato ed kawalaan to a padir, tan ontan met dakel so nampana ed sikato legan a manalalagey ed padir; balet say Espiritu na Katawan so wala ed sikato, a dia ed onia sikato so ag da nakena na saray bato ra odino na saray pana ra.

3 Natan sanen anengneng da a sikato so ag da nakena, wala so dakel ni ya anisia ed salita to, a dia ed saya sikara so linma ed si Nephi a mampabiniag.

4 Tan nia, si Nephi so mambibiniag, tan mamproprofesiya, tan mampupulong, a mañgikekelyaw na pambabawi ed saray totoo, a mañgipapanengneng na saray pakapatnagan tan pakelaw, a mankikimey na saray milagro ed limog na saray totoo, pian nakabatan da a si Cristo so magano la ya onsabi—

5 Ibabaga to ed sikara so saray beñgatla a magano la ya onsabi, pian nakabatan da tan nanunotan da ed panaon ya isabi to a saraya so nipasakbay la ed sikara, ed gagala pian sikara so manisia; dia ed ontan no kaonoñgan karakel so saray anisia ed saray salita nen Samuel so linma ed sikato a pabiniagan, lapu ed sikara so linma a mambabawi tan mañgipapatua ed saray kasalanan da.

6 Balet say karaklan ed sikara so ag manisia ed saray salita nen Samuel; dia ed ontan sanen anengneng da a sikato so ag da nakena ed saray bato ra tan saray pana ra, sikara so inmeyag ed saray kapitan da, a nankuan: Alaen yo so saya a too tan sikato so balor yo, tan nia sikato so awalaan na demonyo; tan lapu ed pakapanyari na demonyo a wala ed sikato ag tayo nakena ed saray bato tayo tan saray pana tayo; dia ed ontan sikato so alaen yo tan balor yo, tan iarawi yo.

7 Tan sanen sikara so linma pian sikato so degkeman da, nia, sikato so tinmaboy ed padir, tan sikato so batik a pinmaway ed dalin da, on, anga ed dili a dalin to, tan ginapoan to so nampulong tan namprofesiya ed limog na saray totoo to.

8 Tan nia, sikato so ag la nadñgelan a kapiganman ed limog na saray Nephite; tan onia so kipapasen na kiwas na saray totoo.

9 Tan dia ed onia so impansampot na komawalomplo tan anem a taon ya oley na saray okom ed saray totoo nen Nephi.

10 Tan dia ed onia met so impansampot na komawalomplo tan pito a taon ya oley na saray okom, a say karaklan ed saray totoo so nampatuloy ira ed kinon tan karelmeñgan da, tan say daiset a kabiañgan da so mankokurang a maalwar ed arap na Dios.

11 Tan onia met so indalan na saray kipapasen ed komawalomplo tan walo a taon ya oley na saray okom.

12 Tan wala balet so melag ya añgumanan na kiwas na saray totoo, likud labat ed saray totoo ginmapo ra a mampaawet ed karelmeñgan, tan dinmakel la a dinmakel so ginagawa da a sumlang ed saray gangan na Dios, ed komawalomplo tan siam a taon ya oley na saray okom.

13 Balet agawa ed komasiamaplo a taon ya oley na saray okom, wala so saray ankakabaleg a pakapatnagan a niiter ed saray totoo, tan saray pakelaw; tan saray salita na saray profeta so ginmapo la a nasumpal.

14 Tan saray angeles so pinmanengneng ed saray totoo, ed saray makabat a totoo, tan imbawag da ed sikara so makapaliket a balita na baleg a gayaga; dia ed onia ed saya a taon saray masanto a kasulatan so ginmapo la a nasumpal.

15 Angaman ontan, saray totoo ginapoan da a paaweten so saray puso ra, amin likud ed saray mananisia ed sikara, mandapag ed saray Nephite tan ontan met ed saray Lamanite, tan ginapoan da so manmatalek ed dili a biskeg da tan dia ed dili a kakabatan da, a kuan da:

16 Saray arum a beñgatla nayari ya aparlesan da a duga, ed limog na dakerakel; balet nia, sikakabat kami a saraya ya ankakabaleg tan makapakelkelaw a kimey so ag nayari a nagawa, a saraya so asalita la.

17 Tan ginapoan da so mankatunoñgan tan mambaliñgaan ed limog da a dili, a kuan da:

18 Tan aliwa a makatunoñgan a wala so pinalsa a sakey a Cristo ya onsabi; no ontan, tan no sikato so Anak na Dios, say Ama na tawen tan dalin, unong a saya so asalita la, akin ag to ipanengneng so inkasikato a dili ed sikatayo a siñga dia ed saray wala ed Jerusalem?

19 On, akin ag to ipanengneng so inkasikato a dili ed saya a dalin a siñga dia ed dalin na Jerusalem?

20 Balet nia, kabat tayo a saya so marelmeng a sisia a tawir, a saya so impalima ed sikatayo na kaamaan tayo, a señgegan pian sikatayo so nepeg a manisia ed saray ankakabaleg tan makapakelaw a beñgatla a nagawa, balet aliwa ed limog tayo, balet dia ed sakey a dalin ya arawrawi, ed dalin ya ag tayo kabat; dia ed ontan nayarian da tayo a pansansiaen ed ag-pikakabat, lapu ed ag tayo natasian ed dili a mata tayo a saraya so tua.

21 Tan saraya so gawaen da, dia ed kasiliban tan misterioso a gawa na saman a sakey a mauges, a mankimey na saray ankabaleg a misterio ya ag tayo natalusan, a saya pagnayonen to itayo ya aripen na saray salita ra, tan aripen da met, lapu ed sikara so panmatalekan tayo a mambañgat ed sikatayo na salita; tan dia ed onia mansiansia itayo ed ag-pikakabat no sikatayo so ontoluk ed sikara, ed amin ya agew na bilay tayo.

22 Tan dakel ni a beñgatla so ninunot na saray totoo ed dalem na saray puso ra, a saraya so makulang-kulang tan andi-kakanaan; tan sikara so mapalalo ya asigen-sigen, lapu ed si Satanas ginewgew to ra a mangawa na karelmeñgan ya andi-tonda; on, sikato so tinmutunog ya añgitayak na saray deñgel-deñgel tan saray baliñgaan ed tapew na dalin, pian paaweten to so puso na saray totoo sumpa ed saman so maong tan sumpa ed saman so onsabi.

23 Tan angaman wala so saray pakapatnagan tan pakelaw a niiter ed limog na saray totoo na Katawan, tan saray dakel a milagro ya agawa, si Satanas so awalaan na mabiskeg a bemben ed puso na saray totoo ed tapew na amin a dalin.

24 Tan onia so impansampot na komasiamaplo a taon ya oley na saray okom ed saray totoo nen Nephi.

25 Tan dia ed onia nansampot so libro nen Helaman, unong ed saray kasulatan nen Helaman tan saray anak to a lalaki.