1 Áko shooh, shikʼéí, Zenos Diyin yá yáłtiʼii bizaad deinóółtaʼ yą́ą́ éíish doo béédaałniih da, éí Israel bighandóó háájéʼígíí yee yichʼįʼ haadzííh, kóníigo:

2 Daʼíísínółtsʼą́ą́ʼ, Yaa Israel bighandóó háájéʼígíí, dóó shizaad dadootsįįh, Diyin Bóhólníihii yá yáłtiʼii nishłį́.

3 Háálá áko shooh, Diyin Bóhólníihii kóní, O Israel bighandóó danohłíinii, olive tsin sikaad baa aháyanígíí biʼdanołtʼé, éí hastiin dahyidiitą́ǫ bidaʼakʼehgi yaa ahalyą́ągo, áádóó dahdiníísą́, dóó tsin sání silį́į́ʼ, dóó niiłnaʼ.

4 Áádóó baa hoolzhiizh dáʼákʼeh bee bóhólníihii dahdiiyá, dóó olive tsin sikaad niiłnaʼ biʼniiłzidgo yaa ákoniizį́į́; dóó ádííniid: Náháshgish doo, dóó binaagóó náháshgod doo, tó baa náshkááh doo, áko neidootso shaʼshin, áko doo dinooneeł da.

5 Áádóó baa hoolzhiizh éí bitsiin yąąh yiyiizhgizh, dóó yínáhazgeed, dóó yaaʼáhályą́ą ńtʼę́ę́ʼ haahaasdzííʼyę́ęgiʼ átʼáo.

6 Áádóó baa hoolzhiizh ląʼí yiską́ą́góó ałtsíísigo yiitsoi, aniidígíí dóó ditʼodígíí bąąh hadaniisą́, ákondi shooh, bilátahdi biʼdiʼniiłnaʼ.

7 Áádóó baa hoolzhiizh dáʼákʼeh bee bóhólníihii yiyiiłtsą, dóó bá naalnishígíí iidííniid: Díí tsin sikaad dadootsaałígíí shiʼdiiłʼá; ákohgo, tʼáá biniikʼéh olive tsin sikaad bąąh diiłdah, dóó shaa diijih, dóó tʼáá íyísii bitsin daniiłnaʼígíí kʼídahidíígish, dóó kǫʼ biihidooltłʼiłgo adidoolkʼą́ą́ł.

8 Áádóó áko shooh, dáʼákʼeh bee Bóhólníihii ání, aniidígíí dóó ditʼóódígíí bąąh hadaniisą́nígíí nahji kodeeshłííł; dóó ínísingiʼ bighą́ą́h didiistsih, dóó tʼáá shįįh áko éí tsin bikétłʼool niiłnaʼ ndi, bineestʼąʼ ałhąąh ádeeshlííł tʼáá shí shá; ákohgo, aniidígíí dóó ditʼodígíí bąąh hadaniisą́nígíí dahdideeshjih, áádóó tʼáá shí nisingóó bighą́ą́h dadidiistsih.

9 Tʼáá binííkʼéh olive tsin sikaadígíí nídidiijih, dóó tsin baa ahayanígíí, bighą́ą́h dadidiistsih, dóó díí bąąh yiłdeehígíí éí kóʼ bihídeeshtłʼił dóó didiishłił, áko shidáʼákʼehgi doo bikʼehíyéʼ da doo.

10 Áádóó baa hoolzhiizh dáʼákʼeh bee Bóhólníihii yá naalʼaʼí dáʼákʼeh bee Bóhólníihii yizaad yikʼeh áhóola dóó tʼáá biniikʼéh olive tsin sikaad hadaniisánígíí yighą́ą́h ńdaʼdeestsih.

11 Áádóó dáʼákʼeh bee Bóhólníihii yinaagóó náhódoogoł; dóó bitsádaazʼáhígíí hidoogish, dóó tó baa nákááh doo, bá naalʼaʼí ííłní: Díí tsin dadootsaałígíí shiʼdiiłʼá, ákohgo, bekétłʼóól biniʼ tʼáá hiináa doo áko doo dínóółnah da, náásgóó tʼáá dahiináa doo nisin, ákótʼáo ííshłaa.

12 Ákohgo, kʼad yínááł, tsin baa aholyá, dóó tó baa nánkááh, shizaad bikʼehgo.

13 Áádóó díí tsin tʼáá nááóyahdi daʼaʼkʼehgi kididoolyeeł, akweʼé da shį́į́, shił tʼáá áko, dóó tʼáá níléídę́ę́ʼ tsin bitsʼádáozʼaʼ yę́ę tʼáá dahiináadoo biniyé ííshłaa; dóó ałdóʼ, tsin bąąh daneestʼą́ágo ałah aneeshį́į́hdóó tʼáá nináhahaa bikʼeh, tʼáá shí ádá, háálá díí tsin dadootsaałígíí shiʼdiiłʼá dóó bineestʼąʼ.

