1 Tan agawa a sanen say komaanemaplo tan dua a taon ya oley na saray okom so nansampot, agawa so saraya ya amin tan saray Lamanite so nanmaliw, say karaklan a kabiañgan da, a matunong a totoo, ya angan say inkamatunong da so alabas nen saray Nephite, lapu ed malet tan ag-nagiing a pananisia ra.

2 Tan nia, dakel ed saray Nephite so nanmaliw ya inmawet tan ag ira mambabawi tan nagnap la a marelmeng, ya angan ag da inawat so salita na Dios tan amin a pulong tan profesiya a sinmabi ed limog da.

3 Manwari ya ontan, saray totoo na simbaan so awalaan na baleg a gayaga lapu ed impakasimbalo ed pananisia na saray Lamanite, on, lapu ed simbaan na Dios, a saya so niletneg ed limog da. Tan sikara so nanoolop a sankakaaro ed sakey tan sakey, tan sikara so nangayaga ed sakey tan sakey, tan awalaan ira na baleg a gayaga.

4 Tan agawa a dakel ed saray Lamanite so linma ed dalin na Zarahemla, tan imbawag da ed saray totoo a Nephite no panon so impakasimbalo ra ed pananisia, tan sikara so pinuloñgan da na pananisia tan pambabawi.

5 On, tan dakel so saray nampulong ed mapalalo a baleg a pakapanyari tan pakaoley, ya angan naawit da so dakel ed sikara ed kaaraleman na panagpaabeba, pian manmaliw ira a mapaabeba a mananumbok ed Dios tan say Cordero.

6 Tan agawa a dakel ed saray Lamanite so linma ed dalin a mamabaybay; tan ontan met ed si Nephi tan si Lehi so linma met ed dalin a mamabaybay, a mampulong ed saray totoo. Tan dia ed onia nansampot so komaanemaplo tan talo a taon.

7 Tan nia, wala so kareenan ed amin a dalin, a dia ed saray Nephite linma ra ed angan dinan a kabiañgan na dalin a labay da, balang la ed limog na saray Nephite odino dia ed saray Lamanite.

8 Tan agawa a saray Lamanite so linma ra met ed angan iner a labay da, balang la ed limog na saray Lamanite odino dia ed limog na saray Nephite; tan dia ed onia sikara so awalaan na bulos a pantatalusan ed sakey tan sakey, a mansaliw odino manlako, tan mangungona, unong ed saray pilalek da.

9 Tan agawa a nanmaliw ira a mapalalo a mayaman, mandapag a saray Lamanite tan saray Nephite; tan sikara so awalaan na dakerakel a balitok, tan pilak, tan amin a nengneng na saray ankabli a mital, mandapag dia ed dalin ya abalaten tan dalin ed baybay.

10 Natan say dalin a wala ed abalaten so tinawag da a Lehi, tan say dalin ed baybay tinawag da a Mulek, ya imboloy da ed laki ya anak nen Sedekias; say Katawan iniakar to si Mulek ed dalin a baybay, tan si Lehi dia ed dalin ya abalaten.

11 Tan nia, wala so amin a nengneng na balitok ed mandapag ed saraya a dua a dalin, tan pilak, tan ankabli a bato ed amin a nengneng; tan wala ra met so saray marunong a managkimey, a sikara so nankimey ed amin a nengneng na bato tan sinuri da so saraya; tan dia ed onia sikara so nanmaliw a mayaman.

12 Sikara so nantanem na saray tanaman a nandawa dia ed daakan, mandapag dia ed baybay tan dia ed abalaten; tan sikara so inmaliguas a mapalalo, mandapag ed baybay tan abalaten. Tan sikara so dinmakel tan binmiskeg a mapalalo ed saman a dalin. Tan sikara so nanasikaso na dakel ya olop na manok tan baka, on, saray kilaw a pinataba.

13 Nia saray bibii so makuli ra a mankimey tan nanabel tan nangawa ra na amin a nengneng na abel, a lienso tan amin a kanengneñgan na abel pian nakawesan so inkalakseb da. Tan dia ed onia say komaanemaplo tan apat a taon so linmabas ed kareenan.

14 Tan dia ed komaanemaplo tan lima a taon awalaan met ira na baleg a gayaga tan kareenan, on, dakel ya impampulong tan dakel so profesiya nipaakar ed no anto so onsabi. Tan onia so inlabas na komaanemaplo tan lima a taon.

