1 Lengolo la ntate, Mormone, le ngolletsoeng ‘na, Moroni; ‘me le ile la ngolloa ‘na kapele kamor’a pitso ea ka bosebeletsing. ‘Me ke ka mokhoa ona a ileng a ngolla ho ‘na a re:

2 Mora oa ka ea ratoang, Moroni, ke nyakalla ka ho fetisisa hore Morena oa hau Jesu Kreste o ile a o ela hloko, ‘me o ile a o bitsetsa bosebeletsing ba hae, le mosebetsing oa hae o halalelang.

3 Ke u ela hloko kamehla lithapelong tsa ka, ho tsoelapele ho rapela ho Molimo Ntate ka lebitso la Ngoana oa hae ea Halalelang, Jesu, hore eena, ka molemo oa hae o sa feleng le mohau, u tla o boloka ka ho tiisetsa ha tumelo ho lebitso la hae ho isa qetellong.

4 ‘Me joale, mora oa ka, ke bua ho uena malebana le seo se nkutloisang bohloko ka ho fetisisa; hobane ho nkutloisa bohloko hore ho tlameha hore likhang li tsohe har’a lona.

5 Hobane, haeba ke ithutile ‘nete, ho bile le likhang har’a lona malebana le kolobetso ea bana ba lona ba banyenyane.

6 ‘Me joale, mora oa ka, ke lakatsa hore u tle u sebetse ka mafolofolo, hore phoso ena e tebileng e tle e tlosoe ho tloha har’a lona; ka lebaka la sepheo sena ke ngotse lengolo lena.

7 Hobane hang kamor’a hore ke ile ka ithuta lintho tsena ka lona ke ile ka botsa Morena malebana le taba eo. ‘Me lentsoe la Morena le ile la tla ho ‘na ka matla a Moea o halalelang, le re:

8 Mamela mantsoe a Kreste, Molopolli oa hau, Morena oa hau le Molimo oa hau. Bona, ke ile ka tla lefats’eng e seng ho tla bitsa ba lokileng empa baetsa libe ho baka; ba phethehileng ha ba hloke ngaka, empa bao ba kulang; ka baka leo, bana ba banyenyane ba phethehile, hobane ha ba na boiphihlelo ba ho etsa sebe; ka baka leo thohako ea Adama e tlositsoe ho bona ka ‘na, hore ha e na matla holim’a bona; ‘me molao oa lebollo o felisitsoe ka ‘na.

9 ‘Me kamor’a mokhoa ona Moea o Halalelang o ile oa bonahatsa lentsoe la Molimo ho ‘na; ka baka leo mora oa ka ea ratoang, kea tseba hore ke nyeliso e tiileng ka pele ho Molimo, hore le tle le kolobetse bana ba banyenyane.

10 Bona ke re ho uena hore ntho ena u tla e ruta—pako le kolobetso ho bao ba nang le boikarabelo ‘me ba na le boiphihlelo ba ho etsa sebe; ee, ruta batsoali hore ba tlameha ho baka ‘me ba kolobetsoe, ‘me ba ikokobetse joaloka bana ba bona ba banyenyane, ‘me ba tla pholosoa le bana ba bona ba banyenyane.

11 ‘Me bana ba bona ba banyenyane ha ba hloke pako, leha ele kolobetso. Bona, kolobetso ke ho isa pakong ho phethahatsa litaelo ho ea ho ts’oarelo ea libe.

12 Empa bana ba banyenyane ba phela ka ho Kreste, esita le ho tloha mothehong oa lefats’e; haeba ho se joalo, Molimo ke Molimo o leeme, ‘me hape ke Molimo ea feto-fetohang, ‘me ea mamelang batho; hobane ke ba bakae bana ba banyenyane ba shoeleng ntle le kolobetso!

13 Ka baka leo, haeba bana ba banyenyane ba ne ba sitoa ho pholosoa ntle le kolobetso, bana ba tlameha hore ebe ba ile liheleng tse sa feleng.

14 Bona ke re ho uena, hore ea nahanang hore bana ba banyenyane ba hloka kolobetso o tletse nyooko e babang ‘me o litlamong tsa bokhopo; hobane ha a na leha ele tumelo, ts’epo, kapa lerato la sebele; ka baka leo, o tlameha ho khaoloa ha a le mohopolong oo, o tlameha ho ea tlase liheleng.