14 Áádóó baa hoolzhiizh dáʼákʼeh bee Bóhólníihii kʼididoolééłgóó dahdiiyá, dóó olive tsin tʼáá níléídę́ę́ʼ bitsʼádáozʼaʼ yę́ę baa aháyą́ągo éí tʼáá náóyahdi doo hootʼį́įgi kʼiidíílá, łaʼ kweʼé dóó łaʼ niléíjí, bił nilínígíí dóó bił yáʼátʼéhígíí bikʼehgo.

15 Áádóó baa hoolzhiizh tʼáá nizaagóó nihoolzhiizh, dóó dáʼákʼeh bee Bóhólníihii bá naaláʼí iidííniid: Tįʼ, dáʼákʼeh góyáá diitʼash, áko dáʼákʼehgi nidiilnish.

16 Áádóó baa hoolzhiizh dáʼákʼeh bee Bóhólníihii, dóó ałdo bá naaláʼí, dáʼákʼeh góyáá nidoolnishgo níʼaazh. Áádóó baa hoolzhiizh dáʼákʼeh bee bóhólníihii bá naaláʼí abiłní: Shooh, kǫ́ǫ́jįʼ diníʼį́į́ʼ; tsin niníłʼį́.

17 Áádóó baa hoolzhiizh dáʼákʼeh bee Bóhólníihii dééʼį́į́ʼgo tʼáá biniikʼeh olive tsin bighą́ą́h daʼdeestsih yę́ę yiyiiłtsą́, dóó dinéésą́ągo bineestʼąʼ haazlį́į́ lá. Áádóó hayíísidgo yaa bił hóozhǫǫd, dóó bineestʼaʼ éí tʼáá níléídę́ę́ʼ tsinyę́ę bineestʼąʼ nahalin.

18 Áádóó bá naalʼaʼí iidííniid: Shooh, tʼáá biniikʼeh olive tsin bitʼáósʼái bitłʼóól tó choyoosʼįįd áko bitłʼóól yee bidziil daazʼlį́į́ʼ; Áko háálá bitłʼóól bidziil daazʼlį́į́ʼgo tʼáá biniikʼeh tsin bitʼaozʼáhą́ą bineestʼąʼ yáʼáʼtééhii bąąh dahazʼlį́į́ʼ. Áko, díí bitsiin tʼáadoo bighąąh nidaʼdootsihgóó, tsin daneeznáa doo ńtʼę́ę́ʼ. Áko kʼad, shooh, ląʼígo bineestʼąʼ hashteʼdeeshłííł, éí tsin bitsʼą́ą́dę́ę hazlį́į́ʼ. Áádóó éí neestʼąʼ nanítʼį́įgoo hashteʼnéishʼį́į́ʼ doo, tʼáá shí shá.

19 Áádóó baa hoolzhiizh dáʼákʼeh bee Bóhólníihii bá naaláʼí iidííniid: Hágo tįʼ, tʼáá nááhóyahdi dáʼákʼeh góyáá diitʼaash, áádóó shooh tʼáá níléídę́ę́ʼ bitsʼádáozʼaʼ baa aháyą́ągnée tʼáadoo bineestʼąʼ haazlį́į́góó ałdóʼ, áádóó éí neestʼąʼ nanítʼį́įgo hashteʼnéishʼį́į́ʼ doo, tʼáá shí shá.

20 Áádóó baa hoolzhiizh tʼáá níléídę́ę́ʼ bitsʼádáozʼaʼ baa aháyą́ągo dáʼákʼeh bee bóhólníihii neideesʼį́į́ʼ yę́ę yikáh dahdiiʼáázh, áádóó bá naaláʼí íídííniid: Áko shooh díí niniłʼíʼ; áádóó ałtsé tsin yiyiiltsaanígíí ląʼída bineestʼąʼ bąąh hazlį́į́ lá, áko yinééłʼíígo bił yáʼíítʼééh. Áádóó bá naaláʼí íídííniid: Díí neestʼąʼ nibéh, neestʼąʼ nanítʼį́įgo hashteʼnéinlʼį́į́ʼ doo, áko náásgóó ádá choineishʼį́į́h doo, háálá áko shooh, ání, kónizáágo baa áhishyáago, łąʼí bineestʼąʼ haazlį́į́ʼ.

21 Áádóó baa hoolzhiizh dáʼákʼeh bee bóhólníihii bá naaláʼí abiłní: Haʼátʼáo kweʼé tsin kʼidíinlá, doodago díí tsin bitsʼáozʼaʼ? Háálá áko shooh, nidáʼákʼehgi łeezh tsʼidá doo yáʼátʼéhą́ągi.

