1 Áádóó kʼad áhoodzaa díkwííshį́į́ nááhai dóó bikéédę́ę́ʼ, hastiin léiʼ Nephi bidineʼé yitah níyá, óólyéhígíí éí Sherem.

2 Áádóó baa hoolzhiizh diné neinitingo yaa nídiidzá, Christ doo hólǫ́ǫ da níigo, dóó tʼáá ádzaagóó Diné yaa haniihgo neinitin; dóó Christ binaʼnitin yóóʼádoolnííł nízingo yínaʼniłtin.

3 Áádóó dińe yijéí yinaʼaloʼgo yóóʼayiiʼéésh éí yéego yinaashnish, ląʼí da bijéí yinaʼaloʼgo dah yidiiʼeezh; shí, Jacob, Christ tʼáá aaníí doogáałgo yinishdlánígíí yee shéhósin, tʼáá íiyisíí bidááhdeeshááł laanaa nízin.

4 Áádóó diné ííłtaʼii nilį́, bidineʼé bizaad tʼáá íiyisíí bił bééhózin; ákohgo, tʼáá íiyisíí saad néiyooniłgo, bizaad bidziil, biʼiiníziinii bibeʼazil bikʼehgo.

5 Áádóó oodląʼ hąąh deeshxał laanaa nízin, azhą́ tʼóó ahayóí Diyin God shił ííshją́ą́ áyiilaa dóó yiłtsánígíí biniinaa; tʼáá aanii Diyin yá nidaalʼaʼí deiłtsá, dóó shíkáʼííjééʼ. Áádóó ałdóʼ, bikʼí náhálzhishgo, Diyin Bóhólníihii tʼáá biʼ biinééʼ yee shichʼį haadzíiʼgo nídiistsʼį́į́h, ákohgo, sheʼoodląʼ doo bóhodééłníi da.

6 Áádóó baa hoolzhiizh shaa níyá, áádóó kótʼéego shichʼį haadzííʼ, kóníigo: Shikʼis Jacob, tsʼídá ląʼídi nichʼįʼ hadeesdzih nisingo bikáʼíítʼįįd, sidétsʼą́ą́ʼ dóó shił bééhózin ląʼígóó tádíníyá, nahatʼá bee yisdáʼiildéehii wolyéii bee naʼnítingo, éí doodago Christ binaʼnitin bee.

7 Áádóó díí diné ląʼígo yóóʼííníʼeezh Diyin God bikééʼ oodááł dayiiłchxǫʼ, dóó Moses bibee hazʼáanii doo yikʼeh dahółʼį́į da éí tʼáá aanííjígo átʼé; dóó Moses bibee hazʼáanii łahgo íinilaa díkwíidi neeznádiin nááhaigo łaʼ náádoodáałgo deidoodląął diníigo. Áádóó kʼad áko shooh, shí, Sherem, bee nihił hashneʼ díí éí Diyin God tʼóó baaʼihgo bá yátiʼ átʼé; háálá diné łaʼ díí doo bił bééhózin da; háálá náasjįʼ ahoodoniłígíí doo łaʼ bił bééhózin da. Díigi átʼáo Sherem saad yee shikʼijįʼ haadzííʼ.

8 Ákondi shooh, Bóhólníihii Diyin God biʼIiʼ Sizį́ Diyinii doo tsʼííd átʼéégóó shiih yíyá, áko tʼáá átʼé yee hahadziih yę́ę bee bidiiłheel.

9 Áádóó abidishní: Daʼ Christ doogááłígíísh doo yinídląą da? Áádóó ńtʼę́ę́ʼ ání; Christ hólǫ́ǫgo; ákótʼáo éí tʼáá aanii holǫ nisin doo; ndi shił bééhózingo Christ doo hólǫ́ǫ da, tʼáá ałkʼidą́ą́ʼ tʼáá adin, dóó náásgóó doo hodooleeł da.

10 Áádóó ábidííniid: Diyin God bizaad bee akʼedaʼashchínígíísh yinídlá? Áádóó aní, Aooʼ.

