Say Libro nen Helaman

1 Tan natan nia, agawa dia ed gapo na komaapataplo a taon ya oley na saray okom ed saray totoo nen Nephi, ginmapo so mapalalo ya irap ed limog na saray totoo a Nephite.

2 Tan nia, si Pahoran so inatey, tan sikato so linma la ed dalan na amin ed dalin; dia ed ontan ginmapo so mapalalo a baliñgaan no siopa so mañgala ed yuroñgan na panañgokoman ed limog na saray sanaagi, a sikara so lalaki ya anak nen Pahoran.

3 Natan saraya so ñgaran na saray mambabaliñgaan ed pañgala na yuroñgan na panañgokoman, a sikara met so nanseñgegan a saray totoo so mambaliñgaan: sikara di Pahoran, Paanchi, tan Pacumeni.

4 Natan aliwa ni a saraya ya amin so lalaki ya anak nen Pahoran (tan dakel so anak to), balet sikara labat, so mansasamsaman ed yuroñgan na panañgokoman; dia ed ontan, sikara so señgegan na nankatlo ya inkaapag-apag na saray totoo.

5 Manwari ya ontan, agawa a si Pahoran so aturo ed panamegley na voces na saray totoo a pañgulo ya okom tan gobernador ed saray totoo nen Nephi.

6 Tan agawa a si Pacumeni, sanen anengneng to ya ag to naala so yuroñgan na panañgokoman, sikato so akitipon ed voces na saray totoo.

7 Balet nia, si Paanchi, tan say kabiañgan na saray totoo a mampilalek a sikato so gobernador da, mapalalo so sanok da; dia ed ontan, ñgalñgali to la ra tanguyoren so saray totoo ya onalsa sumpa ed saray kaagian da.

8 Tan agawa a sanen ñgalñgali to la gawaen so saya, nia, sikato so inala ra, tan sikato so sinalaysay da unong ed voces na saray totoo, tan sikato so atutolan na patey; tan sikato so tinmalindeg ya inmalsa tan nampilalekan to a deralen so kawayañgan na saray totoo.

9 Natan sanen saraman so totoo a mampilalek a sikato so gobernador da anengneng da a sikato so atutolan na patey, dia ed ontan nampasnok ira, tan nia, añgibaki ra na sakey a manñgaran na Kishkumen, ed yuroñgan na panañgokoman nen Pahoran, tan pinatey to si Pahoran sanen manyodyurong ed yuroñgan na panañgokoman.

10 Tan sikato so inosilan na saray igagangan nen Pahoran; balet nia, agay la so peles na batik nen Kishkumen ya angapo so too ya akaabot ed sikato.

11 Tan sikato so linma ed saraman so añgibaki ed sikato, tan sikara ya amin so linmoob ed paknaan, on, sinambaan da ed andi-angaan ya Amalsa, ya angapo so siopaman a too so pañgibagaan da a si Kishkumen so nampatey ed si Pahoran.

12 Dia ed ontan, si Kishkumen so ag-akabatan ed limog na saray totoo nen Nephi, lapu ed sikato so nankonkonwari ed saman a panaon nen pinatey to si Pahoran. Tan si Kishkumen tan saray kaolop to, ya akipaknaan ed sikato, inlimog da so inkasikara ed saray totoo, ed kanengneñgan ya amin da so ag la naalmo; balet no kaonoñgan so saray arumog da sikara so atutolan na patey.

13 Tan natan nia, si Pacumeni so aturo, unong ed voces na saray totoo, a manmaliw a pañgulo ya okom tan gobernador na saray totoo, a sikato so manoley a kasalat nen agi to a Pahoran; tan saya so unong ed pankatunoñgan to. Tan saraya ya amin, so agawa ed komaapataplo a taon ya oley na saray okom; tan saya so nansampot.

14 Tan agawa dia ed komaapataplo tan sakey a taon ya oley na saray okom, saray Lamanite so nantipon na ag-nabilang a ñgayew na totoo, tan sikara so naayuraan da na saray espada, tan saray panagtastas tan pabekang, tan saray pana, tan saray salimbeng na ulo, tan saray salimbeng na pagew, tan amin a nengneng na saray salimbeng.

15 Tan sikara lamet so pinmegdat pian mañgigapo na bakal sumpa ed saray Nephite. Tan sikara so impañgulo na sakey a too a say ñgaran to Coriantumr; tan sikato so kapolian nen Zarahemla; tan sikato so sakey ed saray sinmian ed limog na saray Nephite; tan sikato so baleg tan mabiskeg a too.

16 Dia ed ontan, say ari na saray Lamanite, a say ñgaran to Tubaloth, say laki ya anak nen Ammoron, tan impasen to a si Coriantumr, lapu ed sikato so sakey a mabiskeg a too, nayarian to so ontalindeg sumpa ed saray Nephite, ed biskeg to tan ontan met ed dakel a kakabatan to, a dia ed pañgibaki to sikato so makagamor na pakapanyari ed saray Nephite—

17 Dia ed ontan pinagalaw to ra a mampasnok, tan tinipon to so saray ñgayew to, tan tinuro to si Coriantumr a manmaliw a pañgulo ra, tan ingangan to ra ya onkurang a mamaarap ed dalin na Zarahemla a milaban sumpa ed saray Nephite.

