1 Tan natan agawa dia ed komawalomplo tan anem a taon, nansiansia ni so saray Nephite ed karelmeñgan, on, ed baleg a karelmeñgan, legan a saray Lamanite mapeget so impañgonor da ed saray gangan na Dios, unong ed gangan nen Moises.

2 Tan agawa dia ed saya a taon wala so sakey a Samuel, sakey a Lamanite, so sinmabi ed dalin na Zarahemla, tan ginapoan to so mampulong ed saray totoo. Tan agawa a sikato so nampulong, ed dakel ya agew, na nipaakar ed pambabawi ed saray totoo, tan sikato so pinagit da a pinapaway, tan ñgalñgali la ompawil ed dili a dalin to.

3 Balet nia, say voces na Katawan so sinmabi ed sikato, a sikato so ompawil lamet, tan mamprofesiya ed saray totoo na antokaman ya onsabi ed puso to.

4 Tan agawa ya ag da labay a sikato so onloob ed ciudad; dia ed ontan sikato so linma tan kinmalab ed toktok na padir, tan iniunat to so lima to tan inkuan to ed maksil a voces, tan namprofesiya ed saray totoo na antokaman a beñgatla ya initer na Katawan ed puso to.

5 Tan inkuan to ed sikara: Nengneng yo, siak, si Samuel, sakey a Lamanite, ibalikas ko so saray salita na Katawan ya iter to ed dalem na pusok; tan nia initer to ed dalem na pusok ya ibagak ed saya a totoo a say espada na kaptekan so akasabit ed tagey na saya a totoo; tan apat a lasus a taon so ag onlabas anga ed ondapo so espada na kaptekan ed saya a totoo.

6 On, baleg a kadederal so manaalagar ed saya a totoo, tan andi-saew a saya so onsabi ed saya a totoo, tan angapo so makapañgilaban ed saya a totoo likud labat ed pambabawi tan pananisia ed Katawan Jesu Cristo, a sikato so andi-saew ya onsabi ed saya a mundo, tan mantepel na dakel a beñgatla tan sikato so pateyen da ya onkana ed totoo to.

7 Tan nia, sakey ya angel na Katawan so añgibawag na saya ed siak, tan sikato so añgawit na makapaliket a balita ed kamareruak. Tan nia, siak so nibaki ed sikayo pian saya so ipakabat ko ed sikayo met, pian nawalaan kayo na makapaliket a balita; balet nia ag yo ak awaten.

8 Dia ed ontan, onia so inkuan na Katawan: Lapu ed awet na puso na saray totoo a Nephite, likud no sikara so mambabawi babawien ko so saray salitak ed sikara, tan babawien ko met so Espirituk ed sikara, tan ag ko la ra anosan, tan papuliktaren ko so puso na saray kaagian da sumpa ed sikara.

9 Tan ag onlabas so apat a lasus a taon sakbay ya igangan ko so pamakbak ed sikara; on, dalawen ko ra ed panamegley na espada tan eras tan salot.

10 On, sikara so dalawen ko ed masebeg a sanok ko, tan wala so saray kabiañgan na komapat a kailalakan a nabilay, ed saray kabusol yo, pian nanengneng da so sigpot a kadederal yo; tan saya so andi-saew ya onsabi likud no sikayo so mambabawi, kuan na Katawan; tan saraman so wala ed komapat a kailalakan so ondalaw ed kadederal yo.

11 Balet no sikayo so mambabawi tan ompawil kayo ed Katawan a Dios yo ipulisay ko a paarawien so pasnok ko, kuan na Katawan; on, onia so inkuan na Katawan, mapalar so saraman so mambabawi tan ompawil ed siak, balet abagey so saraman so ag mambabawi.

12 On, abagey so saya a baleg a ciudad na Zarahemla; tan nia, makaseñgeg ed saray matunong kanian saya so nilaban; on, abagey so saya a baleg a ciudad, lapu ed nanenengneng ko, inkuan na Katawan, a wala so dakel, on, angan say babaleg a kabiañgan na saya a baleg a ciudad, paaweten da so saray puso ra sumpa ed siak, inkuan na Katawan.

13 Balet mapalar so saraman so mambabawi, lapu ed sikara so iligyas ko. Balet nia, no ag lapu ed saray matunong a manaayam ed saya a baleg a ciudad, nia, igangan ko so apoy ya onleksab manlapu ed tawen tan manderal ed saya.

