1 Ma o wee ruo na mụ, Nifaị, laghachịrị site n’ịkparịta ụka mụ na Onye-nwe, ruo kwa n’ụlọ ikwuu nke nna m.

2 Ma o wee ruo na ọ gwara m okwu si: Lee a rọwo m nrọ, n’ime nke Onye-nwe nyeworo m iwu ka gị na ụmụnne gị nwoke laghachị Jerusalem.

3 Ma lee, Leban ji akụkọ-ndekọta edekọrọ gbasara ndị Juu, jirịkwa akụkọ-agbụrụ nke ezi na ụlọ ndị nna nna m ha, ma a kanyere ha n’elu epekele nile nke bras.

4 Ya mere, Onye-nwe enyewo m iwu-nsọ na gị na ụmụnne gị ndị nwoke ga-eje n’ụlọ Leban, chọọ akụkọ-ndekọta ahụ ma wedata ha n’ime ọzara ebe a.

5 Ma ugbua, lee ka ụmụnne gị ndị nwoke na-atamu, na-asị na ihe siri ike ka m chọrọ n’aka ha; ma lee ọ bụghị m chọrọ ka ha mee ya, kama ọ bụ iwu-nsọ nke Onye-nwe.

6 Ya mere gaa nwa m, Onye-nwe ga-agọzi gị n’ihi na ị tamughị.

7 Ma o wee ruo na mụ, Nifaị, gwara nna m si: A ga m eje mee ihe ndị ahụ Onye-nwe nyere n’iwu-nsọ, n’ihi a ma m na Onye-nwe anaghị enye ụmụ nke mmadụ iwu-nsọ, ma ọbụghị na ọ ga-edozi ụzọ ha ga-esị mezuo ihe ndị ahụ o nyere ha n’iwu-nsọ.

8 Ma o wee ruo na mgbe nna m nụrụ okwu ndị a obi tọrọ ya ụtọ nke ukwuu, n’ihi na ọ maara na Onye-nwe agọziwo m.

9 Ma mụ, Nifaị, na ụmụnne m ndị nwoke malitere njem anyị n’ime ọzara, jirịkwa ụlọ ikwuu anyị, iji gbago obodo ahụ bụ Jerusalem.

10 Ma o wee ruo ka anyị ruru obodo Jerusalem, mụ na ụmụnne m wee kparịta ụka.

11 Ma anyị wee fee nza—onye n’ime anyị ga-aba n’ime ụlọ Leban. Ma o wee ruo na nza ahụ mara Leman; Leman wee baa n’ụlọ Leban, ya na Leban wee kwụrịta ụka ka ọ nọdụrụ ala n’ụlọ ya.

12 Ma o wee jụọ Leban maka akụkọ-ndekọta ahụ e dere n’elu epekele bras, nke ihe e dere n’ime ya bụ akụkọ-agbụrụ nke nna m.

13 Ma lee, o wee ruo na iwe were Leban, o wee tụpụ Leman ezi site n’ebe ọ nọ; ọ chọghịkwa inye Leman akụkọ-ndekọta ahụ. Ya mere, ọ sịrị ya: Lee ị bụ onye-ori, agakwa m egbu gị.

14 Ma Leman wee si n’ebe ọ nọ gbalaga, wee kọọ ihe Leban meworo anyị. O wee wute anyị nke ukwuu, ụmụnne m wee chọọ ịlaghachikwute nna m n’ime ọzara.

15 Ma lee, agwara m ha sị: Ebe Onye-nwe na-adị ndụ, anyị onwe-anyị na-adị kwa, anyị agaghị alaghachịkwuga nna anyị n’ime ọzara ahụ wee ruo mgbe anyị mezuworo ihe nke Onye-nwe ziworo anyị mee.

16 Ya mere, ka anyị bụrụ ndị kwesịrị ntụkwasị-obi n’idebe iwu-nsọ nile nke Onye-nwe; ya mere, ka anyị gaa n’ala nke nketa nna anyị; ma lee, ọ hapụrụ ọla-edo na ọla-ọcha, na akụ na ụba dị iche iche. Ma ihe nile ndị a ka o mere n’ihi iwu-nsọ nile nke Onye-nwe.

