1 Jacob dabizaadígíí, Nephi bitsilí nilíígo, Nephi bidineʼé yichʼįʼ yee yááłtiʼ, Nephi naadiilyáádóó bikʼijįʼ:

2 Kʼad, shikʼiské ayóó íinishʼníi, shí, Jacob, Diyin God bitsʼą́ą́dóó naanish sheílyáhígíí, yéego bee níshíshnish, nihibąąhági ádaatʼéii shiʼééʼ doo bąąh chingóó ádeishlííł, Diyin God bizaad bee nihichʼįʼ haadeesdzih biniyé díí jį́ diyin bighan góneʼ yah ííyá.

3 Áádóó tʼáá nihí nihił béédahózin shiʼdoolzįįhgo dah sidahígíí yéego bee nishishnish, ndi nihiiʼ naazíinii bá yáʼátʼééh dooleełígíí tʼáá íyísíi nisin dóó baa shíniʼgo dah yishxéełgo tʼáá níléídę́ę́ʼ átʼéhę́ę́gi átʼáo díí jį́ tʼah shíyoołkááł.

4 Háálá áko shooh, tʼahdii, Diyin Bóhólníihii bizaad bikʼeh dahonołʼį́, éí nihaa nilá.

5 Ákondi shooh, dashiinoołtsʼą́ą́ʼ, dóó nihił béédahózin nahasdzáán dóó yáʼąąsh Tʼáá Ałtsoní Áyiilaii beʼadziil yee baa nitsídaahkeesígíí yee shił hoolneʼgo shíkáʼaalwod, haitʼáó bąąhági átʼéii bidadidoołnishígíí, éí bąąhági átʼéii tʼóó bááhádzid doo woolchʼį́į́d shił nahalin, aooʼ, dóó éí Diyin God ayóó yoołchʼį́į́d.

6 Aooʼ, shiiʼ sizíinii yaa yínííł nilį́ dóó shiTaaʼ Áshiilaaígíí bidááhdóó baa yánísingo shąąh nahóókaad, tʼáá ániigo nihił hashneʼ nihijéí biyiʼdi bąąhági ádanóhtʼé.

7 Áádóó ałdóʼ shiʼdiiłʼá saad tʼáá naʼníleʼdii bee nihichʼįʼ yáshtiʼ, niheʼasdzáán dóó nihaʼáłchíní binááł, éí ląʼí da biyiʼ tʼahdii daditʼódí yeeʼ dóó daniłtʼólí dóó Diyin God bidááhdóó baa dahastiʼ, éí Diyin God tsʼídá bił yáʼátʼééh.

8 Áádóó Diyin God bizaad yilzhólígíí dadidiitsʼį́į́ł laanaa danízingo shaa haaskai, aooʼ, saad iiʼ sizį́ atílyaii néíłdziihii.

9 Ákohgo, shiiʼ sizíinii nidaazgo bąąh niilyá, Diyin God saad ílíinii yee shichʼį haadzíʼígíí biniinaa, ndaʼayosíʼígíí bee nihichʼįʼ haasdzííʼ, atídaadzaa yę́ę tʼóó yíwohdi bilóód ąą ádaadzaa, bilóód baa áháyą́ągo nídadoodzih yę́ę; dóó tʼáadoo ádadiiznihígíí, Diyin God bizaad yilzhólígíí dazhdidootsʼį́į́ł yę́ę biiʼ sizíinii béésh baaʼadahaasgeed dóó bintsáhakees baa dahastiʼ atíyiilaa nahalin.

10 Naanish nidaaz ádoolniłígíí, Diyin God bizaad yee shichʼįʼ haadzíʼígíí ádeeshłííł, dóó tsiʼnidaakaígíí dóó bąąhági ádaatʼínígíí bee nihichʼįʼ haasdziih, bijéí daniłtʼólígíí, dóó bijéí dasdiłígíí binááł, áádóó Diyin God Ayóó Ábóodziilii tʼáá áhanigo hakʼideezʼį́į́ʼ.

11 Ákohgo, Diyin God bizaad tʼáá aaníí átʼéego dóó tʼáá bééhózínígo bee nihił hashneʼ. Háálá áko shooh, Diyin Bóhólníihii nabídééłkidgo, kóníigo shichʼįʼ haadzííʼ, Jacob, yiską́ągo diyin bighandi díínááł, dóó saad bee nił hodeeshnihígíí diné bee bichʼįʼ hadíídzih.

12 Áádóó kʼad áko shooh, shikʼiské, díí saad bee nihichʼįʼ haasdzííʼ, tʼóó ahonohyóí béésh óola, dóó béésh łigaii dóó tʼáá ałtso béésh daʼílíinii hadanohtá, éí díí kéyah biyiʼ, éí kéyah ní dóó nihílástiiʼ bee nihił ahaʼdeetʼą́, éí áadi łą́ągo dahólǫ́.