22 Áádóó dáʼákʼeh bee Bóhólníihii abidííniid: Tʼáadoo kotʼé shídiníní; tʼáá íídą́ą́ʼ łeezh doo yáʼátʼééhgóó shił bééhózín, ákohgo, ándishní, kónizáágo baa áhishyáago hoolzhiizh, niniłí łąʼí neestʼąʼ bąąh haazlį́į́ʼ.

23 Áádóó baa hoolzhiizh dáʼákʼeh bee Bóhólníihii bá naaláʼíʼ iidííniid: Kǫ́ǫ́ niniłí; áko shooh tsin bitsʼáozʼaʼ ałdóʼ łáʼ kʼináádiishdlá, áádóó nił bééhózin áłtséédą́ą́ʼ hazʼánée kweʼé łeezh tʼah yíwohdí doo yáʼátʼééh da. Ákondi, shooh tsin níníłʼį́. kónizáágo baa áhishyáago hoolzhiizh, dóó łąʼí neestʼąʼ bąąh haazlį́į́ʼ ákohgo, díí neestʼąʼ nibéh, neestʼąʼ náʼnítʼį́įgo hashteʼnéinlʼį́į́ʼ doo, áko náásgóó tʼáá shí choineishʼį́į́h doo.

24 Áádóó baa hoolzhiizh dáʼákʼeh bee Bóhólníihii bá naaláʼíʼ ánááyídííniid: Kǫ́ǫ́ niniłí; áko shooh tsin bitsʼáozʼaʼ naana łáʼ ałdóʼ, éí kʼidíílá, hansííd éí ałdóʼ baa áhishyáa ńtʼę́ę́ʼ, dóó bineestʼąʼ haazlį́į́ʼ.

25 Áádóó bá naaláʼíʼ iidííniid: Kǫ́ǫ́ niniłí dóó ałtséédą́ą́ yą́ą́. Áko shooh, díí yáʼátʼééh hazʼánígi kʼidiilyá, dóó baa áhishyą́ągo kónízáágóó áhoolzhiizh, áádóó łahdoo tʼéiyá baa aháyą́ągo bineestʼąʼ bąąh hazlį́į́ʼ, dóó łahdoo éí bineestʼąʼ doo yaʼáshóonii bąąh hazlį́į́ʼ, áko shooh, díí tsin tʼáá áłtso tʼáá aheełtʼéego baa áhishyą́ą ńtʼę́ę́ʼ.

26 Áádóó baa hoolzhiizh dáʼákʼeh bee Bóhólníihii bá naaláʼíʼ iidííniid: Tsin bineestʼąʼ doo yáʼádaashóógóó bąąh dahazlį́į́ʼígíí bitsʼadaozʼá bąąh dííłdah, dóó kǫʼ biihidííłtłʼił.

27 Ákondi shooh, bóhólníihii yá naalʼaʼí ábíłní: tsin bąąh diildah, dóó bináhodiigoł, dóó tʼáá náásgóó baaʼáhwiiʼą́ągo, áko neestʼą́ yáʼátʼéehii da łaʼ ná bąąh hodooleeł, éí baąh nanítʼį́įgo hashteʼnéinlʼį́į́ʼ doo.

28 Áádóó baa hoolzhiizh dáʼákʼeh bee Bóhólníihii dóó dáʼákʼeh bee Bóhólníihii yá naaláʼíʼ tsin bąąh nídaʼnitʼį́į́h bindaʼaztiʼígíí tʼáá átʼé baaʼáhwilyą́ą ńtʼę́ę́ʼ.

29 Áádóó baa hoolzhiizh tʼáá nizaagóó nihoolzhiizh, dóó dáʼákʼeh bee Bóhólníihii bá naaláʼí iidííniid: Tįʼ, dáʼákʼeh góyáá diitʼash, áko dáʼákʼehgi nináádiilnish. Háálá áko shooh, kʼadę́ę́ áajįʼ ahalzhíízh, dóó kʼadę́ę́ nohooghááh baa hoolzhíísh, ákohgo, díí neestʼąʼ náʼnítʼį́įgo hashteʼnéshʼį́į́ʼ doo, áko náásgóó tʼáá shí choinaoshʼįįh doo.

30 Áádóó baa hoolzhiizh dáʼákʼeh bee Bóhólníihii, dóó bá naaláʼí, daʼaʼkeh góyáá níʼaazh; dóó tsin tʼáá niléidę́ę́ʼ baa aháyą́ągo bitsʼádáozʼá yę́ę kʼídabiʼdiistiʼ lágo yaa níʼáázh, dóó tsin tʼáá bíniʼ haníísánígíí bitsʼáózʼáhą́ą bighą́ą́h nidaʼdeestsih lá; dóó áko shooh, tsin bineestʼąʼ ałʼąą ádaatʼéégo bąąh yíląąd.

