1 Tan natan agawa dia ed komaapataplo tan talo a taon ya oley na saray okom, angapo so baliñgaan ed limog na saray totoo nen Nephi likud ed ankelag a kinon a saya so wala ed simbaan, a saya so akaseñgeg na melag a baliñgaan ed limog na saray totoo, a saya a kipapasen so naapiger ed kasampotan na komaapataplo tan talo a taon.

2 Tan angapo so baliñgaan ed limog na saray totoo ed komaapataplo tan apat a taon; ni say dakel a baliñgaan ed komaapataplo tan lima a taon.

3 Tan agawa ed komaapataplo tan anem a taon, on, wala so dakerakel a baliñgaan tan amayamay a sinmisian; a dia ed saya wala so mapalalo a kinarakel na tinmataynan ed dalin na Zarahemla, tan linma ra ed dalin a mamabaybay pian tawiren da so dalin.

4 Tan sikara so nambaroy ed mapalalo a kinaarawi a pasen, a dia ed saya sikara so akasabi ed ankakabaleg a tipon na danum tan amayamay ya ilog.

5 On, tan angan sikara so tinmayak ed amin a kabiañgan na dalin, ed dinanman a kabiañgan ya ag nanmaliw ya ag-napanayaman tan angapo so kakiewan, lapu ed kinarakel na nanayam diman ya akakauna ya anawir na dalin.

6 Tan natan angapo so kabiañgan na dalin ya ag-napanayaman, likud no onkana ed kakiewan; balet lapu ed ontan la ya inkaderal na saray totoo ya akakauna a nanayam ed saman a dalin kanian saya so tinawag na ag-napanayaman.

7 Tan lapu ed karaiset na kakiewan ed tapew na saman a dalin, manwari ya ontan saray totoo a linma diman so nanmaliw a mapalalo a marunong ed panagkimey na semento; dia ed ontan sikara so nampaalagey na kaaboñgan a semento, a saya so nanayaman da.

8 Tan agawa a sikara so dinmakel tan binmuyak, tan sikara so linma a manlapu ed dalin a mamaabalaten anga ed dalin a mamabaybay, tan binmuyak ira a dia ed onia ginapoan da so ontayak ed tapew na amin a dalin, manlapu ed dayat ed abalaten ya anga ed dayat ed baybay, manlapu ed dayat ed sagur ya anga ed dayat ed bokig.

9 Tan saray totoo a wala ed dalin a mamabaybay so nanayam ed abong-abong ya abel, tan dia ed abong a semento, tan inasikaso da so antokaman a kiew ya ontubo ed tapew na saman a dalin a saya so ombaleg, pian dia ed isabi na panaon wala so kiew a pañgipaalagey na saray abong da, on, saray ciudad da, tan saray templo ra, tan saray sinagogas da, tan saray pasen a panagpikasian da, tan ed amin a nengneng na paalagey da.

10 Tan agawa a lapu ed mapalalo a matalag so kiew diman ed dalin a mamabaybay, dakel so impawit da ed panamegley na bapor.

11 Tan dia ed onia initer da ed saray totoo so dalin a mamabaybay pian makapañgipaalagey ira na dakel a ciudad, mandapag a kiew tan semento.

12 Tan agawa a dakel ed saray totoo nen Ammon, a sikara so inianak a Lamanite nen saman, so linma met ed saya a dalin.

13 Tan natan dakel so kasulatan a nisinop nipaakar ed saraya a totoo, na dakel ed saya a totoo, a saraya so tua tan balbaleg, nipaakar ed sikara.

14 Balet nia, sakey a kakalasus a kabiañgan na saray kasulatan na saya a totoo, on, say kasulatan na saray Lamanite tan saray Nephite, tan saray bakal da, tan saray baliñgaan da, tan saray gotgotan da, tan saray panagpulong da, tan saray profesiya ra, tan saray baroy da ed panamegley na bapor tan say impangagawa ra na saray bapor, tan say impampaalagey da na saray templo, tan sinagogas tan saray pasen a panagpikasian da, tan say inkamatunong da, tan say karelmeñgan da, tan saray panagpatey da, tan saray panagtakew da, tan saray panagtulisan da, tan amin a nengneng na karumsisan tan inkabalangkantis, so ag nilugan ed saya a kimey.

15 Balet nia, wala so dakerakel a libro tan dakerakel a kasulatan ed nambabañgil a nengneng, tan saraya so malaglaem ya insinop na saray Nephite.

16 Tan saraya so iniawat da manlapu ed sakey a kailalakan ya anga ed sananey na saray Nephite, anga ed sikara so naplag ed kasalanan tan sikara so inaatey, tan dinederal da, tan inaanopan da, tan dinagdag da ira, tan pinapatey, tan nitaytayak ed tapew na dalin, tan sikara so akilaok ed saray Lamanite anga ed sikara so ag la natawag a Nephite, tan nanmaliw ira a marelmeng, tan atap, tan masebeg, on, anga ed nanmaliw la ra a Lamanite.

17 Tan natan pawilen ko lamet so nipaakar ed kasulatan ko; dia ed ontan, say asalitak so agawa la kayari na inkiwala na baleg a baliñgaan, tan saray gulo, tan saray bakal, tan gotgotan, ed limog na saray totoo nen Nephi.

18 Say komaapataplo tan anem a taon ya oley na saray okom so nansampot;

19 Tan agawa a wala ni so baleg a baliñgaan ed saman a dalin, on, anga ed komaapataplo tan pito a taon, tan ontan met ed komaapataplo tan walo a taon.

