Balaan ng mga Kasulatan
1 Nefi 1


Ang Una nga Libro ni Nefi

Ang Iya Pagdumalahan kag Pag-alagad

Ang kasaysayan ni Lehi kag sang iya asawa nga si Saria, kag sang iya apat ka anak nga lalaki nga ginahingalanan kanday (sugod sa kamagulangan) Laman, Lemuel, Sam, kag Nefi. Ang Ginuo nagpaandam kay Lehi nga maghalin sa duta sang Jerusalem, bangod nagpropesiya sia sa katawhan parte sa ila kalainan kag nagatinguha sila sa pagpatay sa iya. Nagpanglakaton sia sing tatlo ka adlaw sa kamingawan upod ang iya panimalay. Gin-upod ni Nefi ang iya mga utod nga lalaki kag nagbalik sa duta sang Jerusalem agud kuhaon ang kasulatan sang mga Judio. Ang kasaysayan sang ila mga pag-antos. Gindala nila ang mga anak nga babayi ni Ismael agud mangin mga asawa. Gindala nila ang ila mga panimalay kag nagkadto sa kamingawan. Ang ila mga pag-antos kag mga kabudlayan sa kamingawan. Ang banas sang ila mga pagpanglakaton. Nag-abot sila sa dako nga mga tubig. Ang mga kauturan ni Nefi nagrebelde sa iya. Gintapna niya sila, kag nagpasad sang isa ka sakayan-dagat. Ang lugar ila ginhingalanan nga Bugana. Nagtabok sila sa dako nga mga tubig padulong sa duta nga ginpanaad, kag iban pa. Ini suno sa kasaysayan ni Nefi; ukon sa iban nga pulong, ako, si Nefi, ang nagsulat sining kasulatan.

Kapitulo 1

Ginsugdan ni Nefi ang kasulatan sang iya katawhan—Si Lehi nakakita sa panan-awon sang isa ka haligi nga kalayo kag nagbasa halin sa isa ka libro sang propesiya—Gindayaw niya ang Dios, gintagna ang pagkari sang Mesias, kag ginpropesiya ang pagkalaglag sang Jerusalem—Ginhingabot sia sang mga Judio. Mga 600 B.C.

1 Ako, si Nefi, bangod nga nabun-ag sa maayo nga mga ginikanan, gani medyo natudloan ako sang tanan nga natun-an sang akon amay; kag nga nakakita sang madamo nga pag-antos sa pagligad sang akon mga adlaw, apang, lubos nga nahamut-an sang Ginuo sa tanan ko nga mga adlaw; huo, nga nakaangkon sang dako nga ihibalo sang kaayo kag mga misteryo sang Dios, gani nagahimo ako sing isa ka kasulatan sang akon mga kahimoan sa akon mga adlaw.

2 Huo, nagahimo ako sing isa ka kasulatan sa lengguahe sang akon amay nga nagalakip sang tinun-an sang mga Judio kag lengguahe sang mga Egiptohanon.

3 Kag nahibal-an ko nga ang kasulatan nga akon ginahimo matuod; kag ginahimo ko ini paagi sa akon kaugalingon nga kamot; kag ginahimo ko ini suno sa akon ihibalo.

4 Kay natabo ini, sang pagsugod sang unang tuig sang paghari ni Sedequias, hari sang Juda, (ang akon amay nga si Lehi, nagpuyo sa Jerusalem sa tanan niya nga adlaw); kag sadto man nga tuig madamo ang nag-alabot nga mga propeta nga nagapropesiya sa katawhan nga kinahanglan gid sila nga maghinulsol, ukon ang dako nga siyudad sang Jerusalem pat-od gid nga pagalaglagon.

5 Gani natabo ini nga ang akon amay nga si Lehi, samtang nagalakat sia nagpangamuyo sa Ginuo, huo, bisan sa iya bug-os nga tagipusuon, para sa iya katawhan.

6 Kag natabo ini nga samtang nagapangamuyo sia sa Ginuo, may nagtuhaw nga isa ka haligi nga kalayo kag nagpabilin sa ibabaw sang isa ka bato sa iya atubang; kag madamo sia sing nakit-an kag nabatian; kag tungod sang mga butang nga iya nakit-an kag nabatian nag-uyog sia kag nagpalangurog sing tuman.

7 Kag natabo ini nga nagbalik sia sa iya kaugalingon nga balay sa Jerusalem; kag naghaplay sa iya hiligdaan, nga nadaug sang Espiritu kag sang mga butang nga iya nakit-an.

8 Kag sa amo nga kahimtangan nga nadaug sang Espiritu, gindala sia sa isa ka panan-awon, bisan pa nga iya nakit-an nga ang kalangitan nabuksan, kag nadumduman niya nga nakit-an niya ang Dios nga nagapungko sa iya trono, nga ginalibutan sang di-maisip nga kadam-an sang mga anghel nga nagakanta kag nagadayaw sa ila Dios.