31 Áádóó baa hoolzhiizh dáʼákʼeh bee Bóhólníihii tsin bineestʼąʼ yizlįh, tʼáá áłtso ałʼąą adaatʼéehgo. Áádóó dáʼákʼeh bee Bóhólníihii ídííniid: Áko shooh, kónizáágo baa áhwiilyáago áhoolzhiizh, dóó łąʼí tsin bineestʼąʼ hashtʼeshłaa náásgóó choideishʼįįł biniyé.

32 Ákondi shooh, kʼad índa ląʼí neestʼąʼ bąąh hazlį́į́, dóó adin doo łaʼ yáʼátʼééh da. Áko shooh, neestʼąʼ doo yáʼátʼéhígíí tʼóó ahayóí ałʼąą átʼé; dóó doo bitsʼąądóó ńdideshléłí da, azhą́ yéego binshiilnish ndi; dóó kʼad díí tsin dadootsaałígíí shiʼdiiłʼá.

33 Áádóó dáʼákʼeh bee Bóhólníihii bá naaláʼí iidííniid: Díí tsin haashdiilnííł, ákó bineestʼąʼ yáʼátʼéhígíí hashtʼe náádeeshdlííłgo tʼáá shí choideeshʼįįł?

34 Áádóó dáʼákʼeh bee bóhólníihii bá naalʼaʼí abíłní: Áko shooh, olive tsin tʼáá bíniʼ haníísánígíí bitsʼáósʼá bighą́ą́h daʼdiʼnítsiih yą́ą́ éí bekétłʼóól yidaʼíísą́ą́ʼ, áko éí tʼah dahiiná dóó tʼáadoo daniiłnaʼ da; ákohgo níníłʼį́ tʼahdii danizhóní.

35 Áádóó baa hoolzhiizh dáʼákʼeh bee Bóhólníihii bá naaláʼí iidííniid: Tsin doo bitsʼąądóó ńdideshléłí da, dóó bekétłʼóól bitsʼąądóó doo ńdideshléłí da tʼah bineestʼąʼ doo yáʼáshóonígíí bąąh nahádlééhgo.

36 Ákondi, bekétłʼóól yáʼátʼéhígíí shił bééhózín, áko tʼáá shí choideishʼį́į́ł biniyé hashtʼeishłaa; áádóó ayóó dabidziilígíí biniinaa kʼad índa bąąh aʼneestʼą́, tsin tʼáá bíniʼ haníísánígíí bitsʼáózʼáhą́ą bitsʼą́ą́dóó, bineestʼąʼ danizhóní.

37 Ákondi shooh, tsin tʼáá bíniʼ haníísánígíí bitsʼáózʼáhą́ą dadinéésą́ dóó bekétłʼóól yideʼádzaa, dóó tsin tʼáá bíniʼ haníísánígíí bitsʼáózʼáhą́ą bekétłʼóól yideʼádzaago biniinaa ląʼí bineestʼąʼ doo yáʼáshóníí bąąh hazlį́į́; niníłʼį́ lą́ʼígo bineestʼąʼ doo yáʼádaashónígíí bąąh hazlį́į́go tʼóó niiłnééh; tʼóó shį́į́ kǫʼ biihídooltłʼił, tʼáá haadei tʼáó ádadiilnííłgo hasteʼnidoojih.

38 Áádóó baa hoolzhiizh dáʼákʼeh bee Bóhólníihii bá naaláʼí iidííniid: Tįʼ, tʼáá náóyahdi dáʼákʼeh góyáá diitʼaash, áádóó shooh tʼáá níléídę́ę́ʼ bitsʼádáozʼaʼ baa aháyą́ąnée daatsʼí ałdóʼ bineestʼąʼ doo yáʼádaashónígíí bąąh hazlį́į́.

39 Áádóó baa hoolzhiizh tʼáá nááóyahdi daʼaʼkeh góyáá níʼaazh. Áádóó baa hoolzhiizh dáʼákʼeh tsin tʼáá niléidę́ę́ʼ baa aháyą́ągo bitsʼádáozʼá yę́ę dááchxǫʼgo yiyiiłtsą́, aooʼ, ałtsé dóó bikééʼ góneʼ dóó akéédígíí; tʼáá ałtsoʼ dááchxǫʼ lá.

40 Áádóó bineestʼąʼ doo yaʼáshóonii akéédígíí tsin bineestʼąʼ yáʼádaatʼééhígíí yideʼádzaa, áko bitsʼáozʼá niiłnaʼgo naaʼííkʼę́ę́z.

41 Áádóó baa hoolzhiizh dáʼákʼeh bee Bóhólníihii yíchah, áádóó bá naaláʼí iidííniid: Shidáʼákʼehyę́ę haʼátʼíísh bá anáádeeshdlííł ńtʼę́ę́ʼ?

42 Áko shooh, tʼáá íídą́ą shił bééhózín dáʼákʼehgi tsin bineestʼąʼ, ałtso dááchxǫʼ, tʼáá hózhóʼó díí tʼéiyá. Dóó díí tsin bineestʼąʼ yáʼádaatʼééhyę́ęʼ éí ałdóʼ kʼad dááchxǫʼ; áádóó kʼad tʼáá ałtso dáʼákʼehgi tsinyę́ę éí tʼáadoo biniyéhé da daazlį́į́ tʼóó ałtso doołdah dóó kǫʼ biihídooltłʼił.