15 Tan agawa dia ed komaanemaplo tan anem a taon ya oley na saray okom, nia, si Cezoram so pinatey na ag kabat a lima legan a sikato so wala ed yuroñgan na panañgokoman. Tan agawa ed saman lamlamang a taon, say anak to a laki, a sikato so tinuro na saray totoo ya onsalat ed sikato, so pinatey da met. Tan onia so impansampot na komaanemaplo tan anem a taon.

16 Tan dia ed gapo na komaanemaplo tan pito a taon saray totoo so ginmapo ra a mapalalo a karelmeñgan lamet.

17 Tan nia, binendicionan ira na Katawan ed andukey a panaon na kayamanan ed mundo kanian sikara so ag ginmalaw ed pasnok, ed bakal, ni say pamaterter na dala; dia ed ontan ginapoan da ya iteen so saray puso ra ed saray kayamanan da; on, ginapoan da ya anapen so pakagungona ra pian sikara so nipaatagey ya ontaluna ed sakey tan sakey; dia ed ontan ginapoan da so mangawa na maamot a panagpatey, tan panagtakew tan panagtolisan, pian sikara so makagamor na gungona.

18 Tan natan nia, saraman so managpatey tan managtulisan so olop a tinibukel nen Kishkumen tan si Gadianton. Tan natan agawa, a wala so dakel ed sikara, anga ed limog na saray Nephite, so kabiañgan na olop nen Gadianton. Balet nia, sikara so dakerakel ed limog na saray marelmeng a kabiañgan na saray Lamanite. Tan sikara so atawag a managtulisan tan managpatey nen Gadianton.

19 Tan sikara so amatey ed pañgulo ya okom a si Cezoram, tan say anak to, legan a wala ra ed yuroñgan na panañgokom; tan nia, sikara la so ag arumog.

20 Tan natan agawa sanen asukayan na saray Lamanite a wala so saray tulisan ed limog da sikara so mapalalo a maermen; tan inkana ra so amin a nayarian da a wala ed pakapanyari ra pian sikara so deralen da ed tapew na dalin.

21 Balet nia, si Satanas pinagalaw to so puso na dakel a kabiañgan na Nephite, anga ed akikasakey ira ed saraman so olop na matatakew, tan linmoob ira ed saray paknaan da tan dia ed saray samba ra, ya iagel da tan asikasoen da so sakey tan sakey ed antokaman a mairap a kipapasen a napasenan da, pian sikara so ag nadusa ed saray panagpatey da, tan saray panagtolisan da, tan saray panagtakew da.

22 Tan agawa a sikara so awalaan na saray tanda, on, saray maamot a tanda, tan saray maamot a salita ra; tan saya pian nibiig da so sakey ya agi a linmoob ed paknaan, pian antokaman a karelmeñgan a gawaen na sakey ya agi da so ag sakitan na agi to, odino saray kabiañgan na olopan, na saraman so akipaknaan.

23 Tan dia ed onia sikara so mamatey, tan manderal, tan mantakew, tan mangawa na inkabalangkantis tan amin a kanengneñgan na karelmeñgan, a sumpa ed saray gangan na bansa ra tan ontan met ed saray gangan na Dios da.

24 Tan siopaman a kabiañgan na olopan da so mañgipatua ed mundo na saray karelmeñgan da tan saray karumsisan da, sikato so nasalaysay, aliwa ya unong ed gangan na bansa ra, balet unong ed gangan na karelmeñgan da, a saya so initer nen Gadianton tan si Kishkumen.

25 Natan nia, saraman a maamot a samba tan paknaan so ingangan nen Alma ed anak to a laki ya ag ompaway ed mundo, ag la piga saraya a pamaakaran so mañgawit ed saray totoo ed kadederal.

26 Natan nia, saraman a maamot a samba tan paknaan so ag sinmabi ed si Gadianton ya inaon ed saray kasulatan ya iniawat ed si Helaman; balet nia, saraya so niiter ed puso nen Gadianton na saman met lamlamang so nantanguyor ed saray unaan ya ateng tayo a mañgan ed saman so nisebel a bunga—

27 On, saman met lamlamang so akinonong ed si Cain, a no pateyen to si agi to ya Abel saya so ag nakabatan na mundo. Tan sikato so akinonong ed si Cain tan saray mananumbok to nanlapu la ed saman a panaon.