9 Kag natabo ini nga nakit-an niya ang Isa nga nagapanaog halin sa tunga sang kalangitan, kag nakita niya nga ang iya kasilak labaw pa sangsa udtong-adlaw.

10 Kag iya man nakit-an ang dose pa gid nga nagasunod sa iya, kag ang ila kasanag labaw pa sangsa mga bituon sa kahawaan.

11 Kag nagpanaog sila kag naglakat sa ibabaw sang duta; kag ang una nagpalapit kag nagtindog sa atubang sang akon amay, kag naghatag sa iya sang isa ka libro, kag nagsugo sa iya nga iya basahon.

12 Kag natabo ini nga samtang nagabasa sia, napuno sia sang Espiritu sang Ginuo.

13 Kag iya ginbasa nga nagasiling: Kalisud, kalisud, sa Jerusalem, kay nakita ko ang imo mga kangil-aran! Huo, madamo nga butang ang nabasa sang akon amay parte sa Jerusalem—nga dapat ini laglagon, kag ang mga pumuluyo sini; madamo ang magakalamatay paagi sa espada, kag madamo ang pagadal-on nga bihag sa Babilonia.

14 Kag natabo ini nga sang nabasa kag nakit-an sang akon amay ang madamo nga dalagko kag dalayawon nga mga butang, nagsinggit sia sang madamo nga butang sa Ginuo; pareho sang: Dako kag dalayawon ang imo mga buhat, O Ginuong Dios nga Makagagahum! Ang imo trono mataas sa kalangitan, kag ang imo gahum, kag kaayo, kag kaluoy yara sa tanan nga pumuluyo sang duta; kag, tungod kay maluluy-on ka, indi mo pagpabay-an ang inang mga nagapalapit sa imo nga mawala sila!

15 Gani amo sini ang lengguahe sang akon amay sa pagdayaw sa iya Dios; kay ang iya kalag nagkalipay, kag ang iya bilog nga tagipusuon napuno, bangod sang mga butang nga iya nakit-an, huo, nga ginpakita sang Ginuo sa iya.

16 Kag karon ako, si Nefi, wala nagahimo sang bug-os nga kasaysayan sang mga butang nga sinulat sang akon amay, kay madamo sia sang mga butang nga sinulat nga iya nakit-an sa mga panan-awon kag sa mga damgo; kag madamo man sia sing sinulat nga mga butang nga iya ginpropesiya kag ginhambal sa iya mga anak, nga sa sini indi ako maghimo sang bug-os nga kasaysayan.

17 Kundi magahimo ako sing isa ka kasaysayan sang akon mga kahimoan sa akon mga adlaw. Tan-awa, nagahimo ako sang pinalip-ot nga kasulatan sang akon amay, sa mga lamina nga akon ginhimo paagi sa kaugalingon ko nga mga kamot; gani, pagkatapos nga mapalip-ot ko ang kasulatan sang akon amay dayon himuon ko ang isa ka kasaysayan sang akon kaugalingon nga kabuhi.

18 Karon, luyag ko nga inyo mahibal-an nga pagkatapos nga ginpakita sang Ginuo ang madamo nga dalayawon nga butang sa akon amay, kay Lehi, huo, ang parte sa pagkalaglag sang Jerusalem, tan-awa nagkadto sia sa tunga sang katawhan, kag nagsugod sa pagpropesiya kag pagpahayag sa ila parte sa mga butang nga iya nga nakit-an kag nabatian.

19 Kag natabo ini nga ginyaguta sia sang mga Judio tungod sang mga butang nga iya ginsaksi parte sa ila; kag matuod gid nga nagsaksi sia sang ila pagkamalain kag sang ila mga kangil-aran; kag nagsaksi sia nga ang mga butang nga iya nakita kag nabatian, kag amo man ang mga butang nga iya nabasa sa libro, maathag nga nagpakita sang pagkari sang isa ka Mesias, kag amo man sang pagtubos sang kalibutan.

20 Kag sang mabatian sang mga Judio ining mga butang naakig sila sa iya; huo, pareho sa mga propeta sang dumaan nga panahon, nga ila ginpalayas, kag ginbato, kag ginpamatay; kag ila man gintinguhaan ang iya kabuhi, nga mapatay nila sia. Apang tan-awa, ako, si Nefi, magapakita sa inyo nga ang mapinalanggaon nga kaluoy sang Ginuo nagapangibabaw sa tanan nga iya mga pinili, tungod sang ila pagtuo, agud mangin mabaskog sila bisan tubtob sa pag-angkon sang gahum nga maluwas.