Balaan ng mga Kasulatan
1 Nefi 15


Kapitulo 15

Ang kaliwatan ni Nefi magabaton sang ebanghelyo halin sa mga Gentil sa ulihing mga adlaw—Ang pagtipon sang Israel ginapaanggid sa isa ka kahoy nga olivo nga ang kinaugali nga mga sanga igasugpon liwat—Ginpatpat ni Nefi ang panan-awon parte sa kahoy sang kabuhi kag naghambal parte sang hustisya sang Dios sa pagpain sang mga malain sa mga matarong. Mga 600–592 B.C.

1 Kag natabo ini nga pagkatapos nga ako, si Nefi, nadala sa Espiritu, kag nakakita sining tanan nga butang, nagbalik ako sa tolda sang akon amay.

2 Kag natabo ini nga nakita ko ang akon mga kauturan, kag nagabinaisay sila parte sa mga butang nga ginhambal sa ila sang akon amay.

3 Kay matuod gid nga naghambal sia sing madamo nga dalagko nga mga butang sa ila, nga mabudlay mahangpan, luwas lang nga ang isa ka tawo magpamangkot sa Ginuo; kag sila bangod matig-a sa ila mga tagipusuon, gani wala sila magtulok sa Ginuo nga amo tani ang nagakadapat.

4 Kag karon ako, si Nefi, nagkalisud tungod sang katig-a sang ila mga tagipusuon, kag amo man, tungod sang mga butang nga akon nakita, kag nahibal-an nga indi gid malikawan nga matabo tungod sang dako nga kalainan sang mga anak sang katawhan.

5 Kag natabo ini nga dinaug ako tungod sang akon mga pag-antos, kay ginkabig ko nga ang akon mga pag-antos labaw sa tanan, tungod sang pagpamatay sang akon katawhan, kay nakita ko ang ila kalaglagan.

6 Kag natabo ini nga pagkatapos nga nakabaton ako sing kusog naghambal ako sa akon mga kauturan, nga maluyag mahibal-an halin sa ila ang kabangdanan sang ila mga pagbinaisay.

7 Kag nagsiling sila: Tan-awa, indi namon mahangpan ang mga pulong nga ginhambal sang aton amay parte sa kinaugali nga mga sanga sang kahoy nga olivo, kag amo man parte sa mga Gentil.

8 Kag nagsiling ako sa ila: Nakapamangkot bala kamo sa Ginuo?

9 Kag nagsiling sila sa akon: Wala; kay ang Ginuo wala magpahibalo sang amo sina nga mga butang sa amon.

10 Tan-awa, nagsiling ako sa ila: Ngaa man nga wala kamo nagatuman sang mga kasugoan sang Ginuo? Ngaa man nga magakadula kamo, tungod sang katig-a sang inyo mga tagipusuon?

11 Wala bala ninyo madumduman ang mga butang nga ginsiling sang Ginuo?—Kon indi ninyo pagpatig-ahon ang inyo mga tagipusuon, kag mamangkot sa akon sa pagtuo, nga nagapati nga magabaton kamo, upod ang katutum sa pagtuman sang akon mga kasugoan, pat-od nga ining mga butang igapahibalo sa inyo.

12 Tan-awa, ginasiling ko sa inyo, nga ang panimalay ni Israel ginpaanggid sa isa ka kahoy nga olivo, sang Espiritu sang Ginuo nga yara sa aton amay; kag tan-awa indi bala nga ginbali kita halin sa panimalay ni Israel, kag indi bala nga kita isa ka sanga sang panimalay ni Israel?

