Balaan ng mga Kasulatan
1 Nefi 22


Kapitulo 22

Ang Israel pagalaptahon sa bug-os nga ibabaw sang duta—Ang mga Gentil amo ang magasagod kag magapakaon sang ebanghelyo sa Israel sa ulihing mga adlaw—Ang Israel pagatiponon kag luwason, kag ang mga malain masunog pareho sang ginaraban—Ang ginharian sang yawa pagalaglagon, kag si Satanas pagagaposon. Mga 588–570 B.C.

1 Kag natabo ini nga pagkatapos nga ako, si Nefi, nakabasa sining mga butang nga ginkurit sa mga lamina nga saway, ang akon mga kauturan nagpalapit sa akon kag nagsiling sa akon: Ano ang kahulugan sining mga butang nga imo ginbasa? Tan-awa, pagahangpon bala ang mga ini suno sa mga butang nga espirituhanon, nga matabo suno sa espiritu kag indi sa unod?

2 Kag ako, si Nefi, nagsiling sa ila: Tan-awa ginpahayag ang mga ini sa propeta paagi sa tingug sang Espiritu; kay paagi sa Espiritu ang tanan nga butang ginapahibalo sa mga propeta, nga magaabot sa mga anak sang katawhan suno sa unod.

3 Gani, ang mga butang nga akon ginbasa amo ang mga butang nga naangot sa mga butang nga dutan-on kag espirituhanon; kay daw nagapakita nga ang panimalay ni Israel, sa ulihi, pagapanglaptahon sa bug-os nga ibabaw sang duta, kag sa tunga man sang tanan nga nasyon.

4 Kag tan-awa, madamo na ang nagkaladula sa ihibalo sinang mga yara sa Jerusalem. Huo, ang laban nga bahin sang tanan nga tribo ginpangdala palayo; kag nagalapta sila pakadto-pakari sa mga pulo sang dagat; kag kon diin na sila wala sing isa sa aton nga nakahibalo, luwas lang nga nahibal-an naton nga ginpangdala sila palayo.

5 Kag tungod ginpangdala sila palayo, ining mga butang ginpropesiya parte sa ila, kag parte man sa tanan sinang mga pagapanglaptahon kag magatalang-talang pagkatapos sini, tungod sang Balaan sang Israel; kay batok sa iya sila magapatig-a sang ila mga tagipusuon; gani, pagalaptahon sila sa tunga sang tanan nga nasyon kag pagadumtan sang tanan nga tawo.

6 Apang, pagkatapos nga saguron sila sang mga Gentil, kag ibayaw sang Ginuo ang iya kamot sa mga Gentil kag ipahamtang sila bilang isa ka bandera, kag makugos ang ila mga anak sa ila mga butkon, kag ang ila mga anak nga babayi mapas-an sa ila mga abaga, tan-awa ining mga butang nga nasambit dutan-on; kay pareho sang nasiling na amo ini ang mga kasugtanan sang Ginuo upod sa aton mga amay; kag ini parte sa aton sa mga adlaw nga magaabot, kag amo man sa tanan naton nga kauturan nga iya sang panimalay ni Israel.

7 Kag ini nagakahulugan nga magaabot ang tion nga pagkatapos nga mapanglapta kag magtalang-talang ang bug-os nga panimalay ni Israel, nga ang Ginuong Dios magapatindog sing isa ka gamhanan nga nasyon sa tunga sang mga Gentil, huo, bisan sa ibabaw sini nga duta; kag paagi sa ila ang aton kaliwatan pagalaptahon.

8 Kag pagkatapos nga maglapta ang aton kaliwatan ang Ginuong Dios magapadayon sa paghimo sing isa ka dalayawon nga buluhaton sa tunga sang mga Gentil, nga mangin importante sa aton kaliwatan; gani, ginapaanggid ini sang pagpakaon sa ila sang mga Gentil kag pagkugos sa ila sa ila mga butkon kag pagpas-an sa ila sa ila mga abaga.