11 Áádóó ábidííniid: Áko tʼáadoo bikʼiʼdintą́ą da lá; háálá éí tʼáá aaníigo Christ yaa dahalneʼ. Áko shooh, ándishní Diyin yá yádaałtiʼii tʼáadoo ndaʼíízoh da, dóó bił ííshją́ą́ ádaʼalyaa da, tʼáá hozhǫʼí yeeʼ Christ bíl ííshjání ádaalyaago índa.

12 Áádóó doo díí tʼéiyá da—éí shił ííshją́ą́ áhoolyaa, háálá sidétsʼą́ą́ʼ dóó yiiłtsą́; áádóó ałdóʼ Iiʼ Sizį́ Diyinii bibeʼadziilii bee shił ííshjání eʼelyaa; ákohgo, bąąhági átʼéii yikʼé nináʼílyáhígíí adingo éiyá nihokááʼ dineʼé doo bééhodoozįįł da ntʼéé.

13 Áádóó baa hoolzhiizh kóshidííniid: Bee yitʼinígíí shił íishjaa áníleeh Iiʼsiziį́ Diyinii bibeʼadziilii bee, áko laʼ áájígo ayóó nił ééhóózingo baa yáníłtiʼ.

14 Áádóó ábidííniid: Háísh áshtʼį́įgo Diyin God bíníshtaah doo díí bichʼįʼ ííshjání ánílééh bidishníígo tʼáá íídą́ą́ʼ nił bééhózinii átʼé? Ákótʼée ndi, doo yinídlą́ą da, háálá biʼiiníziiniikʼehgo yinídlą́. Ákótʼée ndi, doo éí shí shikʼehgo da; ndi Diyin God atíinilaago, éí bee yitʼinígíí beʼadziilii átʼéego nił bééhodoozįįł, yáʼąąsh dóó nahasdzáán bikááʼ tʼáá áłah, dóó ałdóʼ, Christ doogáałgo. O Diyin Bóhólníihii, íinízinígi bikʼehgo áhoodooniił, shí shikʼehgo éí dooda.

15 Áádóó baa hoolzhiizh, shi, Jacob, díí saad bee haasdzííʼ, Diyin Bóhólníihii bibeʼadziilii bikʼi hooleʼ, hónáásiiʼ niʼjįʼ naaʼíígoʼ. Áádóó baa hoolzhiizh baa naʼaltsoʼgo ląida yiską́.

16 Áádóó baa hoolzhiizh diné yichʼįʼ haadzííʼ: Yiską́ągo ałhíidohkah, háálá shiʼniitsą́; ákohgo, díí diné bichʼįʼ hadeesdzih nisin tʼah doo daastsaahdą́ą́ʼ.

17 Áádóó baa hoolzhiizh biiskání ląʼígo áłah azlį́į́ʼ; dóó tʼáá bééhózinígo haadzííʼ dóó yee neineeztʼą́ʼą́ą yikʼijįʼ hahaasdzííʼ, dóó Christ yoosdląądígíí, dóó Iiʼ Sizį́ Diyinii bibeʼadziil, dóó Diyin yá nidaalʼaʼí diyinkʼehgo ákáʼííjéʼígíí yaa hoolneʼ.

18 Áádóó tʼáá bééhózinígo yichʼįʼ haadzííʼ, biʼiiníziinii bibeʼadziil binaʼazloʼígíí yaa hoolneʼ. Áádóó chʼį́įdiitah, dóó ahoolʼáágóó iiná, dóó ahoolʼáágóó atiʼhooʼnííh yaa hoolneʼ.

19 Áádóó ání: bąąhági átʼéii doo bee hanídiʼdootʼaałígíí ááshtʼįįdgo biniinaa baa shił hóóyééʼ; háálá Diyin God nííʼaaʼ: háálá Christ doo yisisdląąd da, dóó Diyin bizaad bee akʼedaʼashchínígíí yiisisdląąd dííniid; dóó éí tʼáá aaníí átʼéego yaa dahoolneʼ. Áádóó Diyin God nííʼaaʼígíí biniinaa bee shaa hodínóotʼįįłígíí tʼáá áyisíí bááhádzidgo béésisdzííd; ákondi Diyin God bichʼįʼ ádaahweeshneʼ.

20 Áádóó baa hoolzhiizh díí saad yee haadzíiʼgo bíkééʼdóó tʼáadoo hanáánáádzííʼ da, áádóó bitsʼíís náádiilyá.