13 Áádóó Diyin nihikʼihoojisdłiʼ éí yaa bił hózhǫ́, tʼóó ahayóí daʼílíinii shodeesołtʼeʼ; dóó háálá łaʼ nihikʼéí bilááhgóó shodaʼíísołtʼeʼgo nihijéí biyiʼdóó bee ádaa deidzinóhdlí dahsoolį́į́ʼ, áádóó nihikʼos daastłʼis dóó yadanoołʼą́ ayóó daʼílínígíí bee hadadinóhtʼé biniinaa, dóó nihikʼéí bee bichʼįʼ ndahoyołná háálá biláahdi nidaʼídółtʼeʼ.

14 Áádóó kʼad, shikʼéí, daʼ Diyin Godísh díí yee nihá hasʼą́ danosin? Áko shooh, ánihidishní, Dooda. Ákondi éí yee nihikʼijįʼ yisʼą́ą doo, áádóó tʼáá ákódaahtʼį́įgo tsxį́į́łgóó nihá nidahodiyootʼááł.

15 Dooládóʼ nihiníkááʼ góneʼ dídóoʼįįłgo nihił ííshją́ą́ íidoolííł, tʼáá łahídi nihikʼíníghalgo łeezhtah góneʼé ánihidoolííł!

16 Dooládóʼ díí bąąhági ádaatʼéii dóó doo yaa ádaashoonii yitsánihidooʼish nisin. Dóó, O dooládóʼ bibee hazʼáanii deiyíísinółtsʼą́ągo, díí nihijéí biyiʼ ádaa hodzódlí nihiiʼ naazíinii doo deidoołchxʼǫǫł da!

17 Tʼáá nihígi átʼáo nihíkʼéí baa nitsídaahkees, dóó tʼáá ałtso bichʼįʼ kʼé nohsin dóó nihinaalyéhé baa wohdleeʼ, áko tʼáá nihigi átʼáo daʼatʼį́į doo.

18 Ákondi ílíinii bíká ánítʼį́įgo, éí tʼáá bítséedi Diyin God bił hazʼą́ bíká ánítʼį́į doo.

19 Áádóó Christ bichʼįʼ hojoobaʼ íininzį́įʼgo índa daʼílíinii ndidiilééł, tʼáá ákónééhii yáʼátʼéehii yíká ádaatʼį́įgóó—tʼáá daalchíʼígíí ééshdoołtééł, dóó dichin danilínígíí baʼjidołtsoł, dóó dahidiiyáhígíí biʼjidoołnih, dóó bitah dahoneezgaiʼígíí dóó atídaadzaaʼígíí bíkáʼazhdoolwoł.

20 Áádóó kʼad, shikʼéí, ádaa hodzódlí bee nihichʼįʼ haasdzííʼ, dóó nihináágóó dabighangi átídaołaaʼígíí, dóó bichʼįʼ nidahoyoołná, háálá nihijéí biyiʼdę́ę́ʼ ádaa dahohniihígíí biniinaa, Diyin God nihainíláhígíí, éí shąʼ haitʼáó baa haadahidoohdzih?

21 Daʼ díí tʼáá ałtso atsʼíís haidiilaaígíí bąąhági ádaatʼéii yoołchʼį́į́d nínízin? Dóó łaʼ diné tʼáá nááná łaʼ tʼáá íiyisíí bił nilínígi átʼáo yiníłʼį́. Dóó tʼáá ałtso atsʼíís łeezh bitsʼą́ądę́ę́ʼ nilį́, dóó tʼáá ahédaałtʼéego áyiilaa, áko bibee hazʼáanii yikʼeh dahółʼį́į doo dóó hoolʼáágóó yaa dahaniih doo.

22 Áádóó kʼad díí ádaahodzódlí ałtso bee nihichʼįʼ háásdzííʼ dooleeł. Doo sohodoobéézhgóó ásdzihgo éí doo bee nihichʼįʼ haasdziih da, éí nihiniinaa shijéí bił nihoozhǫǫh doo ńtʼę́ę́ʼ.

23 Ákondi Diyin God bizaad nidaazgo shąąh silá éí doo sohodoobéézhgóó daʼsoosihígíí biniinaa. Háálá áko shooh, Diyin Bóhólníihii kóní: Díí diné bąąhági ádaatʼéii yaa nídiikai; Diyin bizaad bee akʼedaʼashchínígíí doo yikʼidaʼdiitįįh da, dóó tʼáá átʼé ałhaaʼdilyé yaa naakaiígíí tʼóó yánahasʼą́, David dóó biyeʼ, Solomon baa náʼíísdzooígíí biniinaa.