9 Kag mangin importante man ini sa mga Gentil; kag indi lamang sa mga Gentil kundi sa bug-os nga panimalay ni Israel, tuhoy sa pagpahibalo parte sa mga kasugtanan sang Amay sang langit kay Abraham nga nagasiling: Sa imo kaliwatan ang tanan nga kaliwat sang duta pagabugayan.

10 Kag luyag ko, mga kauturan ko, nga inyo mahibal-an nga ang tanan nga kaliwat sang duta indi makaangkon sing bugay luwas lang kon ipakita niya ang iya butkon sa mga mata sang mga nasyon.

11 Gani, ang Ginuong Dios magapadayon sa pagpakita sang iya butkon sa mga mata sang tanan nga nasyon, sa pagpatuman sang iya mga kasugtanan kag sang iya ebanghelyo sa ila nga iya sang panimalay ni Israel.

12 Gani, dal-on niya sila liwat halin sa pagkabihag, kag pagatiponon sila sa mga duta nga ila palanublion; kag pagadal-on sila halin sa wala’y kasanag kag halin sa kadulom; kag mahibal-an nila nga ang Ginuo amo ang ila Manluluwas kag ila Manunubos, ang Gamhanan sang Israel.

13 Kag ang dugo sinang dako kag makangilil-ad nga simbahan, nga amo ang makihilawason sang bug-os nga duta, magabalik sa ila kaugalingon nga mga ulo; kay magagiyera sila batok sa isa kag isa, kag ang espada sang ila kaugalingon nga mga kamot magatupa sa ila kaugalingon nga mga ulo, kag mahubog sila sang ila kaugalingon nga dugo.

14 Kag ang tagsa ka nasyon nga maggiyera batok sa imo, O panimalay ni Israel, magaliso sa isa batok sa isa, kag mahulog sila sa buho nga ila ginkutkot agud masiod ang katawhan sang Ginuo. Kag ang tanan nga nagapakig-away batok sa Sion malaglag, kag inang dako nga makihilawason, nga nagpatiko sang husto nga mga dalanon sang Ginuo, huo, inang dako kag makangilil-ad nga simbahan, marumpag sa duta, kag mangin dako ang pagkarumpag sini.

15 Kay tan-awa, siling sang propeta, ang tion magaabot sing madasig nga si Satanas mangin wala na sing gahum sa mga tagipusuon sang mga anak sang katawhan; kay ang adlaw magaabot sa indi madugay nga ang tanan nga bugalon kag sila nga nagahimo sing malain mangin pareho sang ginaraban; kag ang adlaw magaabot nga pat-od gid nga masunog sila.

16 Kay ang tion magaabot sa indi madugay nga ang kabug-osan sang kaakig sang Dios igabubo sa tanan nga anak sang katawhan; kay indi niya pagtugotan nga laglagon sang mga malain ang mga matarong.

17 Gani, pagaamligan niya ang mga matarong paagi sa iya gahum, bisan pa kon ang kabug-osan sang iya kaakig pat-od gid nga magaabot, kag ang mga matarong maamligan, bisan pa tuhoy sa kalaglagan sang ila mga kaaway paagi sa kalayo. Gani, ang mga matarong indi kinahanglan nga magkahadlok; kay amo ini ang ginasiling sang propeta, pagaluwason sila, bisan pa kon paagi sa kalayo.

18 Tan-awa, mga kauturan ko, ginasiling ko sa inyo nga ining mga butang pat-od gid nga matabo sa indi madugay; huo, bisan dugo, kag kalayo, kag usbong sang aso pat-od nga magaabot; kag kinahanglan gid ini nga mangin yara sa ibabaw sini nga duta; kag magaabot ini sa mga tawo suno sa unod kon patig-ahon nila ang ila mga tagipusuon batok sa Balaan sang Israel.

19 Kay tan-awa, ang mga matarong indi mawala; kay ang tion pat-od gid nga magaabot nga tanan sila nga magapakig-away batok sa Sion pagasikwayon.