18 Tan agawa lapu ed dakel a baliñgaan tan baleg a kairapan ed oley, kanian ag ira akapañgipasen na magenap a bantay ed dalin na Zarahemla; lapu ed impasen da a saray Lamanite ag la ra onla ed pegley na saray dalin da ya ondugpa ed saman a baleg a ciudad na Zarahemla.

19 Balet agawa a si Coriantumr so nankurang ed unaan na dakerakel a ñgayew to, tan akasabi ra ed kawalaan na saray manaayam ed ciudad, tan say impankurang da so mapalalo ed peles kanian angapo so panaon na saray Nephite a mantipon na saray ñgayew da.

20 Dia ed ontan pinatey nen Coriantumr so bantay ed lolooban na ciudad, tan sikato so kinmurang a kaolop to so tibukel a ñgayew to ed ciudad, tan pinatey da so siopaman ya onsumpa ed sikara, a dia ed onia kinayarian da so tibukel a ciudad.

21 Tan agawa a si Pacumeni, a sikato so pañgulo ya okom, so batik ed arap nen Coriantumr; anga ed padir na ciudad. Tan agawa a dinesdes nen Coriantumr ed padir, a dia ed onia sikato so inatey. Tan onia so impansampot na saray agew nen Pacumeni.

22 Tan natan sanen anengneng nen Coriantumr a sikato la so makankayarian na ciudad na Zarahemla, tan anengneng to a saray Nephite so batik ed arap da, tan sikara so apatey, tan sikara so dinadakep da, tan impisok da ra ed pañgawan, tan agamoran to so pankayarian na sankabiskegan a pasen ed lapag na amin a dalin, say puso to so awalaan na biskeg na linawa a dia ed onia ñgalñgali la onla sumpa ed amin a dalin.

23 Tan natan sikato so ag nambayag ed dalin na Zarahemla, balet sikato so kinmurang a kaolop to so baleg a ñgayew, angan amaarap ed ciudad na Bountiful; lapu ed wala so mabiskeg a getma to ya onla tan ibotaw to so dalan to ed panamegley na espada, pian nagamoran to so mamabaybay a kabiañgan na dalin.

24 Tan, dia ed pañgipapasen to a say sankabalegan a biskeg da so wala ed pegley na saman a dalin, dia ed ontan sikato so nankurang, ya ag to initer ed sikara so panaon a mantitipon ed inkasikara likud labat ed ankekelag ya olop; tan dia ed onia a kanengneñgan sikara so dinugpaan da tan sikara so tinipas da ya imparukol ed dalin.

25 Balet nia, saya a kurang nen Coriantumr ed pegley na saman a dalin so añgiter ed si Moronihah na balbaleg a pankaabigan a taluna ed sikara, angaman ontan la so kinarakel na saray Nephite ya inaatey.

26 Tan nia, impasen nen Moronihah a saray Lamanite so ag la onla ed pegley na saman a dalin, no ag da dugpaan so saray ciudad ed kaliber-liber na ketegan a siñga unong na ginawa ra la; dia ed ontan ingangan nen Moronihah a saray mabiskeg a ñgayew da pagnayonen da so saray kabiañgan a mampaliber ed ketegan.

27 Balet nia, ag tinmakot so saray Lamanite unong ed pilalek to, balet sikara so linma ed pegley na saman a dalin, tan inala ra so manunaan a ciudad a saya so ciudad na Zarahemla, tan sikara so nankurang ed saray pegley a kabiañgan na dalin, a pinapatey da so saray totoo ed baleg a panagpatey, mandapag a lalaki, bibii tan ugogaw, a kinayarian da so dakel a ciudad tan dakel ya asalimbeñgan.

28 Balet sanen asukayan nen Moronihah so saya, tampol ya imbaki to si Lehi a kaiba to so ñgayew ya onsaliberber ed sikara sakbay na isabi ra ed dalin na Bountiful.

29 Tan onia so ginawa to; tan sikato so añgipañgulo ed sikara sakbay na isabi ra ed dalin na Bountiful, tan sikara so nilabanan to, dia ed onia ginapoan da so onsener a papawil ed dalin na Zarahemla.

30 Tan agawa a sinakbayan nen Moronihah ira ed isosener da, tan sikara so nilabanan to, a dia ed saya nanmaliw a mapalalo a madala a bakal; on, dakel so apatey, tan dia ed limog na saray apatey si Coriantumr so nalmo da met.

31 Tan natan, nia, ag la makasener so saray Lamanite ed dinanman a dalan, ni say dia ed baybay, odino dia ed abalaten, ni say dia ed bokig, ni say dia ed sagur, lapu ed sikara so aliktob ed amin a dapag na saray Nephite.

32 Tan dia ed onia iniakar nen Coriantumr so saray Lamanite ed pegley na saray Nephite, a dia ed saya sikara so wala ed loob na pakapanyari na saray Nephite, tan sikato a dili so apatey, tan insuko na saray Lamanite so inkasikara ed lima na saray Nephite.

33 Tan agawa a kinayarian nen Moronihah so ciudad na Zarahemla lamet, tan ingangan to ed saray Lamanite ya adakep so ontaynan ed paway na dalin ed kareenan.

34 Tan dia ed onia so impansampot na komaapataplo tan sakey a taon ya oley na saray okom.