1 Tan agawa a wala so linmesa ya inkaapag ed limog na saray totoo, a dia ed saya sikara so naapag dia tan diman tan sikara so nankurang ed kaliktan da, a tinaynan da si Nephi a bokbukor to, unong nen sikato so nanalagey ed pegley da.

2 Tan agawa a si Nephi so linma met la ed dalan to a mamaarap ed dili ya abong to, a manmumotektek ed saray beñgatla ya impanengneng na Katawan ed sikato.

3 Tan agawa a legan a wala ed onia a panmumotektek—lapu ed sikato so maermen a maong makaseñgeg ed karelmeñgan na saray totoo a Nephite, saray maamot a kimey da ed kabiluñgetan, tan saray panagpatey da, tan saray panagsamsam da, tan amin a kanengneñgan na karelmeñgan—tan agawa a legan ya onia so panmumotektek to ed puso to, nia, sakey a voces so sinmabi ed sikato a nankuan:

4 Mapalar ka, Nephi, makaseñgeg ed saraman a beñgatla a ginawam, lapu ed anengneng ko no panon ya andi-kesaw so impañgibawag mo ed salita, ya initer ko ed sika, ed saya a totoo. Tan ag ka tinmakot ed sikara, tan ag mo nampilalekan ya iagel so dili a bilay mo, balet inanap mo so linawak, tan inonor mo so saray gangan ko.

5 Tan natan, lapu ed saya so ginawam ya andi-kesaw, nia, sika so bendicionan ko ya ando la ya ando; tan gawaen taka a makapanyari ed salita tan dia ed gawa, ed pananisia tan saray kimey; on, anga ed amin a beñgatla so nagawa ed sika unong ed salitam, lapu ed ag mo kekerewen so saman so onsumlang ed linawak.

6 Nengneng mo, sika si Nephi, tan siak so Dios. Nia, saya so ibawag ko ed sika ed arap na saray angeles ko, a nawalaan ka na pakapanyari ed saya a totoo, tan bakbaken mo so dalin na eras, tan salot, tan kadederal, unong ed karelmeñgan na saya a totoo.

7 Nia, iter ko ed sika so pakapanyari, pian antokaman a paeletan mo ed dalin saya met so napaeletan ed tawen; tan antokaman ya ukbaran mo ed dalin saya met so naukbar ed tawen; tan dia ed onia sika so nawalaan na pakapanyari ed saya a totoo.

8 Tan dia ed onia, no ikuan mo ed saya a templo saya so napaldua, saya so nagawa.

9 Tan no ikuan mo ed saya a palandey, Onabeba ka tan manmaliw ka a mapalanas, saya so nagawa.

10 Tan nia, no ikuan mo a say Dios bakbaken to so saya a totoo, saya so nagawa.

11 Tan natan nia, igangan ko ed sika, ya onla ka tan ibawag mo ed saya a totoo, ya onia so inkuan na Katawan a Dios, a sikato so Sankamakapanyarian ed amin: Likud no sikayo so mambabawi sikayo so nabakbak, anga dia ed kadederal.

12 Tan nia, natan agawa sanen imbalikas na Katawan so saraya a salita ed si Nephi, sikato so tinmonda tan ag la tinmuloy ya ompawil ed abong to, balet sikato so pinmawil ed saray karaklan ya ataytayak ed tapew na saman a dalin, tan ginapoan to ya ibawag ed sikara so salita na Katawan a saya so nisalita ed sikato, nipaakar ed kaderal da no sikara so ag mambabawi.

13 Natan nia, manwari ya ontan la kabaleg so milagro a ginawa nen Nephi ed impañgibaga to nipaakar ed impatey na pañgulo ya okom, pinaawet da so saray puso ra tan ag da dineñgel so saray salita na Katawan.

14 Dia ed ontan imbawag nen Nephi ed sikara so salita na Katawan, a nankuan: Likud no mambabawi kayo, kuan na Katawan, sikayo so nabakbak anga ed kadederal.

15 Tan agawa a sanen nibawag nen Nephi ed sikara so saya a salita, nia, siansia ni a pinaawet da so saray puso ra tan ag ira ondeñgel ed saray salita to; dia ed ontan sikato so pinauges da, tan nampilalekan da a limaan pian sikato so ipisok da ed pañgawan.

16 Balet nia, say pakapanyari na Dios so wala ed sikato, tan sikato so ag da naala ya ipisok ed pañgawan, lapu ed sikato so inala na Espiritu tan sikato so niarawi ed pegley da.

17 Tan agawa a dia ed onia sikato so nankurang ed panamegley na Espiritu, manlapu ed sakey a dagup ya anga ed sananey, ya ibabawag to so salita na Dios, anga ed saya so nibawag to la ed sikara ya amin, odino niakar to ed amin a limog na saray totoo.

18 Tan agawa a sikara so ag ondeñgel ed saray salita to; tan wala so ginmapo a baliñgaan, a dia ed say sikara so naapag-apag sumpa ed inkasikara a dili tan ginapoan da so mampapateyan ed sakey tan sakey dia ed panamegley na espada.

19 Tan dia ed onia so impansampot na komapitomplo tan sakey a taon ya oley na saray okom ed saray totoo nen Nephi.