Balaan ng mga Kasulatan
1 Nefi 5


Kapitulo 5

Si Saria nagreklamo batok kay Lehi—Nalipay sila nga duha sa pagbalik sang ila mga anak nga lalaki—Naghatag sila sing mga halad—Ang mga lamina nga saway nagaunod sang mga sinulatan ni Moises kag sang mga propeta—Ang mga lamina nagkilala kay Lehi nga isa sa kaliwat ni Jose—Si Lehi nagpropesiya parte sa iya kaliwatan kag sang pag-amlig sa mga lamina. Mga 600–592 B.C.

1 Kag natabo ini nga sang makaabot kami sa amon amay didto sa kamingawan, tan-awa, napuno sia sing kalipay, kag ang akon man iloy nga si Saria, nalipay sing tuman, kay matuod gid nga nagpangalisud sia bangod sa amon.

2 Kay naghunahuna sia nga nagkalamatay kami sa kamingawan; kag nagreklamo man sia batok sa akon amay, nga ginhambalan sia nga isa sia ka tawo nga may mga panan-awon; nga nagasiling: Tan-awa gindala mo kami palayo sa duta nga amon palanublion, kag ang akon mga anak nga lalaki wala na, kag magkalamatay kita sa kamingawan.

3 Kag sa amo nga sari sang paghambal nagreklamo ang akon iloy batok sa akon amay.

4 Kag natabo ini nga ang akon amay naghambal sa iya nga nagasiling: Nahibal-an ko nga isa ako ka tawo nga may mga panan-awon; kay kon wala ko makita ang mga butang sang Dios sa isa ka panan-awon wala ko kuntani mahibal-i ang kaayo sang Dios, kundi nagpabilin na lamang sa Jerusalem, kag napatay upod sang akon mga kaupod.

5 Apang tan-awa, nakaangkon ako sang isa ka duta sang panaad, nga sa amo nga mga butang ako nagakasadya; huo, kag nahibal-an ko nga luwason sang Ginuo ang akon mga anak halin sa mga kamot ni Laban, kag dal-on sila liwat padulhog diri sa aton sa kamingawan.

6 Kag sa amo nga sari sang paghambal ginpaumpawan sang akon amay nga si Lehi, ang akon iloy nga si Saria, parte sa amon, samtang nagapanglakaton kami sa kamingawan pataklad sa duta sang Jerusalem, agud kuhaon ang kasulatan sang mga Judio.

7 Kag sang makabalik kami sa tolda sang akon amay, tan-awa nangin lubos ang ila kalipay, kag naumpawan ang akon iloy.

8 Kag naghambal sia nga nagasiling: Karon nahibal-an ko na sing pat-od nga ginsugo sang Ginuo ang akon bana sa pagpalagyo padulong sa kamingawan; huo, kag nahibal-an ko man sing pat-od nga gin-amligan sang Ginuo ang akon mga anak, kag ginluwas sila sa mga kamot ni Laban, kag ginhatagan sila sing gahum agud ila matuman ang butang nga ginsugo sa ila sang Ginuo. Kag sa amo sini nga sari sang paghambal sia naghambal.

9 Kag natabo ini nga nagkinalipay sila sing tuman, kag naghatag sang halad kag mga halad-nga-sinunog sa Ginuo; kag naghatag sila sang pasalamat sa Dios sang Israel.

10 Kag pagkatapos nga makahatag sila sang pasalamat sa Dios sang Israel, kinuha sang akon amay nga si Lehi ang mga kasulatan nga kinurit sa mga lamina nga saway, kag iya ginbasa ang mga ini halin sa ginsuguran.

11 Kag iya nakita nga nagaunod ang mga ini sang lima ka libro ni Moises, nga nagahatag sang kasaysayan sang pagtuga sang kalibutan, kag amo man kanday Adan kag Eva, nga amo ang aton una nga mga ginikanan;

12 Kag amo man sang kasulatan sang mga Judio halin sa ginsuguran, tubtob sa pagsugod sang paggahum ni Sedequias, hari sang Juda;

13 Kag amo man sang mga propesiya sang balaan nga mga propeta, halin sa ginsuguran, bisan tubtob sa pagsugod sang paghari ni Sedequias; kag amo man sang madamo nga propesiya nga ginhambal sang baba ni Jeremias.

14 Kag natabo ini nga nakita man sang akon amay nga si Lehi, sa mga lamina nga saway ang lista sang kaliwatan sang iya mga katigulangan; gani iya nahibal-an nga kaliwat sia ni Jose; huo, bisan inang Jose nga amo ang anak ni Jacob, nga ginbaligya sa Egipto, kag amo ang gin-amligan sang kamot sang Ginuo, agud maamligan niya ang iya amay nga si Jacob, kag ang tanan niya nga panimalay halin sa pagkamatay sa gutom.

15 Kag gintuytuyan man sila pagwa sa pagkabihag kag pagwa halin sa duta sang Egipto, sinang amo man nga Dios nga nag-amlig sa ila.

16 Kag sa amo nga paagi natukiban sang akon amay nga si Lehi, ang lista sang kaliwatan sang iya mga katigulangan. Kag si Laban kaliwat man ni Jose, gani sia kag ang iya mga katigulangan amo ang nag-amlig sang mga kasulatan.

17 Kag karon sang makita sang akon amay ining tanan nga butang, napuno sia sang Espiritu, kag nagsugod sa pagpropesiya parte sa iya kaliwatan—

18 Nga ining mga lamina nga saway magadangat sa tanan nga nasyon, kaliwat, lengguahe, kag katawhan nga halin sa iya kaliwatan.

19 Gani, nagsiling sia nga ining mga lamina nga saway indi gid maguba; ukon mapalubog pa sang panahon. Kag nagpropesiya sia sang madamo nga butang parte sa iya kaliwatan.

20 Kag natabo ini nga tubtob sa sini nga tion ako kag ang akon amay nakatuman sang mga kasugoan nga ginsugo sa amon sang Ginuo.

21 Kag nakuha namon ang mga kasulatan nga ginsugo sa amon sang Ginuo, kag ginbasa ang mga ini kag nakita nga maayo ang mga ini; huo, nga tuman gid ka importante para sa amon, kay bangod sini mahimo namon nga maamligan ang mga kasugoan sang Ginuo para sa amon mga anak.

22 Gani, kinaalam ini sa Ginuo nga dapat namon dal-on ang mga ini samtang nagapanglakaton kami sa kamingawan padulong sa duta sang panaad.