21 Áádóó kʼadę́ę daatsaahgo díí saad yee haadzíʼígíí diné deiyidiiztsʼą́ą́ʼ, áko tʼóó báhádzoo biyaadahodeesyis; tʼáá díí biniinaa yáʼąąshdę́ę́ʼ Diyin God bibeʼadziil bikʼidahooleʼ, dóó bide ádaadzaago niʼjįʼ kódabiilaa.

22 Kʼad, shí, Jacob, díí baa shił hóózhǫǫd, háálá shiTaaʼ yáʼąąshdi hólóonii díí bííkeed; háálá díí baanéisiskanígíí yidiiztsʼą́ą́ʼ dóó shisodizin shá yeʼiilaa.

23 Áádóó baa hoolzhiizh diné bitahgo kʼé ndahasdlįįʼ dóó Diyin beʼayóóʼóʼóʼní ninályá; áádóó Diyin bizaad bee akʼedaʼashchínígíí nideiłkaahgo deiyółtaʼ ndaasdlįįʼ, áádóó díí haastiin doo tsʼíídyę́ę bizaad doo deiyóóstsʼą́ą́ʼ da daazlį́į́ʼ.

24 Áádóó baa hoolzhiizh Laman dineʼé tʼáá aaníinii bił bénídahodoozįįł biniyé tʼóó ahayóí binahjįʼ yáʼátʼéehgo dahiná nídadoodleełgo bee bikáʼaʼoowod; tʼóó tʼáadoo biniyéhí nídaasdlį́į́ʼ, háálá anaaʼí dóó naʼatseed tʼéiyá bił danilį́, dóó tʼáá díí binahjįʼ ahoolʼáágóó danihijoosłaad, nihikʼiské. Áádóó bílaʼ yee dabidziilgo áłahjįʼ ádanihidoołdįįłgo ntsídakees daazlį́į́ʼ.

25 Ákohgo, Nephi bidineʼé bílaʼ yee bikin yichʼą́ą́h daʼaztłʼin, yéego ádaatʼį́įgo, Diyin God yaa daʼólí, dóó binahjįʼ yisdáʼiildéehii nilíinii; ákohgo, tʼáá ákodaatʼį́įgo, beʼanaʼí yikʼeh dadeesdlį́į́ʼ.

26 Áádóó baa hoolzhiizh shí, Jacob, hasistih; dóó diné bikééʼ nááháneʼ éí Nephi bibéésh tʼą́hí łaʼígíí bikááʼ nídaháasdzo, ákohgo, díí ałtso náházoh, tʼáá shí shintsíkeesígíí bikʼeh niʼsézoh dishní, kódeitʼį́įgo nihił ahoolzhiizh, dóó niheʼiinaʼ ałdóʼ naʼiigeeł nahalingo nihił ahoolzhiizh, tʼáá sáhí neikai dóó hojoobaʼ dineʼé dasiidlį́į́ʼ, diné tʼóó nidaakaiígíí, Jerusalemdę́ę́ʼ chʼíbidiʼneelkaadígíí, tiʼhooʼnííh biiʼ dabiʼdizhchínígíí, diné doo kééhatʼínídi, dóó nihikʼiské danihoołchʼį́įdgo, tʼáá díí binahjįʼ ałchʼįʼ ndaabaah dóó daʼahigą́ daazlį́į́ʼ; ákohgo, yínííł biiʼ nihiyííską́.

27 Áádóó shí, Jacob, kʼadę́ę łeeh shiʼdilteehgóó bee aʼdiistsą́; ákohgo, shiyeʼ Enos ábidííniid: Díí béésh tʼą́hí nidiinííł. Dóó Nephi shikʼis áshidííniidyę́ę bee bił hweeshneʼ, áádóó bee ndahwiistʼánée bikʼeh honishʼį́į doo dííniid. Dóó díí béésh tʼą́hí akéeʼdi ałtso biiʼ niʼdeesoh, éí niʼsézooígíí áłtsʼíísí yę́ę; áádóó díí yółtaʼígíí hágoóneeʼ bidishní, ląʼígo shikʼiské shizaad deiyídóołtahgo baa laanaa nisin. Shikʼéí, Diyin God nihił dah hólǫ́ǫ doo.