1 Jacob dabizaadígíí, Nephi bitsilí nilíígo, Nephi bidineʼé yichʼįʼ yee yáałtiʼ, Nephi naadiilyáádóó bikʼijįʼ:

2 Kʼad, shikʼiské ayóó íinishʼníi, shí, Jacob, Diyin God bitsʼą́ą́dóó naanish sheilyáhígíí, yéego bee níshíshnish, nihibąąhági ádaatʼéii shiʼééʼ doo bąąh chingóó ádeishlííł, Diyin God bizaad bee nihichʼįʼ haadeesdzih biniyé dííjį́ diyin bighan góneʼ yah ííyá.

3 Áádóó tʼáá nihí nihił béédahózin shiʼdoolzįįhgo dasidahígíí yéego bee nishishnish, ndi nihiiʼ naazíinii bá yáʼátʼééh dooleełígíí tʼáá íyísíi nisin dóó baa shíneʼgo dah yiishhééłgo tʼáá niléí dę́ę́ʼ átʼéehę́ę́ʼgiʼ átʼáo dííjį́ʼ tʼah shíyoołkááł.

4 Háálá áko shooh, tʼahdii, Diyin Bóhólníihii bizaad bikʼeh dahonołʼį́, éí nihaa nilá.

5 Ákondi shooh, dashiinoołtsʼą́ą́ʼ, dóó nihił béédahózin nahasdzáán dóó yáʼąąsh Tʼáá Ałtsoní Áyilaií beʼdziił yee baa nitsídaahkeesígíí yee shił hoolneʼgo shikáʼaalwod, haitʼao bąąhági átʼéii bidadidoołnishígíí, éí bąąhágiʼ átʼéii tʼóó baahádzido woolchʼį́į́d shił nahalin, aooʼ, dóó éí Diyin God ayóó yoołchʼį́į́d.

6 Aooʼ, shiiʼ sizíinii yaa yínííł nilį́ dóó shiTaaʼ Áshiilaaígíí bidááhdóó baa yánísingo shąą nahóókaad, tʼáá ániigo nihił hashneʼ nihijéí biyiʼdi bąąhági ádanóhtʼé.

7 Áádóó ałdóʼ shiʼdiiłʼá saad tʼáá naʼníleʼdii bee nihichʼįʼ yáshtiʼ, niheʼasdzáán dóó nihaʼáłchíní binááł, éí ląʼída biyiʼ tʼahdii daditʼódí yeeʼ dóó daniłtʼólí dóó Diyin God bidááhdóó baa dahastiʼ, éí Diyin God tsʼídá bił yáʼátʼééh.

8 Áádóó Diyin God bizaad yilzhólígíí dadidíítsʼį́į́ł laanaa danízingo shaah haaskái, aooʼ, saad iiʼ sizį́ atílyai neiłdziihii.

9 Ákohgo, shiiʼ sizíinii nidaazgo bąąh niilyá, Diyin God saad ílínii yee shichʼį haadzíʼígíí biniinaa, ndaʼayosíʼígíí bee nihichʼįʼ haasdzííʼ, atídaadzaa yę́ę tʼóó yíwohdi bilóód ąą ádaadzaa, bilóód baa áháyą́ągo ndadoodzi yę́ę; dóó tʼáadoo ádadiiznihígíí, Diyin God bizaad yilzhólígíí dazhdidootsʼį́į́ł yę́ę biiʼ sizíinii béésh baaʼadahaasgeed dóó bintsáhakees baa dahastiʼ atíyiilaa nahalin.

10 Naanish nidaaz ádoolniłígíí, Diyin God bizaad yee shichʼįʼ haadzihígíí adééshlííł, dóó tsiʼnidaakaígíí dóó bąąhágiʼ ádaatʼínígíí bee nihichʼįʼ haasdziih, bijéí daniłtʼólígíí, dóó bijéí dasdiłígíí binááł, áádóó Diyin God Ayóóʼábóodziilii tʼáá áhanigo hakʼideezį́į́ʼ.

11 Ákohgo, Diyin God bizaad tʼáá aaníí átʼéego dóó tʼáá bééhózínígo bee nihił hashneʼ. Háálá áko shooh, Diyin Bóhólníihii nabídééłkidgo, kóníigo shichʼįʼ haadzííh, Jacob, yiską́ągo diyin bighandi díínááł, dóó saad bee nił hodeeshníhígíí diné bee bichʼįʼ hadíídzih.

12 Áádóó kʼad áko shooh, shikʼiské, díí saad bee nihichʼįʼ haasdzííʼ, tʼóó ahonohyóí béésh óola, dóó béésh łigaii dóó tʼáá ałtso béésh daílíínii hadánohtʼá, éí díí kéyah biyiʼ, éí kéyah ní dóó nihilastii bee nihił áhaʼdeetʼą́, éí áadi łą́ąʼgo dahólǫ́.