20 Kag ang Ginuo pat-od gid nga magahanda sing isa ka paagi para sa iya katawhan, tuhoy sa katumanan sang mga pulong ni Moises, nga iya ginhambal nga nagasiling: Isa ka propeta ang pagabangonon sa inyo sang Ginuo nga inyo Dios, nga pareho sa akon; sia ang inyo pamatian sa tanan nga butang bisan ano ang iya isiling sa inyo. Kag matabo ini, nga ang tanan nga indi mamati sa sina nga propeta pagasikwayon sa tunga sang katawhan.

21 Kag karon ako, si Nefi, nagapahayag sa inyo, nga ining propeta nga ginasiling ni Moises amo ang Balaan sang Israel; gani, magapatuman sia sang paghukom sa pagkamatarong.

22 Kag ang mga matarong indi kinahanglan nga magkahadlok, kay amo ini sila ang indi mapaslawan. Kundi ang ginharian sang yawa, nga pagatukuron sa tunga sang mga anak sang katawhan, nga ang amo nga ginharian ginpahamtang sa tunga nila nga yara sa unod—

23 Kay ang tion madasig nga magaabot nga ang tanan nga simbahan nga gintukod agud makaangkon sing manggad, kag ang tanan sa ila nga ginapauswag sa pag-angkon sing gahum sa unod, kag ang mga ginapauswag agud mangin bantug sa mga mata sang kalibutan, kag ang mga nagahangad sang mga kailigbon sang unod kag sang mga butang sang kalibutan, kag sa paghimo sang tanan nga sari sang kalainan; huo, sa malip-ot nga pulong, ang tanan nga iya sang ginharian sang yawa amo sila nga nagakinahanglan nga magkahadlok, kag mangurog, kag magtay-og; sila amo ang mga pat-od gid nga ipapanaog sa duta; sila amo ang pat-od gid nga maupos pareho sang ginaraban; kag ini suno sa mga pulong sang propeta.

24 Kag ang tion madasig nga magaabot nga ang mga matarong pat-od gid nga pagaubayan pareho sang mga tinday sang toril, kag ang Balaan sang Israel pat-od gid nga magahari sa pagkaginuo, kag kusog, kag gahum, kag dako nga himaya.

25 Kag pagatiponon niya ang iya mga anak halin sa apat ka pamusod sang duta; kag isipon niya ang iya mga carnero, kag makilal-an nila sia; kag mangin may isa ka panong kag isa ka manugpahalab; kag pahalbon niya ang iya mga carnero, kag sa iya makakita sila sang halalban.

26 Kag tungod sang pagkamatarong sang iya katawhan, si Satanas mawad-an sing gahum; gani, indi sia mabuy-an sa sulod sang madamo nga tinuig; kay mawad-an sia sing gahum sa mga tagipusuon sang katawhan, kay magapuyo sila sa pagkamatarong, kag ang Balaan sang Israel ang magahari.

27 Kag karon tan-awa, ako, si Nefi, nagasiling sa inyo nga ining tanan nga butang pat-od gid nga magaabot suno sa unod.

28 Apang, tan-awa, ang tanan nga nasyon, kaliwat, lengguahe, kag katawhan magapuyo sing hilway sa Balaan sang Israel kon lamang nga maghinulsol sila.

29 Kag karon, ako, si Nefi, nagatapos; kay indi ako mangisog sa paghambal sing dugang pa parte sining mga butang.

30 Gani, mga kauturan ko, luyag ko nga dumdumon ninyo nga ang mga butang nga ginsulat sa mga lamina nga saway matuod; kag nagasaksi ang mga ini nga ang isa ka tawo kinahanglan gid nga mangin matinumanon sa mga kasugoan sang Dios.

31 Gani, indi kinahanglan nga hunahunaon ninyo nga ako kag ang akon amay amo lamang ang mga nagsaksi, kag nagtudlo man sang mga ini. Gani, kon mangin matinumanon kamo sa mga kasugoan, kag magpadayon tubtob sa katapusan, maluwas kamo sa katapusan nga adlaw. Kag gani amo sini. Amen.