14 Balet nia, say makaseñgeg saray matunong kanian saya so niligyas. Balet nia, say panaon onsabi, inkuan na Katawan, sano pagiten yo a papawayen so saray matunong ed limog yo, dia ed ontan sikayo so asinger la ya onkana ed kadederal; on, abagey so saya a baleg a ciudad, lapu ed saray karelmeñgan tan karumsisan a wala ed sikato.

15 On, tan abagey so ciudad na Gideon, lapu ed saray karelmeñgan tan karumsisan a wala ed sikato.

16 On, tan abagey so amin a ciudad a wala ed dalin a kaliber-liber, a kayarian na saray Nephite, lapu ed saray karelmeñgan tan karumsisan a wala ed sikara.

17 Tan nia, sakey ya ayew so onsabi ed dalin, inkuan na Katawan na saray Ejercito, makaseñgeg ed saray totoo a wala ed dalin, on, lapu ed saray karelmeñgan tan karumsisan da.

18 Tan nagawa, kuan na Katawan na saray Ejercito, on, say makapanyari tan tua a Dios tayo, a siopaman a mañgiamot na saray kayamanan da ed dalem na dalin saya so ag da la narumog lamet, lapu ed baleg ya inkaayew na dalin, likud no sikato so sakey a matunong a too tan saya so iamot to dia ed Katawan.

19 Tan gawaen ko, kuan na Katawan, a sikara so mañgiamot ed saray kayamanan da ed siak; tan naayew so saray ag mañgiamot na saray kayamanan da ed siak; tan angapo so makapañgiamot na saray kayamanan da ed siak no likud ed saray matunong; tan siopaman ya ag makapañgiamot na saray kayamanan to ed siak, sikato so naayew, tan ontan met ed kayamanan, tan angapo so makadundon ed saya lapu ed inkaayew na dalin.

20 Tan say agew onsabi ya iamot da so saray kayamanan da, lapu ed pilalek na saray puso ra ed kayamanan da; tan lapu ed pilalek na saray puso ra ed saray kayamanan da, tan iamot da so saray kayamanan da sano ibatikan da so saray kabusol da; lapu ed ag da inamot so saraya ed siak, naayew ira tan ontan met ed saray kayamanan da; tan dia ed saman ya agew sikara so nabakbak, kuan na Katawan.

21 Nengneng yo, totoo ed saya a baleg a ciudad, tan deñgel kayo ed saray salitak; on, deñgel kayo ed saray salita ya inkuan na Katawan, tan nia, inkuan to a sikayo so naayew lapu ed saray kayamanan yo, tan ontan met na saray kayamanan yo so naayew lapu ed pilalek na saray puso yo ed saraya, tan ag kayo dinmeñgel ed salita na saman so añgiter ed saraya ed sikayo.

22 Ag yo nanunotan so Katawan a Dios yo ed saray beñgatla ya imbendicion to ed sikayo, balet lawas yo a nanunotan so saray kayamanan yo, ya ag kayo misasalamat ed Katawan a Dios yo lapu ed saraya; on, saray puso yo so aliwan maasinger ed Katawan, balet saraya so napno na baleg a kinon, anga ed panagpasirayew, tan agay la ya inkalastog, panagibeg, pikokulkol, panagluko, panagpasegsegang, tan panagpatey, tan amin a nengneng na karelmeñgan.

23 Lapu ed saya ya inkagawa kanian say Katawan a Dios ingangan to ya onsabi so sakey ya ayew ya onsabi ed saya a dalin, tan ontan met ed saray kayamanan yo, tan saya lapu ed saray karelmeñgan yo.

24 On, abagey so saya a totoo, lapu ed saya a panaon a sinmabi, a pinagit yo so saray profeta, tan sikara so nilemlemew yo, tan tinutopak yo ra na bato, tan sikara so pinatey yo, tan ginawa yo so amin a kanengneñgan na karelmeñgan ed sikara, a siñga ginawa ra ed daan a panaon.

25 Tan natan sano mansalita kayo, ikuan yo: No komon saray agew mi sanen agew na saray ama mi nen saman, ag mi komon pinatey so saray profeta; ag mi ra tinutopak, tan ag mi ra pinagit.

26 Nia lalo kayo a mauges nen say sikara; tan unong a say Katawan mabilay, no say sakey a profeta so onsabi tan ibawag to ed sikayo so salita na Katawan, a sikato so mampaneknek ed saray kasalanan tan karelmeñgan yo, sikayo so mampasnok ed sikato, tan sikato so pagiten yo a papawayen tan seetan yo ya anapen so amin a polaing a panderal ed sikato; on, ikuan yo a sikato so sakey ya aliwa a tua a profeta, tan sikato so sakey a managkasalanan, tan makademonyo, lapu ed paneknekan to a saray kagagawa yo so mauges.