17 N’ihi na ọ maara na a ga-ebibirịrị Jerusalem, n’ihi ajọọ omume nke ndị ahụ.

18 N’ihi na lee, ha ajụwo okwu nke ndị-amụma. Ya mere, ọ bụrụ na nna m ga-anọ n’ala ahụ mgbe enyeworo ya rị iwu ka o si n’ala ahụ gbapụ, lee, ya onwe ya ga-anwụkwa. Ya mere, ọ dị mkpa ka o si n’ala ahụ gbapụ.

19 Ma lee, ọ bụ amamihe n’ime Chineke ka anyị ga-eweta akụkọ-ndekọta ndị a, ka anyị wee doziere ụmụ anyị asụsụ nke nna anyị ha.

20 Na kwa ka anyị wee doziere ha okwu ndị nke sitere n’ọnụ nke ndị-amụma nile dị-nsọ, bụ ndị e nyeworo ha site na Mụọ na ike nke Chineke, site na mgbe ụwa malitere; ọbụna gbada ruo oge ugbua.

21 Ma o wee ruo na n’ụdị asụsụ a ka m rịọrọ ụmụnne m, ka ha nwe ntụkwasị-obi n’idebe iwu-nsọ nke Chineke.

22 Ma o wee ruo ka anyị garuru ala nke nketa anyị, anyị chịkọtakwara ọla-edo anyị, na ọla-ọcha anyị, na ihe oke-ọnụ ahịa anyị.

23 Ma mgbe anyị chịkọtaworo ihe ndị a, anyị wee gaakwa ọzọ n’ụlọ Leban.

24 Ma o wee ruo ka anyị bakwugara Leban, ma chọọkwa ka onye anyị akụkọ-ndekọta ahụ nke a kanyere n’elu epekele bras, nke ọbụ n’ihi ya ka anyị ga-eji wee nye ya ọla-edo anyị, na ọla-ọcha anyị, na kwa ihe oke-ọnụ-ahịa anyị nile.

25 Ma o wee ruo na mgbe Leban hụrụ akụ na ụba anyị, na o buru ibu karịa, o wee nwe agụụ ibukọrọ ya, nke mere ka ọ chụpụ anyị n’ụlọ ya, wee zie ụmụ-oru ya ka ha gbuo anyị, ka onwe ike nweta akụ na ụba anyị.

26 Ma o wee ruo na anyị gbanahụrụ ụmụ-oru Leban, nke mere na anyị hapụrụ akụ na ụba anyị, ma o wee daba n’aka nke Leban.

27 Ma o wee ruo na anyị gbabara n’ime ọzara, ụmụ-oru Leban agbafeghị anyị, ma anyị zokwara n’oghere dị n’okwute.

28 Ma o wee ruo na Leman weere m ịwe, weekwara nna m; Otu a kwa ka ọ dị Lemuel, n’ihi na ọ n̄ara ntị n’okwu Leman. Ya mere Leman na Lemuel gwara anyị ọtụtụ okwu ọjọọ, bụ ụmụnne ha nwoke ndị ntakịrị, wee tie kwa anyị mkpara.

29 Ma o wee ruo ka ha na-eti anyị mkpara, lee, mụọ-ozi nke Onye-nwe bịara guzoro n’iru ha, ma o wee gwa ha okwu na-asị: Gịnị mere unu ji na-eti nwanne unu nke ntakịrị mkpara? Unu amataghị na Onye-nwe ahọpụtawo ya ka ọ bụrụ onye ọchịchị unu, ma nke a bụ n’ihi ajọọ-omume unu? Lee unu ga-eje kwa Jerusalem ọzọ, Onye-nwe ga-arara Leban nye n’aka unu.

30 Ma mgbe mụọ-ozi ahụ gwachara anyị okwu, o wee pụọ.

31 Ma mgbe mụọ-ozi ahụ pụworo, Leman na Lemuel wee malite kwa ịtamu, na-asị: O lee otu ọ ga-esị kwe omume na Onye-nwe ga-arara Leban tinye n’aka anyị? Lee, ọ bụ nwoke gbasịrị ike, o nwekwara ike inye iri mmadụ ise iwu, e, o nwekwara ike igbu iri mmadụ ise: Mgbe ahụ gịnị mere ọ gaghị egbu anyị?