1 Kag liwat: Magpamati, O kamo nga panimalay ni Israel, kamo tanan nga ginhamulag kag ginpanabog tungod sang kalainan sang mga pastor sang akon katawhan; huo, kamo tanan nga ginhamulag, nga ginpanglapta sa gwa, nga pila sang akon katawhan, O panimalay ni Israel. Magpamati, O mga pulo, sa akon, kag pamati kamo nga katawhan halin sa malayo; ang Ginuo nagtawag sa akon halin pa sa pagkatawo; halin sa tiyan sang akon iloy ginsambit niya ang akon ngalan.

2 Kag ginhimo niya ang akon baba pareho sing isa ka matalom nga espada; sa landong sang iya kamot gintago niya ako, kag ginhimo ako nga isa ka mahining nga baslay; sa iya baslayan iya ako gintago;

3 Kag nagsiling sa akon: Ikaw ang akon alagad, O Israel, nga sa imo ako pagahimayaon.

4 Dayon nagsiling ako, nagpangabudlay ako sa wala’y pulos, gingamit ko ang akon kusog sa wala’y kapuslanan kag wala sing pulos; pat-od gid ang paghukom sa akon yara sa Ginuo, kag ang akon buluhaton yara sa akon Dios.

5 Kag karon, siling sang Ginuo—nga nagporma sa akon halin sa tiyan nga ako mangin iya alagad, sa pagdala liwat kay Jacob sa iya—bisan nga ang Israel indi pa matipon, apang mangin mahimayaon ako sa mga mata sang Ginuo, kag ang akon Dios amo ang akon mangin kusog.

6 Kag nagsiling sia: Isa ka mamag-an nga butang nga ikaw mangin akon alagad sa pagpatindog sang mga tribo ni Jacob, kag sa pagpapanumbalik sang naamligan sang Israel. Ihatag ko man ikaw bilang isa ka kasanag sa mga Gentil, agud nga ikaw mangin akon kaluwasan tubtob sa mga punta sang kalibutan.

7 Amo ini ang ginasiling sang Ginuo, ang Manunubos sang Israel, ang iya Balaan, sia nga ginakaugtan sang tawo, sia nga ginakangil-aran sang mga nasyon, sa alagad sang mga tagdumala: Ang mga Hari makakita kag magatindog, ang mga prinsipe magasimba man, tungod sang Ginuo nga tampad.

8 Amo ini ang ginasiling sang Ginuo: Sa isa ka nahamut-an nga tion nabatian ko ikaw, O mga pulo sang dagat, kag sa isa ka adlaw sang kaluwasan ginbuligan ko ikaw; kag pagaamligan ko ikaw, kag ihatag ikaw nga akon alagad bilang isa ka kasugtanan para sa katawhan, sa pagpahamtang sang duta, sa pagpapanubli sang mamingaw nga mga duta;

9 Agud nga makasiling ka sa mga bilanggo: Lakat kamo; sa ila nga nagapungko sa kadulom: Ipakita ang inyo mga kaugalingon. Magakaon sila sa mga dalanon, kag ang ila mga halalban mangin sa tanan nga matag-as nga mga lugar.

10 Indi sila paggutumon ukon pag-uhawon, kag ang init man ukon ang adlaw indi magsakit sa ila; kay sia nga may kaluoy sa ila magatuytoy sa ila, bisan sa tupad sang mga tuburan sang tubig ubayan niya sila.

11 Kag ang tanan ko nga kabukiran himuon ko nga dalanon, kag ang akon dalagko nga mga dalanon pataason.

12 Kag dayon, O panimalay ni Israel, tan-awa, ini sila magaabot halin sa malayo; kag yari karon, ini sila halin sa norte kag halin sa weste; kag ini sila halin sa duta sang Sinim.

13 Magkinanta, O mga langit; kag magmangin malipayon, O duta; kay ang mga tiil sinang mga sa este pagalig-unon; kag maghinugyaw sa pagkinanta, O mga bukid; kay indi na sila pagsakiton; kay ginpasulhay sang Ginuo ang iya katawhan, kag mangin maluluy-on sa iya mga nagaantos.

14 Apang, tan-awa, ang Sion nagsiling: Ginpabay-an ako sang Ginuo, kag ang akon Ginuo nalipat na sa akon—apang ipakita niya nga indi amo sina.

15 Kay malimtan bala sing isa ka babayi ang iya bata nga nagasuso, nga indi sia magkaluoy sa iya kaugalingon nga anak? Huo, mahimo nga malipat sila, apang ako indi magkalipat sa imo, O panimalay ni Israel.

16 Tan-awa, ginkurit ko ikaw sa mga palad sang akon mga kamot; ang imo mga pader dalayon nga yara sa akon atubang.

17 Ang imo mga anak magadali-dali batok sa imo mga manuglaglag; kag sila nga mga naglaglag sa imo magalakat palayo sa imo.

18 Ibayaw ang imo mga mata sa palibot kag tan-awa; ini sila tanan nagatipon, kag magapalapit sila sa imo. Kag pareho nga buhi ako, siling sang Ginuo, pat-od gid nga sul-ubon mo sila tanan, pareho sing isa ka ornamento, kag iwagkos sila bisan pareho sing isa ka nobya.

19 Kay ang imo nalaglag kag mamingaw nga mga lugar, kag ang duta sang imo kalaglagan, bisan subong mangin tuman kakitid tungod sang mga pumuluyo; kag sila nga naglamon sa imo mangin malayo.

20 Ang mga anak nga imo maangkon, pagkatapos nga nadulaan ka sang nauna, magasiling liwat sa imo mga dulunggan: Ang lugar tuman kapiot para sa akon; hatagi ako sing lugar nga akon mapuy-an.

21 Dayon magasiling ka sa imo tagipusuon: Sin-o bala ang amay sang mga ini, kay makita nga nadulaan ako sang akon mga anak, kag mamingaw ako, nga isa ka bihag, kag nagapakadto-pakari? Kag sin-o bala ang nagpadako sini sa ila? Tan-awa, binayaan ako nga nagaisahanon; ini sila, diin bala sila naghalin?

22 Amo ini ang ginasiling sang Ginuong Dios: Tan-awa, ibayaw ko ang akon kamot sa mga Gentil, kag patindugon ko ang akon bandera sa katawhan; kag kuguson nila ang imo mga anak nga lalaki sa ila mga butkon, kag ang imo mga anak nga babayi pas-anon nila sa ila mga abaga.

23 Kag ang mga hari mangin imo manug-atipan nga mga amay, kag ang ila mga reyna mangin imo manug-atipan nga mga iloy; magaduko sila sa imo nga ang ila mga nawong ayon sa duta, kag magadilap sang yab-ok sang imo mga tiil; kag imo mahibal-an nga ako amo ang Ginuo; kay indi sila mahuy-an nga nagahulat sa akon.

24 Kay ang inagaw bala pagakuhaon sa gamhanan, ukon ang makatarongan nga mga binihag pagaluwason?

25 Apang amo ini ang ginasiling sang Ginuo, bisan ang mga bihag sang gamhanan pagakuhaon, kag ang inagaw sang makakululba pagaluwason; kay makigbais ako sa iya nga nagapakigbais sa imo, kag luwason ko ang imo mga anak.

26 Kag pakaunon ko sila nga nagapangpigos sa imo sang ila kaugalingon nga unod; mahubog sila sang ila kaugalingon nga dugo pareho sang matam-is nga bino; kag ang tanan nga unod makahibalo nga ako, nga Ginuo, amo ang imo Manluluwas kag imo Manunubos, ang Gamhanan ni Jacob.