28 Tan ontan sikato met lamlamang so añgiter ed puso na saray totoo a mañgipaalagey ira na tori a nagnap ed kinaatagey pian makaakar ira ed tawen. Tan sikato met lamlamang so añgiwanwan ed saray totoo a nanlapu ed saman a tori ed saya a dalin; a sikato so añgibuyak na kimey na kabiluñgetan tan karumsisan ed amin a lapag na tapew na dalin, anga ed niguyor to so saray totoo ed nagnap da a kadederal, tan ed andi-angaan ya infierno.

29 On, sikato met lamlamang so añgilogan ed puso nen Gadianton a mañgituloy ed kimey na kabiluñgetan, tan maamot a panagpatey; tan saya so inawit to nanlapu ed gapo na too ya anga ed saya a panaon.

30 Tan nia, sikato so saman so sugsog ed amin a kasalanan. Tan nia, itotuloy to ni so saray kimey to ed kabiluñgetan tan maamot a panagpatey, tan iniawat to so saray maamot a nunoñgan da, tan saray samba ra, tan saray paknaan da, tan say plano ra a makapataktakot a karelmeñgan, manlapu ed sakey a kailalakan ya anga ed sananey a kailalakan unong ed pakabemben to ed puso na saray anak na totoo.

31 Tan natan nia, malet so impakabemben to ed puso na saray Nephite; on, a dia ed sikara so nanmaliw a mapalalo a marelmeng; on, a say dakerakel a kabiañgan da so sinmian ed dalan na inkamatunong, tan ingatin-gatin da ed silong na saray sali ra so saray gangan na Dios, tan sikara so linma ed dili a dalan da, tan sikara so nampaalagey ed inkasikara na saray talintao ra ed balitok da tan pilak da.

32 Tan agawa a saraya ya amin a karelmeñgan so sinmabi ed sikara ed loob na aliwa a dakel a taon, a dia ed say dakel a kabiañgan da so sinmabi ed komaanemaplo tan pito a taon ya oley na saray okom ed saray totoo nen Nephi.

33 Tan sikara so binmaleg ed karelmeñgan da ed komaanemaplo tan walo a taon met, dia ed baleg a kaermenan tan dageyem na saray matunong.

34 Tan dia ed onia anengneng tayo a saray Nephite ginapoan da so onlasay ed ag-panisia, tan binmaleg ira ed karelmeñgan tan karumsisan, legan a saray Lamanite so ginmapo ya ombaleg a mapalalo ed pikakabat ed Dios da; on, sikara so ginmapo ya ononor ed saray tutuntonen tan saray gangan to, tan mankurang ed katuaan tan kaptekan ed arap to.

35 Tan dia ed onia anengneng tayo a say Espiritu na Katawan ginmapo ya onoyos ed saray Nephite, lapu ed karelmeñgan tan awet na saray puso ra.

36 Tan dia ed onia anengneng tayo a ginapoan na Katawan ya iter so Espiritu to ed saray Lamanite, lapu ed inomay da tan bulos na linawa ra a manisia ed saray salita to.

37 Tan agawa ya inanap na saray Lamanite so olop na saray matatakew a Gadianton; tan impulong da so salita na Dios ed saray lalo a marelmeng a kabiañgan da, anga ed saya ya olop na matatakew so sigpot ya aderal ed limog na saray Lamanite.

38 Tan agawa dia ed sananey a dapag, pinabiskeg ira na saray Nephite tan tinuloñgan da ra, manlapu ed saray lalo a marelmeng a kabiañgan da, anga ed sikara so nitayak ed amin a dalin na saray Nephite, tan atanguyor da so saray dakel a kabiañgan na saray matunong anga ed sikara so anisia ed saray kimey da tan akiapag ira ed saray atulisan da, tan sikara so akitipon ed saray maamot a panagpatey tan pannununoñgan.

39 Tan dia ed onia agamoran da so dili a panañgikurang na oley, a dia ed saya ingatin-gatin da ed saray sali ra tan binakbak tan pinairap tan imbeneg da so saray duka tan saray maoyamo, tan mapaabeba a mananumbok na Dios.

40 Tan dia ed onia nanengneng tayo a sikara so wala ed makapataktakot a kipapasen, tan asinger la ra ed andi-angaan a kadederal.

41 Tan agawa ya onia so impansampot na komaanemaplo tan walo a taon ya oley na saray okom ed saray totoo nen Nephi.