43 Áádóó áko shooh díí akééʼdi, tsin bitsʼáozʼá niiłnaʼígíí, éí yáʼátʼééh hazʼą́ągi kʼidiilá; aooʼ, éí shidáʼákʼehgi kédaayahígíí tsʼídá aláahdi átʼéego shił nilį́ʼ.

44 Áádóó hanisíídgo díí hazʼą́ągi bikʼehíyéʼígíí ałdóʼ kʼíníłneʼ, áko bitséskʼehgi shį́į́ díí tsin kʼidideeshłééł.

45 Áádóó háínísidgo łahgóó neestʼąʼ yáʼátʼéhígíí bąąh dahazlį́į́ʼ, dóó łahdóó éí neestʼąʼ doo yáʼátʼéhígíí bąąh hadaníísą́, dóó tsin bitsʼádaozʼá doo bąąh yíłdeehígíí dóó doo kǫʼ biihiłtłʼidígíí biniinaa, niniłį́ʼ, éí tsin bitsʼádaozʼá yáʼádaatʼéhę́ę́ yideʼádzaago daniiłʼnaʼ.

46 Áádóó kʼad, áko shooh, azhą́ yéego shidáʼákʼeh binshiilnish ndi, tsin dááchxǫʼ, éí tsin bineestʼąʼ doo yáʼátʼéehii bąąh hazʼlį́įʼ, dóó díí tʼáá shí choideishʼį́į́ł biniyé hashtʼedeeshʼłííł nisin ńtʼę́ę́ʼ. Ákondi, shooh, éí olive tsin tʼáá bíniʼ hadaniihsánígíí nahalin daazlį́į́ʼ, éí doo daʼílíiní da ndi ałtso dooldah dóó kǫʼ biihídooltłʼił, dóó kʼad díí olive tsin bineestʼąʼ dooghą́łígíí bąąh shíneʼ.

47 Ákondi shidáʼákʼehyę́ę haʼátʼíísh bá anáádeeshdlííł ńtʼę́ę́ʼ? Tʼóóísh shilaʼ bąąh nanííłʼnaʼ, tʼáadooísh baʼ níłtsood da? Nidayeeʼ, baʼ niłtsood, binaagóó náhósíhgeed, dóó bitsaozʼaʼ łaʼ bąąh yíłdeeʼńtʼę́ę́ʼ, dóó naaldlooshii bichaan bił nehejaaʼ, dóó wołíbee shílaʼ yiiłchʼííʼgo baaʼ átʼéétʼįįd, áádóó kʼadę́ę bił nihoolzhiish. Dóó baa yíniił nisin dáʼákʼehdi tsinígíí tʼáá átʼé deeshdah, dóó kǫ́ʼ bihídeeshtłʼiłgo adidookʼą́ą́ł. Háí shąʼ shidáʼákʼeh yiyiiłchxǫʼ?

48 Áádóó baa hoolzhiizh dáʼákʼeh bee bóhólníihii bá naaláʼí abíłní: Nidáʼákʼeh yee adootʼínígíí dóóísh éí átʼé da—daʼ tsin bitsʼaozʼááísh doo bikeʼtłool yáʼátʼéhígíí yideʼádzaa da? Áádóó tsin bitsʼaozʼá bikeʼtłool yideʼádzaaʼígíí biniinaa, áko shooh tsin bitsʼaozʼá bikeʼtłool yilááh daníísą́, áko yee yiláah bidziil daazlį́į́ʼ. Áko shooh, ádishní, daʼ díísh doo biniinaa dáʼákʼehdi tsin dááchxǫ da?

49 Áádóó baa hoolzhiizh dáʼákʼeh bee Bóhólníihii bá naaláʼí iidííniid: Tįʼ, dáʼákʼeh góyáá diitʼaash dóó tsinígíí diildah dóó kǫ́ biiʼ hidiiltłííł áko shidáʼákʼeh hazʼą́ągi doo bikʼehíyéʼ da doo, háálá tʼáá ałtsoní ííshlaa. Shidáʼákʼehyę́ę haʼátʼíí lá bá anáádeeshdlííł ńtʼę́ę́ʼ?

50 Ákondi, shooh, dáʼákʼeh bee Bóhólníihii bá naalʼaʼí ábíłní: Biniʼdii áłtsé bee náhódiʼnaah.

51 Áádóó Diyin Bóhólníihii adííniid: Tʼáá áko, biniʼ áłtsé bee nááhódiʼnaah, háálá shidáʼákʼehgi tsin dadooghą́łígíí bąąh shíneʼ.