27 Balet nia, no say sakey a too so onla ed limog yo tan ikuan to: Gawa yo so saya, tan angapo so karelmeñgan; gawa yo so ontan tan ag kayo manirap, on, ikuan to: Mankurang kayo unong ed kinon na saray dili a puso yo; on, kurang kayo unong ed kinon na saray mata yo, tan gawa yo so antokaman a beñgatla a pilalek na saray puso yo—tan no sakey a too so onsabi ed limog yo tan saya so ikuan to ed sikayo, sikato so awaten yo, tan ikuan yo a sikato so sakey a profeta.

28 On, sikato so itanduro yo, tan iter yo ed sikato so kakanen yo; iter yo ed sikato so balitok yo, tan saray pilak yo, tan sikato so kawesan yo na ankabli a kawes; tan lapu ed sikato so mambabaga na makaruyo a salita ed sikayo, tan ikuan to ya amin so maong, dia ed ontan sikayo so ag makarumog na liñgo ed sikato.

29 O sikayo a marelmeng tan beñger a kailalakan; sikayo ya anawet tan matalker a teñger a totoo, kaonoñgan so kinabayag na pañgipasen yo a say Katawan nitepel to kayo? On, kaonoñgan so kinabayag na pañgitepel yo a sikayo so idawat na saray makulang-kulang tan bulag a manañgitunton? On, kaonoñgan so kinabayag na pampili yo na kabiluñgetan nen say liwawa?

30 On, nia, say pasnok na Katawan so aselselan la sumpa ed sikayo; nengneng yo, inayew to so dalin lapu ed karelmeñgan yo.

31 Tan nia, say panaon onsabi ya ayewen to so saray kayamanan yo, pian saraya so manmaliw ya andanglel, pian ag yo nabembenan so saraya; tan dia ed saray agew na inkaduka yo ag yo pagnayonen so saraya.

32 Tan dia ed saray agew na inkaduka yo sikayo so onnañgis ed Katawan; tan say nañgis yo so andi-kana, lapu ed say pambokbukor yo so sinmabi la ed sikayo, tan say kaderal yo so andi-saew la a nagawa; tan dia ed ontan sikayo so onnañgis tan ondageyem ed saman ya agew, kuan na Katawan na saray Ejercito. Tan dia ed ontan sikayo so manermen, tan mankuan:

33 O no komon siak so nambabawi, tan ag ko pinatey so saray profeta, tan tinutopak, tan pinagit a pinapaway. On, dia ed saman ya agew ikuan yo: O no komon anunotan mi so Katawan a Dios mi ed saman ya agew nen niiter ed sikami so saray kayamanan, tan dia ed ontan saraya komon so ag nanmaliw ya andanglel a saraya so naikbanan mi; tan nia, saray kayamanan mi so naandi la ed sikami.

34 Nia, mañgigaton kami dia na sakey a kagawaan tan dia ed kaimbuasan saya so angapo la; tan nia, saray espada mi so naekal ed sikami ed agew a saraya so anapen mi ya ikana ed bakal.

35 On, insinop mi so saray kayamanan mi tan saraya so kinmaronias manlapu ed sikami, lapu ed inkaayew na dalin.

36 O no komon sikami so nambabawi ed saman ya agew a say salita na Katawan so sinmabi ed sikami; tan nia say dalin so naayew, tan amin a beñgatla so nanmaliw ya andanglel, tan saraya so ag mi nabembenan.

37 Nia, sikatayo so aliber-liber na saray makapataktakot a pinalsa, on, sikatayo so aliktob na angeles na saman so manseseet a deralen so saray kamarerua tayo. Nia, saray karelmeñgan tayo so baleg. O Katawan, ag mo kasi nayari a babawien so pasnok mo ed sikami? Tan saya so salita yo ed saraman ya agew.

38 Balet nia, saray agew na panagsubok yo so linmabas la; impaleen yo so agew na kilalaban yo anga ed saya kapiganman so ag la nababawi, tan say kadederal yo so nagawa ya ag la nasaew; on, lapu ed inanap yo ed amin ya agew na bilay yo so saman so ag yo nagamoran; tan inanap yo so liket ed impangawa yo na karelmeñgan, a saya a beñgatla so sumlang ed kaugalian na inkamatunong a saya so wala ed makapanyari tan Andi-angaan a Pañgulo.

39 O sikayo a totoo ed saya a dalin, komon deñgelen yo so saray salitak! Tan pikasik a say pasnok na Katawan so niarawi komon ed sikayo, tan komon sikayo so mambabawi tan nilaban.