20 Manwari ya ontan si Helaman so akapasen ni ed yuroñgan na panañgokoman a wala so kaptekan tan pampapara; on, inasikaso to so pakasumpal na saray tutuntonen, tan saray tutol, tan saray gangan na Dios; tan ginawa to no anto so manepeg ed imaton na Dios ya andi-tonda; tan tinunton to so saray dalan nen ama to, dia ed onia sikato so inmaliguas ed dalin.

21 Tan agawa a sikato so awalaan na duara ya anak a lalaki. Initer to ed pañguloan so ñgaran a Nephi, tan say sankayugtanan, say ñgaran a Lehi. Tan sikara so ginmapo a binmaleg ed Katawan.

22 Tan agawa a saray bakal tan baliñgaan so ginmapo ya ontonda, a minmelag, ed limog na saray totoo a Nephite, dia ed saguinunor a sampot na komaapataplo tan walo a taon ya oley na saray okom ed saray totoo nen Nephi.

23 Tan agawa dia ed komaapataplo tan siam a taon ya oley na saray okom, wala so nampatuloy a kareenan a niletneg ed saman a dalin, amin likud labat ed maamot ya impinunong ed si Gadianton a matakew a sikato so añgiletneg ed mareereen a kabiañgan na dalin, a dia ed saman a panaon ag ira kabat na saraman so pañgulo na oley; dia ed ontan sikara so ag aderal ed saman a dalin.

24 Tan agawa ed saya met lamlamang a taon wala so mapalalo a baleg ya aliguas ed simbaan, a dia ed saya wala so nilibo ya inkasakey da so inkasikara ed simbaan tan sikara so abiniagan onkana ed pambabawi.

25 Tan ontan la so kabaleg na inialiguas na simbaan, tan agay la so karakel na saray bendicion a nikalbo ed saray totoo, ya angan saray atagey a sacerdote tan saray managbañgat mankelaw ira ed inkasikara ya ag nasoksukat.

26 Tan agawa a say kimey na Katawan so inmaliguas onkana ed panagbiniag tan pankakasakey ed simbaan na Dios, na amayamay a kamarerua, on, angan asamplora a nilibo.

27 Dia ed onia anengneng tayo a say Katawan so mapañgasi ed amin, dia ed katuoran na puso ra, ya ontawag ed masanto a ñgaran to.

28 On, dia ed onia anengneng tayo a say dalan a paarap ed tawen so lukas ed amin, angan saraman so manisia ed ñgaran nen Jesu Cristo, a sikato so Anak na Dios.

29 On, anengneng tayo a siopaman ya ompeket ed salita na Dios, a saya so mabilay tan makapanyari, a saya so mamuyak ed amin a kasiliban tan patit tan masilib a plano na demonyo, tan mañgitunton ed too nen Cristo ed mairap tan maiñget a dalan ya ombasil ed saman so andi-angaan a kaaraleman na segsegang a saya so niparaan a manliktob ed saray makasalanan—

30 Tan isakbit to so kamarerua ra, on, say ag ompatey a kamarerua ra, ed nikawanan na Dios ed panarian na tawen, ya onyurong a miolop ed si Abraham, tan si Isaac, tan si Jacob, tan kaiba na amin a masanto ya ama tayo, ya ag la ra ompaway.

31 Tan dia ed saya a taon wala so nampatuloy a gayaga ed dalin na Zarahemla, tan dia ed amin a pasen ed kaliber-liber, angan dia ed amin a dalin a kayarian na saray Nephite.

32 Tan agawa a wala so kareenan tan mapalalo a baleg a gayaga ed nakekeraan ed komaapataplo tan siam a taon; on, tan wala met so nampatuloy a kareenan tan baleg a gayaga ed komalimamplo a taon ya oley na saray okom.

33 Tan dia ed komalimamplo tan sakey a taon ya oley na saray okom wala met so kareenan, likud labat ed kinon a ginmapo ya onloob ed simbaan—aliwa a dia ed simbaan na Dios, balet dia ed puso na saray totoo ya ipapasen da so inkasikara a miembro na simbaan na Dios—

34 Tan sikara so nampaatagey ed saray kinon da, anga ed impamasegsegang da ed dakel ed saray kaagian da. Natan saya so baleg a kaugsan, ya akaseñgeg ed saray mapaabeba a kabiañgan na saray totoo a mantepel na baleg a pamasegsegang, tan onyakyak ed dakel a kairapan.

35 Manwari ya ontan sikara so naynay a nanayuno tan nampikasi, tan sikara so binmiskeg tan binmiskeg ed panagpaabeba ra, tan nanmaliw a malet tan inmelet so pananisia ra ed Cristo, a saya so nampano ed kamarerua ra na gayaga tan ligliwa, on, anga ed inkalinisan tan inkapasanto na saray puso ra, a saya ya impakasanto agamoran da lapu ed impañgiter da ed saray puso ra ed Dios.

36 Tan agawa a say komalimamplo tan dua a taon so nansampot met ed kareenan, likud labat ed mapalalo a baleg a kinon a linmoob ed puso na saray totoo; tan saya lapu ed saray mapalalo a baleg a kayamanan da tan aliguas da ed saman a dalin; tan saya so binmaleg ed sikara ya inagew-agew.

37 Tan agawa ed komalimamplo tan talo a taon ya oley na saray okom, si Helaman so inatey, tan say sankapañguloan ya anak to a laki a si Nephi so ginmapo a manoley a kasalat to. Tan agawa a sikato so inmirong ed yuroñgan na panañgokoman ed kaptekan tan pampapara; on, inonor to so saray gangan na Dios, tan nankurang ed saray basbas nen ama to.