52 Ákohgo, díí tsin bitsʼaozʼá náóyahdi dáʼákʼeh góyáá kʼidiilyáhą́ą́ nídiijih, dóó tʼáá niléí dę́ę́ tsin hadaniisánaa bitsʼą́ą́dę́ę́ʼyę́ę bighą́ą́h nididiitsih; áádóó tsin bitsʼadaozʼá diiłdah éí bineestʼąʼ tʼáá ííiyisíí doo yáʼádaashóó da, dóó tʼáá níléídę́ę́ʼ tsin bitsʼádáozʼaʼ yą́ą́ bitséskʼé góneʼ bighą́ą́h dadidiitsih.

53 Áádóó díí adeeshlííł áko tsin doo doogą́ą́ł da, áko, laanaa nisingo, bekétłʼóól hashtʼe nideeshnił áko náásgóó choideishʼį́į́ł.

54 Áádóó, áko shooh, tʼáá níléídę́ę́ʼ tsin haníísą́ bitsʼádáozʼaʼ éí bekétłʼóól tʼáá shí kʼidiiláhą́ągi tʼahdii dahiiná; ákohgo, éí tʼáá shí choideishʼį́į́ł biniyé hashtʼeʼniníjaaʼ, díí tsin bitsʼadaozʼáhígíí nidideeshjih, áádóó éí tsin bighą́ą́h nidadideestsih. Aooʼ, éí tʼáá nílę́ędę́ę́ʼ bimá tsinyę́ę bitsʼádáozʼaʼ bighą́ą́h nídadideestsih éí bekétłʼóól ałdóʼ tʼáá shí choinéideishʼįįłgo hashtʼeʼnideeshjih, áko bidziil dazlį́įgóó bineestʼąʼ yáʼátʼéhígíí shá dadínóótʼį́į́ł, áko shidáʼákʼehdi daʼneestʼą́ą́hgóó dooládóʼ baa shił hózhǫ́ǫ dooleeł.

55 Áádóó baa hoolzhiizh tʼáá níléídę́ę́ʼ tsinyę́ę éí doo yáʼátʼééhgóó dínéesą́, dóó tʼáá níléídę́ę́ʼ tsinéé bighą́ą́h ndaʼdeestsih, éí ałdóʼ doo yáʼátʼééhgóó dadínéésą́.

56 Áádóó tsin tʼáá níléídę́ę́ʼyę́ę doo yáʼátʼééhgóó dadínéesą́, dóó tʼáá níléídę́ę́ʼ bimá tsinyę́ę bighą́ą́h nídaʼdeestsih.

57 Áádóó dáʼákʼeh bee Bóhólníihii bá naaláʼí iidííniid: Tsin bitsaʼdaozʼaʼ doo yáʼátʼéhígíí tʼáadoo daołdéhé, tʼáá házhóʼí tʼáá ííiyisíí bąąh dadichʼííhígíí tʼéiyá, dóó éí ídííniidígíí bikʼehgo bighą́ą́h nidadidíítsih.

58 Áádóó tsin dáʼákʼehgi yiláʼhígíí baa ánáádahodiilyąął, dóó tsin bitsʼadaozʼaʼ diildah, dóó tsin bitsʼadaozʼaʼ bąąh daʼneestʼánígíí diildah, éí dadoogą́ą́ł, dóó kǫʼ bihidooltłʼił.

59 Áádóó laanaa ídlį́įgo, díí ádeeshlííł, yáʼátʼéhígíí binahjiʼ bekétłʼóól bidziil dooleeł, tsin bitsʼadaozʼaʼ łahgo alyaaígíí biniinaa, yáʼátʼéehii nichxǫ́ʼígíí yikʼehdidoodleeł.

60 Áádóó tʼáá níléídę́ę́ʼ tsin haníísą́ bitsʼádáozʼaʼ dóó bekétłʼóól hastʼeʼniníjahígíí biniinaa, áko éí tʼáá níléídę́ę́ʼ tsin haníísą́ bitsʼádáozʼa éí tʼáá níléídę́ę́ʼ bimá tsinyę́ę bighą́ą́h nínáádadideestsih, áko éí tʼáá níléídę́ę́ʼ bimá tsinyę́ę bekétłʼóól hastʼeʼniníjaaʼ, áádóó nisingo, shidaʼaʼkehgi tsin bineestʼaʼ yáʼátʼéhígíí bąąh dinootʼį́į́ł, áko shidáʼákʼehgi neestʼąʼ bąąh shił nááhózhǫ́ǫ doo, dóó nisingo, shidaʼaʼkehgi tʼáá íiyisíí bąąh shił hózhǫ́ǫ dooleeł, éí bekétłʼóól dóó tsin bitsʼadaozʼaʼ neestʼąʼ ałtsé bąąh hazlį́ʼígíí hashtʼeʼniníjaaʼ.