13 Kag karon, ang butang nga buot silingon sang aton amay parte sang pagsugpon sang kinaugali nga mga sanga paagi sa kabug-osan sang mga Gentil, amo, nga sa ulihing mga adlaw, kon ang aton kaliwatan magausmod na sa pagkawala’y pagtuo, huo, sa sulod sang madamo nga mga tinuig, kag madamo nga henerasyon pagkatapos nga ang Mesias magpakita sa lawas sa mga anak sang katawhan, dayon magaabot ang kabug-osan sang ebanghelyo sang Mesias sa mga Gentil, kag halin sa mga Gentil padulong sa nagkalabilin sang aton kaliwatan—

14 Kag sa sina nga adlaw mahibal-an sang nagkalabilin sang aton kaliwatan nga iya sila sang panimalay ni Israel, kag nga sila mga katawhan sang kasugtanan sang Ginuo; kag dayon mahibal-an nila kag makadangat sa ihibalo parte sa ila mga katigulangan, kag amo man sa ihibalo parte sa ebanghelyo sang ila Manunubos, nga gintudlo niya sa ila mga amay; gani, magadangat sila sa ihibalo parte sa ila Manunubos kag sa tagsa ka bahin sang iya doktrina, agud nga mahimo nila nga mahibal-an kon paano magpalapit sa iya kag maluwas.

15 Kag dayon sa sina nga adlaw indi bala sila magkasadya kag maghatag sing pagdayaw sa ila wala’y katubtuban nga Dios, ang ila bato kag ila kaluwasan? Huo, sa sina nga adlaw, indi bala sila makabaton sing kusog kag pagkaon halin sa matuod nga puno sang ubas? Huo, indi bala sila magpadulong sa matuod nga panong sang Dios?

16 Tan-awa, ginasiling ko sa inyo, Huo; pagadumdumon sila liwat sa tunga sang panimalay ni Israel; igasugpon sila sa matuod nga kahoy nga olivo, kay kinaugali sila nga sanga sang kahoy nga olivo.

17 Kag amo ini ang buot silingon sang aton amay; kag buot niya silingon nga indi ini matabo tubtob nga pagkatapos nga mapanglapta sila sang mga Gentil; kag buot niya silingon nga magaabot ini paagi sa mga Gentil, agud nga mapakita sang Ginuo ang iya gahum sa mga Gentil, tungod mismo sang kabangdanan nga igasikway sia sang mga Judio, ukon sang panimalay ni Israel.

18 Gani, ang aton amay wala naghambal parte sang aton kaliwatan lamang, kundi parte man sang tanan nga panimalay ni Israel, nga nagatudlo sa kasugtanan nga dapat matuman sa ulihing mga adlaw; nga ang amo nga kasugtanan ginhimo sang Ginuo sa aton amay nga si Abraham nga nagasiling: Sa imo kaliwatan ang tanan nga kaliwat sang duta pagabugayan.

19 Kag natabo ini nga ako, si Nefi, madamo sing ginhambal sa ila parte sining mga butang; huo, naghambal ako sa ila parte sa pagpanumbalik sang mga Judio sa ulihing mga adlaw.

20 Kag ginsaysay ko sa ila ang mga pulong ni Isaias, nga naghambal parte sa pagpanumbalik sang mga Judio, ukon sang panimalay ni Israel; kag pagkatapos nga mapanumbalik sila indi na sila magtalang-talang pa, ukon maglinapta pa liwat. Kag natabo ini nga naghambal ako sang madamo nga pulong sa akon mga kauturan, sa bagay nga napakalma sila kag nagpaubos sang ila mga kaugalingon sa atubang sang Ginuo.

21 Kag natabo ini nga naghambal sila liwat sa akon nga nagasiling: Ano ang kahulugan sining butang nga nakita sang aton amay sa isa ka damgo? Ano ang kahulugan sang kahoy nga iya nakita?

22 Kag nagsiling ako sa ila: Amo yadto ang simbolo sang kahoy sang kabuhi.

23 Kag nagsiling sila sa akon: Ano ang kahulugan sang barandilya nga salsalon nga nakita sang aton amay, nga nagapadulong sa kahoy?

24 Kag nagsiling ako sa ila nga ini ang pulong sang Dios; kag kon sin-o man ang magpamati sa pulong sang Dios, kag maghawid sing hugot sa sini, indi gid sila madula; kag ang mga pagsulay kag ang nagadabadaba nga mga pana sang kaaway indi man makadaug sa ila padulong sa pagkabulag, sa pagdala sa ila sa kalaglagan.