24 Áko shooh, David dóó Solomon tʼáá aaníí tʼóó ahayóí beʼasdzáá dóó łaʼ beʼnadaasdzáánígíí bee hólǫ́ǫ ńtʼę́ę́ʼ, éí baa naahkaiígíí éí doo tʼáá íiyisíí shił aaníi da, ní Diyin Bóhólníihii.

25 Ákohgo, Diyin Bóhólníihii kóní, díí diné Jerusalem kéyahdę́ę́ʼ chʼíníʼeezh, sheʼadziilii bee, áko Joseph bitsʼą́ą́dóó tsin bineestʼąʼ bitsʼáozʼáí diyinkʼehgo yikahígíí éí hadínéesééł.

26 Ákohgo, Shí Bóhólníihii Diyin God díí diné ałkʼidą́ą́ʼ ádáátʼįįd yę́ę doo bee hoséłʼą́ą da.

27 Ákohgo, shikʼéí, dashíínółtsʼą́ą́ʼ, dóó Diyin Bóhólníihii bizaad deisinółtsʼą́ą́: Diné nihitah tʼááłáʼígo beʼadzą́ą́ áyósin doo, doo éí tʼóó ahayóí beʼasdzáá hólǫ́ǫ da doo.

28 Háálá shí, Bóhólníihii Diyin God, asdzání bitsʼíís yidísinígíí aláahdi shił yáʼátʼééh. Dóó aaʼdilyé yaa naakaiígíí wooshchʼį́į́d, ní Diyin Tʼáá Ałtsoní bee Bóhólníihii.

29 Ákohgo, díí dineʼé shibee hazʼáanii deiidóhsin doo, ní Diyin Tʼáá Ałtsoní bee Bóhólníihii, éí doodago bikéyah hóyéeʼgo bá háʼdoodzih.

30 Hááłá, Diyin Tʼáá Ałtsoní bee Bóhólníihii ání, álástsiiʼ shichʼįʼjigo dínéesééł, shidineʼé shikʼehgo ádaʼdoolííł; éí doodago éí díí deididootsʼį́įłgo yedaʼdoolííł.

31 Háálá áko shooh, shí, Diyin Bóhólníihii, Jerusalemdi shidineʼé bitsiʼké yínííł danilį́įgo yiiłtsą́, dóó daachago sidétsʼą́ą́ʼ, aooʼ, tʼáá átʼé shidineʼé bikédaayahgóó, bahastiin bąąhági ádáátʼįįłgo dóó aláahgo woolchʼį́į́d yaa naakaiígíí biniinaa.

32 Áádóó Diyin Tʼáá Ałtsoní bee Bóhólníihii ání, shidineʼé bitsiʼké daniłtólígíí sodadilzingo dachaa éí doo bee hoséłʼą́ą da, éí Jerusalemdę́ę́ʼ chʼíníʼeezh, shichʼí ndaʼookąąhgo sidétsʼą́ą́ éí shidineʼé bahastóí bikʼijįʼ siláa doo, ní Diyin Tʼáá Ałtsoní bee Bóhólníihii.

33 Háálá éí shidineʼé bitsiʼké daniłtólígíí doo deisnah da doo tʼahdii baa átʼéʼ ádaadinígíí daditʼódígíí biniinaa, tʼáá hazhóʼó tsʼídá bikʼeʼíyeʼígíí bikʼijįʼ kódéeshłííł, ńléí hodeeshchǫǫłjįʼ; áko aaʼdilyé doo yaa naakai da doo, ałkʼidą́ą́ʼ ádáátʼįįd yę́ęgi átʼáo, ní Diyin Tʼáá Ałtsoní bee Bóhólníihii.

34 Áádóó kʼad áko shooh, shikʼiské, nihił béédahózin díí bee hazʼáanii nihizhéʼé Lehi beyilyá, ákohgo, díí tʼáá ídą́ą́ nihił béédahózin ńtʼę́ę́ʼ; dóó ayóó átʼáo nihikʼijįʼ nidoodleeł; háálá díí adááhtʼį́į́dígíí doo ádadoołííł da ńtʼę́ę́ʼ.

35 Áko shooh, Laman dineʼé, nihikʼiské, bilááh átʼéego dahsoosih. Niheʼadzáá bijéí daditʼódiyę́ę dasołdił, dóó nihaʼáłchíní nihaʼdaʼólí yę́ę daołchxǫʼ, doo yáʼátʼéehii ádaałʼínígíí biniinaa, dóó bijéí daachaaígíí yáʼąąshgóó dadiitsʼaʼgo nihikʼíjí siláa doo. Dóó Diyin God bizaad bikʼeʼashchʼígíí biniinaa, éí nihikʼíjí siláa doo, tʼóó ahayóí bijéí dasdił, bijéí dóó bitsʼíís yéego atídaadzaa.