13 Áádóó Diyin nihikʼihoojisdłiʼ éí yaa bił hózhǫ́, tʼóó ahooyóí daʼílíínii shoodeesołtʼeʼ; dóó háálá łaʼ nihikʼéí bilááhgóó shoodaʼíísołtʼeʼgo nihijéí biyiʼdoo bee adaa deizínóhdłí dahsoolį́į́ʼ, áádóó nihikʼos daastłis dóó yádaʼnoołʼą́ ayóó daʼílíínígíí bee hadadinóhtʼé biniinaa, dóó nihikʼéí bee bichʼįʼ ndahoyołná háálá bilááhdi nidaʼídółtʼeʼ.

14 Áádóó kʼad, shikéí, daʼ Diyin Godísh díí yee niháhasʼą́ danosin? Áko shooh, ánihidishní, Dooda. Ákondi éí yee nihikʼijįʼ yisʼą́ą doo, áádóó tʼáá ákodaahtʼį́įgo tsxį́į́łgóó nihá nidahodiyootʼááł.

15 Dooládóʼ nihiníkááʼ góneʼ dídóoʼįįłgo nihił ííshją́ą́ íídoolííł, tʼáá łahídi nihikínighalgo łeezhtah góneʼé ánihidoolííł!

16 Dooládóʼ díí bąąhági ádaatʼéii dóó doo yaa ádaashoonii yitsánihidooísh nisin. Dóó, O dooládóʼ bibééhaazáanii deiyisinółtsʼą́ągo, díí nihijéí biyiʼ ádaa hodzódlí nihiiʼ naazíinii doo deidoołchxʼǫǫł da!

17 Tʼáá nihígi átʼáo nihíkʼéí baa nitsídaahkees, dóó tʼáá ałtso bichʼįʼ kʼé nohsin dóó nihinaalyéhé baodleeʼ, áko tʼáá nihigiʼ átʼáo daʼatʼį́į doo.

18 Ákondi ílíinii biká ánítʼį́įgo, éí tʼáá bítséedi Diyin God bił hazʼą́ biká anítʼį́į doo.

19 Áádóó Christ bichʼįʼ hojoobaʼ ííninzį́į́góó índa daʼílíinii ndidiilééł, tʼáá ákónééhii yáʼátʼéehii yiká adaatʼį́įgóó—tʼáá daalchʼíʼígíí ééshdoołtʼééł, dóó dichin danilinígíí bazhdoołtsoł, dóó dah daʼhídííyáhígíí bizhdoołnih, dóó bitah dahoneezgaiʼígíí dóó atíʼdaazaahígíí bíkáʼazhdoolwoł.

20 Áádóó kʼad, shikʼéí, ádaahoodzoodlí bee nihíchʼįʼ hasdzííʼ, dóó nihináágóó dabighangi átídaołaaʼígíí, dóó bichʼįʼ nidahiyoołná, háálá nihijéí biyiʼdę́ę́ adaadahoonihígíí biniinaa, Diyin God niheeníláhígíí, éí shą́ haitʼáó baa haadahidoozih?

21 Daʼ díí tʼáá áłtso atsʼiis haidiilaaígíí bąąhági ádaatʼéíi yoołchʼį́į́d ninízin? Dóó łaʼ diné tʼáá naaná łaʼ tʼáá íiyisíí bił nilinígiʼ átʼáo yiniłį́. Dóó tʼáá áłtso atsʼíís łeezh bitsʼą́ądę́ę́ʼ nilį́, dóó tʼáá ahédaałtʼéego ayiilaa, áko bibee hazʼáanii yikʼeh dahółʼį́į doo dóó hoolʼáágóó yaa daʼhaniih doo.

22 Áádóó kʼad díí ádaahodzódlí ałtso bee nihichʼįʼ háászíí dooleeł. Doo sohodoobéézhgóó ásdzihgo éí doo bee nihichʼįʼ haasdzííh da, éí nihiniinaa shijéí bił nihoozhǫǫh doo ńtʼę́ę́ʼ.

23 Ákondi Diyin God bizaad nidaazgo shąąh silá éí doo sohodoobéézhgóó daʼsohsihígíí biniinaa. Háálá áko shooh, Diyin Bóhólníihii kóní: Díí diné bąąhági ádaatʼéii yaa nídiikai; Diyin bizaad bee akʼedaʼashchínígíí doo yikʼidaʼdiitʼįįh da, dóó tʼáá átʼé ałhaaʼdilyé yaa naakaiígíí tʼóó yánahasʼą́, David dóó biyeʼ, Solomon baa náʼíísdzooígíí biniinaa.