25 Gani, ako, si Nefi, naglaygay sa ila nga mamati sa pulong sang Ginuo; huo, ginlaygayan ko sila upod ang bug-os nga kusog sang akon kalag, kag upod ang bug-os nga ikasarang sang hunahuna nga yari sa akon, nga magpamati sila sa pulong sang Dios kag magdumdum sa pagtuman sang iya mga kasugoan pirme sa tanan nga butang.

26 Kag nagsiling sila sa akon: Ano ang kahulugan sang suba nga may tubig nga nakita sang aton amay?

27 Kag nagsiling ako sa ila nga ang tubig nga nakita sang akon amay amo ang kahigkoan; kag tuman ang pagkatutok sang iya kaisipan sa iban nga mga butang sa bagay nga wala niya nakita ang kahigkoan sang tubig.

28 Kag nagsiling ako sa ila nga isa ini ka makahaladlok nga kadadalman, nga nagaseparar sang malain sa kahoy sang kabuhi, kag amo man sa mga santos sang Dios.

29 Kag nagsiling ako sa ila nga isa ini ka simbolo sinang makahaladlok nga impiyerno, nga ginsiling sang anghel sa akon nga ginhanda para sa mga malain.

30 Kag nagsiling ako sa ila nga nakita man sang amon amay nga ang hustisya sang Dios nagpain man sang mga malain halin sa mga matarong; kag ang kasanag sini pareho sang kasanag sing isa ka nagadabadaba nga kalayo, nga nagapasaka sa Dios sa gihapon kag sa gihapon, kag wala sing katapusan.

31 Kag nagsiling sila sa akon: Ini bala nga butang nagakahulugan sang pagpaantos sang lawas sa mga adlaw sang pagtilaw, ukon nagakahulugan ini sang katapusan nga kahimtangan sang kalag pagkatapos sang kamatayon sang dutan-on nga lawas, ukon nagatumod bala ini sa mga butang nga dutan-on?

32 Kag natabo ini nga nagsiling ako sa ila nga isa ini ka simbolo sang mga butang nga dutan-on kag espirituhanon; kay magaabot ang adlaw nga kinahanglan gid nga pagahukman sila suno sa ila mga binuhatan, huo, bisan sang mga binuhatan nga ginhimo sang dutan-on nga lawas sa ila mga adlaw sang pagtilaw.

33 Gani, kon mapatay sila sa ila kalainan pat-od nga isikway man sila, suno sa mga butang nga espirituhanon, nga parte sa pagkamatarong; gani, kinahanglan gid nga dal-on sila sa pagtindog sa atubang sang Dios, agud hukman suno sa ila mga binuhatan; kag kon ang ila mga binuhatan nangin kahigkoan pat-od gid nga mahigko sila; kag kon mahigko sila pat-od nga indi sila makapuyo sa ginharian sang Dios; kay kon mag-amo sini, ang ginharian sang Dios mahigko man.

34 Apang tan-awa, ginasiling ko sa inyo, ang ginharian sang Dios indi mahigko, kag wala sing bisan ano nga di-matinlo nga butang nga makasulod sa ginharian sang Dios; gani pat-od nga may isa ka lugar sang kahigkoan nga ginhanda para sa sinang mahigko.

35 Kag may isa ka lugar nga ginhanda, huo, bisan inang makahaladlok nga impiyerno nga akon ginatumod, kag ang yawa amo ang manughanda sini; gani ang katapusan nga kahimtangan sang mga kalag sang mga tawo amo ang magpuyo sa ginharian sang Dios, ukon isikway tungod sinang hustisya nga akon ginatumod.

36 Gani, ang mga malain ginahamulag halin sa mga matarong, kag amo man sa sinang kahoy sang kabuhi, nga ang bunga sini amo ang labing hamili kag labing halandumon sa tanan nga iban pa nga mga bunga; huo, kag ini ang pinakadako sa tanan nga dulot sang Dios. Kag sa amo nga paagi ako naghambal sa akon mga kauturan. Amen.