15 Hobane bo bohloko ke bokhopo ba ho nahana hore Molimo o pholosa ngoana a le mong ka lebaka la kolobetso, ‘me e mong o tlameha ho timela hobane ha a na kolobetso.

16 Ho malimabe bona ba tlang ho khelosa litsela tsa Morena ka mokhoa ona, hobane ba tla timela ntle le hore ba bake. Bona, ke bua ka sebete, ke na le tokelo ho tsoa ho Molimo; ‘me ha ke ts’abe seo motho a ka se etsang, hobane lerato le phethehileng le leleka ts’abo eohle.

17 ‘Me ke tlatsitsoe ka lerato la sebele, e leng lerato le sa feleng; ka baka leo, bana bohle ba joaloka ‘na, ka baka leo, ke rata bana ba banyenyane ka lerato le phethehileng; ‘me kaofela ba ts’oana ‘me ke baji ba poloko.

18 Hobane kea tseba hore Molimo ha se Molimo ea leeme, leha e le ho ba motho ea feto-fetohang, empa ha a fetohe ho tloha ho bosafeleng bohle ho ea ho bosafeleng bohle.

19 Bana ba banyenyane ba sitoa ho baka; ka baka leo, ke bokhopo bo bohloko ho hanela pelo e mohau ea Molimo ho bona, hobane kaofela ha bona ba phela ka ho eena ka lebaka la mohau oa hae.

20 ‘Me ea bolelang hore bana ba banyenyane ba hloka kolobetso o latola pelo e mohau ea Kreste, ‘me o nyelisa topollo ea hae le matla a topollo ea hae.

21 Ho malimabe ba joalo, hobane ba kotsing ea lefu, lihele, le tlhokofalo e sa feleng. Ke e bolela ka sebete; Molimo o ntaetse. Li mameleng ‘me le hlokomele, kapa li tla ema khahlanong le lona setulong sa kahlolo sa Kreste.

22 Hobane bonang hore bana bohle ba banyenyane ba phela ka ho Kreste, hape le bao ba se nang molao. Hobane matla a topollo a tla ho bona bohle ba se nang molao; ka baka leo, eo ea sa ahloloang, kapa eo ea seng tlasa kahlolo, o sitoa ho baka; ‘me ho ba joalo kolobetso ha e fumahants’e letho—

23 Empa ke nyeliso ka pele ho Molimo, ho latola pelo e mohau ea Kreste, le matla a Moea o Halalelang, le ho beha ts’epo mesebetsing e shoeleng.

24 Bona, mora oa ka, ntho ena ha ea tlameha ho ba joalo; hobane pako ke bakeng sa bona bao ba tlas’a kahlolo le tlas’a thohako ea molao o robiloeng.

25 ‘Me litholoana tsa pele tsa pako ke kolobetso; ‘me kolobetso e tla ka tumelo ho isa ho phethahatseng litaelo; ‘me ho phethahatsa ha litaelo ho tlisa ts’oarelo ea libe;

26 ‘Me ts’oarelo ea libe e tlisa bonolo, le pelo e kokobetseng; ‘me ka lebaka la bonolo le pelo e kokobetseng ho tla ketelo ea Moea o Halalelang, Motselisi eo ea tlatsang ka ts’epo le lerato le phethehileng, lerato leo le tiisetsang ka mafolofolo ho thapelo, hofihlela pheletso e tla tla, ha bahalaleli bohle ba tla lula le Molimo.

27 Bona, mora oa ka, ke tla u ngolla hape haeba ha ke tlo tsoa haufi khahlanong le Ba-Lamane. Bona, boikhohomoso ba sechaba sena, kapa sechaba sa Ba-Nefi, se netefalitse timelo ea sona ntle le hore se tle se bake.

28 Ba rapelle, mora oa ka, hore pako e ke e tle ho bona. Empa bona, kea ts’oha esere Moea o emisitse ho ba le bona; ‘me karolong ena ea lefats’e hape ba batla ho beha fats’e matla ohle le tokelo e tsoang ho Molimo; ‘me ba latola Moea o Halalelang.

29 ‘Me kamor’a ho latola tsebo e kholo joalo, mora oa ka, ba tlameha ho timela haufi, ho phethahatseng boporofeta bo ileng ba boleloa ke baporofeta, joalo hantle le mantsoe a Mopholosi oa rona ka bo eena.

30 Sala hantle, mora oa ka, ho fihlela ke tla u ngolla, kapa re tla kopana hape. Amen.