24 Áko shooh, David dóó Solomon tʼáá aaníí tʼóó ahayói beʼasdzáá dóó łaʼ beʼnadaasdzáánígíí bee hólǫ́ǫ ńtʼę́ę́ʼ, éí baa naakaígíí éí doo tʼáá íiyisíí shil aaníi da, ní Diyin Bóhólníihii.

25 Ákohgo, Diyin Bóhólníihii kóní, díí diné Jerusalem kéyahdę́ę́ʼ chʼíníʼeezh, sheʼaziilii bee, áko Joseph bitsáádóó tsin bineestʼąʼ bitsʼáozʼáí diyinkʼehgo yikahígíí éí hadínéeséeł.

26 Ákohgo, Shí Bóhólníihii Diyin God díí diné ałkʼidą́ą́ʼ ádáátʼįįd yę́ę doo bee hoséłʼą́ą da.

27 Ákohgo, shikʼéí, dashíínółtsʼą́ą́ʼ, dóó Diyin Bóhóníihii bizaad deisinółtsʼą́ą́: Diné nihitʼah tʼáá łaʼígo beʼadzą́ą́ ayósin doo, doo éí tʼóó ahayóí beʼasdzáá hólóo da doo.

28 Háálá shí, Bóhólníihii Diyin God, asdzání bitsʼíís yidísinígíí aláahdi shił yáʼátʼééh. Dóó aaʼdilyé yaa naakaiígíí wooshchʼį́į́d, ní Diyin Tʼáá Ałtsoní bee Bóhólníihii.

29 Ákohgo, díí dineʼé shibee hazʼáanii deiidóhsin doo, ní Diyin Tʼáá Ałtsoní bee Bóhólníihii, éí doodago bikéyah hóyéego bá hádoodzih.

30 Hááłá, Diyin Tʼáá Ałtsoní bee Bóhólníihii ání, álástsiiʼ shichʼijoo dínéesééł, shidineʼé shikʼehgo ádaʼdoolííł; doodagóó éí díí deididootsʼį́į́łgo yedaʼdoolííł.

31 Háálá áko shooh, shí, Diyin Bóhólníihii, Jerusalemdi shidineʼé bitsiʼké yínííł danilíigo yiiłtsą́, dóó daachago sidétsʼą́ą́ʼ, aooʼ, tʼáá átʼé shidineʼé bikédaayahgóó, bahastiin bąąhági ádáátʼįįłgo dóó aláagǫ woolchʼį́į́d yaanaakaiígíí biniinaa.

32 Áádóó Diyin Tʼáá Ałtsoní bee Bóhólníihii ání, shidineʼé bitsiʼké daniłtólígíí sodadilzingo dachaa éí doo bee hoséłʼą́ą da, éí Jerusalemdę́ę́ʼ chʼíníʼeezh, shichʼí ndaʼookąąhgo sidétsʼą́ą́ éí shidineʼé bahastóí bikʼijįʼ siláa doo, ní Diyin Tʼáá Ałtsoní bee Bóhólníihii.

33 Háálá éí shidineʼé bitsiʼké daniłtólígíí doo deisnahda doo tʼahdii baa atʼéʼ adaadinígíí daditʼódígíí bininaa, tʼáá hazhoʼó tsʼídá bikʼeʼíyeʼígíí bikʼijįʼ kódéeshłííł, ńléí hodeeshchʼǫǫłjįʼ; áko aaʼdilyé doo yaanaakai da doo, ałkʼidą́ą́ʼ ádáátʼįįd yęęgiʼ átʼáó, ní Diyin Tʼáá Ałtsoní bee Bóhólníihii.

34 Áádóó kʼad áko shooh, shikʼiské, nihił béédahozin díí bee hazʼáanii nihizheʼé Lehi beyilyá, ákohgo, díí tʼáá ídą́ą́ nihił béédahozin ńtʼę́ę́ʼ; dóó ayóó átʼáo nihikʼijįʼ nidoodleeł; háálá díí adááhtʼį́į́dígíí doo ádadoołííł da ńtʼę́ę́ʼ.

35 Áko shooh, Laman dineʼé, nihikʼiské, bilaah átʼéego dahsoosih. Niheʼadzáá bijéí daditʼódiyę́ę dasołdił, dóó nihaʼáłchíní nihaʼdaʼólí yę́ę daołchxǫʼ, doo yáʼátʼéehii adałínígíí biniinaa, dóó bijéí daachaaígíí yáʼąąshgóó dadiitsʼaʼgo nihikʼíjí siláa doo. Dóó Diyin God bizaad bikʼeʼashchʼígíí biniinaa, éí nihikʼíjí siláa doo, tʼóó ahayóí bijéí dasdił, bijéí dóó bitsʼíís yéígo atíʼdaazaa.