61 Ákohgo, nilááh, nidaaláʼí bikáʼádíní, áko dáʼákʼehgi yéego nideeldzilgo nidadiilnish, áko bá hashtʼeʼhodoolnííł, áko tʼáá níléídę́ę́ʼ tsin bineestʼąʼyę́ę, ííshjání ídeeshlííł, éí tʼáá níléídę́ę́ʼ neestʼąʼyą́ą yáʼátʼééh dóó ląʼí neestʼąʼ tsʼídá yiláahdi ílíinii átʼé.

62 Ákohgo, Tįʼ nilááh dáʼákʼehgóó tʼáá awołí bee tʼáá łahídi nináádiilnish, háálá áko shooh kʼadę́ę nihoolzhíísh, díí éí tsʼídá akéédi shidáʼákʼehgi tsin bitsʼáozʼá náádeeshdah.

63 Tsin bitsʼáozʼá bighą́ą́h nidadidootsih; akééʼdeígíí bee hahodoolzhish áko aláajįʼ dadooleeł, dóó aláajįʼ yée akéédééʼ dadooleeł, dóó tsin bináhodoogoł, kʼadęę daniiłnéhígíí dóó índa dadadíníísánígíí, aláajįʼígíí dóó akééʼdeígíí, akééʼdeígíí dóó aláajįʼígíí, díí tsʼídá tʼáá áłtso akééʼdi baaʼanááhodooyąął.

64 Ákohgo, binaagóó náhágeed, dóó nááháshgéésh, dóó naaldlooshii bichaan tʼáá łáhídi baa nááhidoojih, éí tsʼídá akéédi doo, háálá kʼadę́ę nihoolzhíísh. Akééʼdi bighááh ndaʼdeestih yą́ą́ dadadíníísáago, dóó tʼáá níléiidééʼ neestʼąʼ yąą bąąh haslįįʼgo, bá hashtʼeh hodíílííł, áko danóósééł doo.

65 Áádóó dadadíníísáago tsin bitsádaozʼá nahjįʼ bąąh dííłdah éí bineestʼąʼ dadíchʼííʼ, yáʼátʼéhígíí beʼadziil dóó áníłtsooígíí bikʼehgo; áádóó nichxǫʼígíí dóó tʼááłahjįʼ ałtso dííłdah da, áko behétłʼóól bighááh dadeestséhígíí doo bilááh dabidziil da doo, áko bighááh dadeestsiígíí dadínóółʼnah, dóó shidáʼákʼehgi tsin dadooghááłgo dadinóónééł.

66 Háálá shidáʼákʼehgi tsin dadooghą́łígíí baa yínííł nisin, ákohgo doo yáʼádaashoonii nahjįʼ dooldah éí bikékʼehgi yáʼáʼtʼééhígíí dadinóosééł, áko bekétłʼóól dóó bilátʼah tʼáá ahełtéego bidziil doo, yáʼátʼéhígíí éí nichxǫ́ʼígíí yikʼehdeesdlíígo índa, dóó nichxǫ́ʼígíí dooldah dóó kǫʼ biihídooltłʼił, áko shidáʼákʼehgi doo bikʼehíyéʼ da doo, áádóó danichxǫ́ʼígíí shidáʼákʼehdę́ę́ʼ chʼídeeshoh.

67 Áádóó tʼáá níléídę́ę́ʼ tsin bitsʼádáozʼaʼą́ą́ éí tʼáá níléídę́ę́ʼ tsin yą́ą́ bighą́ą́h nidadidootsih;

68 Áádóó tʼáá níléídę́ę́ʼ tsin bitsʼádáozʼaʼą́ą́ éí tʼáá níléídę́ę́ʼ tsin yą́ą́ bighą́ą́h nidadidootsihʼ; áádóó áko ałhąʼánáádeeshdlííł; áko tʼáá níléídę́ę́ʼ neestʼąʼą́ą́ bąąh hodoodleeł, dóó tʼááłáʼí danilį́į doo.

69 Áádóó danichxǫ́ʼígíí yóó ahidoolkał, aooʼ, tʼáá átʼé shidáʼákʼeh nidaneesʼą́ą́dę́ę́ʼ; háálá áko shooh, shidáʼákʼeh tsʼídá kʼad tʼéiyá deeshdah.

70 Áádóó baa hoolzhiizh dáʼákʼeh bee Bóhólníihii bánaalʼáʼí ayííłʼaʼ; áádóó éí bánaalʼaʼí dahdiiyá dóó Diyin Bóhólníihii abidiiniidyę́ę yikʼehóola, áádóó ndaalaʼí łaʼ néíníʼeezh; éí tʼáá díkwíí yiltʼé.

71 Áádóó dáʼákʼeh bee Bóhólníihii ábíłní: Nílááh, dáʼákʼehdi tʼáá awołí bee nidaałnish. Háálá áko shooh, shidáʼákʼeh tsʼídá akéedi bininááʼdoonish, háálá naanish akéedi bílátah dahashzhiizh, díí tsxį́į́łgo baa hodoolzhish, tʼáá awołi bee shił ndaałnishgo kodééʼ hoolzhishígíí bichʼįʼ neestʼąʼ choideeshį́į́łígíí hashtʼeʼdeishłííł éí baa nihił dahózhǫ́ǫ doo.

72 Áádóó baa hoolzhiizh nidaalaʼí dahdiikai dóó tʼáá awołí bee nidaałnish; áádóó dáʼákʼeh bee Bóhólníihii ałdo yił nidaashnish; dóó dáʼákʼeh bee Bóhólníihii bibee hazʼáanii tʼáá áłtsojįʼ yikʼeh dahoolaa.

73 Áádóó tʼáá níléídę́ę́ʼ neestʼąʼą́ą́ dáʼákʼehgi náhasdlį́į́ʼ, tʼáá níléídę́ę́ʼ tsin bitsʼádáozʼaʼ yą́ą́ dah dadíníísą́ dóó haanootʼą́; dóó tsin tʼáá bíniʼ hadaniihsánígíí daaldeeʼ dóó yóó adahaaskaad; bekétłʼóól dóó bilátʼah tʼáá áheełtʼéegóó ádéíyósin ńtʼę́ę́ʼ, dabidziilígíí bikʼehgo.

74 Áádóó díígi átʼáo nidaashnish, tʼáá áwołí bee, dáʼákʼeh bee Bóhólníihii bibee hazʼáanii bikʼeh, dóó doo yáʼádaashóonii dáʼákʼehdóó chʼídahaaskaadjįʼ, dóó Diyin Bóhólníihii tʼáá bí choidoołį́į́łgo hastʼeʼyiilaa tʼáá níléídę́ę́ʼ tsin bineestʼąʼą́ą́ nidaasdlį́į́, dóó tʼááłáʼí daazlį́į, dóó neestʼąʼąą tʼáá ahidaałtʼé, áádóó dáʼákʼeh bee Bóhólníihii tʼáá bí choidoołį́į́łgo tʼáá níléídę́ę́ʼ tsin bineestʼąʼyę́ę hashtʼeʼyiilaa, éí tʼáá níléídę́ę́ʼ ayóó bił nilį́.

75 Áádóó baa hoolzhiizh dáʼákʼeh bee Bóhólníihii bineestʼąʼ yáʼátʼéehgo yiyiiłtsą, dóó bidáʼákʼeh kʼad doo yíchxǫ da, bá ndaalaʼí hágoʼ yidííniid, dóó ííłní: Áko shooh, díí tsʼídá akéédi shidáʼákʼeh baa ádahwiilyą́ą́d, áko hádaahsíídgóó tʼáá shinahatʼá bikʼehgo íʼííshłaa; tʼáá níléídę́ę́ʼ neestʼąʼą́ą hashtʼeishłaa, éí danizhóní, éí tʼáá ńilei dę́ę hahoolzhiizh dę́ę́giʼ átʼé. Áádóó nihikʼihojoosdlíídoo; háálá tʼáá áwołí bee shidaʼaʼkʼehgi shił nidashoołnish, dóó shibee hazʼáanii bikʼih dahonołʼį́, dóó tʼáá ńilei dę́ę neestʼąʼąą shaa nidashoojaaʼ, áko kʼad shidáʼákʼeh doo yíchxǫ́ da, dóó doo yáʼáshóonígíí chʼihééskaad, háálá shidaʼaʼkʼehgi neestʼanígíí biniinaa nihił dahóozhǫ́ǫ doo.

76 Háálá áko shooh, nizáágóó ahodoolzhish shidáʼákʼehdóó neestʼąʼ nooʼkʼeh hashchíín góneʼ hastʼeʼdeeshlííł naasdi choinéishį́į́ doo biniyé, éí tsxį́į́łgo baa hodoolzhish; dóó shidáʼákʼeh tsʼídá akéedi bininááshishnish, dóó bitsaoʼá náádeeshdah, dóó binaagóó náhódeeshgoł, dóó naaldlooshii bichaan bił nideeshjih; ákohgo tʼáá shí neestʼąʼ hastʼeʼdeeshlííł, nizáágóó ahodoolzhish, bee haasdzííyę́ę bikʼehgo.

77 Áádóó áajįʼ ahodoolzhish neestʼąʼ doo yáʼádaashónígíí shidáʼákʼehgi naah hasdlį́į́go, ákohgo índá yáʼátʼéehígíí dóó nichxǫígíí ahąʼ ádeeshlííł, dóó yáʼátʼéehígíí éiyá tʼáá shí doo, dóó nichxǫígíí éí bá hazʼą́ągóó chiʼhideeshkał. Áádóó áajįʼ nihodoolzhiish dóó áajįʼ ałtso doo; dóó shidáʼákʼeh kǫʼ bee adideeshkʼą́ą́ł.